Mu lwimbo wa kutota Mulenga, Mfumu wa bena Isalela ba kala aye Davida waimbile’mba: “Nsekela bingi mu kuba kyaswa muchima wenu, anweba Lesa wami; Kine, mizhilo yenu yanembwa mukachi kami.” (Sala. 40:8) Nangwa kya kuba Davida wapitanga mu bya malwa ne kwikala na makatazho, kuba kyaswa muchima wa Lesa kwamuletelanga bingi lusekelo mu muchima wanji. Davida kechi ye yenkatu mupopweshi wa Yehoba watananga lusekelo mu kwingijila Lesa wa kine ne.

Mutumwa Paulo walumbulwile’mba byambo biji mu Salamo 40:8 byaambilenga pe Mesiasa nangwa’mba Kilishitu. Wanembele’mba: “Kilishitu byo aishile pano pa ntanda waambile amba: ‘“Anweba mwakaine kitapisho ne mulambo, bino mwannengezhejile mubiji. Kechi mwaitabizhe milambo ya kusoka ne ya bundengamambo ne.” Kepo naambile namba: “Talai! Amiwa naiya. Kyanembwa pe amiwa mu muvungilo. Naiya na kuba kyaswa muchima wenu anweba Lesa.”’”—Hebe. 10:5-7.

Yesu byo ajinga pano pa ntanda, waumvwanga bingi bulongo kutamba bilengwa, kwikala pamo na balunda nanji ne kujiila pamo nabo kajo. (Mat. 6:26-29; Yoa. 2:1, 2; 12:1, 2) Nangwa byonkabyo, kuba kyaswa muchima wa Shanji kyo kintu kyo akebeshanga kuba, kabiji kyamuletelanga bingi lusekelo. Yesu mwine waambile’mba: “Kajo kami ke kuba kyaswa muchima wa yewa wantumine ne kupwisha mwingilo wanji.” (Yoa. 4:34; 6:38) Baana banji ba bwanga bafunjile kwi Nkambo yabo Yesu kintu kileta lusekelo lwa kine. Bepaine na lusekelo ne na muchima yense kwingila mwingilo wa kusapwila byambo bya Bufumu na kizaku.—Luka 10:1, 8, 9, 17.

Yesu wakambizhe baana banji ba bwanga amba: “Yainga na kufunjisha bantu ba mu bisaka byonse kwikala ke baana bami ba bwanga, ne kwibabatizha mu jizhina ja Tata ne ja Mwana ne ja mupashi  wazhila, ne kwibafunjisha kulamanga bintu byonse byo nemukambizha. Kabiji yukai amba nji nenu moba onse kukafikatu ne ku mpelo ya buno bwikalo.” (Mat. 28:19, 20) Kulondela uno mukambizho kwavwangamo kuya na kusapwila bantu konse ko bakonsha kutanwa, ne kubwela ku bantu bakeba’mba tufundenga nabo Baibolo. Kwingila uno mwingilo kuleta bingi lusekelo.

Kulanguluka pa mwingilo wa kusapwila kwitulengela kwikala na lusekelo, kikale bantu baswa kwibasapwila nangwa ne. Mambo ka o tubujila kuleka kusapwila mambo awama nangwa kya kuba betumanyika nangwa bakaana kwibasapwila? Mambo a kuba twatemwa Lesa ne bantu, kyo kilengela kutwajijila kusapwila Bufumu ne kufunjisha bantu kwikala baana ba bwanga. Kwambatu kine, bumi bwetu ne bwa bantu bonse buji mu kizumba. (Ezi. 3:17-21; 1 Timo. 4:16) Pano twayai twisambe pa bishinka bimo byakwasha balongo ne banyenga bavula kutwajijila kwingila na kizaku mu manyaunda mwakatazha bingi kusapwila.

Kwipuzha mepuzho awama mu mwingilo javula mufuma byawama bingi. Juba jimo lukelo, Amalia wamwene mwanamulume umo saka abena kutanga pepala wa byambo mu mpunzha mwakukokolokela. Wayile ko aji ne kumwipuzha inge watangamo mambo awama. Byo akumbwile kuba’mba kafwamo, Amalia waambile’mba, “Nemuletela mambo awama aamba pa Bufumu bwa Lesa.” Kino kyalengejile uno mwanamulume kutako muchima, kabiji waswile kufunda Baibolo. Amalia, watendekele mafunjisho a Baibolo asatu mu ino mpunzha mukokolokela bantu.

Janice umona mpunzha po engijila kuba’mba yo nyaunda yanji ya kusapwilamo. Malonda ne mukwabo wamukazhi mobengijila batemenwe kibaba kimo kyajinga mu Kyamba kya Usopa, Janice wibepwizhe inge wafwainwa kwibaletelanga magazini. Byo byo aubile ne ku mukwabo mo baingijilanga watemenwe mitwe yavula ikala mu Kyamba kya Usopa ne Labainga! Kino kyalengejile ne mukwabo mo bengijila kutendeka kukeba magazini. Janice waambile’mba, “Yehoba wampesheshe bingi.” Mu kuya kwa moba wajinga na bantu 11 bo atwajilanga magazini.

Kalama wenda umo waambile’mba pa kwingila mwingilo wa ku nzubo ku nzubo, pa kupwisha kwisamba na mwina nzubo, basapwishi kechi bafwainwa kwambila mwina nzubo kuba’mba bakeyako juba jikwabo ne. Pakuba bafwainwa kumwipuzha’mba: “Nanchi mwakonsha kutemwa kwimumwesha byo tufunda Baibolo nyi?” Nangwa’mba, “Ñanyi juba ne kimye kyo mwakonsha kutemwa kuba’mba nkabwele ne kutwajijila mwisambo wetu?” Uno kalama wenda washimikizhe kuba’mba kupichila mu kwingijisha jino jishinda, balongo ne banyenga mu kipwilo kimo kyo aingijilemo, mu mulungu umo, batendekele mafunjisho a Baibolo 44.

Kubwelako bukiji ku muntu ye mwisambile nanji mwakonsha kufuma bintu byawama bingi. Mambo  ka? Mambo kuba bino kumwesha kuba’mba tukeba kukwasha bantu kufunda Baibolo. Mwanamukazhi umo byo bamwipuzhe kyamulengejile kutendeka kufunda Baibolo na Bakamonyi ba kwa Yehoba, waambile’mba, “Natendekele kufunda nabo mambo a kuba bantele bingi muchima ne kuntemwa kya kine.”

Aku upwishatu Sukulu wa Mwingilo wa Bupainiya, Madaí watendekele kufunjisha bantu 15 Baibolo, kabiji bakwabo batanu wibapaine ku basapwishi bakwabo. Bavula bo afunjishanga Baibolo batendekele kutanwa ku kupwila kimye kyonse. Ki ka kyakwashishe Madaí kutendeka kufunjisha bantu bavula bino? Sukulu wamutundaikile bingi kubwelanga kimye kyonse ku bantu bakebanga kufunda. Kamonyi mukwabo wakwasha bantu bavula kufunda bukine bwa mu Baibolo, waambile’mba, “Nafunda kuba’mba kutwajijila kubwela ku bantu ke jishinda jimo ja kwibakwashishamo kuyuka Yehoba.”

Kubwela ku bantu bakeba kufunda bukine ne kwibafunjisha Baibolo kechi kwapela ne. Nangwa byonkabyo, mufuma bintu byawama bingi. Kupichila mu kwingila mwingilo wa kusapwila Bufumu, twakonsha kukwasha bantu “kuyukisha bulongo bukine,” ne kwibalengela kukapuluka. (1 Timo. 2:3, 4) Kwi atweba, kusapwila kwakonsha kwituletela lusekelo lwabaya bingi.