MYAKA ibiji kino saka kikyangye kubiwa, amiwa ne mukwetu mishonale aye Evelyn Trabert twapwishishe Sukulu wa Baibolo wa Gileada wa Watchtower wa buna waikejile kwipi na Ithaca, mu New York. Betutumine kuya na kwingijila mu Santa Ana. Bino saka nkyangye kutwajijila kushimikizha byo naingila mu mwingilo wa bumishonale pepi na myaka 29, lekai nemushimikizheko kyalengejile’mba mfuukulepo kwingila uno mwingilo.

Mu 1923, mwaka ye nasemekelwe, bansemi bami ba John ne ba Eva Olson, baikalanga mu Spokane, mu Washington, ku U.S.A. Bajinga mu chechi ya Lutherans, bino kechi baswile byafunjishanga chechi yabo pa mujilo wa helo ne, mambo bakankalwanga kwibikwatakanya na byo baitabijile mwi Lesa wa butemwe. (1 Yoa. 4:8) Batata baingilanga ku kampanyi waoshanga bashinkwa, kabiji juba jimo bufuku bo baingilanga nabo bebabuujile’mba Baibolo kechi ufunjisha’mba kuji mpunzha ya helo ko bayanjisha bantu ne. Ponkapotu bansemi bami batendekele kufunda na Bakamonyi ba kwa Yehoba kabiji bafunjile bya kine Baibolo byo afunjisha pa byo kikala inge muntu wafwa.

Najingatu na myaka itanu na ina, bino nkivuluka bansemi bami byo besambilenga na kizaku pa bukine bwa mu Baibolo bo bataaine. Kizaku kyabo kyabayijileko byo bafunjile’mba jizhina ja Lesa wa kine, Yehoba,  kabiji bakasulukile ku lufunjisho luvulañanya lwa Balesa Basatu. Natendekele kulama ano mafunjisho a mu Binembelo ne kufunda ‘bukine bukasulula bantu.’ (Yoa. 8:32) Onkao mambo, kechi namonanga’mba lufunjisho lwa Baibolo luleta mukose ne, bino neyowanga kubalaula Mambo a Lesa kimye kyonse. Nangwa kya kuba najinga na bumvu, nayanga na bansemi bami mu mwingilo wa kusapwila. Babatizhiwe mu 1934. Mu 1939, saka nji na myaka 16, ne amiwa naikele wa mwingilo wa Yehoba wabatizhiwa.

Mu kimye kya kisalo mu 1940, bansemi bami bapoteshe nzubo, kabiji atweba basatu twatendekele mwingilo wa kimye kyonse ne kwikala bapainiya mu Coeur d’Alene, mu Idaho. Twaikalanga mu nzubo ya kusonkela peulu ya kishimikwa mo balungishishanga myotoka. Kabiji mu nzubo yetu mo mo twapwilanga. Pa kyokya kimye, bipwilo bichechetu byo byajinga na Mazubo a Bufumu, onkao mambo, basambakenanga mu mazubo nangwa mu bibamba bya kusonkela.

Mu 1941, amiwa ne bansemi bami twatainwe ku kubuñana kwajinga mu St. Louis, mu Missouri. Juba ja pa Mulungu jajinga “Juba ja Baana,” kabiji aba bajinga na myaka ya kusemwa 5 kufika ku 18 baikejile kulutwe kwipi na mutuntamo. Jashi byo jafikile pene pa kishina, Mulongo Joseph F. Rutherford waambijile atweba bakyanyike amba: “Anweba bonse . . . baana . . . mwaswa kukookela Lesa ne Mfumu wanji, imanaiko!” Bonse twaimene. Kepo Mulongo Rutherford abijikile’mba: “Monai bakamonyi ba katataka ba Bufumu bakila pa 15,000!” Akino kyankwashishe kukosesha kufuukulapo kwami kwa kwikala painiya wa kimye kyonse mu bwikalo bwami.

Byo papichile bañondo bacheche kufuma po twaikejile na kubuñana mu St. Louis, kisemi kyetu kyavilukijile ku kabeta ka ku bulenge bwa California. Byo twafikile kokwa mu muzhi wa Oxnard, mwingilo wetu wajinga wa kulenga kipwilo. Twaikalanga mu kazubo ka kukoka na motoka kajingatu na mwanya umo. Pa juba pa juba bufuku “naanshikanga” pa tebulu wa kujiilapo kabiji kino kyapuseneko bingi na kimye kyo najinga na kibamba kya kulaalamo!

Saka tukyangye kufika mu California, kyalo kya Japan kyalukukile Pearl Harbor mu Hawaii, pa 7 December 1941. Juba jalondejilepo, kyalo kya United States kyatwelele mu Nkondo ya Bubiji ya Ntanda Yonse. Bakulumpe balama kyalo babikileko muzhilo wa kuzhimya malaichi, kabiji abwa bufuku twazhimishe malaichi onse. Maato akatampe a bashilikale a bena Japan azhokolokelenga kitulu kya California, kabiji mfishi yakwashisheko kuba’mba babule konauna bintu byo bakebelenga byajinga ku mutunta.

Byo papichile bañondo, mu September 1942, twatainwe ku kubuñana kwa New World Theocratic Assembly mu Cleveland, mu Ohio. Akwa twatelekelenga ku jashi jaambile Mulongo Nathan H. Knorr ja kuba’mba “Nanchi Mutende Ukatwajijila Nyi?” Walondolwele Lumwekesho kitango 17, kyaamba pa “lukinyama” “wajingapo, pakuba luno ufwapo, bino uji pepi kufuma mu kalengwa kabula kupela.” (Lum. 17:8, 11) Mulongo Knorr walondolwele’mba “lukinyama” wajinga kipamo kya League of Nations kyalekele kwingila mingilo yakyo mu 1939. Baibolo waambijile jimo amba pa kino kipamo kya League pakapingakena kikwabo, ne kuleta mutende wa pa kakimye kacheche. Byonkabyo, mu mwaka wa 1945, Nkondo ya Bubiji ya Ntanda Yonse yapwile. Kepo “lukinyama” asolokele jikwabo ne kwikala United Nations. Pa kyokya kimye Bakamonyi ba kwa Yehoba babayisheko mwingilo wabo wa kusapwila ntanda yonse, kabiji twamona kuyilako palutwe kukatampe kufumatu kyokya kimye!

Abuno bungauzhi bwankwashishe kuyuka biji kulutwe. Byo babijikile’mba Sukulu wa Gileada ukatendeka mwaka ubena kwiya, kizaku kyami kya kwikala mishonale kyabayijileko. Mu 1943, bantumine kuya na  kwingila bupainiya ku Portland, mu Oregon. Mu oa moba, twaingijishanga bijimba bya malekodi kujizha majashi pa kibelo kya bena nzubo, apa bino twibapa mabuku alumbulula Baibolo aamba pa Bufumu bwa Lesa. Awa mwaka yense, nalangulukilengatu pa mwingilo wa bumishonale.

Mu 1944, natemenwe bingi pa kutambwila lwito lwa kuya ku Gileada na mulunda nami aye Evelyn Trabert. Pa bañondo batanu, bafunjishi betu betubuulanga byo twafwainwa kutaana lusekelo mu lufunjisho lwetu lwa Baibolo lwa pa bunke. Twatemenwe bingi kwipelula kwabo. Bimye bimo byo twajanga kajo, bano balongo bo betuletelanga kajo pa matebulu. Twapwishishe sukulu pa 22 January 1945.

Amiwa ne ba Evelyn, ba Leo ne ba Esther Mahan twafikile ko betutumine na kwingijila ku El Salvador mu June 1946. Twataaine kuba’mba buno bujimi ‘bwatoka kala bwafwainwa kunowa.’ (Yoa. 4:35) Kyamwekele kyo naji kwamba ku ntendekelo ya jino jishimikila kyamwesha byazhingijile bantangi ba bupopweshi. Mulungu umo kino saka kikyangye kubiwa, twajinga na kubuñana kwa mwanzo kutanshi mu Santa Ana. Twasampenye bingi kuba’mba kukekala jashi ja mvula bantu kabiji twatemenwe bingi byo kwatainwe bantu pepi na 500. Mu kifulo kya kuchina kufuma mu yewa muzhi, po po twakizhizhemo kukeba kwikala ne kukwasha bantu ba michima ya kishinka. Nangwa kya kuba bantangi ba bupopweshi bajimwineko bantu kubula kutanga Baibolo kabiji bantu bacheche bo bajingatu na ma Baibolo, bavula bajinga na nzala ya bukine. Betusanchijile bingi na mambo a kwibikako kwetu kwa kufunda Kisipanishi pa kuba’mba twibafunjishe pe Lesa wa kine Yehoba, ne pa mulaye wanji wawama wa kubwezha Paladisa pano pa ntanda.

Rosa Ascencio wajinga umo pa bantu batanshi bo nafunjishanga. Byo atendekele kufunda Baibolo, wafumineko ku mwanamulume ye aikalanga nanji. Kepo uno mwanamulume atendekele kufunda Baibolo. Besongwele ne kubatizhiwa, kabiji baikele Bakamonyi ba mukoyo ba kwa Yehoba. Rosa ye wajinga mutanshi kwikala painiya pa bantu ba mu Santa Ana. *

Rosa wajinga na shitolo mucheche. Inge waya mu mwingilo wa kusapwila, washinkanga shitolo wanji ne kuketekela’mba Yehoba ukamupa bintu byo akajilwa. Inge washinkula jibiji shitolo wanji pa kupitapo maola acheche, bantu bavula baiyanga na kupota bintu. Wimwenejile bukine bwa byambo biji mu Mateo 6:33 kabiji wajinga wa kishinka kufikatu ne byo afwile.

Juba jimo, pulishiti wakonkakwa wafwakashijile mwanamulume mwina nzubo yo twasonkelanga atweba bamishonale batanu na umo kabiji wamujimwineko amba inge atwajijile kwitusonkesha mu nzubo yanji, aye ne mukazhanji bakebapanga mu chechi. Uno mwina nzubo wajinga musulu wayukanyikwa bingi, kabiji washikilwe byubilo byatama byajinga na bantangi babupopweshi kabiji kechi waumvwijile byo bamubuujile ne. Kabiji wabuujile pulishiti amba kechi wakonsha kwakamwa nangwa bamupanga mu chechi ne. Witubuujile’mba twakonsha kutwajijila kwikala kufika ne kimye kyo tukakeba kufumamo.

Mu muzhi mukatampe wa San Salvador, mishonale mukwabo wafunjilenga Baibolo na mukazhi wa shayuka  wa bya kulengalenga aye Baltasar Perla. Uno mwanamulume uji na muchima wawama walekele kwitabila mwi Lesa panyuma ya kumona bukamfutumfutu bwa bantangi babupopweshi. Kimye kya kushimika ofweshi wa musampi byo kyafikile, ba Baltasar nangwa kya kuba kechi bajinga mu bukine ne, bepaine kunemba byafwainwa kwikala kino kishimikwa kabiji bashimikile kino kishimikwa kyatutu.

Panyuma ya kupwanañana na bantu ba Yehoba pa uno mwingilo wa kushimika, ba Baltasar bashiinwe’mba bataana bupopweshi bwa kine. Babatizhiwe pa 22 July 1955, kabiji palutwe kacheche bakazhi babo ba Paulina nabo babatizhiwe. Baana babo bonse babiji babena kwingijila Yehoba mu bukishinka. Baana babo ba balume abo ba Baltasar, Jr., baingila myaka 49 pa Betele wa ku Brooklyn, ko babena kukwasha mwingilo ubena kukomenakotu wa kusapwila ntanda yonse kabiji luno baji mu Kavoto ka Musampi wa ku United States. *

Byo twatendekele kwikala na kushonkena mu San Salvador, Mulongo Perla witukwashishe kuba’mba betuswishe kwingijisha kishimikwa mo bobila bisela bya kukosesha mubiji. Pa kutendeka, twaingijishetu bipona bicheche byajinga ku lubaji lumo; bino na mapesho a Yehoba, twayilengatu na kuvula pa mwaka pa mwaka kufikatu ne kishimikwa byo kyayujile kabiji kyatendekele ne kukepa! Pa bino bimye bya lusekelo, namonañananga na bantu bo nafunjishanga Baibolo. Fwanyikizhai byo naumvwine bantu bo nafunjishanga kala byo bangyukishe ku “bankana bami” ko kuba’mba babatizhiwe katataka bo bafundanga nabo!

Pa kubuñana kumo, mulongo umo waishile ko nji ne kumbuula’mba ubena kukeba kulomba lulekelo lwa mambo. Kechi namuvulukilemo ne, kabiji nakebeshenga kumvwa byo akebelenga kwamba. Waambile’mba, “Najinga pa bansongwalume bemwashilenga mabwe mu Santa Ana.” Pa kikye kimye waingijilenga Yehoba pamo ne amiwa! Nasangalele bingi. Uno mwisambo wandengejile kushiinwa’mba mwingilo wa kimye kyonse ye mwingilo muji mfweto muntu ye akonsha kusala.

Pepi na myaka 29, natwajijile kwingila mwingilo wa bumishonale mu El Salvador, patanshi naingijile mu Santa Ana, kepo mu Sonsonate, ne mu Santa  Tecla kabiji napezhezheko kwingijila mu San Salvador. Mu 1975 panyuma ya kulombapo, nafuukwilepo kuleka mwingilo wa bumishonale ne kubwela ku Spokane. Bansemi bami ba kishinka bakotele bakebelenga’mba nebakwashenga.

Batata byo bafwile mu 1979, natendekele kulama Bamama, kabiji bayilengatu na kukooka ne kupwa bulume pachepache. Kufuma kyokya kimye baikele myaka itanu na isatu, ne kufwa bafwile na myaka 94. Pa kyokya kimye kya makatazho, nakookele ku mubiji ne mu milanguluko. Ano makatazho andengejile kwikala na mantomya achila pa mubiji akolelenga. Lulombelo ne bukwasho bwa Yehoba byandengejile kwikala na lusekelo, kabiji nachinchikile luno lweseko. Kyajingatu byonka byaambile Yehoba amba, “kufika ne ku bukote bwenu . . . , nemusendanga; kabiji yami nkemupapanga ne kwimupulusha.”—Isa. 46:4.

Mu 1990 navilukijile ku Omak, mu Washington. Akwa naumvwine jikwabo amba nakonsha kwingijila mu nyaunda ya mulaka wa Kisipanishi, kabiji bavula bo nafunjishanga Baibolo babatizhiwe. Mu November 2007, nakankelwe kulama nzubo yami mu Omak, onkao mambo, navilukijile mu kibamba kyajinga kwipi na muzhi wa Chelan, mu Washington. Kufumatu kyokya kimye, kipwilo kya Kisipanishi kyatendekele kundama, kabiji nsanta bingi. Byo njitu bunke Kamonyi wa kikulumpe kuno, balongo ne banyenga “bansala” kwikala “nkambo” yabo.

Nangwa kya kuba nafuukwilepo kubula kusongolwa ne kwikala na kisemi pa kuba’mba ngikale na kimye kyabaya kya kwingila ‘kwa kubula bya kuntabakanya,’ nji na baana ba ku mupashi bavula. (1 Ko. 7:34, 35) Nalangulukilepo kuba’mba mu buno bwikalo, kechi nakonsha kwikala na bintu byonse ne. Onkao mambo, natangizhako bintu bitanshi, ko kuba’mba kwipana kwami kwingijila Yehoba na muchima yense. Mu ntanda ipya mukekala kimye kyabaya kya kwiyowa kwingila mingilo ikwabo yonse yawama. Kinembelo kyo natemwa ke Salamo 145:16, kitulaya’mba Yehoba ‘ukekusha michima ya byonse byumi.’

Byo nji na myaka 91, nkijitu na butuntulu bwa mubiji bwawama, onkao mambo, natwajijila kwingila bupainiya. Mwingilo wa bupainiya unkwasha kubambakana ne kulengela bwikalo bwami kuwama. Kimye kitanshi kyo nafikile mu El Salvador, mwingilo wa kusapwila po po atendekelengatu. Nangwa kya kuba Satana watwajijilatu na kukanya mwingilo, mu kyokya kyalo luno muji basapwishi kukila pa 39,000. Kino kyakosesha bingi lwitabilo lwami. Kyamwekatu patoka kuba’mba, mupashi wazhila wa Yehoba ubena kukwasha kwibikako kwa bantu banji!