1, 2. Ñanyi luzhikijilo lwakebewenga ku mwana wa mwanamukazhi, kabiji mambo ka?

BUNGAUZHI butanshi bwanembwa mu Baibolo bwanema bingi mu kufika kwa kyaswa muchima wa Yehoba. Byo aambilenga mulaye wa mu Edena, Lesa wa kine waambile’mba: “Nkalenga obewa [Satana] ne mwanamukazhi ke muji ba mulwanyi na mulwanyi, kabiji ne wa mu kisemi kyobe [mwana] ne wa mu kisemi kyanji pamo.” Buno bulwanyi bukabaya byepi? Yehoba waambile’mba: “Aye [mwana wa mwanamukazhi] ukafumpa mutwe wobe [Satana], ne obewa ukafumpa kashiko kanji.” (Nte. 3:15) Bulwanyi pakachi ka muloolo ne mwanamukazhi bukabaya bingi kya kuba Satana ukengila na ngovu kukeba konauna mwana wa mwanamukazhi.

² O ene mambo nyimbi wa masalamo o ajijiile mu lulombelo kwi Lesa pa mambo a bantu banji basalwa amba: “Talai, balwanyi benu bauba kyungwe; ne abo bemushikwa bainuna mitwe yabo. Bebachibila kije bantu benu mwa kwibajimukila, ne kumvwañana bene na bene mwa kwibobila bibi benu bo mulama. Abo amba, twayai, tukebavizhe kechi bakikale mukoka wa bantu ne.” (Sala. 83:2-4) Ndonda ya kisemi mwafumine mwana wa  mwanamukazhi beizhikijile kuba’mba babule kwiizhiya ne kwiitamisha. Pa kuba’mba obe kino, Yehoba wabikileko lunengezho lukwabo lwa mwayila mizhilo lukalamawizha kufika kwa kyaswa muchima wanji.

3, 4. (a) Lulayañano lwa Mizhilo lwatendekele kwingila kimye ka, kabiji kisaka kya bena Isalela kyaswile kuba ka? (b) Lulayañano lwa Mizhilo lwazhikijile ñanyi kintu?

³ Ba mu kisemi kya kwa Abalahama, Izaka ne Yakoba byo basemumwinenga ne kuvula, Yehoba walengele kisaka kufuma mwi abo, ko kuba’mba kisaka kya bena Isalela ba kala. Kupichila mwi Mosesa, Yehoba walayañene lulayañano lwanema na kisaka kupichila mu kwibapa Mizhilo, kabiji kisaka kya Isalela kyaswile kwiikookela. Baibolo waamba’mba: ‘Kepo [Mosesa] ashikwile buku wa lulayañano ne kumutanga ku matwi a bantu; kumvwa abo baambile’mba: Byonse byaamba Yehoba, tukebyubanga ne kwibikookela. Ponkapo Mosesa washikwile mashi [a bañombe bo batapishe] ne kwiasupila pa bantu ne kwamba’mba: Ano o mashi a lulayañano lo alayañana nenu aye Yehoba pa bino byambo byonse.’—Lupu. 24:3-8.

⁴ Lulayañano lwa Mizhilo lwatendekele kwingila ku Mutumba wa Sinai mu 1513 B.C.E. Kupichila mu luno lulayañano kisaka kya bena Isalela bekipaatwile kwikala kisaka Lesa kyo asajile. Yehoba waikele ‘Nchibamambo wabo, Upana mizhilo wabo kabiji Mfumu wabo.’ (Isa. 33:22) Bintu byapichilemo bena Isalela bimwesha kyakonsha kumweka inge mizhilo yaoloka ya Lesa beilondela nangwa babula kwiilondela. Byo kiji kuba’mba Mizhilo yakainye kusongola nangwa kusongolwa ku bantu babulanga kupopwela Lesa ne kwivwanga mu bupopweshi bwa bubela, yalengejile kuzhikijila ndonda ya kisemi kya kwa Abalahama kubula kwiitamisha.—Lupu. 20:4-6; 34:12-16.

5. (a) Lulayañano lwa Mizhilo lwaletele ñanyi jishuko ku bena Isalela? (b) Mambo ka Lesa o akaine bena Isalela?

⁵ Lulayañano lwa Mizhilo lwapaine ne lunengezho lwa buñanga, kumwesha lunengezho lukatampe lukobiwa kulutwe. (Hebe. 7:11; 10:1) Kabiji kupichila mu luno lulayañano bena Isalela bajinga na jishuko ja kwikala “bufumu bwa bañanga,” kikulutu bakookela mizhilo ya Yehoba. (Tangai Kulupuka 19:5, 6.) Nangwa byonkabyo, bena Isalela bakankelwe kulondela uno mukambizho. Mu kifulo kya kunemeka kwiya kwa kwa Mesiasa, lubaji lutanshi lwa mwana wa kwa Abalahama, akino kisaka kyamukaine. Onkao mambo, Lesa wakaine kino kisaka.

6. Mizhilo yaingijile ñanyi mwingilo?

⁶ Bena Isalela byo bakankelwe kwikala ba kishinka kwi Yehoba ne kulengela bonse kubula kwikala bañanga ba bufumu, kechi kyalumbulwile’mba Mizhilo yakankalwa ne. Mizhilo yazhikijile mwana ne kutangijila bantu kwi Mesiasa. Kilishitu byo aishile ne  kuyukanyikwa, Mizhilo yaingijile mwingilo wayo. Baibolo waamba’mba, “Kilishitu yo mpelo ya Mizhilo.” (Loma 10:4) Nangwa byonkabyo, bwipuzho ke bwa kuba’mba: Pano bañanyi bakekala bañanga ba bufumu? Yehoba Lesa wabikileko lunengezho lukwabo lwa mwayila mizhilo lwa kulenga kisaka kipya.

7. Ñanyi kintu Yehoba kyo aambijile jimo mwi Yelemiya pa mambo a lulayañano lupya?

⁷ Kala lulayañano lwa Mizhilo saka bakyangye kwilufumyapo, Yehoba waambijile jimo mwi ngauzhi Yelemiya amba ukalayañana na kisaka kya bena Isalela “lulayañano lupya.” (Tangai Yelemiya 31:31-33.) Luno lulayañano kupusanako na lulayañano lwa Mizhilo lwalengejile kulekelwa mambo kwa kubula kupana bitapisho bya banyama. Lwakonsheshe kuba byepi kino?

8, 9. (a) Mashi a kwa Yesu aichikile engila ñanyi mwingilo? (b) Ñanyi jishuko jaikele na boba baji mu lulayañano lupya? (Monai kipikichala kitanshi.)

⁸ Byo papichile bitota bya myaka, Yesu watendekeshe Kijiilo kya Nkambo kya Mabanga pa Nisanyi 14, mu 33 C.E. Byo aambilenga pa katomeno mwajinga binyu, wabuujile batumwa banji ba kishinka 11 amba: “Kano katomeno lo lulayañano lupya lukatatula kimye kyo nkemwichijila mashi ami.” (Luka 22:20) Mu jishimikila ja kwa Mateo muji byambo byaambile Yesu pa mambo a binyu amba: “Kano katomeno o ‘mashi ami a lulayañano,’ akechikila bavula kuba amba mambo abo akalekelwe.”—Mat. 26:27, 28.

⁹ Mashi a kwa Yesu aichikile o aikajika lulayañano lupya. Ano mashi alengela kulekelwa mambo jimotu. Yesu kechi uji mu lulayañano lupya ne. Byo abula mambo, kechi ukebewa kumulekelako mambo ne. Bino Lesa waingijisha buneme bwa mashi a kwa Yesu aichikile ku baana ba kwa Adama. Kabiji wakonsha ne kutongola bantu bamo ba kishinka kwikala “baana” banji kupichila mu kwibashinga mupashi wazhila. (Tangai Loma 8:14-17.) Byo bebamona kwi Lesa amba mambo bafwao, mu jishinda jikwabo bekala nobe Yesu Mwana Lesa wabula mambo. Bano bashingwa bakekala ‘banswanyi ba kuswana pamo na Kilishitu’ ne kwikala na jishuko ja kwikala “bufumu bwa bañanga.” Jino jajinga jishuko jafwainwe kwikala na bena Isalela byo balondejilenga Mizhilo. Byo aambilenga pa ‘banswanyi ba kuswana pamo na Kilishitu,’ mutumwa Petelo waambile’mba: “Anweba ‘mwi kisaka kyasalululwa, mwi ba buñanga bwa bufumu, kisaka kyazhila, bantu bo enonkejile mwine Lesa kuba amba musapwile ku mapunzha onse byawamisha’ bya yewa wimwichile byo mwajinga mu mfishi amba mwiye mu kyeya kyanji kya kukumya.” (1 Pe. 2:9) Lulayañano lupya lwanema bingi! Lwalengela baana ba bwanga ba kwa Yesu kwikala lubaji lwa bubiji lwa mwana wa kwa Abalahama.

10. Lulayañano lupya lwatendekele kwingila ñanyi kimye, kabiji mambo ka o lwatendekele kwingila pa kyokya kimye?

¹⁰ Lulayañano lupya lwatendekele kwingila ñanyi kimye? Kechi lwatendekele kimye Yesu kyo elwambilepo pa bufuku bwanji bwapeleleko pano pa ntanda ne. Pa kuba’mba lutendeke kwingila, mashi a kwa Yesu bafwainwe kwiechila ne buneme bwa mashi bafwainwe kwibupana kwi Yehoba mwiulu. Kabiji mupashi wazhila bafwainwe kumwitulwila pa boba bakekala ‘banswanyi ba kuswana pamo na Kilishitu.’ Onkao mambo, lulayañano lupya lwatendekele kwingila pa Pentekosita mu 33 C.E. kimye baana ba bwanga ba kishinka ba kwa Yesu kyo bebashingile mupashi wazhila.

11. Lulayañano lupya lwalengejile byepi Bayudea ne Bangetila kwikala mu bena Isalela ba ku mupashi, kabiji banga baji mu lulayañano lupya?

¹¹ Nangwa kya kuba lulayañano lwa kala ‘lwaalukile ke lwatutu’ kimye Yehoba kyo  abijikile mwi Yelemiya amba ukalayañana lulayañano lupya na bena Isalela, kechi lwakipwile ne, kufikatu ne lulayañano lupya byo lwatendekele kwingila. (Hebe. 8:13) Kino byo kyaubiwe, Lesa wamonanga Bayudea ne Bangetila baitabila babujile kuya ku mukanda mu jishinda jimotu, mambo ‘mukanda wabo wa kine ke yewa wa mu muchima na mambo a mupashi kechi na mambo a mizhilo yanembwa ne.’ (Loma 2:29) Byo alayañene nabo lulayañano lupya, Lesa wabikile mizhilo yanji “mu milanguluko yabo ne kwiinemba mu michima yabo.” (Hebe. 8:10) Bonse baji mu lulayañano lupya baji 144,000, balenga kisaka kipya, ko kuba’mba “bena Isalela ba Lesa,” bena Isalela ba ku mupashi.—Nga. 6:16; Lum. 14:1, 4.

12. Lulayañano lwa Mizhilo ne lulayañano lupya lwipasha byepi?

¹² Lulayañano lwa Mizhilo ne lulayañano lupya lwipasha byepi? Lulayañano lwa Mizhilo lwajinga pakachi ka Yehoba ne bena Isalela ba kisemwa; kabiji lulayañano lupya luji pakachi ka Yehoba ne bena Isalela ba ku mupashi. Mosesa wajinga ñambi wa lulayañano lwa kala; Yesu ye Ñambi wa lulayañano lupya. Lulayañano lwa Mizhilo lwaikajikilwe na mashi a nyama; lulayañano lupya lwaikajikilwe na mashi a kwa Yesu aichikile. Kabiji kisaka kya bena Isalela kyakwatankene pamo kupichila mu lulayañano lwa Mizhilo mwi Mosesa; aba baji mu lulayañano lupya bakwatankana mwi Yesu, Mutwe wa kipwilo.—Efi. 1:22.

13, 14. (a) Lulayañano lupya lwakwatankana byepi na Bufumu? (b) Ñanyi kintu kikebewa pa kuba’mba bena Isalela ba ku mupashi bakalame pamo na Kilishitu mwiulu?

¹³ Lulayañano lupya lwakwatankana na Bufumu mambo lwalengela’mba kwikale kisaka kyazhila kikekala bamfumu ne bañanga mu Bufumu bwa mwiulu. Kino kisaka kyalengwa na lubaji lwa bubiji lwa mwana wa kwa Abalahama. (Nga. 3:29) Onkao mambo, lulayañano lupya lumwesha’mba lulayañano lwa Abalahama lukafika.

¹⁴ Kuji kintu kikwabo kya Bufumu kikyangye kwikajikwa. Lulayañano lupya lwalengela amba kwikale bena Isalela ba ku mupashi kabiji lwalengela bajimo kwikala ‘banswanyi ba kuswana pamo na Kilishitu.’ Nangwa byonkabyo, kubena kukebewa lunengezho lwa mwayila mizhilo lukebalengela kwikala pamo ne Yesu mu Bufumu bwanji lwa kwikala bamfumu ne bañanga mwiulu.

15. Ñanyi lulayañano lwa kyanji kyanji Yesu lo alayañene na batumwa banji ba kishinka?

¹⁵ Byo atendekeshe Kijiilo kya Nkambo kya Mabanga, Yesu walayañene lulayañano na baana banji ba bwanga ba kishinka javula lutelwa’mba lulayañano lwa Bufumu. (Tangai Luka 22:28-30.) Kupusanako na lulayañano lukwabo muji Yehoba, luno ke lulayañano lujitu pakachi ka kwa Yesu ne baana banji ba bwanga bashingwa. Byo aambile’mba, “byonka Batata byo balayañana ne amiwa lulayañano,” Yesu waambilenga pa lulayañano Yehoba lo alayañene nanji lwa kwikala “ñanga wa myaka ne myaka byonka byajinga Melekizedeke.”—Hebe. 5:5, 6.

16. Lulayañano lwa Bufumu lwalengela bena Kilishitu ba kishinka kwikala byepi?

¹⁶ Batumwa ba kishinka 11 ‘batwajijile kwikala pamo ne Yesu mu makatazho anji.’ Lulayañano lwa Bufumu lwibalengejile kushiinwa’mba bakekala nanji mwiulu ne kwikala pa matanda na kulama nobe bamfumu ne bañanga. Nangwa byonkabyo, bano 11 kechi bo bonka bakengilanga uno mwingilo ne. Yesu watumbijikwa wamwekele ku mutumwa Yoano mu kimwesho ne kwamba’mba: “Awa ushinda nkamuswisha kwikala pamo ne amiwa pa jitanda jami byonkatu byo nashinjile ne kwikala ne Batata pa jitanda jabo.” (Lum. 3:21) Onkao mambo, lulayañano lwa Bufumu lwalengwa na ba 144,000 bena Kilishitu bashingwa. (Lum.  5:9, 10; 7:4) Luno lo lulayañano lwa mwayila mizhilo lwaikala kitendekesho kya kuba’mba bakalama pamo ne Yesu mwiulu. Kino kipasha na musongwa wafuma mu kisemi kyanonka wakonsha kusongolwa ku mfumu ubena kulama ne kulama pamo nanji. Binembelo byamba pa bena Kilishitu bashingwa amba “musongwa” wa Kilishitu, “kisungu wawama” ye balaya kusongola kwi Kilishitu.—Lum. 19:7, 8; 21:9; 2 Ko. 11:2.

17, 18. (a) Tongolai lulayañano lutanu na lumo lo twisambapo ne byo lwakwatankana na Bufumu. (b) Mambo ka o twafwainwa kwikela na lwitabilo lwakosa mu Bufumu?

¹⁷ Lulayañano lonse lo twisambapo mu ino mitwe ibiji lwaamba pa lubaji lumo nangwa mbaji yavula yanema ya Bufumu. (Monai kitenguluzha kya kuba’mba “Lesa byo Akafikizha Kyaswa Muchima Wanji.”) Kino kishinka kimwesha’mba lunengezho lwa Bufumu lwaimena pa lunengezho lwa mwayila mizhilo. Onkao mambo, tuji na bishinka bya kwitulengela kuketekela mu Bufumu bwa Bumesiasa byo buji kingijisho Lesa kyo abena kwingijisha kufikizhamo kyaswa muchima wanji ku ntanda ne ku bantu byonka byo kyajinga ku ntendekelo.—Lum. 11:15.

¹⁸ Nanchi twakonsha kuzhinauka’mba bintu byauba Bufumu bikaletela bantu mapesho a myaka ne myaka nyi? Twakonsha kusapwila saka twashiinwa’mba Bufumu bwa Lesa bo bonkatu bukapwisha makatazho a bantu bonse. Twayai tubuulengako bakwetu buno bukine na mukoyo!—Mat. 24:14.