BANTU ba Lesa byo bafuminenga mu buzha mu Babilona mu 537 B.C.E.,Yehoba wateleko bingi muchima ku lwendo lwabo lwa kuya ku Yelusalema. Wibambijile’mba: “Nengezhezhai jimo jishinda ja kupichilamo bantu; tuchikaimo, tuchikaimo, mukwakwa abumbuke; angataimo mabwe.” (Isa. 62:10) Fwanyikizhai Bayudea byo baubile pa kuba’mba bengile uno mwingilo. Kampe bafwainwe kusala jibumba ja banabalume bakuya na kuwamisha mu jishinda, kupanga tu byabu pa tunkololongwa, kufumya bikokolo ne kuzhika mu bimbo mu jishinda. Kuba bino, kwalengejile lwendo lwa kubwela kwabo kuwama.

Twakonsha kufwanyikizha luno lwendo ku bikonkwanyi bya kwingijila Lesa. Yehoba ukeba bakalume banji kwenda mu jishinda kwakubula bya kwibakatazha. Mambo anji etutundaika amba: “Usalulule jishinda jalamba ja kuyamo, kepo ukendanga mwaluñama bulongo monsetu.” (Mana 4:26) Twafwainwa kumvwina luno lujimuno lwa Lesa pa kuba’mba tumwenemo.

Mwafwainwa mwakyumvwapo kala byamba bantu pa bakyanyike kuba’mba: ‘uno mwanyike ukoba bintu byavula bingi’ nangwa amba ‘ukafika palepa bingi mu bwikalo.’ Banyike baji na butuntulu bwa mubiji bwawama, balanguluka bukiji kabiji batapo muchima kufikizha byo bakeba kuba mu bwikalo. Baibolo waambatu kipasu kuba’mba: “Bulume bwa bansongwalume lo lukumo lwabo.” (Mana 20:29) Mwanyike wingijisha bulume bwanji ne byo ayuka pa kwingijila Yehoba wakonsha kufikizha kikonkwanyi kyanji, kabiji kimuletela bingi lusekelo.

Byonka byo mwayuka, busendwe bwa bena Kilishitu banyike, bebunemeka bingi ku bantu bamo ba mu ino ntanda lelo jino. Bakamonyi bavula boba bingi bulongo ku sukulu, kino kilengela bafunjishi babo ne baana ba sukulu bakwabo kwibatundaika kufunda kufika palepa. Nangwa bakyanyike boba bulongo mu bya makayo apa sukulu, bebatundaika ku bakwabo kutwajijila kuba bino mu bwikalo bwabo. Nanchi  kino kya kimumwekelapo kala nyi? Abya mwayukapo uji na luno lukatazho nyi? Ki ka kyakonsha kukwasha mwina Kilishitu kufuukulapo bulongo?

Bifunjisha Baibolo byakonsha kwitukwasha kwenda mu jishinda jaya ku bumi. Musapwishi 12:1 waamba kuba’mba: “Sa uvuluka Mulenga wobe mu moba a bwanyike bobe.” Nga anweba ne bakwenu bakyanyike ‘mwakonsha kuvuluka byepi Mulenga wenu’?

Akimonai kyamwekejile Eric * wikala kumuzhika wa Africa. Watemenwe bingi kupama mpila. Byo afikizhe myaka 15, bamusajile kutendeka kupama mpila mu jibumba ja mu kyalo mo aikalanga. Bakebelenga kumutuma ku Europe na kumufunjisha bya kupama mpila, kino inge kyamulengejile kutumbalala bingi. Pano walondejile byepi lujimuno lwa ‘kuvuluka Mulenga wanji’? Twakonsha kufunjilako ka ku kyamumwekejile?

Pa myaka yo ajinga ku sukulu, Eric watendekele kufunda Baibolo na Bakamonyi ba kwa Yehoba. Wafunjilenga kuba’mba Mulenga ukafumyapo makatazho onse abena kupitamo bantu. Eric popo ayukile kuba’mba kyanema bingi kwingijisha kimye, ne bulume kuba kyaswa muchima wa Lesa. Wayukile’mba kwingijila Lesa kwanema bingi kukila kupama mpila. Wabatizhiwe ne kutendeka kwingijisha kimye ne bulume bwanji mu mwingilo wa Yehoba. Eric wafuukwilepo kubula kutwajijila na kufunda bya kupama mpila. Pa kupitapo kimye, waikele nkwasho mu kipwilo kabiji bamwichile ku Sukulu wa Baibolo wa Balongo Bakatanda.

Umvwe watwajijile na kufunda bya kupama mpila, Eric inge watumbalele ne kwikala bingi na bunonshi. Bino wavulukile jifunde ja mu Baibolo ja kuba’mba: “Bunonshi bwanji munonshi bwauba nobe muzhi wanji wakosa, kabiji mu milanguluko yanji bwauba nobe nsakwa yalepa.” (Mana 18:11) Mali akonsha kubepa bantu, kabiji kechi apana luzhikijilo lwa kine ne. Onkao mambo, aba bakebesha bya bunonshi “beasa bene na misongo yavula.”—1 Timo. 6:9, 10.

Kya lusekelo ke kya kuba’mba, banyike bavula batana kuba’mba luzhikijilo lwa kine lufuma mu kwingila mwingilo wa kimye kyonse. Eric waambile’mba: “Nenunga ku ‘jibumba’ jikatampe ja bakalume ba Yehoba baji mu mwingilo wa kimye kyonse. Jino jo jibumba jawama jo nafwainwa kwikalamo, kabiji na musanchila bingi Yehoba pa kummwesha jishinda mwakutaina lusekelo lwa kine ne mwakubila bintu mu bwikalo.”

Nga anweba kiji byepi? Kukila kukebesha bintu bya mu ino ntanda, nanchi mwakonsha kunengezhezha jimo “jishinda” ja kwingijilamo Lesa kupichila mu kwingilako bupainiya nyi?—Monai kakitenguluzha ka kuba’mba “ Namwenamo Bintu Byavula Bingi byo Nafwainwe Kubula Kumwenamo pa Univesiti.”

Bamulume ne mukazhi byo bafwakashijile ofweshi wa musampi wa mu United States, bamwene bengijila Yehoba pa Musampi byo bajinga na lusekelo. Nyenga wanembele’mba: “Twatemenwe kubatu bintu bya kyetu kyetu.” Bano ba Mulume ne mukazhi bafuukwilepo kwingijisha kimye ne bulume bwabo mu mwingilo wa Yehoba.

Pano bino, kuba bino kechi kwapelele ne. Juba jimo byo babalawilenga kinembelo kya pa juba batangile Yoano 8:31, po tutanga byambo byaambile Yesu amba: “Umvwe saka mulama byambo byami, mukekala baana bami ba bwanga”. Bino byambo bibalengejile kulangulukapo kuba’mba: “Pa kuba’mba twipane kyanema bingi kupezhako bwikalo bwetu.” Bapoteshe nzubo yabo ikatampe, ne bintu byo bamwene kuba’mba kechi byanema ne, kabiji bayile ku kipwilo kwa kebewenga basapwishi ba Bufumu. Luno ke bapainiya ba kimye kyonse, kabiji bakwashako ne mwingilo wa kushimika Mazubo a Bufumu ne kwingilako mingilo imo pa kushonkena kwa nkambi. Bomvwa byepi pa lupimpu lo baubile? Baambile’mba “Twakumya bingi pa kuyuka kuba’mba kwikala bwikalo bwapela kuleta bingi lusekelo, kabiji ne kuba bintu byonse jibumba ja Yehoba byo jitutundaika kuba.”

Solomone wanembele kuba’mba: “Meso obe atajishengatu kulutwe, ne bikope byobe nabyo konka.” (Mana 4:25) Twafwainwa kutwajijila kwenda mu jishinda jiketulengela kwingilako mu mwingilo wa Yehoba. Twafwainwa kuchinuzhuka bintu byakonsha kwitulabika ne kwitulengela kubula kuba bintu byo tukeba kuba.

Ñanyi bikonkwanyi bya kwingijila Lesa byo mwibikila? Kwingila mwingilo wa kimye kyonse kwawama bingi. Jishinda jimo, ke kuya na kwingijila ku bipwilo biji mu kukajilwa kwa basapwishi pa kuba’mba tusapwile  mu nyaunda yonse. Nangwa kipwilo muji basapwishi bengila bingi bulongo, pano bino muji bakulumpe ne bankwasho bakepa. Abya mwakonsha kukwashako mu ano mashinda nyi? Nanchi mwakonsha kwambila kalama wa mwanzo ne kumona inge mwakonsha kuba bino nyi? Inge mukeba kuya na kwingijila kuji kukajilwa, mwakonsha kumona bipwilo bibena kukebewa bukwasho. *

Pano twayai twambepo jikwabo pa byambo biji mu Isaya 62:10. Bayudea bamo bafwainwa baingijile bingi pa kuwamisha mu jishinda jayile ku muzhi wabo pa kuba’mba bantu ba Lesa bende bulongo ne kufika ko bayilenga. Inge mu bena kwibikako kufikizha bikonkwanyi byenu mu mwingilo wazhila, kechi mwafwainwa kwikileka ne. Na bukwasho bwa Lesa, mwakonsha kufikizha bikonkwanyi byenu. Twajijilai na kulomba maana kwi Yehoba byo mubena kwibikako kushinda bintu byonse byakonsha kwimulengela kukankalwa kuba byo mukeba. Mu kuya kwa kimye, mukamona byo mwakonsha ‘kusalulula jishinda jalamba ja kuyamo, kepo mukendanga mwaluñama bulongo monsetu.’—Mana 4:26.