1, 2. (a) Ñanyi kilengwa kitanshi kyalengele Lesa, kabiji Yehoba wamwingijishe byepi? (b) Ki ka kimwesha kuba’mba bamalaika baji mu mabumba?

YEHOBA, Mulenga wa bintu byonse, uba bintu monka mo byalondakena. Kintu kitanshi kyo alengele ke Mwananji yenkawatu umo, kilengwa kya mupashi kitelwa’mba “Mambo.” Utelwa bino, mambo Lesa ye ye ambilamo. Waingijila pamo ne Yehoba myaka yavula bingi, o ene mambo Baibolo o aambila’mba: “Mu ntendekelo mwajinga Mambo, ne oa Mambo ajinga na Lesa.” Kabiji waamba ne kuba’mba: “Bintu byonse byalengelwe kupichila mwi aye [Mambo] kabiji kufumyakotu aye, kafwako kyalengelwe kwa kubula aye ne.” Kukila myaka 2,000 yapitapo, Lesa watumine Mambo pano pa ntanda, kabiji ano mambo aubilenga kyaswa muchima wa Shanji mu bukishinka saka atelwa’mba Yesu Kilishitu muntu walumbuluka.—Yoa. 1:1-3, 14.

² Saka akyangye kwiya pano pa ntanda, Mwana Lesa waingijile mu bukishinka nobe “sendwe mwine.” (Mana  8:30) Kupichila mwi aye, Yehoba walengele bilengwa bya mupashi byavula bingi mwiulu. (Kolo. 1:16) Jishimikila jimo ja mu Baibolo jaamba pa bamalaika amba: “Kiumbi kya biumbi bamwingijilenga, ne biumbi jikumi bya biumbi jikumi baimene ku meso anji.” (Da. 7:10) Bilengwa bya  mupashi bya Lesa byavula bebitela’mba “mabumba” a Yehoba.—Sala. 103:21.

3. Kuji tubangabanga ne mapulaneti anga, kabiji bebyabanya byepi?

³ Twakonsha kwambapo mba ka pa bilengwa bya mwiulu nabiji tubangabanga ne mapulaneti? Pa mambo a tubangabanga, jishimikila ja kwa Houston, Texas jaamba pa byatana basayansi katataka amba “kuji mabilyonyi avula bingi a tubangabanga ne mapulaneti kukila ne byo babajile kala.” Tubangabanga betwabanya mu mabumba a myela yanshansha, mu mwela wanshansha umo muji mabilyonyi ne mabilyonyi a tubangabanga, ne mapulaneti avula bingi. Kabiji myela yanshansha yavula nayo iji mu tumabumba ne mu mabumba a myela yanshansha ikatampe.

4. Mambo ka o twakonsha kwambila’mba bakalume ba Lesa bakakwatankana?

⁴ Bamalaika mwiulu, tubangabanga ne mapulaneti bebinengezha monka mo byalondakena. (Isa. 40:26) Onkao mambo, kyayilamo bingi kwamba’mba Yehoba ukakwatankanya bakalume banji pano pa ntanda. Ukeba kuba’mba bobenga bintu monka mo byalondakena, kabiji kino kyanema bingi mambo baji na mwingilo wanema bingi wa kwingila. Bintu byawama byanembwa pa bakalume ba Yehoba bakishinka bakala ne ba mu ano moba bimwesha kuba’mba Lesa uji nabo kabiji ne kuba’mba ke “Lesa wa mutende kechi wa bimvulañanya ne.”—Tangai 1 Kolinda 14:33, 40.

5. Nga lunengezho lwa kusema ne kuyuzha ntanda lwavulañene byepi?

⁵ Yehoba byo alengele bantu batanshi wibambijile’mba: “Semainga ne kusemununa, muvule ne kukumbana ponse pa ntanda ne kwiikokesha; mwikale na bunkambo bwa pa masabi a mu mema, ne bwa pa bañonyi bapita mwiulu, ne bwa pa byumi byonsetu byenda pano pa ntanda.” (Nte. 1:28) Yehoba kechi walengele bantu bavula pa kimye kimo ne. Adama ne Evwa bafwainwe kwikala na baana, kabiji baana babo nabo bafwainwe kusema baana kufikatu ne ntanda yonse byo yafwainwe kukumbana bantu. Lesa wakebelenga kuba’mba ntanda yonse ikale ke Paladisa. Pano Adama ne Evwa byo babujile kukokela, bintu byakebelenga kuba Lesa byavulañene. (Nte. 3:1-6) Mu kuya kwa kimye, ‘Yehoba wamwene bubi bwa bantu byo bwatamishe pano pa ntanda, ne milanguluko yonse ya mu michima yabo byo yajingatu yatama kikuputu.’ Kabiji “pano pa ntanda napo patamishetu ku meso a Lesa, ne kuyula payujiletu bukapondo.” Onkao mambo, Lesa wakebelenga kuleta muyulo wa mema wa konauna bantu babula kwakamwa Lesa.—Nte. 6:5, 11-13, 17.

6, 7. (a) Ki ka kyalengejile Nowa kutalwa bulongo kwi Yehoba? (Monai kipikichala kitanshi.) (b) Ki ka kyamwekejile bantu babujile bukishinka bajingako mu moba a kwa Nowa?

⁶ Nangwa kya kuba pa ntanda payujile bubi, “Nowa watajilwe bulongo ku meso a Yehoba” mambo wajinga “muntu waoloka” kabiji “walumbuluka mukachi ka bantu ba mu yoya myaka.” Na mambo a kuba “Nowa waendelenga na Lesa,” Yehoba wamukambizhe kufiika bwato bukatampe. (Nte. 6:8, 9, 14-16) Kabiji bwato bebulengele mu jishinda ja kuba’mba kechi bwakonsheshe kuloba ne konauna banyama ne bantu bajingamo ne. Na mambo a lukokelo lwanji, “Nowa waubile byonsetu byo amukambizhizhe Yehoba,” kabiji wakwatankene na kisemi kyanji ne kupwisha kufiika bwato mu jishinda jawama. Byo atwezhezhe byumi byonse mu bwato, kepo “Yehoba amushinkileko.”—Nte. 7:5, 16.

⁷ Muyulo wa mema byo aishile mu 2370 B.C.E., Yehoba “wibivizhizhe byonse byajinga na bumi byajinga pano panshi,” pakuba wapulwishe Nowa muntu wakishinka ne kisemi kyanji mu bwato. (Nte. 7:23) Bantu bonse baji pano pa ntanda lelo jino, bafuma mu kikota kya kwa Nowa, baana banji ne bakazhi babo. Pano bino, bantu babujile lwitabilo bajinga pangye ya  bwato bonse bafwile, mambo bakaine kumvwina Nowa, wajinga “musapwishi wasapwijilenga bololoke.”—2 Pe. 2:5.

8. Ñanyi bishinka bimwesha lukwatankano lwajingako mu Isalela, Lesa byo ebakambizhe kutwela mu Ntanda ya Mulaye?

⁸ Byo papichile myaka kukila 800 kufuma kimye kyajingako muyulo, Lesa wakwatankenye bena Isalela kwikala mukoka umo. Wanengezhezhe byonse byo bakebelenga, kikatakata byo bafwainwe kumupopwela. Bena Isalela bamo wibapele mwingilo wa buñanga, bakwabo bajinga bena Levi. Kabiji kwajinga ne “banabakazhi baingijilenga mingilo konka ku kibelo kya tente wa lusambakeno.” (Lupu. 38:8) Nangwa byonkabyo, Yehoba Lesa byo akambizhe bena Isalela kutwela mu ntanda ya Kenana, uno mukoka kechi waikele wakishinka kwi aye ne. Onkao mambo, Lesa wibambijile’mba: “Kafwako nangwa umo ukafika mu ntanda yo nachipile kwimwikazhamo ne, kana Kaleba mwana Yefune, ne Yoshua mwana Nuni,” mambo baletele sawakya wawama byo bayile na kwendela Ntanda ya Mulaye. (Bala. 14:30, 37, 38) Lesa waambijile Mosesa kuba’mba Yoshua ye ukamuswana. (Bala. 27:18-23) Yoshua byo ajinga pepi kutwezha bena Isalela mu ntanda ya Kenana, bamubuujile’mba: “Ukose, uchinchike bulongo; kuchina ne, nangwa kukakilwa ne; mambo Yehoba Lesa wobe uji nanji konse konse ko uya.”—Yosh. 1:9.

9. Lehaba wamonanga byepi Yehoba ne bantu banji?

⁹ Yehoba Lesa wajinga ne Yoshua konse konse ko ayanga. Kyakumwenako, akilangulukai pa bena Isalela byo baikele mu kampu kwipi na bena Kenana mu muzhi wa Yeliko. Mu 1473 B.C.E., Yoshua watumine banabalume babiji kuya na kwendela muzhi wa Yeliko, mo bataine Lehaba mwanamukazhi pite. Banabalume bo batumine ku mfumu wa mu Yeliko bakebelenga kukwata bano bamwendela ntanda, pano bino, Lehaba wibafiile pa mutenge wa nzubo yanji. Lehaba wabuujile bamwendela ntanda bena Isalela amba: “Nayuka namba Yehoba wimupa kala ino ntanda . . . , Mambo twaumvwa mambo a Yehoba byo aumishe mema a Kalunga Kachila palutwe yenu . . . ne byo mwibobile aba bamfumu babiji ba bena  Amoli.” Kabiji ambile’mba: “Yehoba Lesa wenu ye Lesa Mwine wa mwiulu ne wa pano panshi.” (Yosh. 2:9-11) Na mambo a kuba Lehaba watundaikile jibumba ja Yehoba pa kyokya kimye, Lesa wamuzhikijile pamo na ba mu kisemi kyanji kimye bena Isalela kyo bashinjile muzhi wa Yeliko. (Yosh. 6:25) Lehaba wajinga na lwitabilo ne kunemeka Yehoba, kabiji wamwesheshe mushingi ku bantu banji.

10. Ñanyi byambo Yesu byo aambilejile bantangi ba bupopweshi bwa Bayudea bajingako mu moba anji, kabiji mambo ka o aambijile bino?

¹⁰ Bena Isalela bashinjile mizhi yavula bingi byo be batangijilenga kwi Yoshua, kabiji baikele mu ntanda ya Kenana. Pano ki ka kyamwekele mu kuya kwa kimye? Pa myaka yavula, bena Isalela kechi balondejilenga mizhilo ya Lesa ne. Kufika pa kimye Yehoba kyo atumine mwananji pano pa ntanda, batwajijiletu kubula kukokela Lesa ne kukana kuteleka ku baluwe banji. Kyo kyalengejile Yesu kwambila bangikazhi ba mu muzhi wa Yelusalema amba “mwipaya bangauzhi.” (Tangai Mateo 23:37, 38.) Lesa wakaine bantangi ba bupopweshi bwa Bayudea mambo kechi bajinga bakishinka kwi aye ne. O ene mambo Yesu o ebambijile’mba: “Bakemwangata Bufumu bwa Lesa ne kwibupana ku kisaka kipanga bipangwa.”—Mat. 21:43.

11, 12. (a) Ki ka kimwesha kuba’mba mu myaka kitota kitanshi, Yehoba walekele kupesha mukoka wa Bayudea ne kutendeka kupesha jibumba jikwabo? (b) Mu jibumba ja Lesa ja katataka mwajinga bañanyi?

¹¹ Mu myaka kitota kitanshi, Yehoba wakaine mukoka wa bena Isalela babujile bukishinka. Nangwa byonkabyo, kino kechi kyalumbulwilenga kuba’mba kechi ukekalapo na jibumba ja bakalume bakishinka pano pa ntanda ne. Yehoba watendekele kupesha jibumba ja katataka jalondejilenga byafunjishenga Yesu Kilishitu. Jino jibumba jatendekele pa juba ja Pentekosita 33 C.E. Pa kyokya kimye, baana ba bwanga ba kwa Yesu 120 bakonkene pa mpunzha imo mu Yelusalema, kabiji “ponkapotu mwiulu mwafumine kilulumo nobe kinkunkwila kikatampe kabiji kyakumbene nzubo yonse mo baikajile.” Kepo “mujilo wamwekelenga nobe njimi waabene ne kwikala pa muntu pa muntu, bonse bayujile na mupashi wazhila ne kutatula kwamba mu milaka yapusana pusana, monka mupashi mo ebapelejile byambo bya kwamba.” (Byu. 2:1-4) Kino kintu kya kukumya kyamwekele kyamwesheshetu patoka kuba’mba Yehoba ubena kupesha jibumba ja katataka, mwajinga baana ba bwanga ba kwa Kilishitu.

¹² Pa jonka jino juba, ku baana ba bwanga ba kwa Yesu “banungilweko bajinga pepi 3,000.” Kabiji “Yehoba wanungilengako kwi abo bantu bavula bo apulwishenga.” (Byu. 2:41, 47) Bano bena Kilishitu ba mu myaka kitota kitanshi basapwijilenga bingi kya kuba “mambo a Lesa akomenenga ne baana ba bwanga bavujilengako bingi mu Yelusalema.” Kabiji “ne bañanga bavula baitabijile.” (Byu. 6:7) Bantu bavula bajinga na michima ya bukishinka baswile bukine bwasapwijilenga bantu bajinga mu jino jibumba ja katataka. Mu kuya kwa kimye, Yehoba wamwesheshe jikwabo kuba’mba ubena kukwasha jino jibumba kimye kyo atendekele kuleta “bantu ba mu bisaka bikwabo” mu kipwilo kya bwina Kilishitu.—Tangai Byubilo 10:44, 45.

13. Ñanyi mwingilo wajinga na jibumba ja Lesa?

¹³ Kwakubula nangwa kuzhinaukatu ne, kyamwekeletu patoka kuba’mba Lesa ye wapele baana ba bwanga ba kwa Kilishitu uno mwingilo. Yesu mwine wibapele kyakumwenako, mambo panyumatu ya lubatizhilo lwanji, watendekele kusapwila pa “Bufumu bwa mwiulu.” (Mat. 4:17) Yesu wafunjishe baana banji ba bwanga kwingila yenka uno mwingilo. Wibabuujile’mba: “Mukekala batumonyi bami mu Yelusalema, mu Yudea ne mu Samaliya monse, ne monse mwapela ntanda.” (Byu. 1:8) Kwakubula nangwa kuzhinaukatu ne, bena Kilishitu batanshi bayukile byo bafwainwe kuba. Kyakumwenako,  mu Antioka ne mu Pisidya, Paulo ne Banabasa babujile na kuchinchika Bayudea bajinga bakajimbuluzhi amba: “Kyafwainwe patanshi mambo a Lesa kusapwilwa kwi anweba. Bino na mambo a kuba mubena kwiakana ne kwichibila anwe bene mambo amba kechi mwafwainwa bumi bwa myaka ne, twaya ku bisaka bikwabo. Mambo Yehoba witukambizha na bino byambo amba, ‘Nakutongola kwikala kyeya kya ku bisaka bikwabo, kuba amba wikale lupulukilo ne kwapela ntanda.’” (Byu. 13:14, 45-47) Kufumatu mu myaka kitota kitanshi, lubaji lwa pano pa ntanda lwa jibumba ja Lesa batwajijila kubuula bakwabo bitubila Yehoba pa kuba’mba tukapuluke.

14. Ki ka kyamwekejile bangikazhi ba mu Yelusalema mu myaka kitota kitanshi, bino bañanyi bapulukile?

¹⁴ Bayudea bavula kechi baswile mambo awama ne, kabiji malwa ajinga pepi kwibafikila. Mambo Yesu wajimwineko baana banji ba bwanga amba: “Umvwe mwamona Yelusalema bamuzhokoloka ku mazhita, mukayuke amba lonaiko lwanji luji pepi. Kepo aba baji mu Yudea bakanyemene ku mitumba, aba baji mukachi kanji bakanyememo, kabiji aba baji mu mapunzha akwabo kange bakatwelemo ne.” (Luka 21:20, 21) Byaambile Yesu byamwekele. Na mambo a bunsatuki bwa Bayudea, nzhita ya bena Loma yatangijilwenga ne Cestius Gallus yataile Yelusalema mu kañumbwañumbwa mu 66 C.E. Pano bino, kechi papichile ne moba avula ne, ino nzhita yafuminemo, kino kyalengejile baana ba bwanga ba kwa Yesu kwikala na kimye kya kufuma mu Yelusalema ne mu Yudea. Kwesakana na byaambile shayuka Eusebius, bavula banyemejile ku bushiya bwa Mukola wa Yodano ku Pela ne ku Pelia. Mu 70 C.E., nzhita ya bena Loma yatangijilenga mukulumpe wa nzhita aye Titus yaonawine muzhi wa Yelusalema. Nangwa byonkabyo, bena Kilishitu bakishinka bapulukile mambo baumvwijile lujimuno lwa kwa Yesu.

15. Ki ka kyalengejile bwina Kilishitu kutwajijila na kukoma?

¹⁵ Nangwa kya kuba baana ba bwanga ba kwa Kilishitu bapichilenga mu makatazho, kwibamanyika ne mesekotu akwabo, bwina Kilishitu bwailengatu na kukoma mu myaka kitota kitanshi. (Byu. 11:19-21; 19:1, 19, 20) Bano bena Kilishitu batanshi baubilenga bingi bulongo ku mupashi mambo Lesa wibapesheshe.—Mana. 10:22.

16. Pa kuba’mba lwitabilo lwabo lukose, bena Kilishitu batanshi bafwainwe kuba ka?

¹⁶ Pa kuba’mba lwitabilo lwabo lukose, bena Kilishitu bonse bafwainwe kwibikako. Kufunda Binembelo kimye kyonse, kutanwa ku kupwila kimye kyonse ne kwingila na kizaku mwingilo wa kusapwila Bufumu, byanemene bingi. Bino bintu bibalengejile kwikala na bulunda bwawama na Lesa kabiji bantu ba Yehoba bakwatankene bingi, byonkatu byakwatankana bena kilishitu ba mu ano moba. Aba bajinga mu bipwilo bitanshi bamwenejilemo bingi mu bukwasho bwa bakalama ne bankwasho bajinga mu bino bipwilo. (Fili. 1:1; 1 Pe. 5:1-4) Kabiji baumvwanga bingi bulongo inge bebafwakesha ku bakalama benda nabiji Paulo. (Byu. 15:36, 40, 41) Kileta bingi lusekelo pa kumona mpopwelo yetu mu ano moba byo ipasha na ya bena Kilishitu ba mu myaka kitota kitanshi. Tumusanchila bingi Yehoba pa kukwatankanya bakalume banji ba kala ne ba mu ano moba. *

17. Mu mutwe walondelapo tukesamba pa ka?

¹⁷ Ino ntanda ya kwa Satana byo ibena kunangijila ku mpelo, lubaji lwa jibumba ja Yehoba ja pano pa ntanda jibena kuyilako bingi palutwe. Nanchi mubena kwendela pamo najo nyi? Abya mubena kukomenako mu maana a kuyuka Lesa nyi? Mutwe walondelapo ukamba byo mwakonsha kuba bino.