1, 2. (a) Ñanyi Mukambizho wa bubiji Yesu ye ambilepo? (b) Mepuzho ka o tusakwisambapo?

PA KWESEKA Yesu, Mufaliseo umo wa mwipwizhe amba: “Mufunjishi, nanchi mukambizho mukatampe wa mu Mizhilo ye wepi?” Byonka byo twafunjile mu mutwe wafumako, Yesu wakumbwile amba “mukambizho mukatampe kabiji mutanshi” ke wa kuba’mba: “‘Wafwainwa kutemwa Yehoba Lesa wobe na muchima wobe yense, na mweo wobe yense, ne na maana obe onse.’ Uno ye mukambizho mukatampe kabiji ye mutanshi. Wa bubiji ke uno: ‘Wafwainwa kutemwa mukwenu byonka byo witemwa obe mwine.’”—Mat. 22:34-39.

² Yesu waambile’mba twafwainwa kutemwa bakwetu byonka byo twitemwa atwe bene. Onkao mambo, kyawama kwiipuzha amba: Nanchi mukwetu ye ñanyi? Twakonsha kumwesha byepi kuba’mba twatemwa bakwetu?

3, 4. (a) Ñanyi kishimpi kyaambilepo Yesu kimwesha kutemwa bakwetu byo kulumbulula? (b) Mwina Samaliya wakwashishe byepi mwanamulume ye bapumine ku tupondo ne kumusha mu jishinda? (Monai kipikichala kitanshi.)

³ Kampe twakonsha kulanguluka amba mukwetu, ke muntu ye twikala nanji kinkalankulo. (Mana 27:10) Mwanamulume umo  byo a aipwizhe Yesu amba: “Nanchi mukwetu ye ñanyi?” Wamukumbwile kupichila mukwamba kishimpi kya Muyudea ne mwina Samaliya. (Tangai Luka 10:29-37.) Yesu waambile kuba’mba, mwanamulume Muyudea bamulukukile ku tupondo ne kumupuma, ne kumusha mu jishinda. Ñanga mwina Isalela ne mwina Levi bajinga balunda nanji, kechi bamukwashishe ne. Uno muntu bamukwashishe ku mwina Samaliya wanemekele bingi Mizhilo ya kwa Mosesa yabujile kunemeka Bayudea.—Yoa. 4:9.

⁴ Pa kukwasha uno mwanamulume ye bapumine ku tupondo, uno mwina Samaliya waichijile manyi ne binyu pa bilonda byanji. Kabiji wamutwajile ku nzubo ya bwenyi kuba’mba bamulame kabiji wapaine ma ndenali abiji. Ano mali aesakene pamo na mali aingijilanga bantu pa moba abiji. (Mat. 20:2) Onkao mambo, twamona mu kino kishimpi wajinga mukwabo ku uno muntu ye bapumine. Kishimpi kya kwa Yesu kitufunjisha kuba lusa ne kumwesha butemwe bantu bonse.

5. Bakalume ba Yehoba bamwesheshe byepi butemwe mu kimye kya bya malwa biponakotu bine?

⁵ Kechi kyapela mu ano moba kutana bantu baji na lusa byonka byajinga mwina Samaliya ne. Kikatakata mu ano ‘moba akupelako’ bavula kechi baji na butemwe ne, bashinta, kabiji kechi batemwa byawama ne. (2 Timo. 3:1-3) Mu 2012 mu ñondo wa October, kwamwekele kinkunkwila kikatampe kyaonawine bintu byavula bingi mu muzhi wa New York. Kechi kwajinga malaichi, pa kuteka nangwa bintu bikwabo byakwingijisha ne. Kyataminekotu ke kya kuba’mba, bangivi batendekele kwibila bano bantu bajinga mu lukatazho. Bino Bakamonyi ba kwa Yehoba abo bapuseneko bingi. Banengezhe kukwasha balongo ne banyenga ne bantu bonse bajinga mu ino mpunzha, mambo bena Kilishitu bakine batemwa bantu bonse. Mu ñanyi mashinda akwabo mo twafwainwa kumweshesha butemwe ku bantu bonse?

6. Ñanyi bukwasho bwa mu Baibolo bo tupana ku bantu?

⁶ Kwashainga bantu kupichila mu kwi bafunjisha Baibolo. Mu mwingilo wetu wa kusapwila, tubula bantu “lutekenesho lwa mu Binembelo.” (Loma 15:4) Tumwesha amba twibatemwa inge ke twingijishe Baibolo pa kwibabula mambo awama a Bufumu bwa Lesa. (Mat. 24:14) Tuji bingi na mwingilo wanema wa kutaya mbila ya Bufumu bwa “Lesa upana luketekelo”!—Loma 15:13.

7. Muzhilo Wawama ye mu ka, kabiji tumwenamo byepi mu kumulondela?

⁷ Londelainga Muzhilo Wawama. Mu Jashi janji ja pa Mutumba, Yesu walumbulwile bingi bulongo mwatala uno muzhilo byo ambile amba: “Bintu byonse byo mukeba amba bantu bemubile, ne anweba mwafwainwa kwibobilabyo. Mambo muno mo mwayila Mizhilo ne Bungauzhi.” (Mat. 7:12) Inge ketulondele jifunde ja kwa Yesu, tukobanga bintu mwayila “Muzhilo” (kufuma mu Ntendekelo kufika mu Mpitulukilo ya mu mizhilo) ne “Bangauzhi” (mabuku a bungauzhi a Binembelo bya Kihebelu) Ano mashimikila amwesha kuba’mba Lesa upesha bantu batemwa bakwabo. Mu buku wa Isaya, Yehoba waamba’mba: “Chibilai mambo monka mo aolokela ne kuba byaoloka. . . . Ye mwine wa lusekelo awa muntu uba kino.” (Isa. 56:1, 2) Inge twatemwa bantu bonse ne kulondela Muzhilo Wawama, tukekala bingi na lusekelo.

8. Mambo ka o twafwainwa kutemenwa balwanyi betu, kabiji ñanyi bintu bifumamo mu kuba bino?

⁸ Temwai balwanyi benu. Yesu waambile’mba: “Mwaumvwine byo kyaambilwe’mba, ‘Ukamutemwa mukwenu, ne mulwanyi wobe ukamushikwa,’” Bino “Amiwa nemwambila namba, sa mwibatemwa balwanyi benu  ne kwibalombela bemupata; namba mwikale bana ba Shenu wa mwiulu.” (Mat. 5:43-45) Mutumwa Paulo naye waambilepo pa kino amba: “Bino umvwe mulwanyi wenu wafwa nzala, mupepoi bya kuja; umvwe wafwa kilaka, mupepoi bya kutoma.” (Loma 12:20; Mana 25:21) Mu moba a bena Isalela, Yehoba wapaine muzhilo ku bantu banji wa kukwasha balwanyi babo ne banyama ba balwanyi babo. (Lupu. 23:5) Inge ketulondele luno lujimuno, bantu betushikwa bakonsha kwikala balunda netu. Byo tuji bena Kilishitu, kutemwa balwanyi betu kwakonsha kwibalengela kupimpula milanguluko yabo pe atweba. Bamo bakonsha kutendeka kwingijila Yehoba.

9. Yesu waambilepo byepi pa kwikala mu mutende na balongo betu?

⁹ “Ibikaingako kwikala mu mutende na bantu bonse.” (Hebe. 12:14) Kino kyavwangamo ne balongo betu ba mukisemi. Yesu waambile’mba: “Byonkabyo, umvwe ke ulete mulambo wobe ku kya kusokelapo bitapisho kabiji wavuluka amba uji na mambo na mulongo wobe, sha konka mulambo wobe. Patanshi kapwane na mulongo wobe apa bino ubwele ulambule mulambo wobe.” (Mat. 5:23, 24) Inge twatemwa balongo betu ne kwikala nabo mu mutende, Lesa uketupesha.

10. Mambo ka o twafwainwa kubujila kuzhachishanga bakwetu?

¹⁰ Kange muzhachishenga bakwenu ne. Yesu waambile’mba: “Kilekai kuzhachisha bakwenu kuchina amba ne anweba Lesa wakeya kwimuzhachisha,” kabiji waambile ne kuba’mba, “mambo monka mo muzhachishisha bakwenu, ne anweba mo mo bakemuzhachishisha, kabiji kyonka kipimo kyo mupiminako bakwenu, ne anweba kyo kyo bakemupiminako. Mambo ka o utajila kakibalabala kaji mu jiso ja mulongo wobe kwa kubula kukimona patanshi mwamba uji mu jiso jobe? Nangwa wakonsha kwambila byepi mulongo wobe amba, ‘Leka nkupepule kakibalabala mu jiso jobe,’ bino obewa saka uji na mwamba mu jiso jobe? Obewa kamfutumfutu! Patanshi akipepula mwamba uji mu jiso jobe, apa bino umone bulongo bya kupepula kakibalabala kaji mu jiso ja mulongo wobe.” (Mat. 7:1-5) Kino kitufunjisha kuba’mba kechi twafwainwa kuzhachishanga bakwetu inge balubankanya ne, mambo ne atweba tulubankanya.

11, 12. Ñanyi jishinda jo tumwesheshamo butemwe ku bantu?

¹¹ Kuji mashinda avula o twafwainwa kumwesheshamo butemwe. Tusapwila mambo awama a Bufumu byonka byaubanga Yesu. (Luka 8:1) Yesu wakambizhizhe batumwa banji “kufunjisha bantu ba mu bisaka byonse kwikala ke baana ba bwanga.” (Mat. 28:19, 20) Umvwe ketulondele uno mukambizho, tukwasha bantu kuleka kwenda mu jishinda jikatampe, kabiji ja pabuka jitwala kulonaiko. Kabiji twibakwasha kwenda mu jishinda jakatazha kwendamo jitwala ku bumi. (Mat. 7:13, 14) Twayuka kuba’mba kwibikako kwetu kusangajika bingi Yehoba.

¹² Yesu wakwashishe bantu bavula kuyuka Yehoba. (Mat. 5:3) Tuba byonka byaubanga Yesu inge ke ‘tusapwile mambo awama a Lesa’ ku bantu. (Loma 1:1) Aba bomvwa byambo bya Bufumu, bapwanañana ne Lesa kupichila mwi Yesu Kilishitu. (2 Ko. 5:18, 19) Mwingilo wa kusapwila mambo awama ke jishinda jawama bingi kumwesheshamo butemwe ku bantu.

13. Mumvwa byepi kwingilako mwingilo wa kutaya mbila ya Bufumu?

¹³ Kunengezha saka tukyangye kubwela ku bantu bamwesheshe lusekelo ne botufunjisha Baibolo, kwitukwasha kwibafunjisha bulongo kukokela Yehoba. Kuba bino kwakonsha kulengela bamo kupimpula bwikalo bwabo. (1 Ko. 6:9-11) Kileta bingi lusekelo, Lesa byo abena kukwasha bantu ‘bonse baji na michima ya bukishinka ya kukeba bumi bwa myaka’ ne kupimpula bwikalo bwabo pa kuba’mba bekale balunda nanji. (Byu. 13:48) Inge ke bafunde Baibolo, bantu babujile luketekelo bekela bingi na lusekelo. Kechi bakamwa ne, mambo baketekela mwi Yehoba. Kituletela bingi lusekelo kwingilako mwingilo wa kusapwila.

14. Paulo walumbulwile byepi butemwe mu 1 Kolinda 13:4-8?

¹⁴ Inge twatemwa bantu byonka byalumbulwile Paulo, tukasangajika Yehoba, kuchinuzhuka makatazho ne kwikala balusekelo. Kuba bino kulengela Lesa kwitupesha. (Tangai 1 Kolinda 13:4-8.) Pano twayai twisambe pa byaambile Paulo pa butemwe ne pa byo twafwainwa kwingijisha byambo byo ambile pa kutemwa bakwetu.

15. (a) Mambo ka o twafwainwa kwikela na lusa ne kutekanya? (b) Kichima ne kwitota byatamina ka?

¹⁵ “Butemwe butekanya ne kuba lusa.” Byonkatu Lesa byo amwesha kutekanya ne kubila lusa bantu bambulwakoloka, ne atweba twafwainwa kutekanya ne kubila lusa bantu inge balubankanya, baamba byambo byatama nangwa inge bamwesha bulunji. “Butemwe kechi buba kichima ne,” butemwe bwa kine bwitukwasha kubula kubila kichima balongo mu kipwilo. Kabiji kechi tuketotanga ne. Mambo Yehoba washikwa “meso a misula, ne muchima wa kwitota.”—Mana 21:4.

16, 17. Twakonsha kulondela byepi byambo biji mu 1 Kolinda 13:5, 6?

¹⁶ Butemwe kechi buba bya bunya ne. Inge twatemwa bantu kechi tukebabepanga, kwibebila nangwa kuba kintu kiji kyonse kyakonsha kufichisha Yehoba ku muchima ne. Kabiji butemwe buketulengela kubula kukebangatu bintu byo tukeba, bino tukengilanga nangovu kuba bintu bikeba bakwetu.—Fili. 2:4.

¹⁷ Butemwe bwa kine kechi buzhingila ne kabiji “kechi buvuluka kintu kyatama ne.” Inge muntu wauba bintu byatama kechi tufikenatu ponkapotu kuzhingila ne. (1 Tesa. 5:15) Kechi twafwainwa kubala bimye muntu byo etulenga mambo ne. Inge twaikala na mfika mu muchima wetu, bukaji bwakonsha kutema  nobe mujilo, kabiji twakonsha kuba kintu kyakonsha kukozha bakwetu ku muchima ne atwe bene pamo. (Levi 19:18) Butemwe bwitulengela kusangalela mu bukine, pano bino kechi bwitulengela ‘kusekela pa bintu byabula koloka ne.’ Inge muntu witupata ke bamube shinji nangwa ke ayande kechi tutemwa ne.—Tangai Byambo bya Mana 24:17, 18.

18. Twafunjilako ka mu 1 Kolinda 13:7, 8 pa mambo a butemwe?

¹⁸ Paulo wanembele’mba “Butemwe buvweta pa bintu byonse.” Inge muntu witulenga mambo walomba lulekelo lwa mambo, butemwe bwitulengela kuswa kumulekelako mambo. Kabiji waambile ne kuba’mba “bwitabila byonse” biji mu Mambo a Lesa kabiji bwitulengela kusanta pa kajo ka ku mupashi ko tutambula kimye kyonse. Butemwe “buketekela byonse” byanembwa mu Baibolo kabiji bwitulengela kubulako bakwetu pa mambo a luketekelo lwetu. (1 Pe. 3:15) Inge bintu byakatazha, tulomba kwi Lesa ne kuketekela kuba’mba usakwitukwasha. Butemwe “buchinchika mu bintu byonse,” inge betulenga mambo, kwitumanyika, nangwatu meseko akwabo. Kabiji “butemwe kechi bupwa ne.” Bantu bakatwajijila kumwesha butemwe ku bantu myaka ne myaka.

19, 20. Ñanyi lujimuno lwa mu Binembelo lwitulengela kutwajijila kutemwa bantu?

¹⁹ Kumvwina lujimuno lwa mu Baibolo kwitukwasha kutwajijila kutemwa bantu. Twafwainwa kutemwa bantu bonse bafuma mu bisho byapusana pusana. Kabiji twafwainwa kuvulukanga byaambile Yesu amba: “Wafwainwa kutemwa mukwenu byonka byo witemwa obe mwine.” (Mat. 22:39) Lesa ne Kilishitu bakeba atweba kutemwa bantu bonse. Inge kitukatazha kutemwa bantu, twafwainwa kulomba kwi Yehoba kwitupa mupashi wanji wazhila. Kuba bino kukalengela Yehoba kwitupesha ne kwitukwasha kubila bintu mu jishinda ja butemwe.—Loma 8:26, 27.

²⁰ Mukambizho wakutemwa bakwetu byonka byo twitemwa bamutela’mba “muzhilo wa mfumu.” (Yako. 2:8) Byo apwishishe kwamba pa mikambizho iji mu Mizhilo ya kwa Mosesa, Paulo waambile’mba: Ne mizhilotu ikwabo, yapwila mu bino byambo bya kuba amba: ‘Wafwainwa kutemwa mukwenu byonka byo witemwa obe mwine.’ butemwe kechi buba kyatama ne; onkao mambo, butemwe bo bufikizha mizhilo.” (Loma 13:8-10) Oene mambo o twafwainwa kutwajijila kutemwa bantu bonse.

21, 22. Mambo ka o twafwainwa kutemenwa Lesa ne bantu?

²¹ Byo tubena kulanguluka pa ene mambo o twafwainwa kutemenwa bantu, kyawama bingi kulanguluka pa byaambile Yesu kuba’mba Shanji “usamisha kyeya pa bantu babi ne bawama, kabiji unokesha mvula pa baoloka ne babula koloka.” (Mat. 5:43-45) Twafwainwa kutemwa bantu bonse, baoloka ne babulakoloka. Byonka byo twaambapo kala, jishinda jimo jawama ja kumwesheshamo butemwe ke kusapwila pa Bufumu bwa Lesa ku bantu. Inge muntu ke engijishe byo afunda mu Baibolo, wikala bingi na lusekelo pa kwikala mulunda ne Lesa.

²² Tuji na bishinka byavula bitulengela kutemwa Yehoba na muchima wetu yense, na mweo wetu yense ne na mana etu onse. Kabiji kuji ne mashinda akwabo o twafwainwa kumwesheshamo kuba’mba twatemwa bantu. Inge twatemwa Lesa ne bantu, tumwesha kuba’mba tubena kukokela mikambizho ibiji ikatampe yaambilepo Yesu. Kuba bino kwawama bingi mambo kusangajika Shetu wa mwiulu aye Yehoba.