KYAMBO kya “EUREKA”! kilumbulula’mba “Nekitana!” Mu kitota kya bu 19 mu California, U.S.A., muntu inge watana ngolode wabijikanga bino byambo. Nangwa byonkabyo, ba Charles Taze Russell ne bakwabo Bafunda Baibolo, bataine kintu kyanema bingi, ko kuba’mba bukine bwa mu Baibolo. Kabiji bakebeshenga bingi kubulako bakwabo buno bukine.

Mu kimye kya mayoo mu 1914, bantu bavula mu mizhi ikatampe bakonkene ne kwiya na kutamba filimu ye baitanga amba “Mashikopo wa Bilengwa na Lesa” (Photo-Drama of Creation) ye batambishanga pa maola atanu na asatu, walengelwe na Jibumba ja Bafunda Baibolo (I.B.S.A.). Uno filimu wajinga na bipikichala byawama, byajinga na misombelo yawama kabiji byaendejilenga pamo na jishimikila ne nyimbo yawama. Uno filimu waambile pa biji mu Baibolo, wamwesheshe bilengwa kufuma kimye kyatendekele bwikalo bwa bantu kukafika ku mpelo ya Bukalama bwa Myaka Kiumbi bwa kwa Yesu Kilishitu.—Lum. 20:4. *

Pano kyajinga byepi ku boba baikalanga mu mataunyi acheche ne mu mizhi? Pa kuba’mba babule kwikala na nzala ya ku mupashi, mu ñondo wa Kasalakanduba mu 1914, Jibumba ja Bafunda Baibolo (I.B.S.A) balupwile kifwanyikizho kyo baitanga’mba “Eureka”—kyo basendanga kyajinga na bipikichala nobe akya kyo baitanga’mba “Photo-Drama” mwajinga ne bibese bya mafilimu akwabo. Bamulengele pasatu, mutanshi wajinga mu milaka yavula: Ye batelanga’mba “Eureka X” muno mwajinga jishimikila ne nyimbo saka ibena kujila. Mukwabo wajinga “Eureka Y” muno mwajinga bipikichala byawama byaendanga. Ne wa busatu wajinga wa “Eureka Family Drama,” ba mulengele kuba’mba bamwingijishenga mu bisemi, mu uno mwajinga jishimikila ne nyimbo. Bapotele munkinyi wajinga na mutengo mucheche wa kwingijisha ye baitanga amba phonograph.

Kwa kubula kusenda kiñambañamba kikatampe kya kwingijisha pa kutambisha bifwanyikizho, Bafunda Baibolo bayanga na kutambisha bino bifwanyikizho mu kyalo kyonse, ne kutwala byambo bya Bufumu mu manyaunda akatataka. Kifwanyikizho kya mawitu kya “Eureka X” bekijizhanga mute nangwa bufuku. Kya “Eureka Y” baingijishanga kiñambañamba kyabulanga kwingijisha malaichi, bino baingijishanga malampi o baitanga amba carbide. Kyamba kya usopa kyaambile’mba, “twakonsha kutambisha bino bipikichala ku mapuzha aji onse.” Kyaubiwanga byepi bino!

 Bafunda Baibolo kechi basonkelanga bishimikwa bikatampe ne, pano bino bataine bishimikwa byo babulanga kusonkesha, nabiji bibamba bya pa sukulu, mazubo a mu makochi, pa biteshenyi bya shitima ne mu bibamba bya mu mazubo akatampe. Javula batambishanga pangye kwingijisha kisapi kitoka kyo balamika pa lubumbulu. Ba Anthony Hambuch banembele amba: “Banjimi balengele tubibanza tucheche mu majimi abo a bipangwa, ne kubikamo myandalo pa kwikala bantu pa kuba’mba beyowe mutanchi yense.” Abano balongo batambishanga kifwanyikizho kyo baitanga’mba “Eureka” baingijishanga kikochikala kyo bakashilanga ku motoka pa kusenda byonse bya kwingijisha, byola, mwa kulaala ne mwa kutekela kajo.

Baiyanga na kutamba kifwanyikizho kyo baitanga’mba “Eureka” bavulanga bingi. Mu kyalo kya United States, bantu 400 baishile na kutamba kino kifwanyikizho mu kishimikwa kya pa sukulu. Ku mapuzha akwabo, bantu baendanga palepa makilomita atanu na asatu kwiya na kutamba kifwanyikizho kya “Eureka.” Mu kyalo kya Sweden, bakinkalankulo bapwijile pa nzubo ya ba Charlotte Ahlberg “baumvwine bingi bulongo” pa kupwisha kuteleka ku kifwanyikizho. Bantu 1,500, baishile na kutamba kino kifwanyikizho kyaikejile ku mpuzha yajinga kwalepa ya mikochi mu kyalo kya Australia. Kyamba kya Usopa kyapaine sawakya wa kuba’mba pa masukulu acheche, ne pa masukulu akatampe, “bafunjishi ne baana basukulu batemenwe bingi bino bipikichala ne bijimba byawama bya malekodi.” Kifwanyikizho kya “Eureka” kyayile bingi nkuwa kabiji kyatanwanga ne mu mapunzha mobatambishisha mafilimu.

Kifwanyikizho kya “Eureka” kyajinga kingijisho kyawama kyo baingijishanga mu “Mwingilo wa Kufunjisha,” Bafunda Baibolo mo be batumanga kuya nakutendeka kufunjisha bantu. Bantu banga batambile kifwanyikizho kya “Eureka”? Kibelengelo kechi kyayukanyikwa ne. Bino “Bifwanyikizho” byavula batatwile kwibingijisha. Mu mwaka wa 1915 “bifwanyikizho” 14 pa bifwanyikizho 86 byobyo bapainenga sawakya kimye kyonse. Pa kupwa mwaka, baambile kuba’mba, bantu milyonyi umo batambile kino “Kifwanyikizho.” Bantu 30,000 batambile kino kifwanyikizho balombele mabuku alumbulula Baibolo.

Mamilyonyi a bantu batambile kino kifwanyikizho kya “Eureka,” bekivulukanga mu bwikalo bwabo. Mu byalo mwafikile kino kifwanyikizho ke mu Australia, kufika mu kyalo kya Argentina, South Africa ne pa jikuji jiji mu kyalo kya Britian, mu India ne pa jikuji jo batela’mba Caribbean. Bavula bataine bukine bwa mu Baibolo bwanema kukila ngolode ne kwamba’mba “Eureka!”