Nanchi mwatanga magazini a katataka a Kyamba kya Usopa nyi? Monai inge mwakonsha kukumbula ano mepuzho:

Ñanyi kimye kyo bafwainwe kwipaya mwana mukooko pa Kijiilo kya Lupitailo pa Nisanyi 14?

nMa Baibolo amo amba kuba’mba, bafwainwe kwipaya mwana mukooko “kimye kya muntuwa muntuwa,” kino kyalumbulwilenga kuba’mba bafwainwe kumwipaya kimye kya muntuwa muntuwa. (Lupu. 12:6)—12/15, mapa 18-19.

Ñanyi mafunde asatu a mu Baibolo akonsha kwimukwasha pa kufuukula bintu?

Kuji mafunde asatu (1) Kebai Bufumu bwa Lesa ne bololoke bwanji patanshi. (Mat. 6:19-34) (2) Ikalai na lusekelo lufuma mu kwingijila bakwenu. (Byu. 20:35) (3) Iyowai kwingijila Yehoba mu bwanyike bwenu. (Sapwi. 12:1)—1/15, mapa 19-20.

Ñanyi ba mbili bana babena kwenda kutendeka mu 1914?

Yesu Kilishitu, ke Mfumu waoloka waikala pa mbili utoka, mwingilo mutanshi ye aingijile wajinga wa kufumya Satana ne bandemona banji mwiulu. Mbili uchila ne waikalapo wimenako makondo a bena kuyanjisha bantu. Mbili ufita ne waikalapo wimenako bipowe bya nzala. Mbili watokoloka ne waikalapo wimenako lufu lwiya na mambo a myalo ya ipaya bantu bavula. (Lum. 6:2-8)—2/1, mapa 6-7.

Ñanyi kimye kyafwainwa kwikalako “kijiilo kya masongola a Mwana mukooko”? (Lum. 19:7)

“Masongola a Mwana mukooko” akekalako kimye Mfumu, Yesu Kilishitu, byo akapwisha kushinda nkondo yanji, ko kuba amba konauna Babilona Mukatampe kabiji ne panyuma ya kushinda pa nkondo ya Amagedonyi.—2/15, jipa 10.

Ñanyi bishinka byalengejile Bayudea ba mu myaka kitota kitanshi ‘kutengela’ Mesiasa? (Luka 3:15)

Twakonsha kwamba’mba, Bayudea kechi baumvwishishe mwatajile bungauzhi bwaambilepo Danyela pe Mesiasa byonka byo twayuka atweba lelo jino ne. (Da. 9:24-27) Bino baumvwine bamalaika byo baambijile bakafunga nangwa kwi ngauzhi wa mukazhi aye Ana byo aambile byo amwene Yesu saka aji mucheche mu nzubo ya Lesa. Bashayuka batubangabanga baishile na kumona “mfumu wa Bayudea.” (Mat. 2:1, 2) Pa kupitapo kimye, Yoano Mubatizhi waambile’mba Kilishitu ukamweka.—2/15, mapa 26-27.

Twakonsha kuchinuzhuka byepi Ee wetu kubula kwikala Ine? (2 Ko. 1:18)

Kimye kimo mwakonsha kupimpula bintu byo mwalayile kuba, kechi na mambo a kuba’mba mukebatu kwibipimpula ne, bino ke na mambo a kuba’mba bintu byakatazha. Byo muji bena Kilishitu, inge mwalaya kuba kintu, mwafwainwa kwibikako kufikizha kyo mwalaya.—3/15, jipa 32.

Twakonsha kuchinuzhuka byepi muteeto wa kutamba bipikichala bya mulekese?

Kuji mashinda asatu akonsha kwitukwasha (1) Kanyai meso enu kutala pa bintu byatama. (2) Chinuzhukainga milanguluko yabula kufwainwa, langulukainga pa bintu byawama ne kulomba kwi Lesa. (3) Chinuzhukainga kutamba mafilimu ne misabilo imo ya pa kompyuta patanwa bya mulekese.—4/1, mapa 10-12.

Ñanyi bintu byatama bimweka bya kubula kuketekela inge mwina Kilishitu washa kisemi kyanji ne kuya ku kyalo kingi na kwingila nkito?

Inge bansemi bafuukulapo kusha kisemi kyabo, baana bayanda bingi. Batendeka kukebesha kumona bansemi babo. Inge bamulume ne mukazhi ke bekale kwalepa na bena kwabo, bakonsha kutendeka kwifwalama na bantu bangi.—4/15, mapa 19-20.

Mambo ka kyo bachimawinanga maulu a tupondo inge bebapopa pa kichi?

Bena Loma pa kukambula tupondo, bebapopanga pa kichi. Yesu byo bamupopele na tupondo, Bayudea balombele’mba bachimaune maulu a tupondo. Kuba bino kwalengelanga bantu ku nkalwa kupema bulongo ne kufwa bukiji. Nangwa byonkabyo kechi bafwainwe kuzhikisha juba pa kichi ne. (Mpitu. 21:22, 23)—5/1, jipa 11.

Ñanyi mepuzho ana o twafwainwa kulangulukangapo pa kusolomoka bantu kimye kyo tuji mu mwingilo?

Mbena kusolomoka bantu ba mutundu ka? Kwepi ko nsakutana bantu? Ñanyi kimye kyawama kwisamba na bantu? Nakonsha kusolomoka byepi bantu?—5/15, mapa 12-15.

Kupepa fwanka kwatamina ka?

Pa myaka kitota yapitapo, bantu 100,000,000 bo bafwa na mambo a kupepa fwanka. Bantu 6,000,000 bo bafwa pa mwaka pa mwaka.—6/1, jipa 3.