Buno bwipuzho bwanema bingi, kikatakata aba bafwisha bena kwabo. Bano bantu bakebesha bingi kuba’mba mu ntanda ipya bakekale pamo na bena kwabo bakasangulwa. Mwanamulume wafwilwa umo waambile’mba: “Amiwa ne mukazhami kechi twakebelenga masongola etu kupwa ne. Twakebelenga bingi kutwajijila kwingijila Lesa pamo myaka ne myaka. Kufumatu kimye kyafwile mukazhami kechi naleka kulanguluka bino ne.” Nanchi kujipo kintu kyakonsha kwitulengela kwikala na luketekelo lwa kuba’mba aba bakasanguka bakasongola nangwa kusongolwa nyi? Kechi twayuka ne.

Myaka yapitapo, mabuku etu aambanga amba, byambo byaambile Yesu pa lusanguko ne pa kusongola, wibitazhizhenga ku boba bakasangulwa ne kwikala pano pa ntanda ne kuba’mba aba bakasangulwa ne kwikala mu ntanda ipya kechi bakasongola ne. * (Mat 22:29, 30; Mako 12:24, 25; Luka 20:34-36) Byo kiji kuba’mba kechi twakonsha kukoselatu ku lubaji lumo ne, nanchi byambo byaambile Yesu wibitazhizhenga ku bakasangulwa ne kuya mwiulu nyi? Akitwayai twisambe pa byo ambile.

Akilangulukai byo kyajinga. (Tangai Luka 20:27-33.) Basadusea kechi baitabijile mu lusanguko ne. Onkao mambo, bamwesekele Yesu kupichila mu kumwipuzha bwipuzho pa mambo a lusanguko ne pa mambo a kusongola bukwe yobe. * Yesu wakumbwile’mba: “Baana ba mu buno bwikalo basongola ne kusongolwa, bino aba bo baitabizha amba bafwainwa kufika ku bobwa bwikalo ne kusanguka ku bafu kechi bakasongola nangwa kusongolwa ne. Kabiji kechi bakafwa ne, mambo bakekala nobe bamalaika ne kwikala baana ba Lesa kimye kyo bakasanguka.”—Luka 20:34-36.

Mambo ka mabuku etu kyo ambijile kuba’mba Yesu waambilenga pa lusanguko lwa pano pa ntanda? Kuji bintu bibiji byalengejile. Kitanshi, twamwene kuba’mba kampe Basadusea balangulukilenga pa bakasanguka ne kwikala pano pa ntanda ne kulanguluka’mba kyo kine kintu Yesu kyo akumbwijile kwesakana na byo balangulukilenga. Kya bubiji, Yesu wapezhezheko kwaamba pe Abalahama, Izaka ne Yakoba bashakulu ba kishinka bakasangulwa ne kwikala pano pa ntanda.—Luka 20:37, 38.

Nangwa byonkabyo, kyamweka Yesu waambilenga pa bakasangulwa ne kuya mwiulu. Ñanyi bishinka byakonsha kwitulengela kwamba bino? Twayai twambe pa bishinka bibiji byanema bingi.

“Aba bo baitabizha amba bafwainwa . . . kusanguka ku bafu.” Bashingwa ba kishinka bebatongola amba, “bo bafwainwa Bufumu bwa Lesa.” (2 Tesa. 1:5, 11) Bebatela’mba baoloka ne kwikala na bumi kupichila mu bukuzhi, onkao mambo, kechi bafwa na mambo a kuba’mba bebazhachisha amba bandengamambo ne. (Loma 5:1, 18; 8:1) Bano bobo baambapo amba ‘batokwa ne kuzhila’ kabiji basangulwa ne kuya mwiulu. (Lum. 20:5, 6) Bino paji lupusano, ku bantu bakasangulwa ne kwikala pano pa ntanda paji “ne babula koloka.” (Byu. 24:15) Nanchi bebetabizha amba “bafwainwa” luno lusanguko nyi?

 “Kechi bakafwa ne.” Mu ma Baibolo akwabo uno mukuku bamunemba’mba “lufu kechi luji na bulume pe abo ne.” Bashingwa inge bapwisha mwingilo wabo pano pa ntanda mu bukishinka basangulwa ne kuya mwiulu ne kwikala na mweo ubula kufwa. (1 Ko. 15:53, 54) Lufu kechi lwikala na bulume pa boba basangulwa ne kuya mwiulu ne. *

Kwesakana na byo twaambapo peulu, twakonsha kupwisha amba ka? Twakonsha kwamba’mba Yesu byo aambilenga pa kusongola ne kusongolwa ne pa lusanguko, waambilenga pa byo kikekala ku bakasangulwa ne kuya mwiulu. Umvwe momo atazhizhe, ko kuba’mba kino kilumbulula byavula byo kikekala ku bakasangulwa ne kuya na kwikala na bumi mwiulu: Kechi bakasongola ne kufwa ne, bakekala nobe ba malaika, ne kwikala bilengwa bya mupashi. Abino byakonsha kuleta mepuzho avula bingi.

Kitanshi, mambo ka Yesu kyo aambijilenga pa lusanguko lwa kuya mwiulu byo akumbwilenga Basadusea, balangulukilenga pa lusanguko lwa kwikala pano pa ntanda? Yesu kechi wakumbulanga bakajimbuluzhi kwesakana na byo balangulukanga ne. Bayudea byo bamwambijile kwi bobilapo kiyukilo, wibambijile’mba: “Onaunai ino nzubo ya Lesa, ne amiwa nkeimika mu moba asatu.” Yesu wayukile byo balangulukilenga pa nzubo ya Lesa, “bino ino nzubo ya Lesa yo aambilengapo wajinga mubiji wanji.” (Yoa. 2:18-21) Yesu kechi wakebelenga kukumbula bano Basadusea, babujile kwitabila mu lusanguko ne kuyuka’mba kuji bamalaika ne. (Mana. 23:9; Mat. 7:6; Byu. 23:8) Bino wakebelenga kwibasolwela bukine pa lusanguko lwa kuya mwiulu pa kuba’mba baana banji ba bwanga ba kishinka bomvwishe, bajinga na luketekelo lwa kusangulwa ne kuya mu mwiulu.

Kya bubiji, mambo ka Yesu kyo apezhejileko kwamba pe Abalahama, Izaka ne Yakoba, banabalume bakasangulwa ne kwikala pano pa ntanda? (Tangai Mateo 22:31, 32.) Saka akyangye kwamba pa bano banabalume ba kishinka, Yesu, waambile “pa mambo a kusangula bafu.” Bino byambo bibena kumwesha kuba’mba Yesu watatwile kwamba pa bakasangulwa ne kwikala pano pa ntanda. Na mambo a kuba’mba Basadusea baitabijile mu byanembele Mosesa, Yesu waingijishe byambo byaambile Yehoba kwi Mosesa ku kipupu kyatemenenga mujilo kumwesha kuba’mba lusanguko lwa kwikala pano pa ntanda lwa kine, ne kumwesha kuba’mba kyo kyaswa muchima wa Lesa.—Lupu. 3:1-6.

Kya busatu, inge kya kuba byambo byaambile Yesu pa lusanguko ne kusongola wibitazhizhe ku bakasangulwa ne kuya mwiulu, nanchi kino kilumbulula’mba aba bakasangulwa ne kwikala pano pa ntanda bakasongola ne kusongolwa nyi? Baibolo kechi wakumbula buno bwipuzho ne. Inge Yesu waambilenga pa bakasangulwa ne kuya mwiulu, ko kuba’mba bino byambo byo aambile kechi bimweshatu nangwa pacheche amba aba bakasangulwa ne kwikala mu ntanda ipya bakasongola ne kusongolwa ne.

Bino Baibolo waamba’mba lufu lo lupwisha masongola. Nangwa byonkabyo, mwanamulume wafwilwa nangwa mwanamukazhi kechi bakonsha kwipamo mambo inge kebakebe kusongola nangwa kusongolwa jikwabo ne. Kuba bino ke kufuukulapo kwa muntu mwine, kabiji aba bafuukulapo kusongola nangwa kusongolwa kechi twafwainwa kwibalengulula ne.—Loma 7:2, 3; 1 Ko. 7:39.

Nangwa byonkabyo, twakonsha kwikala na mepuzho avula bingi pa mambo a byo kikekala mu ntanda ipya. Onkao mambo kechi twafwainwa kutayanga kimye na kulanguluka pa mikumbu ya ano mepuzho ne, twafwainwa kupembelela ne kumona byo kikala. Twafwainwa kuyuka kuba’mba: Bantu ba lukokelo bakasangalala bingi, mambo Yehoba ukekusha michima ya byonse ne byonse byo tukeba mu jishinda jawama.—Sala. 145:16.