Davida wanembele’mba, “kechi namwenepo waoloka walekelelwa ne, nangwa bana banji saka balomba kajo ne.” Waambile bino byambo na mambo a byo apichilemo mu bwikalo bwanji. Wayukile kuba’mba Lesa kechi ulekelela bantu banji ne. (Sala. 37:25) Byambo byaambile Davida kechi bilumbulula’mba kafwako mupopweshi wa Lesa ukabula kuyanda nangwa kumanyikwa ne.

Bimye bimo Davida wayandanga bingi. Kimye kimo kyo ayanjile bingi kyajinga kimye kyo anyemenenga Saulo. Davida kechi wajinga na kajo ne, o ene mambo o alombejile shinkwa wa kuja na bantu bo ajinga nabo. (1 Sam. 21:1-6) Onkao mambo, pa kyo kimye Davida ‘walombele kajo.’ Nangwatu pa kyokya kimye kyakatezhe, wayukile kuba’mba Yehoba kechi wamulekelela ne. Twayuka bino mambo kafwako nangwa pamo po tutanga kuba’mba Davida wapopwejile kuba’mba bamupepo kajo ne.

Tutanga byambo bya kwa Yesu mu Mateo 6:33 bya kuba’mba Lesa ukamwenanga bintu bapopweshi banji bakishinka batangizhako bya Bufumu mu bwikalo bwabo. Yesu waambile’mba: “Onkao mambo, twajijilai na kukeba Bufumu patanshi ne bololoke bwanji, ne bino bintu byonse bikemubikilwapo.” Bino Yesu waambile ne kuba’mba kimye kimo “balongo” banji bakekalanga na nzala na mambo a lumanamo. (Mat. 25:35, 37, 40) Kino kyo kyamwekejile mutumwa Paulo. Pa bimye bimo waikalanga na nzala ne kufwa kilaka.—2 Ko. 11:27.

Yehoba witubula kuba’mba tukapita mu lumanamo lwa misango ne misango. Wakonsha kwituswisha kwikala na nzala pa bimye bimo pa kuba’mba tushiine Diabola. (Yoba 2:3-5) Bena Kilishitu bamo, nabiji boba bajinga mu makampu a lumanamo a bena Nazi bamanamine bingi. Bakamonyi kechi bebapelenga kajo kawaina ne, bakebelenga kuba’mba basankilepo bukishinka bwabo. Bakamonyi bakishinka batwajijile kukokela Yehoba, ne aye kechi wibalekelejile ne. Lesa waswishishe kuba’mba bamaname mu jino jishinda byonka byo aswisha bena Kilishitu bonse kwibamanyika na lumanamo lwa misango ne misango. Nangwa byonkabyo, Yehoba ukwasha bonse bo bamanyika na mambo a jizhina janji. (1 Ko. 10:13) Kimye kyonse twafwainwa kuvulukanga byambo biji pa Filipai 1:29 bya kuba’mba: “Anweba kechi mwaitabijiletu mwi Kilishitu ne, bino mwamanamine na mambo a aye.”

Yehoba walaya kuba’mba ukekala na bakalume banji. Isaya 54:17 waamba kuba’mba: “Kafwako kyela nangwa kimo kyo bakabunda kya kukulwishako obewa kikengila bulongo ne.” Uno mulaye ne ikwabotu itulengela kushiinwa kuba’mba bantu ba Lesa bazhikijilwa mu bujibumba. Bino mwina Kilishitu wakonsha kupita mu bya malwa, kimo kimye wakonsha ne kufwa.