1, 2. Kwitutalatala kwitala Yehoba kwapusana byepi na bingila makamela a mu mikwakwa?

MU BYALO byavula, kafulumende wingijisha makamela kumona bibena kwenda myotoka mu mikwakwa ne kukopa inge kwamweka mapuso. Ano makamela akopa ne badalaivwa banyema inge bapunka muntu. Kabiji byo akopa bikwasha kafulumende kwibakwata. Na mambo a ano makamela, kyapela bingi bambanzhi kwibakwata inge balenga mambo.

² Baibolo wamba’mba: “Meso a Yehoba aji konse konse.” (Mana 15:3) Nanchi kino kibena kulumbulula’mba, Yehoba meso anji aji konse konse na kumona balala mizhilo nyi? Abya upembelatu kwitukambula inge twauba bilubo nyi? Ine. (Yele. 16:17; Hebe. 4:13) Yehoba utalatala mambo witutemwa kabiji ukeba kwituzhijila kuba’mba twikalenga na lusekelo.—1 Pe. 3:12.

3. Tusakwisamba pa ñanyi bintu bitanu mwitulamina Yehoba?

³ Ki ka kyakonsha kwitulengela kuyuka kuba’mba Lesa witutalatala mambo witutemwa? Twayai twisambe pa byo oba bino. Uba bino (1) kupichila mu kwitujimunako inge twatendeka kwikala na miteeto yatama, (2) kupichila mu kwitololako inge twatamisha, (3) kupichila mu kwitutangijila na mafunde a mu Baibolo, (4) kupichila mu kwitukwasha inge tuji  mu bya malwa, ne (5) kupichila mu kwitupesha inge wamona byawama mwi atweba.

4. Mambo ka Yehoba o ajimwijileko Kaina saka akyangye kulenga mambo?

⁴ Patanshi twayai twisambe pa bitujimunako Lesa inge twatendeka kwikala na miteeto yatama. (1 Moba 28:9) Pa kuba’mba tuyuke byo oba bino pa kwitulama, twayai tumone byo aubile kimye Kaina kyo ajinga na “bukaji bukatampe,” byo abujile kutalwa bulongo kwi Lesa. (Tangai Ntendekelo 4:3-7.) Yehoba wajimwineko Kaina kuba’mba usakulenga mambo umvwe abule kwaluluka ne kutendeka kuba byawama. Kyajinga nobe ‘bubi bwamubelamina ku kibelo.’ Lesa wamwipwizhe’mba, “Pakuba obewa wafwainwa kwibushinda” nyi? Lesa wakebelenga Kaina kumvwina lujimuno lwanji pa kuba’mba ‘etabilwe’ kwi aye. Inge Kaina wakokejile byo bamujimwineko kwi Lesa, inge waikele na bulunda bwawama ne aye.

5. Mu ñanyi mashinda Yehoba mo etujimwinako pa miteeto yatama yo twakonsha kwikala nayo?

⁵ Nga mu ano moba kiji byepi? Meso a Yehoba amona biji mu muchima wetu. Kechi twakonsha kufya miteeto ne biji mu muchima wetu bitulengela kuba bintu bimo ne. Lesa witutemwa ukeba’mba twendenga mu mashinda a bololoke. Bino kechi witukanjikizha kuleka byo tuba ne. Kupichila mu Mambo anji, Baibolo, witujimunako inge ketube bintu biketulengala kulenga mambo. Uba byepi bino. Pa kutanga Baibolo pa juba pa juba, twakonsha kutanapo kishinka kyakonsha kwitukwasha kushinda miteeto yatama. Kabiji mabuku etu a bwina Kilishitu nao etulengela kuyuka bya kupwisha lukatazho. Pa kupwila kwa kipwilo napo tutambwila lujimuno lwa pa kimye kyafwainwa.

6, 7. (a) Ñanyi bintu bitunengezhezha Yehoba bimwesha kuba’mba wimuta bingi muchima? (b) Mumwenamo ka mu kwimuta muchima kwa kwa Yehoba?

⁶ Lujimuno lonse luji mu Baibolo lumwesha bitutemwa Yehoba ne byo etuta muchima pa muntu pa muntu. Kya kine, Baibolo, mabuku anengezha jibumba ja Lesa ne lujimuno lo tumvwa pa kupwila lwakwasha bantu bavula bingi. Nangwa byonkabyo, Yehoba wimusashijila kupichila mu ano mashinda kuba’mba mutengako muchima ku Mambo anji akonsha kwimukwasha kuwamisha muchima wenu. Kino kimwesha Yehoba byo emutemwa.

⁷ Pa kuba’mba tumwenemo mu bitujimunako Lesa, patanshi twafwainwa kuyuka kuba’mba wituta bingi muchima. Ne kukokela lujimuno lwa mu Mambo anji, ne kwibikishako kushinda milanguluko yatama ifichisha Lesa ku muchima. (Tangai Isaya 55:6, 7.) Inge twaumvwina luno lujimuno tukefumya mu makatazho avula. Pano kyakonsha kwikala byepi inge twatwajijila na muteeto watama? Shetu witutemwa wakonsha kwitukwasha byepi?

8, 9. Lujimuno lwa kwa Yehoba lo apana kupichila mu bakalume banji lumwesha byepi byo etuta muchima? Ambai kyamwekele.

⁸ Kwitololako kwi Yehoba kwitulengela kuyuka kuba’mba wituta bingi muchima. (Tangai Bahebelu 12:5, 6.) Kya kine kuba’mba kechi tumvwa bulongo pa kwitufundako nangwa kwitujimunako ne. (Hebe. 12:11) Bino akilangulukai pa bilangulukapo ubena kwitujimunako. Wafwainwa kuyuka byo tubena kuba byakonsha konauna bulunda bwetu ne Yehoba Lesa. Kabiji wafwainwa kulanguluka ne pa byo tusakwiumvwa. Kabiji umonapo ne kimye kya kunengezha bya kwitukwasha  kwingijisha Baibolo pa kuba’mba tumone byo twafwainwa kupimpula bwikalo bwetu pa kuba’mba butokeshenga Lesa ku muchima.

⁹ Kya kumwenako, mulongo umo wajinga na muteeto wa kutamba bya mulekese saka akyangye kufunda bukine. Byo afunjile bukine, walekele uno muteeto. Pano bino mu muchima wakijinga na mujojo wa kukeba kuba bino. Byo apotele foni, watendekele jikwabo uno muteeto wanji watama wa kutamba byamulekese pa intaneti. (Yako. 1:14, 15) Watambanga bya mulekese pa uno foni wanji. Juba jimo, byo basapwijilenga kwingijisha mafoni, wapeleko mukulumpe mu kipwilo foni wanji. Pa foni paishile misabilo mutanwa byamulekese. Ponkapotu mukulumpe mu kipwilo wafunjileko uno mulongo. Uno mulongo waumvwijile luno lujimuno, ne kuleka kikupu muteeto wanji wakutamba byamulekese. Tumusanchila bingi Shetu wa mwiulu umona ne mambo otulenga mu bufyamfya ne kwitukwasha pa kuba’mba tubule kutwajijila.

10, 11. (a) Tumwesha byepi ku­ba’mba tukeba Lesa kwitutangijila? (b) Kisemi kimo kimwenejile byepi buneme bwa kulondela lutangijilo lwa Yehoba?

¹⁰ Nyimbi wa masalamo waimbile kwi Yehoba amba: “Mukantangijilanga na mana enu.” (Sala. 73:24) Inge ke tukebe lutangijilo, twafwainwa ‘kuvulukanga’ Yehoba kupichila mu kutanga Mambo anji ne kumona byo abena kulanguluka pa byo byo bintu. Kulondela mafunde a mu Baibolo kwitulengela kwikala na bulunda bwawama ne Lesa, kabiji kimye kimo kwitukwasha ne kumona mwakumwena bya mu bwikalo.—Mana 3:6.

¹¹ Kya kumwenako, njimi umo ne bakazhi banji, ne baana banji bavula baikalanga ku mpunzha ya mitumba ko basonkelanga fwamu mu kyalo kya Philippines. Aye ne benakwanji baingilanga mwingilo wa bupainiya. Juba jimo bakuminye bingi mwina fwamu byo ebatumijile nkalata ya kwibabula’mba bafwainwa kufumapo pa fwamu. Mambo ka? Bebabepejile’mba boba bintu kwakubula bukishinka. Nangwa kya kuba uno mulongo walangulukilenga ko basakuya na kwikala na kisemi kyanji, waambile’mba: “Yehoba usakwitumwena. Ye witulama kimye kyonse nangwa bintu byakatazha byepi.” Uno mulongo waketekejile mwi Yehoba. Panyuma ya kupitapo moba  bebabujile’mba kechi basakufumapo pa fwamu ne. Ki ka kyalengejile? Mwina fwamu wamwene byubilo byabo byawama. Kino kisemi kya Bakamonyi balondela mafunde a mu Baibolo batwajijile kumwesha mushingi ne kwikala bamutende nangwa kya kuba bebabepejile. Mwina fwamu waumvwine bingi bulongo pa kumona bino, kya kuba wibachibijileko ne mpunzha ikwabo kuba’mba bajimengamo. (Tangai 1 Petelo 2:12.) Kya kine, Yehoba witutangijila kupichila mu Mambo anji ne kwitukwasha kuyuka bya kuba mu bimye bya makatazho.

12, 13. Ñanyi bintu byakonsha kwimulengela kutendeka kulanguluka’mba Lesa kechi umona byo mbena kuyanda ne?

¹² Kimye kimo meseko nangwa makatazho kechi apwa bukiji ne. Nabiji kumanama na kikola kibula kupwa, kumanyikwa ku ba mu kisemi, nangwa kwitumanyika ku balwanyi. Kabiji kintu kimo kikatazha bingi kuchinchika ke kwikatazha na mukwetu wa mu kipwilo.

¹³ Kya kumwenako, byambo byatama bimwambila wa mu kipwilo byakonsha kwimukozha bingi ku muchima. Mwakonsha kwamba’mba: “Kuñambila byatama bibye mu jibumba ja Lesa.” Kikatakata inge ao mulongo uba byo byo babena kumupa mingilo yavula mu kipwilo kabiji bantu bavula bamuketekela bingi. Mwakonsha kutendeka kulanguluka’mba: ‘Pano kyaikala byepi bibye? Nanchi kine Yehoba umona byo oba nyi? Nanchi kine ukamubapo kimo?’—Sala. 13:1, 2; Ha. 1:2, 3.

14. Ñanyi kishinka kimo kyakonsha kulengela Lesa kuswisha balongo betu ba bwina Kilishitu kwitufundako kyakosa?

¹⁴ Yehoba wakonsha kwikala na bishinka byakonsha kumulengela kubula kubapo kimo. Kya kumwenako, mwakonsha kulanguluka’mba mukwenu ye watamisha, pano bino Lesa wakonsha kwibimwena mungi. Kwi aye kimo kimye yenu mwatamisha. Byambo byakonsha kwimukozha ku muchima, byakonsha kwikala bya kwimufundako pa kintu kyo mwafwainwa kulangulukapo bulongo. Mu jishimikila ja bwikalo ja Mulongo Karl Klein wajinga wa mu Jibumba Jitangijila waambapo pa kimye Mulongo J. F. Rutherford kyo amusanzhilemo. Pa kupitapo kimye Mulongo Rutherford waimwine Mulongo Klein na lusekelo amba, “Byepi ba Karl!” Bino Mulongo Klein kumuchima wakikolelenga pabyo amwambijile, onkao mambo, wakumbwiletu kya na mukose mukose. Mulongo Rutherford byo amwene kuba’mba Mulongo Klein wanzhingila, wamujimwineko kuba’mba Daibolo usakumushukilwa. Pa kupitapo moba, Mulongo Klein wanembele’mba: “Inge twazhingijila mulongo kikatataka inge witukwasha, twikala mu kizumba kya kufwa mu bitewa bya kwa Daibola.” *

15. Ñanyi kintu kyo twafwainwa kuvulukanga pa kuba’mba tupembelelenga saka twatekanya Yehoba kwitukwasha mu bimye byakatazha?

¹⁵ Tukeba bya malwa nangwa makatazho kupwa bukiji. Bino kyanema bingi kutekanya. Inge mubena kwendesha motoka pano mwafika po yavula kyakuba ibena kwenda pachepache, kabiji kechi mwayuka ne kimye kyo musakufika ko mubena kuya ne. Inge mwazhingila ne kukeba jishinda jikwabo, mwakonsha kulubilamo ne kutaya kimye kyabaya kukila inge mwaji kutekanya ne kupembela. Kyo kimotu, inge ke tulondela mafunde a mu Baibolo, Yehoba uketukwasha kuchinchika.

16. Mambo ka Yehoba kimye kimo o aswishisha kuba’mba tupite mu makatazho?

¹⁶ Yehoba wakonsha kuleka bimye byakatazha kutwajijila kuba’mba tufunjileko  kimo. (Tangai 1 Petelo 5:6-10.) Lesa kechi ye uleta makatazho ne. (Yako. 1:13) “Mulwanyi wenu aye Diabola” ye uleta bya malwa. Bino Lesa wakonsha kuswisha lukatazho kuba’mba lwimulengele kukosesha bulunda bwenu ne aye. Lesa umona byo tuyanda, kabiji ‘wituta bingi muchima,’ onkao mambo, kwashalatu “kakimye kacheche” kuba’mba afumyepo makatazho onse. Nanchi mumusanchila Yehoba pa byo emuta muchima mu bimye bya meseko ne kushiinwa kuba’mba usakwimumwena jishinda ja kufuminamo nyi?—2 Ko. 4:7-9.

17. Mambo ka Yehoba o atajilatajila mu michima ya bantu bonse?

¹⁷ Kyapelako, Lesa umona byonse byo tuba mu bwikalo bwetu na mulanguluko wawama bingi. Kupichila mwi ngauzhi Hanani, Lesa waambijile Mfumu Asa amba: “Meso a Yehoba apitañana pano pa ntanda ponse amba: Nebamweshe bulume bwami abo banketekela na muchima yensetu.” (2 Moba 16:9) Yehoba ‘ukemumwesha bulume bwanji’ inge mwatwajijila kuba byaoloka.

18. Mambo ka o twafwainwa kushiinwa kuba’mba Yehoba uketupesha inge ketube byawama? (Monai kipikichala kitanshi.)

¹⁸ Lesa ukeba atweba ‘kukeba byawama,’ ne ‘kutemwa byawama’ ne ‘kuba byawama’ pa kuba’mba ‘aketubile lusa.’ (Amo. 5:14, 15; 1 Pe. 3:11, 12) Yehoba ulama baoloka ne kwibapesha. (Sala. 34:15) Akilangulukai pa banabakazhi Bahebelu bapapishanga, ba Shifula ne Puwa. Bena Isalela byo bajinga mu buzha mu Ijipita, bano banabakazhi babiji bachinanga Lesa kukila Felo wibakambizhe kwipaya baana babalume pakupapisha banabakazhi Bahebelu. Kyamweka jiwi ja mu muchima ja bano banakazhi bakamwanga Lesa jibalengejile kupulusha baana babalume basemanga Bahebelu. Shifula ne Puwa mu kuya kwa moba, Lesa wibapele baana. (Lupu. 1:15-17, 20, 21) Yehoba wamwene byubilo byabo byawama. Kimye kimo twakonsha kumonanga nobe kafwako umona bintu byawama byo tuba ne. Bino Yehoba umona bintu byawama byonse byo tuba kabiji uketupesha.—Mat. 6:4, 6; 1 Timo. 5:25; Hebe. 6:10.

19. Nyenga umo wayukile byepi kuba’mba Yehoba umona byawama byo tuba?

¹⁹ Nyenga umo mu kyalo kya Austria washiinwe kuba’mba Lesa umona kwibikako kwanji. Uno nyenga watambwile keyala ya mwanamukazhi wamba mulaka wa ku Hungary mambo naye mwina Hungary. Wayile pa nzubo ya uno mwanamukazhi, pa bino kechi watainepo muntu ne. Wabweleleko bimye byavula bingi kwakubula kutapo bantu ne. Pa bimye bimo wayukanga kuba’mba pa nzubo paji bantu, bino kafwako wakumbulanga ne. Nangwa byonkabyo, washanga mabuku ne makalata ne nambala ya foni. Byo papichile mwaka umo ne kichika, wabweleleko jikwabo bimye byavula ku nzubo ya uno mwanamukazhi. Juba jimo uno mwanamukazhi washinkwileko. Wamutambwijile na lusekelo amba: “Batwele mwane, natanganga mabuku onse o mwashanga, kabiji nemupembejilenga. Uno mwanamukazhi watomenenga muchi wa kansa kabiji kechi wakebanga kwisamba na bantu ne. Nyenga watendekele kumufunjisha Baibolo. Kwambatu kine, Lesa wapesheshe uno nyenga pa kwibikako kwanji.

20. Mwiumvwa byepi pa bimulama Yehoba?

²⁰ Yehoba umona byonse byo muba kabiji ukemufweta. Inge mwavuluka’mba Lesa ubena kwimutala, kange mulangulukenga’mba ubena kukebakeba tubilubo byonka bingila makamela o babika mu mikwakwa ne. Pakuba mwafwainwa kwiumvwanga kufwenya kwipi ne Lesa wimuta bingi muchima.