KAÑENDA (utelwa’mba kalama wenda) wasemekejilwe mu kyalo kya Japan waikalanga mu United States wafikile mu kyalo kya Japan pa 6 September, mu 1926. Wapotanga Kyamba kya Usopa watendekele kufunjisha jibumba ja bantu Baibolo mu muzhi wa Kobe ye wamupembelejilenga bunke bwanji kuba’mba amutambwile. Bafunda Baibolo bajinga na kubuñana kutanshi mu yewa muzhi pa 2 January, mu 1927. Bantu batainweko bajinga 36, ne babatizhiwe bajinga 8. Batendekele bingi bulongo, pano jino jibumba jicheche jafwainwe kuba byepi pa kuba’mba basapwile bantu 60 milyonyi ba mu Japan bakebelenga kufunda bukine bwa mu Baibolo?

Mu May mu 1927, Bafunda Baibolo bajinga bingi na kizaku batendekele mukwekele wa kwita bantu ku majashi a Baibolo a mvula bantu. Pa kwita bantu ku jashi jitanshi mu muzhi wa Osaka, balongo balamikile bipepala pa bipabi ne kutuma tupepala 3,000 twakwichilapo bantu ku babinemanga. Basampainye tupepala twakwichilapo bantu 150,000, kabiji babikile ne byambo bya kwita bantu ku jashi mu mapepala a byambo a mu Osaka ne pa machikichi 400,000 a mashitima. Pa juba jajingako jino jashi, madeke abiji atumbukile ne kusukumuna tupepala 100,000 twakwichilapo bantu mwaya muzhi yense. Bantu 2,300 bo baishile na kuteleka ku jashi jaikejile mu kishimikwa kikatampe kya mu muzhi wa Osaka Asahi jajinga na mutwe wa kuba’mba: “The Kingdom of God Is at Hand” (Bufumu bwa Lesa Bwafwenya Pepi.) Bantu nobe kiumbi kimo bebabwezhezhemo mambo kishimikwa kyayujile. Jashi byo japwile, bantu kukila pa 600 batainweko bashajile kuba’mba batanweko ku mwisambo wa mepuzho ne mikumbu. Mu bañondo balondejilepo, majashi a Baibolo a mvula bantu beambile mu muzhi wa Kyoto ne mu mizhi ikwabo ya ku muzhika wa kyalo kya Japan.

Mu October mu 1927, Bafunda Baibolo banengezhezhe kuya na kwamba majashi mu Tokyo. Batumine jikwabo tupepala twakwichilapo bantu ku babinemanga, kubikapotu ne ku ndamakyalo, ku bantomesha ba mu nzubo ya mizhilo, ku bantangi ba bupopweshi ne ku bakulumpe ba bashilikale. Baingijishe bipabi, mapepala a byambo ne tupepala 710,000 twakwichilapo bantu. Kabiji bonse batainweko ku majashi asatu o baambile mu muzhi mukatampe wa mu Japan bajinga 4,800.

Bakoputala (batelwa’mba bapainiya) baingijile mwingilo wanema bingi wa kutwala byambo bya Bufumu ku mazubo a bantu. Ba Matsue Ishii, bo bajinga pa bakoputala batanshi mu kyalo kya Japan. Bamwata wabo ba Jizo baingijile mu mapunzha avula a mu kino kyalo, ku Sapporo, ku Sendai, ku Tokyo, ku Yokohama, ku Nagoya, ku Osaka, ku Kyoto, ku Okayama, ne ku Tokushima. Banyenga Ishii ne banyenga bakikulumpe ba Sakiko Tanaka bavwajile bivwalo bya mushingi bitelwa’mba kimonos pa kuya na kumona bakulumpe bamukafulumende. Umo pa bano bakulumpe walombele mabuku 300 o baitanga amba, The Harp of God ne a kuba’mba Deliverance (Kupokololwa) ne kwiabika mu butala bwa mabuku bwa mu kaleya.

Ba Katsuo ne ba Hagino Miura baswile kutambula mabuku kwi Nyenga Ishii ne kuswa kufunda bukine. Babatizhiwe mu mwaka wa 1931 ne kwikala bakoputala. Ba  Haruichi ne ba Tane Yamada, ne balongo babo bavula baswile byambo bya Bufumu mwaka wa 1930 saka akyangye kufika. Ba mu kisemi kya ba Yamada batendekele mwingilo wa bukoputala, ne mwanabo wamukazhi Yukiko wayile na kwingijila pa Betele wa mu Tokyo.

Kala myotoka yajinga bingi na mutengo kabiji mikwakwa nayo yatamine bingi. Onkao mambo, ba Kazumi Minoura ne bakwabo bakoputala bakyanyike baingijishanga myotoka yajinga na mazubo kunyuma abujile mainjini. Ano mazubo beatelanga’mba Yehu, jizhina ja waendeshanga kalaki lubilo waikele mfumu wa bena Isalela. (2 Mfu. 10:15, 16) Mazubo asatu o baitanga’mba Yehu onse mubula alepele mamita 2.2, mu mbavu mamita 1.9 ne mu kimino ajinga mamita 1.9. Mu imo mwaikalanga bapainiya batanu na umo. Kabiji musampi wa ku Japan walengele makinga 11 o baendeshanga ku banabalume babiji. Beatelanga’mba Yehu Mucheche. Ba Kiichi Iwasaki, baingijileko mwingilo wa kulenga mazubo o baitanga’mba Yehu, bavuluka’mba, “Mazubo a Yehu ajinga na matente ne jibwe ja mu motoka kwakufumya malaichi.” Bakoputala basamishanga kyeya kya bukine mu kyalo kya Japan, saka bakoka makinga o batelanga’mba Yehu kutuntuka ne ku kukuluka mitumba ne kwabuka tukola tuji ku buyeke bwa Hokkaido kukafika ku bulenge ku Kyushu.

Bakoputala abo ba Ikumatsu Ota baambile’mba: “Inge twafika mu taunyi, twabikilanga mazubo etu a Yehu kwipi na mukola nangwa mu mungyetu. Patanshi twayanga na kumona babinemanga ba mu yeo taunyi, nabiji mukulumpe wa mukafulumende mu yeo taunyi, apa bino twatendeka kufwakesha bantu ku mazubo abo na kwibatwajila mabuku. Inge twapwisha kusapwila mu yeo taunyi, twavilukilanga mu taunyi mukwabo.”

Bafunda Baibolo 36 bo batainweko ku kubuñana kutanshi kwajinga mu muzhi wa Kobe. (Zeka. 4:10) Byo papichile myaka itanu, mu 1932 bakoputala 103 ne basapwishi mu Japan batumine sawakya wa byo baingijile mu mwingilo, bashile mabuku kukila pa 14,000. Lelo jino mwingilo wa kusapwila pa mvula bantu bamunengezha bingi bulongo mu Japan. Basapwila mu mapunzha mutanwa bantu bavula. Kabiji basapwishi pepi na 220,000 babena kusamisha kyeya mu kyalo kyonse kya Japan.—Kufuma mu butala bwetu mu Japan.