BA KATHERINE bakomejile mu muzhi wa United States, babatizhiwe byo bafikizhe myaka 16 ne kwikala Kamonyi wa kwa Yehoba. Baingilanga bingi mwingilo wa kusapwila, bino bantu kechi bateleko muchima ku byambo bya Bufumu ne. Baambile’mba: “Natangile mashimikila a bantu balombelenga kwi Lesa kwibatumina muntu wa kwibakwasha kuyuka Lesa. Nakebanga bingi kutanapo muntu walombanga bino, pano bino kechi natainepo umo ne.”

Byo basapwijile mu ino nyaunda pa myaka yavula, ba Katherine balangulukilenga kuya na kwingijila ku mpunzha kuji bantu bakeba kumvwa mambo a Bufumu. Bino bazhinaukilenga, mambo bachinanga’mba inge baya bakavulukanga ku nzubo. Mambo kimye kitanshi kyo bafumine ku bansemi, papichiletu milungu ibiji batendekele kutonga ku nzubo. Na mambo a kukebesha kukwasha bantu ne kwimwena lusekelo lufumamo inge bamuyuka Yehoba, bashinjile ino milanguluko. Byo balangulukilenga ko bafwainwe kuya, batumine nkalata ku musampi wa mu Guam kabiji bebabujile byo bakebelenga. Mu 2007 mu ñondo wa Mankumbinkumbi, ba Katherine byo bafikizhe myaka 26 bayile ku Saipan, jikuji jaikela ku Pacific Ocean paji makilomita 10,000 kufuma ko bekala. Ñanyi bintu byawama byafuma mu kuba bino?

Ba Katherine byo bafikile mu kipwilo kyakatataka, batendekele kufunjisha ba Doris Baibolo bajinga na myaka kukila pa 40. Byo bafunjile bitango bisatu mu buku wa Baibolo Ufunjisha, ba Katherine batele bingi muchima ba Doris. Baambile’mba “Ba Doris bajinga baana ba bwanga bawama bingi, onkao mambo kechi nakebelenga kubula kwibata muchima ne,” kabiji baambile’mba. “Kechi nafunjishapo lufunjisho lwa Baibolo lwa kimye kyonse ne, kabiji nalangulukilenga kuba’mba ba Doris ne bapane ku nyenga wayuka bulongo kufunjisha, kikatakata mukulumpe byonka byo baji.” Ba Katherine balombele kwi Yehoba kwibakwasha kutana nyenga wayuka kufunjisha, ye bafwainwe kupa lufunjisho lwabo lwa Baibolo. Kepo babujile ba Doris kuba’mba nsakwimuletela wa kwibafunjishanga.

Ba Katherine baambile’mba, “Saka nkyangye ne kwibabula byo nalangulukilenga,” ba “Doris bambujile’mba bakeba kumbula lukatazho lumo. Byo bapwishishe kumbula, ne babujile Yehoba byo ankwashishe kushinda luno lukatazho. Basanchijile bingi.” Ba Doris babujile ba Katherine amba: “Yehoba wa kwingijisha kunkwansha. Juba jitanshi jo waishile ku nzubo,  natangilenga Baibolo pa maola avula bingi. Najijilenga, ne kulomba Lesa kuntuminapo muntu wa kunkwasha kumvwisha biji mu Baibolo. Kepo wakonkosheshe ku kibelo. Yehoba wakumbwile lulombelo lwami!” Ba Katherine baumvwine bingi bulongo bibabujile ba Doris. Baambile’mba: “Byaambile ba Doris byamwesheshenga kuba’mba Lesa wakumbula lulombelo lwami. Yehoba wankwashishe kutwajijila kwibafunjisha Baibolo.”

Ba Doris babatizhiwe mu 2010, lelo jino nabo bafunjisha mafunjisho a Baibolo avula. Ba Katherine baambile’mba: “Natemwa bingi, mambo kintu kyo nakebelenga pa kimye kyabaya kya kukwasha muntu ukeba kwikala mulunda ne Yehoba kyafikile!” Ba Katherine lelo jino bengila bupainiya bwiikajila pa jikuji jiji ku Kosrae.

Balongo ne banyenga bavula, bafuma mu byalo bingi (baji na myaka kutendeka pa 19 kufika ku 70) baya na kwingijila kuji kukajilwa kukatampe kwa basapwishi mu Micronesia. Byaubile Erica, bimwesha bano balongo ne banyenga byo bekala, mu 2006 wayile ku Guam sa aji na myaka 19. Waambile’mba: “Kwingila bupainiya mu nyaunda muji bantu bakeba kufunda bukine kwawama bingi. Namusanchila bingi Yehoba pa kunkwasha kwingila mwingilo wanji. Jino jo jishindatu jawama ja kwingijishamo bumi bwetu!” Lelo jino, Erica wingila bupainiya bwiikajila ku Ebeye mu Marshall Islands. Kya kine kuba’mba kwingijila ku kyalo kingi kechi kyapela ne. Pano twayai twambepo mashinda asatu, ne kumona aba baya na kwingijila ku Micronesia byo boba.

Bwikalo. Simon uji na myaka 22 byo afikile ku jikuji ja Palau mu 2007, watendekele kwikala na mali acheache kukila o amonanga kimye kyo ajinga ku kyalo kya England. Waambile’mba “Kechi napotanga bintu byonse byo nakebanga ne. Pano natendekele kusala bya kuja byo nafwainwa kupota, kabiji nakebanga biji na mutengo wapela. Bipe bimo inge byaonaika, nkeba tubyela twaonaikako ne kumonapo muntu wakonsha kukwasha kulungisha.” Kupeezhako bintu mu bwikalo kwamukwashishe byepi? Simon waambile’mba: “Kwankwashishe kuyuka bintu byanema mu bwikalo ne bya kwingijisha mali bulongo. Nemwena kuboko kwa Yehoba byo kunkwasha mu bimye byavula. Myaka itanu na ibiji yo naingijila kuno, ngikala na bya kuja kimye kyonse ne pa kulaala.” Kwakubula nangwa kuzhinaukatu ne, Yehoba ukwasha aba bapezhako bwikalo bwabo pa kuba’mba bakebe Bufumu bwanji patanshi.—Mat. 6:32, 33.

Kuvuluka ku Nzubo. Erica waambile’mba: “Natemwa bingi bamu kisemi, kabiji naakaminwe bingi kuba’mba nkavulukanga ku nzubo ne kundengela kubula kwingila bulongo mu mwingilo.” Waubile byepi pa kuba’mba enengezhe? Waambile’mba: “Saka nkyangye kuya, natangile bibaba byaamba pa kuvuluka ku nzubo biji mu Kyamba kya Usopa. Kino kyankwashishe kuyuka bya kuba na luno lukatazho. Mu kibaba kimo kyo natangile, nsemi wa mukazhi waambijile mwananji wa mukazhi amba: ‘Yehoba wakonsha kukulama kukila ne byonakonsha kukulama.’ Bino byambo byankoseshe  bingi.” Ba Patrick ne bakazhi babo ba Hannah, bengijila ku Majuro mu Marshall Islands. Ba Hannah kibakwasha kubula kuvuluka ba ku nzubo, ke kulanguluka pa balongo ne banyenga mu kipwilo. Baambile’mba: “Namusanchila bingi Yehoba pa bwana bwankazhi bwa ntanda yonse, mambo nabo kisemi kyami. Kwakubula butemwe ne lutundaiko lwabo, inge kechi mbena kwingijila kuji kukajilwa kukatampe kwa basapwishi ne.”

Kwikala na Balunda. Simon waambile’mba “Inge wafika mu kyalo kingi, bintu byonse byaluka.” Kabiji waambile ne kuba’mba, “Bimye bimo nkankalwa kushimikizha tu majashi twa kusekesha ne kukankalwa kulumbulula bulongo pa kuba’mba byo mbena kwamba byumvwanyike.” Erica waambile’mba: “Kuntendekelo, naumvwanga bingi mukose mambo kechi najinga na bakwisamba nabo ne, kino kyankwashishe kuyuka ene mambo o nayijile ku kyalo kingi. Kechi nayile na kukeba bintu byami ne, bino nayile na kwingijila Yehoba.” Wanungilepo amba: “Byo papichile kimye, najinga na balunda bawama bingi, bo nanemeka kya kine.” Simon wibikileko bingi pa kuba’mba afunde mulaka wa Palauan, uno mulaka wamukwashishe ‘kubaisha butemwe’ ku balongo ne banyenga. (2 Ko. 6:13) Kwibikako kwanji kwalengejile balongo kumutemwa bingi. Inge kya kuba balongo ne banyenga kebengijile pamo na balongo baiya, bonse beyowa bingi bulunda bwawama mu kipwilo. Ñanyi mfweto ikwabo iyowa aba bepana ne kuya na kwingijila kuji kukajilwa kukatampe?

Mutumwa Paulo waambile’mba: “Awa ukusa byavula ukanowa byavula.” (2 Ko. 9:6) Bino byambo kikatakata bingila bulongo ku boba bengila na ngovu mwingilo wa kusapwila. Ñanyi bintu “byavula” byafumamo mu kwingila mwingilo wa kusapwila mu Micronesia?

Mu Micronesia, muji bantu bavula bakeba kufunda Baibolo, kabiji mwakonsha ne kwimwena bantu bafunda bukine byo bapimpula bwikalo bwabo ne kukosesha bulunda bwabo na Lesa. Ba Patrick ne ba Hannah basapwilanga ku Angaur, ka jikuji kacheche kwikala bantu 320. Byo basapwijile pa ba ñondo babiji, basapwijile nsemi wamukazhi wabula kusongolwa. Ponkapotu waswile lufunjisho lwa Baibolo, ne kuswa bukine ne kupimpula bwikalo bwanji. Ba Hannah baambile’mba: “Kimye kyonse pa kupwisha lufunjisho, byo twafumanga pa nzubo yanji na makinga etu, twitalanga ne kwamba’mba: ‘Twimusanchila, anweba Yehoba!’” Ba Hannah banungilepo amba: “Nayuka namba Yehoba ubena kukeba kukokela uno mwanamukazhi kwi aye, bino na mambo a kwingijila kuji kukajilwa kukatampe, twataine ne kukwasha muntu wakebelenga kuyuka Yehoba. Kino kyo kintu kimo pa bintu byawama Yehoba byo etubila mu bwikalo bwetu!” Byonka byaambile Erica amba, “inge twakwasha muntu kuyuka Yehoba, mufuma bintu byawama bingi.”

Mu byalo byavula, mu bena kukebewa basapwishi ba Bufumu. Nanchi mwakonsha kuya na kwingijila ku mapunzha kubena kukebewa basapwishi nyi? Mulombai Yehoba kwimukosesha pa kuba’mba mwikale na kizaku kya kubaisha mwingilo wenu. Isambai na bakulumpe mu kipwilo, kalama wa mwanzo, nangwa aba baingijilapo kala mu byalo bingi mu bena kukebewa ba kukwashako mwingilo wa kusapwila. Inge mwatendeka kunengezha, mwafwainwa kunemba nkalata ne kwiituma ku musampi utala pa yoyo nyaunda ko mubena kukeba kuya, ne kwipuzha bintu bikwabo bikebewa. * Ne anweba mwafwainwa kwinunga ku jibumba ja balongo ne banyenga, bakulumpe ne banyike, basongolwa ne babula kusongolwa bepana bene na muchima yense, ne kwimwena lusekelo lufuma mu ‘kunowa byavula.’