Binembelo kechi byaswisha nangwa kukanya kusoka bantu ne.

Mashimikila amo a mu Baibolo amwesha kuba’mba mibiji ne bikupa bya bantu bamo bafwile bebisokele. (Yosh. 7:25; 2 Moba. 34:4, 5) Kino kyamweshanga amba bano bantu kechi bafwainwe kwibazhika ne. Pano bino, kechi kimye kyonse o kyalumbululanga bino ne.

Abino byobyo kyajinga ne mu jishimikila jaamba pa lufu lwa Mfumu Saulo ne baana banji basatu. Bonse bana bafwile mu nkondo kimye kyo balwilenga na bena Filishitiya. Pa bano baana banji bafwile, pajinga ne Yonafwanyi, wajinga mulunda wawama kabiji wakishinka watundaikanga Davida. Kimye bena Isalela bachinchika baikalanga mu Yabeshi-gileada byo baumvwine kyamwekele, bayile na kusenda bino bitumbi, bebisokele, kabiji bazhikile bikupa byabo. Pa kupitapo moba, Davida watakaikile bena Isalela pa byo baubile.—1 Sam. 31:2, 8-13; 2 Sam. 2:4-6.

Binembelo byamba kuba’mba, bafwa bakasangulwa, kabiji Lesa ukapana bumi ku bantu bonse. Yehoba uji na bulume bwa kusangula bonse bo bazhiika nangwa bo basoka, ukapa bantu bumi ne kwibapa mibiji ipya. Bahebelu basatu byo bebataile mukisha kya mujilo kwesakana na byakambizhe Mfumu Nebukaneza, kechi bachiine ne, mambo bayukile kuba’mba Lesa ukebasangula. (Da. 3:16-18) Byobyo kyajinga ne ku bakalume ba kwa Yehoba bajinga mu makampu alumanamo mu Nazi, bamo bebepaile ne kwibasoka. Bakalume ba Lesa bavula, bafwa ku bya malwa byubiwa kya kuba bantu bamo kechi bebamona inge bafwa ne. Nangwa byonkabyo, twaketekela kuba’mba, luketekelo lwa lusanguko lwa kine.—Lum. 20:13.

Yehoba kechi ukalenga jikwabo mubiji wa muntu byonka byo ajinga pa kuba’mba amusangule ne. Kino kimweka Lesa byo oba pa kusangula bena Kilishitu bashingwa na bumi bwa kuya mwiulu. Byonka byo kyajinga kwi Yesu ye ‘basangwile kwikala kilengwa kya mupashi,’ bena Kilishitu bashingwa inge bafwa basanguka byonka byo bajinga, pano bino mibiji yabo ikala nobe bamalaika. Kafwako kinungwa kimo kya mubiji wabo wa kala kyo baya nakyo mwiulu ne.—1 Pe. 3:18; 1 Ko. 15:42-53; 1 Yoa. 3:2.

Luketekelo lwa lusanguko kechi lwaimena pa bikobiwa ku mibiji yetu inge twafwa ne, bino lwaimena pa kwikala na lwitabilo mu bulume bwa Lesa bwa kufikizha milaye yanji. (Byu 24:15) Nangwa kya kuba kechi twaumvwisha bya kukumya bya kala Lesa byo aubile pa kusangula bantu nangwa byo akoba kulutwe ne, bino twaketekela mwi Yehoba. Bantu bonse bafwainwa “kuketekela” jino juba, mambo wasangwile Yesu.—Byu 17:31; Luka 24:2, 3.

Bena Kilishitu bafwainwa kulangulukangapo pa bisho byamba bantu bo bekala nabo kinkalankulo, ne pa bikebewa kulondela inge muntu wafwa. (2 Ko. 6:3, 4) Inge mubiji wa muntu wafwa babena kukeba kumusoka nangwa ne, ke kufuukulapo kwa muntu mwine nangwa kisemi kyanji.