1, 2. Ñanyi makatazho ekala na baya na kwingijila mu kyalo kingi inge babwela ku nzubo kwabo? (Monai kipikichala kitanshi.)

BA EDUARDO * baambile’mba: “Naingilanga nkito yawama bingi mu kyalo kingi, kabiji nafolanga mali avula bingi. Pano byo natendekele kufunda Baibolo na Bakamonyi ba kwa Yehoba, naishile kuyuka kuba’mba nji na mwingilo wanema bingi wa kukwasha kisemi kyami kwikala na bulunda bwawama ne Lesa, kechi kwibamwenatu bya mu bwikalo ne. Onkao mambo, nafuukwilepo kubwela ku nzubo.”—Efi. 6:4.

² Ba Eduardo bayukile kuba’mba kubwela kuji kisemi kyabo kukatokesha Yehoba ku muchima. Byonka byaubile ba Marilyn bo twisambilepo mu mutwe wafumako, ne ba Eduardo nabo batendekele kuwamisha jikwabo bulunda bwabo na ba mu kisemi kyabo. Kabiji kechi kyapelele kumwena bya mu bwikalo bakazhi babo ne baana ku mpunzha kwakatazha mwakumwena ne. Pano bamwenanga mu ka? Balongo ne banyenga mu kipwilo bakonsha kwibakwasha byepi?

3. Baana bekala byepi inge bansemi babo bafumapo?

³ Ba Eduardo baambile’mba: “Nayuka kuba’mba nalekelejile baana bami pa kimye kyo bakebelenga bingi kwibatangijila ne kwibamwesha  butemwe. Kechi najinga nabo pa kuba’mba nebatangilenga mashimikila a mu Baibolo, kulombela nabo pamo, kwibakumbata, ne kukaya nabo ne.” (Mpitu. 6:7) Mwanabo wamukazhi mukulumpe aye Anna uvuluka’mba: “Neumvwanga kubula kuzhikijilwa kwikala pa nzubo pabula batata. Byo babwelele, twayukiletu byo bamwekanga pa meso ne jiwi jabo. Kechi nakasulukile byo bankumbachilemo ne.”

4. Mambo ka o kikatezha nsemi wamulume kutangijila bulongo kisemi kyanji inge wikala kwalepa?

⁴ Kabiji nsemi wamulume inge wafumapo kimulengela kubula kwingila bulongo mwingilo wanji wa kutangijila kisemi. Ba Ruby ba muka Eduardo baambile’mba: “Naingilanga mingilo yafwainwa bantu babiji, ingila nsemi wamukazhi ne wamulume, kabiji napijilwe kufuukula bintu byonse bya mu kisemi. Ba Eduardo byo babwelele pa nzubo, popo nayukile kunekenena kwa bwina Kilishitu byo kulumbulula. Nangwatu luno bimye bimo ndubamo kuba’mba bamwatawami po baji.” (Efi. 5:22, 23) Ba Eduardo banungilepo amba: “Baana bami babakazhi bapijilwe kuya na kulomba luusa ku bainabo. Atweba bansemi twaishile kuyuka kuba’mba twafwainwa kukwatankana ne kwikala bakumwenako ku baana betu, kabiji popo nafuunjile kutangijila kisemi mu jishinda ja bwina Kilishitu.”

5. Nsemi wamulume umo wawamishe byepi bulunda bwanji na kisemi kyanji bo aonawine byo afuminepo, kabiji ki ka kyafuminemo?

⁵ Ba Eduardo bebikileko kuwamisha bulunda na ba mu kisemi kyabo ne kwibakwasha kwikala na bulunda bwawama na Lesa. Baambile’mba: “Najinga na mwingilo wa kufunjisha bukine baana bami mu byambo ne mu byubilo. Kechi kwambatu amba natemwa Yehoba ne, bino ne kumwesha kino mu byo nguba. (1 Yoa. 3:18) Nanchi Yehoba wibapesheshe ba Eduardo pa byo baubile byamwesheshe lwitabilo mwi aye nyi? Mwanabo Anna waambile’mba: “Twatendekele kwibakasulukila jikwabo byo twamwene byo bebikilengako kwikala nsemi wawama, kabiji mwafumine byawama bingi. Kabiji byo twamwene batendeka kukanamina mingilo mu kipwilo, twaumvwine bingi bulongo. Ino ntanda yakebelenga kwitufumya kwi Yehoba. Bino twamwene bansemi betu byo batele muchima pa bukine, onkao mambo, ne atweba twatendekele kuba byo baubanga. Batata baambile amba kechi baketushapo jikwabo ne, kabiji kechi betushilepo jikwabo ne. Inge batata betushile jikwabo, kampe luno inge kechi nji mu jibumba ja Yehoba ne.”

6. Ñanyi kintu kyafunjile bansemi bamo mu kimye kya nkondo?

⁶ Mashimikila amo aamba’mba kimye kyajingako nkondo mu Balkans, baana ba Bakamonyi ba kwa Yehoba bajinga bingi na lusekelo nangwa kya kuba bwikalo bwakatezhe. Mambo ka? Mambo bansemi bayanga ku makito baikelenga pa nzubo na kufunjila pamo na baana babo, kukayila nabo pamo ne kwisamba nabo. Twakonsha kufunjilako ka? Kintu kyanema ku baana ke kwikala pamo na bansemi babo kechi kwibapa mali nangwa bya bupe ne. Kya kine, byonkatu byaamba Mambo a Lesa, baana bamwenamo bingi inge bansemi bebata muchima ne kwibafunjisha.—Mana 22:6.

7, 8. (a) Ñanyi kilubo kyuba bansemi bamo inge babwela? (b) Bansemi bakonsha kukwasha byepi baana babo kuleka kwibatala bibi?

⁷ Kyatamakotu ke kya kuba’mba bansemi bavula pa kubwela pa nzubo baana babo bebatala bibi. Bansemi bakonsha kwambila baana babo amba: “Anweba baana musantenga, nemubila bintu byavula bingi.” Nangwa byonkabyo, javula kilengela baana kuba bino ke kufumapo kwa bansemi. Pano bansemi bakonsha kuba byepi inge kyaikala bino?

⁸ Lombai kwi Yehoba kuba’mba emukwashe kuyuka kyo babena kubila byobyo. Kabiji pa kwisamba na ba mu kisemi kyenu, swai kuba’mba ne anweba kyomwaubile kibalengela kuba’mba bemutalenga bibi. Kulomba kwimulekelako mambo kufuma panshi ya muchima kwakonsha kwibakwasha. Inge benakwenu ne baana benu bamona byo mubena kwibikako kuba bintu byawama, bakayuka kuba’mba mwi bakishinka.  Kwibikako ne kwibatekenya kukalengela kisemi kyenu kutendeka kwimutemwa ne kwimupa mushingi.

9. Mambo ka o twafwainwa kusekela mu byonka byo tuji nabyo?

⁹ Mutumwa Paulo waambile’mba, bena Kilishitu bakikulumpe inge kebakankalwe kumona mwakwikela, baana babo ne bankana babo bafwainwa “kwibabwezhezha byawama bansemi babo ne bankambo yabo.” Bino Paulo watundaikile bena Kilishitu bonse kusekela mu bintu byonka byo baji nabyo, ko kuba’mba kajo, bivwalo ne mwakulaala. Kechi twafwainwa kukoyokanga na kukeba bwikalo bwa ntentente nangwa na kukeba mali a kukekwashishamo kulutwe na lwendo ne. (Tangai 1 Timoti 5:4, 8; 6:6-10.) Pa ‘kukebela bintu ba mu nzubo yanji,’ mwina Kilishitu kechi wafwainwa kukebeshanga bunonshi bwa mu ino ntanda ibena kupita ne. (1 Yoa. 2:15-17) Kange tongolwe na “bulume bwa bujimbijimbi bwa bunonshi,” nangwa kuleka “bya kutabataba bya buno bwikalo” kulengela kisemi kyetu kubula ‘kukwachisha ku bumi bwa kine kine’ bwa mu ntanda ipya ya Lesa ya bololoke ne.—Mako 4:19; Luka 21:34-36; 1 Timo. 6:19.

10. Mambo ka o twafwainwa kuchinuzhukila kongolwa?

¹⁰ Yehoba wayuka kuba’mba tukeba mali. Bino mali kechi akonsha kwituzhikijila byonka bituzhikijila maana afuma kwi Lesa ne. (Sapwi. 7:12; Luka 12:15) Javula bantu balubako kuba’mba bwikalo ku bushiya bwa tulunga nako bwakatazha, kabiji kechi kilumbulula’mba muntu yense wayako ukanonka ne. Kwambatu kine, kuya ku kyalo kingi muji bizumba byavula bingi. Bavula baya na kwingijila ku byalo bingi javula pa kubwela bekala na nkongole ikatampe. Mu kifulo kya kwingijila Lesa saka bakasuluka, bekala bazha ba bobakongweleko mali. (Tangai Byambo bya Mana 22:7.) Kintu kya maana ke kuchinuzhuka kukongola mali.

11. Kulenga mutanchi wa bintu bya kupota kwakonsha kukwasha byepi kisemi?

¹¹ Ba Eduardo pa kuba’mba batwajijile kwikala pamo na kisemi kyabo bayukile kuba’mba bafwainwe kwingijishanga bulongo mali. Abo ne bakazhi babo banembele mutanchi wa bintu bya kupota, byonkatu byo bakebeshenga kwapwa. Pa uno mutanchi kechi pajinga bintu bimo kisemi kyabo byo beyowanga kala ne. Bino bonse bakwatankene kabiji kechi bapota bintu byabula kunema ne. * Kya kumwenako, ba Eduardo baambile’mba: “Nafumishe baana bami ku sukulu ko napanga mali avula ne kwibatwala ku sukulu kwayanga bavula.” Abo ne kisemi kyabo balombanga kuba’mba bakatane nkito ikebalengelanga kwingila bulongo mingilo ya Lesa. Nanchi Yehoba wakumbwile milombelo yabo nyi?

12, 13. Nsemi wamulume umo ulama byepi kisemi kyanji, kabiji Yehoba wamupesha byepi pa kwibikako kwikala bwikalo bwepela?

¹² Ba Eduardo bavuluka’mba: “Mu myaka itanshi ibiji bwikalo bwakatezhe bingi. Mali akepele bingi, kechi avujile kya kuba napotamo byonse byo nakebelenga ne, kabiji nakokanga bingi. Pano bino twatanwanga ku kupwila konse ne kuyila pamo mu mwingilo wa kusapwila na kisemi kyami.” Ba Eduardo bafuukwilepo kubula kutwela nkito ikebalengela kusha kisemi kyabo. Baambile’mba: “Mu kifulo kya kuya na kwingijila kwalepa, nafuukwilepo kufunda nkito yapusana pusana, kya kuba inge nkito imo yabula kumweka, natwela ikwabo.”

¹³ Na mambo a kuba’mba ba Eduardo bapainenga nkongole pachepache, bataine kuba’mba bapainenga mali avula kukila o bakongwele. Bino ba Eduardo bamwene’mba kijitu bulongo mambo kuba bino kwibalengelanga kwikala na kimye kya kwingijila Yehoba pamo na kisemi kyabo. Ba Eduardo baambile’mba: “Luno mfola mali acheche kukila o nafolanga ku bushiya bwa tulunga. Pano bino kechi twakilalapo na nzala ne. ‘Kuboko kwa Yehoba kechi kwaipipa’ ne. Kabiji twafukwilepo ne kutendeka bupainiya. Kabiji bwikalo bwapelako, bukomo bwa kyalo byo bwawamine.”—Isa. 59:1.

14, 15. Bisemi byakonsha kuba byepi inge bakilongo kebebatundaike kukebesha mali kukila kupopwela Lesa, kabiji ñanyi bintu bifumamo inge mwaikala bakumwenako bawama?

¹⁴ Mu mapunzha avula bantu balanguluka’mba bafwainwa kupanga bakilongo ne balunda nabo mali ne bya bupe. Ba Eduardo balumbulwile’mba: “Tumvwa bingi bulongo kupana bya bupe kabiji kyo kisho kyetu.” Banungilepo’mba: “Bino paji po twafwainwa kupelela. Nebalumbulwila bulongo bakilongo mu jishinda jibula kwibafichisha ku muchima kuba’mba nkebakwashanga kufika po nakonsha kupelela, bino kechi nkalekelela ba mu nzubo yami, ne kubula kwibakwasha kwikala na bulunda bwawama ne Yehoba ne.”

¹⁵ Bakilongo bakonsha kumvwa bibi ku muchima inge bamona mulongo wabo ye baketekela kuba’mba ye wakonsha kwibakwasha wafuukulapo kubula kuya na kwingijila ku kyalo kingi, nangwa wasalapo kubwela kufuma ku kyalo ko engijila pa kuba’mba ekalenga pamo na kisemi kyanji. Bamo bebambila’mba bakanama. (Mana 19:6, 7) Anna mwana ba Eduardo waambile’mba: “Inge twakana kusankilapo bintu bya ku mupashi na mambo akukeba bya ku mubiji, bakilongo mu kuya kwa moba bamona byo twanemeka bwikalo bwa bwina Kilishitu. Pano bakonsha kwitumona byepi inge twibomvwina?”—Esakanyaiko 1 Petelo 3:1, 2.

16. (a) Muntu wakonsha byepi ‘kwijimbaika na ndangulukilo yatama’? (Yako. 1:22) (b) Kufuukula kwa mutundu ka Yehoba ko apesha?

¹⁶ Nyenga umo byo afikiletu mu kyalo muji bunonshi kwakubula bamwata wanji ne baana, wabujile bakulumpe mu kipwilo kuba’mba: “Twasankilapo bintu byavula bingi pa kuba’mba amiwa ngiye kuno. Bamwata wami belekejilepo ne bukulumpe mu kipwilo. Naketekela Yehoba usakupesha byo twafuukula.” Yehoba kimye kyonse upesha byonse byo tufuukula bimwesha lwitabilo mwi aye, pano wakonsha kupesha byepi bintu byo twafuukula byapusana na kyaswa muchima wanji, kikatakata inge byalengela muntu kuleka mingilo ya mu kipwilo?—Tangai Bahebelu 11:6; 1 Yoano 5:13-15.

17. Mambo ka o twafwainwa kukebela lutangijilo lwa Yehoba saka tukyangye kufuukula bintu, kabiji twakonsha kuba byepi bino?

¹⁷ Kebainga lutangijilo lwa Yehoba saka mukyangye kufuukula nangwa kutendeka bintu. Kechi kukeba lutangijilo panyuma ya kufuukula ne. Lombai mupashi wazhila, maana ne lutangijilo.  (2 Timo. 1:7) Ishikishai anweba bene amba: ‘Nenengezha kukokela Yehoba mu bintu bya mutundu ka? Nakonsha kumukokela ne mu bimye bya lumanamo nyi?’ Inge byo ibyo, nanchi mwipana kumukokela nangwa kya kuba kuba bino kwavwangamo kupezhako bwikalo bwenu nyi? (Luka 14:33) Ipuzhai bakulumpe mu kipwilo kwimubulako mafunde a mu Binembelo, kabiji mweshai lwitabilo ne kuketekela mwi Yehoba walaya kwitukwasha inge twalondela lujimuno lwanji. Bakulumpe mu kipwilo kechi bakemufuukwilako ne, bino bakonsha kwimukwasha kufuukula bikemulengela kwikala na lusekelo.—2 Ko. 1:24.

18. Ñanyi uji na mwingilo wakukwasha kisemi, kabiji mu bintu bya mutundu ka bakwabo mo bakonsha kumukwasha?

¹⁸ Yehoba ukeba mitwe ya bisemi kukwasha ba mu nzubo yabo kimye kyonse. Twafwainwa kusanchilanga ne kulombelako balama bisemi byabo bulongo kwakubula kusha benakwabo ne baana babo nangwa kya kuba bakwabo bebabula kuba bino. Mu bintu biponakotu bine, nabiji bikunkukwila nangwa bikola bipulumukatu ke bimye bena Kilishitu bakine byo bafwainwa kwimwesha butemwe ne lusa. (Nga. 6:2, 5; 1 Pe. 3:8) Nanchi mwakonsha kukwasha mukwenu mwina Kilishitu mu bintu bipulumukatu, nangwa kumukwasha kutwela nkito konkako ko mwikala nyi? Inge ibyo, mukamukwasha kukepeshako bijikila bilengela kusha kisemi ne kuya na kwingijila kwalepa.—Mana 3:27, 28; 1 Yoa. 3:17.

19, 20. Mambo ka bena Kilishitu o bafwainwa kuketekela kuba’mba Yehoba ukebakwasha?

¹⁹ Binembelo bitutundaika’mba: “Mwikale babula kutemwa mali, sekelainga mu bintu byonka byo muji nabyo, mambo Lesa walaya amba: ‘Kechi nkakusha nangwa kukulekelela ne.’ Onkao mambo, tukosa ne kwamba amba: ‘Yehoba ye nkwasho wami; kechi nchine ne, muntu angube ka?’” (Hebe. 13:5, 6) Tuba byepi bino mu bwikalo bwetu?

²⁰ Mukulumpe mu kipwilo waingila myaka yavula wikala mu kyalo mwakatazha bwikalo waambile’mba: “Bantu javula bamba pa lusekelo luji na Bakamonyi ba kwa Yehoba. Kabiji bamona ne kuba’mba nangwatu Bakamonyi bayanda nabo baji bingi na lusekelo, kabiji bavwala bulongo kukila bantu bavula.” Kino kibena kumwesha bukine bwa mulaye wa kwa Yesu ku boba bakeba Bufumu patanshi mu bwikalo bwabo. (Mat. 6:28-30, 33) Kya kine, Yehoba, Shetu wa mwiulu wimutemwa bingi, kabiji ukeba anweba ne baana benu kwikala bulongo. “Meso a Yehoba apitañana pano pa ntanda ponse amba: Nebamweshe bulume bwami abo banketekela na muchima yensetu.” (2 Moba 16:9) Lesa witupa mikambizho kuba’mba tumwenemo atweba bene inge twiilondela. Pa ino mikambizho paji ne yaamba pa bwikalo bwa kisemi ne pa bya kwibamwena bya mu bwikalo. Inge twiilondela, tumwesha byo twamutemwa ne kumuketekela. Mambo “kutemwa Lesa kulumbulula amba tulondelenga mikambizho yanji; kabiji mikambizho yanji kechi yakatazha ne.”—1 Yoa. 5:3.

21, 22. Mambo ka o mwasajilapo kutwajijila kumwesha byo mwaketekela mwi Yehoba?

²¹ Ba Eduardo baambile’mba: “Nayuka kuba’mba kechi nakonsha kubwezha kyokya kimye kyonashile benakwami ne baana bami ne. Bino kechi ndeka kwilangulusha kumbwezha panyuma ne. Bakwetu bavula mo twaingijilanga banonka bingi, pano bino kechi baji na lusekeo ne. Bisemi byabo biji na makatazho avula bingi. Pa kuba atweba mu kisemi kyetu tuji bingi na lusekelo. Kabiji kindetela bingi lusekelo pa kumona balongo bayanda baji mu kino kyalo batangizhako bya ku mupashi mu bwikalo bwabo. Atweba bonse twimwena bukine bwa mulaye wa kwa Yesu.”—Tangai Mateo 6:33.

²² Kosai! Salaipo kukokela Yehoba ne kumuketekela. Mwakonsha kwikala mutwe wa kisemi wawama inge mwatemwa Yehoba, ne benakwenu, ne baana benu. Kikafumamo, mukemwena kuba’mba: ‘Yehoba ye nkwasho wenu.’