PETELO wajijile bingi byo akaine Yesu. Nangwa kya kuba uno mutumwa wafwainwe kwibikako pa kuba’mba bulunda bwanji ne Lesa bukose, pano bino, Yesu wakebelenga ku mwingijisha kuba’mba akakwashenga bakwabo. Wamwambijile’mba: “Inge wabwela ukakoseshe lwitabilo lwa balongo bobe.” (Luka 22:32, 54-62) Petelo waikele jishiki ja kipwilo kya bena Kilishitu kya mu myaka kitota kitanshi. (Nga. 2:9) Po pamotu, ne mulongo wajingapo mukulumpe mu kipwilo, wafwainwa kwibikako pa kuba’mba atendeke jikwabo mwingilo wa bukulumpe ne kwikala na lusekelo lufuma mukukwasha ne kukosesha balongo ku mupashi.

Bamo bajinga bakulumpe mu kipwilo, bukulumpe bwapwa. Kino kilengela bamo kutendeka kwilengulula. Ba Julio, * bajinga bakulumpe mu kipwilo mu kyalo kya Bolivia pa myaka 20, baambile’mba: “Kunengezha majashi, kupempula balongo, ne kufunga mikoko ya mu kipwilo ye wajinga mwingilo wami! Pano bino byonse byapwijile pa mpuki ne kushalatu mabokotu. Nangwa byonkabyo, kino kyajinga kimye kyakatazha bingi.” Ba Julio batendeka kwingila mwingilo wa bukulumpe mu kipwilo jikwabo.

Mwana wa bwanga aye Yakoba wanembele’mba: “Balongo bami, sekelainga umvwe kemupite mu meseko apusana pusana.” (Yako. 1:2) Yakoba waambilenga pa meseko eya na mambo a kumanyikwa ne bumbulwakulumbuluka bwetu. Watongwele bya kusakasaka bya mubiji, kuba misalululo ne bintutu bikwabo. (Yako. 1:14; 2:1; 4:1, 2, 11) Inge Yehoba witufundako, kikola bingi kumuchima. (Hebe. 12:11) Ano meseko kechi afwainwa kwitupwishisha lusekelo lwetu ne.

Nangwa kya kuba bukulumpe bwapwa mu kipwilo, bino twafwainwa kukosesha lwitabilo lwetu ne kumwesha’mba twatemwa Yehoba. Kabiji twafwainwa ne kulangulukanga pa ene mambo o twaikejile bakulumpe mu kipwilo. Nanchi twakebangatu kumwenamo nyi, inyi twaingilanga na mambo a kutemwa Lesa ne kushiinwa’mba  ye mwina kipwilo kabiji ye wikita muchima nyi? (Byu. 20:28-30) Aba batwajijila kwingijila Yehoba mu bukishinka nangwa kya kuba bukulumpe bwapwa, bamwesha ku bonse kubikakotu ne Satana kuba’mba batemwa Yehoba kya kine.

Mfumu Davida byo alengele mambo akatampe, waswile byo bamufunjileko kabiji bamulekejileko mambo. Davida waambile’mba: “Ye mwine wa lusekelo, mwina mizhilulwila yalekelwa, mwina mambo avwetwapo ye mwine wa lusekelo wabulwa kutelelwa bubi kwi Yehoba, wa muchima wabulwa bujimbijimbi.” (Sala. 32:1, 2) Kumufundako kwamukwashishe Davida ne kumulengela kwikala kafunga wawama wa bantu ba Lesa.

Po pamotu ne balongo bo babwezha pa bukulumpe mu kipwilo, bekala bakafunga bafikilamo. Mukulumpe mu kipwilo umo ye kyamwekejilepo waambile’mba: “Pano popo nayuka bulongo bya kuba na bilubo byuba balongo ne banyenga.” Mukulumpe mu kipwilo mukwabo wambile mba: “Luno nanemeka bingi mwingilo wa kwingijila balongo ne banyenga.”

Nyimbi wa masalamo wanembele’mba: ‘[Yehoba] kechi ukebakeba mambo mwi atweba ne.’ (Sala. 103:9) Onkao mambo, kechi twafwainwa kulangulukanga kuba’mba inge muntu walenga mambo, Lesa kechi ukamulekelako mambo ne. Ba Ricardo bajinga bakulumpe mu kipwilo pa myaka yavula baambile’mba: “Kyankolele bingi ku muchima kabiji natendekele kwilengulula.” Banungilepo amba, “Pa kimye kyabaya namonanga nobe kechi nafikilamo ne, kino kyandengejile kubula kukeba kwikala mukulumpe mu kipwilo. Kechi najinga na luketekelo lwa kuba’mba bantu ba kanketekela ne. Bino na mambo a kuba’mba neyowanga kukwasha balongo ne banyenga, natendekele kufunjisha mafunjisho a Baibolo, kutundaika balongo kimye kyo tuji pa Nzubo ya Bufumu ne kwingila nabo mu mwingilo wa kusapwila. Kino kyakwashishe kufikilamo, luno ne mukulumpe mu kipwilo jikwabo.”

Inge mulongo waswisha bukaji kwikala mu muchima wanji, bwakonsha kumulengela kubula kwikala mukulumpe mu kipwilo. Kyawama bingi kwikala nobe kalume wa Yehoba Davida, wakaine kwipaya Mfumu Saulo wa mubijile kichima! Davida wakaine kushinkanya ne Saulo, nangwa kya kuba wajinga na jishuko ja kuba bino. (1 Sam. 24:4-7; 26:8-12) Saulo byo afwile mu  nkondo, Davida wamujijile, ne kwamba pe aye ne mwananji Yonafwanyi amba: ‘bebatemenwe’ ku bantu. (2 Sam. 1:21-23) Davida kechi waswishishe bukaji kwikala mu muchima wanji ne.

Inge mwalanguluka’mba kechi bemuchibila bulongo mambo enu ne, kechi mwafwainwa kuswisha bukaji kwikala mu muchima wenu ne. Ba William bekala mu kyalo kya ku Britain kimye bukulumpe kyo bwapwile panyuma ya kwikala mukulumpe pa myaka nobe 30, batendekele kuzhingijila bakulumpe mu kipwilo. Ki ka kyakwashishe ba William kushinda ino milanguluko? Baambile’mba, “Kutanga buku wa Yoba kwantundaikile bingi.” Kabiji banungilepo amba, “Inge Yehoba wakwashishe Yoba kwikala mu mutende na balunda nanji basatu, ko kuba’mba ukankwasha ne amiwa kwikala mu mutende na bakalama ba bwina Kilishitu!”—Yoba 42:7-9.

Inge mwalekele mwingilo wa kufunga jitanga ja Lesa, kyakonsha kuwama kulanguluka ne kumona ene mambo kyo mwalekejile. Nanchi makatazho o alengejile nyi? Inyi kuji bintu bimo byamwekanga nobe byanema mu bwikalo byo byalengejile nyi? Nanchi mwalefwilwe na mambo a bumbulwakulumbuluka kwa balongo nyi? Nangwa kiji bino, mwafwainwa kuvulukanga’mba mwakwashanga bingi balongo ne banyenga mu mashinda avula byo mwajinga bakulumpe mu kipwilo. Majashi o mwaambanga ebakoseshanga, byo mwaubanga bintu kibatundaikanga kabiji byo mwayanga na kwi bapempula kibakwashanga kuchinchika meseko. Byo mwaingijilenga mu bukishinka mwingilo wa bukulumpe, kyasangajikanga bingi muchima wa Yehoba, byonkatu byo mwaumvwanga bulongo ne anweba bene.—Mana. 27:11.

Yehoba wakwasha balongo kwikala jikwabo na lusekelo ne kukeba kutendeka mwingilo wa kutangijila kipwilo. Inge mwalekele mwingilo wa bukulumpe nangwa bemufumishe pa bukulumpe, mwafwainwa jikwabo “kukanamina mingilo ya bukalama.” (1 Timo. 3:1) Paulo ‘watwajijile kulombelako’ bena Kilishitu bajinga mu Kolose kuyuka maana alumbuluka a kuyuka kyaswa muchima wa Lesa ‘pa kuba’mba bendenga monka mukebela Yehoba mwa kumutokeshesha ku muchima.’ (Kolo. 1:9, 10) Inge mwatendeka mwingilo wa bukulumpe jikwabo, ketekelai mwi Yehoba kwi mukosesha, kutekanya ne kwikala na lusekelo. Mu ano moba a kupelako, bantu ba Lesa babena kukebewa bakafunga ba kwibatundaika pa kuba’mba bakoseshe bulunda bwabo ne Lesa. Nanchi mukabwela na kukosesha balongo ne banyenga yenu mu kipwilo nyi?