1. Bamo balanguluka’mba ka pa bantu ba Lesa pano pa ntanda?

BANTU bavula bamba’mba bupopweshi bwavula kechi bukwasha bantu ne. Bamo baswa kuba’mba buno bupopweshi kechi bwakonsha kwitabilwa kwi Lesa ne, mambo kechi bufunjisha bukine pe Lesa ne, kabiji buba bintu byatama bingi. Bino baitabila kuba’mba mu bupopweshi bonse muji bantu bakishinka kabiji Lesa wibayuka kuba’mba bapopweshi banji ba pano pa ntanda. Kechi bayuka ene mambo o bafwainwa kufumina mu bupopweshi bwa bubela ne kukwatankana pamo na bapopweshi ba Lesa bakine ne. Nanchi ne Lesa byobyo alanguluka nyi? Twayai tukumbule buno bwipuzho kupichila mu kwisamba pa bintu byapichilemo bapopweshi bakine ba Yehoba banembwa mu Baibolo.

2. Bañanyi baikele bantu ba Yehoba, kabiji ñanyi kintu kibalengejile kupusanako na bantu bakwabo? (Monai kipikichala kitanshi.)

² Kala, luno papita ne myaka nobe 4,000, Yehoba wasajile bantu  banji pano pa ntanda. Abalahama “shanja bonse baji na lwitabilo,” ye wajinga mushakulu wa bano bonse. (Loma 4:11; Nte. 14:14) Bakalama ba mu Kenana bamumonanga amba “mfumu mukatampe” kabiji bamunemekele bingi. (Nte. 21:22; 23:6) Yehoba walayañene lulayañano ne Abalahama ne na ba mu kisemi kyanji. (Nte. 17:1, 2, 19) Lesa waambijile Abalahama amba: “Luno lo lulayañano lwami lo mwafwainwa kulama, lo nalayañana amiwa ne obewa, ne na ba mu kisemi kyobe bakeya panyuma yobe, namba bana bonse ba balume ba mwi anweba bakebatwezha mu mukanda. . . . Kyo kikekala ke kayukilo ka lulayañano lo nalayañana amiwa ne obewa.” (Nte. 17:10, 11) Abalahama ne ba mu kisemi kyanji bonse bebatwajile ku mukanda. (Nte. 17:24-27) Ba mu kisemi kya kwa Abalahama bebatwajile ku mukanda kumwesha kuba’mba bajinga na bulunda bwawama ne Yehoba.

3. Ba mu kisemi kya kwa Abalahama baikele byepi mukoka?

³ Mu nkana wa kwa Abalahama aye Yakoba nangwa’mba Isalela wajinga na baana 12. (Nte. 35:10, 22b-26) Pa kupitapo kimye, bano baana baikele ke bashakulu ba mikoka 12 ya bena Isalela. (Byu. 7:8) Na mambo a kipowe kya nzala, Yakoba ne ba mu nzubo yanji bayile na kwikala mu Ijipita, mwajinga mwananji Yosefwa, ye bapele mwingilo wa kutala pa kajo kwi Felo ne kumupa luusa pa bantu bonse. (Nte. 41:39-41; 42:6) Ba mu kisemi kya kwa Yakoba batendekele kuvula, kya kuba baikele “ke kiombe kya mikoka ya bantu.”—Nte. 48:4; tangai Byubilo 7:17.

4. Patanshitu bena Ijipita baikalanga byepi na ba mu kisemi kya kwa Yakoba?

⁴ Ba mu kisemi kya kwa Yakoba baikele mu Ijipita kukila pa myaka 200 ku mpunzha ya Goshenyi yaikela ku masango a mukola wa Nile. (Nte. 45:9, 10) Bebatambwijile kwi Felo wayukile Yosefwa kabiji wamunemekele bingi. (Nte. 47:1-6) Pa myaka nobe 100 baikele mu mutende na bena Ijipita ku mpunzha kwajinga mwakujila mikooko ne bañombe babo. Bena Ijipita bashikilwe bingi bantu bafunga mikooko. (Nte. 46:31-34) Nangwa byonkabyo, bena Ijipita bakokejile Felo ne kwikala pamo na bena Isalela.

5, 6. (a) Bwikalo bwa bantu ba Lesa bwaalukile byepi mu Ijipita? (b) Mosesa waikele byepi na bumi, kabiji Yehoba waubijilepo ka bantu banji?

⁵ Mu kuya kwa moba bena Ijipita baalwile bena Isalela ke bazha babo. Baibolo wamba’mba: “Bino kwamwekele mfumu ungi wa mu Ijipita, wabujile kuyuka Yosefwa. Kabiji wibambijile bantu banji amba: ‘Talai, mukoka wa bena Isalela bavujisha ne kukosa kukila atweba.’ Onkao mambo bena Ijipita bebengijishe bena Isalela na kushinta; balengeshe michima yabo ke ipelelwe na mingilo yakosa, na kutobola mulobwe ne na kufyatula matafwali kabiji ne na misango yonse ya mingilo ya mu majimi sa bebashintaukila na mingilo yonse yo baingijilenga.”—Lupu. 1:8, 9, 13, 14.

⁶ Felo wakambizhe kuba’mba baana babalume ba Bahebelu bonse bafwainwa kwibepaya pa kusemwa. (Lupu. 1:15, 16) Pa kyonkakya kimye Mosesa popo asemenwe. Byo afikizhe bañondo basatu bainanji bamufile mu matete mu mukola wa Nile. Kuno konka mwana wamukazhi wa kwa Felo koko amutaine ne kumwalula ke mwananji. Mu myaka itanshi, Mosesa bamukomeshe kwi inanji waakamwanga Lesa, aye Yokebeda. O ene mambo o aikejile kalume wa Yehoba wa kishinka. (Lupu. 2:1-10; Hebe. 11:23-25) Yehoba ‘watele muchima’ bantu banji bamanaminenga kabiji wafukwilepo kwibapokolola ku bebamanyikilenga kwingijisha Mosesa wajinga ntangi wabo. (Lupu. 2:24, 25; 3:9, 10) Onkao mambo, baikele ke bantu bo ‘bakuula’ kwi Yehoba.—Lupu. 15:13; tangai Mpitulukilo ya mu mizhilo 15:15.

7, 8. Bantu ba Yehoba baikele byepi kisaka kya bantu bazhila?

⁷ Nangwa kya kuba Yehoba kechi wakikwatankenye bantu mu bukisaka ne, bino wibayukile kuba’mba bantu banji. Onkao mambo, Mosesa ne Alona bebakambizhe kuya na kwamba kwi Felo amba: “Yehoba, Lesa wa bena Isalela, waamba bino amba: Uleke bantu bami baye bakaje kijilo kyami mungyetu.”—Lupu. 5:1.

⁸ Bena Isalela pa kwibapokolola mu Ijipita ku bebamanyikilenga, Felo bamukambwile na binkunka jikumi ne kumulobesha pamo na nzhita yanji mu Kalunga Kachila. (Lupu. 15:1-4) Panyuma ya bino, bañondo basatu saka bakyangye kupwa, Yehoba walayañene lulayañano na bena Isalela ku Mutumba wa Sinai ne kwibakambizha’mba: ‘Inge kine mukomvwa jiwi jami ne kulama lulayañano lwami, mukekala ke kya bunonshi bwami ami mwine kyapatulwa mu mikoka yonse ne kwikala ke mukoka wazhila.’—Lupu. 19:5, 6.

9, 10. (a) Kwesakana na Mpitulukilo ya mu mizhilo 4:5-8, Mizhilo yapusenye byepi bena Isalela na bantu bakwabo? (b) Bena Isalela bafwainwe kumwesha byepi kuba’mba bajinga “bantu bazhila kwi Yehoba”?

⁹ Bahebelu byo bakijinga mu Ijipita saka bakyangye kwikala bazha, bajingatu mukoka umo, kabiji batangijilwanga na mitwe ya bisemi, nangwa bashakulu. Ino mitwe ya bisemi bo bajinga bakalama, mitonyi, ne bañanga ba mu bisemi byabo, byonka byaikalanga bakalume ba Yehoba bajingako abo saka bakyangye kwikalako. (Nte. 8:20; 18:19; Yoba 1:4, 5) Pano bino, kupichila mwi Mosesa, Yehoba wapele bena Isalela mizhilo ibapusenyeko na bantu ba mu bisaka bikwabo. (Tangai Mpitulukilo ya mu mizhilo 4:5-8; Sala. 147:19, 20) Mu ino Mizhilo mwajinga ne lunengezho lwa bano bañanga ba mu mukoka yense. Mizhilo yaambile ne kuba’mba, bano “bakulumpe” bo banemekele na mambo a maana ne milangwe yabo bo bafwainwe kwikala mitonyi. (Mpitu. 25:7, 8) Mu ino Mizhilo mwajinga ne mikambizho ya kulondela pa kupopwela Lesa ne mu bwikalo bwa pa juba pa juba.

¹⁰ Byo kwashajiletu pacheche kuba’mba bena Isalela batwele mu Ntanda ya Mulaye, Yehoba wibabujile jikwabo ino mizhilo. Mosesa wibabujile’mba: “Yehoba naye lelo wasapula’mba: Anweba mwi bantu bami bo nenonkela ami mwine, monka mo ne mulayijile, kabiji mukalamenga mikambizho yami yonse, namba nkemutumbijike kukijishatu pa mikoka yonse yo nalenga, amba bakemutakaike ne kwimutumbijika, ne kwimunemeka, kabiji namba mukekale ke bantu bazhila kwi amiwa Yehoba Lesa wenu monka mo naambijile.”—Mpitu. 26:18, 19.

11-13. (a) Bañanyi batendekele kupopwela Lesa pamo na bantu banji? (b) Bantu babujile bena Isalela bakebanga kupopwela Yehoba bafwainwe kuba ka?

¹¹ Nangwa kya kuba Yehoba wajinga na mukoka ye asalulula pano pa ntanda, kechi wakanyanga bantu babujile bena Isalela kwikala na bantu banji ne. Waswishishe “jibumba ja bantu ba mitundu yapusanapusana” babujile bena Isalela, kubikapotu ne bena Ijipita kuya na bantu banji byo ebapokolwele kufuma mu Ijipita. (Lupu. 12:38) Pa kimye kyamwekele kinkunka kya butanu na bubiji, bamo bajinga “bakalume ba kwa Felo” bachiine byambo bya Yehoba. Kwa kubula ne kuzhinaukatu ne, bano bantu bajinga pa jibumba ja bantu ba mitundu yapusana pusana bafumine mu Ijipita na bena Isalela.—Lupu. 9:20.

¹² Bena Isalela saka bakyangye kwabuka Yodano ne kutambula kyalo kya Kenana, Mosesa wibabujile’mba “batemwai benyi” baji mukachi kenu. (Mpitu. 10:17-19) Bantu  ba Lesa bafwainwe kuswa kwikala na bantu bafumine mu byalo bingi balondelanga mizhilo yo bapele Mosesa. (Levi 24:22) Bantu bamo bafumine mu byalo bingi baikele ke bapopweshi ba Yehoba, byonka byajinga mwanamukazhi mwina Moabu Luta waambijile Naomi mwina Isalela amba: “Balongo benu bakekala ke balongo bami ne Lesa wenu ukekala ke Lesa wami.” (Luta 1:16) Bano bantu bafumine mu byalo bingi baikele ke Bayudea kabiji banabalume baswile kuya ku mukanda. (Lupu. 12:48, 49) Yehoba wibatambwijile ne kwibaswisha kwikala na bantu banji bo asajile.—Bala. 15:14, 15.

¹³ Lulombelo lwalombele Solomone byo apainenga nzubo ya Lesa kwi Yehoba, lwamwesheshe kuba’mba ne bantu babujile bena Isalela nabo bafwainwa kupopwela Lesa. Walombele’mba: “Umvwe mwenyi, wabula wa mu mukoka wa bantu benu bena Isalela, wafuma mu kyalo kya kwalepa na mambo a jizhina jenu jikatampe, ne na mambo a kuboko kwenu kwa bulume ko mwatanyikile, ne kwiya na kulomba ku yo ino nzubo, apa bino mukomvwe mwiulu mo mwikala, ne kumubila awa mwenyi byonse byo emujijila anweba; namba bantu bonse ba pano panshi bakayuke jizhina jenu ne kwimwakamwa, pamo byonka byo bemwakamwa bantu benu bena Isalela, kabiji namba bakayuke’mba ino nzubo yo nashimika yatelwa na jizhina jenu.” (2 Moba 6:32, 33) Ne mu moba a kwa Yesu bantu babujile bena Isalela bakebanga kupopwela Yehoba nabo bafwainwe kumupopwela pamo na bantu banji.—Yoa. 12:20; Byu. 8:27.

14-16. (a) Mu ñanyi jishinda bena Isalela mo bafwainwe kwikala bakamonyi ba kwa Yehoba? (b) Lesa wakebelenga bantu banji kuba ka?

¹⁴ Bena Isalela bapopwelanga Lesa wabo aye Yehoba, pakuba bantu ba mu bisaka bikwabo bapopwelanga ba lesa babo. Kimye kyajingako ngauzhi Isaya, Yehoba wafwanyikizhe bintu byaubiwenga mu ntanda ku byubiwa mu kochi pa kuchiba mambo. Waambile’mba, inge ba lesa ba mu bisaka bikwabo bakine bamweshe bu lesa bwabo. Waambile ne kuba’mba: “Mikoka yonse ikonkene pamo, ne mitundu ya bantu ipwile pamo. Ñanyi wa mwi abo wakonsha kwamba kya byonkabyo? Betubule byo baawile kala ne kuleta batumonyi ba  kwibabingisha. Kabiji bebomvwe byo basakwambanga ne kwamba’mba: Ee, i byo.”—Isa. 43:9.

¹⁵ Ba lesa ba mu bisaka bikwabo bakankelwe kumwesha bu lesa bwabo. Bajingatu bankishi babulanga kwamba ne kwenda bo basendangatu ku bantu. (Isa. 46:5-7) Pakuba Yehoba waambijile bena Isalela amba: ‘Anweba yenu batumonyi bami, mwi bami ba mwingilo bo nasalulula, namba mungyuke ne kungitabila ne kukwatakanya bulongo amba: Yami i ye. Panyuma yami kechi kwajipo Lesa mukwabo ne, kabiji kechi kukekalapo mukwabo palutwe yami ne. Amiwa yami Yehoba, ka kuji mupulushi mukwabo nangwa umo ne. Onkao mambo, anweba mwi batumonyi bami, kabiji amiwa ne Lesa.’—Isa. 43:10-12.

¹⁶ Byonka byuba bakamonyi mu kochi, ne bantu ba Yehoba nabo bashimuna kuba’mba Yehoba ye Lesa yenka wa kine. Wibeta’mba “bo bantu bo nalengele ke bami ami mwine, namba bakantotenga.” (Isa. 43:21) Bano bantu batelwanga pa jizhina ja Yehoba. Na mambo a kuba Yehoba wapokolwele bena Isalela kufuma mu Ijipita, wakebelenga’mba bamukokelenga ne kutumbijika bumfumu bwanji na muchima yense. Ngauzhi Mika walumbulwile muchima wajinga na bano bantu amba: “Ba mu mitundu yonse ya bantu benda mu mazhina a balesa babo pa mutundu, pa mutundu, bino atweba tukendanga mu jizhina ja Yehoba Lesa wetu myaka yonsetu.”—Mika 4:5.

17. Mambo ka Yehoba o amwenejilenga bena Isalela nobe ‘muñanzañanza muncha’?

¹⁷ Kyataminekotu ke kya kuba’mba bena Isalela balekele kwikala bakishinka kwi Yehoba Lesa wabo. Baswishishe bantu ba mu bisaka bikwabo kwibalengela kutendeka kupopwela ba lesa bangi ba kusonga ne ba mabwe. Mu kitota kya myaka kya butanu na busatu B.C.E., ngauzhi Hoseya wanembele’mba: “Bena Isalela bauba nobe muñanzañanza . . . Monka mo bavuzhizha ne bipandawilo byabo . . . Baji na michima ibiji, pano bafwainwa kutambula lukabisho na mambo a bubi bwabo.” (Ho. 10:1, 2) Byo papichile myaka nobe 150, Yelemiya wanembele byambo Yehoba byo aambijile bantu banji babujile bukishinka bya kuba’mba: “Amiwa byo nakujimbile wajinga muñanzañanza wawama, wafuma ku lukunwa walumbulukatu; nanchi pano wialula byepi ke munchatu, wa mungye? . . . Balesa benu bo mwalengele baji pi? Nanchi bemane umvwe bakonsha kwimupulusha mu kimye kya kumanama kwenu . . . Bantu bami bamvulama.”—Yele. 2:21, 28, 32.

18, 19. (a) Yehoba waambile’mba ka pa mambo a kulenga mukoka mupya ukatelwanga pa jizhina janji? (b) Tukesamba pa ka mu mutwe walondelapo?

¹⁸ Bena Isalela batendekele kupanga bipangwa byatama, mambo balekele kupopwela Yehoba mu jishinda jawama. Balekele kwikala bakamonyi bakishinka ba Yehoba kabiji batendekele kupopwela bankishi. O ene mambo Yesu o aambijile bantangi ba Bayudea bajinga bakamfutumfutu amba: “Bakemwangata Bufumu bwa Lesa ne kwibupana ku kisaka kipanga bipangwa.” (Mat. 21:43) Yehoba waambijile jimo kupichila mwi ngauzhi Yelemiya amba, aba baji mu “lulayañano lupya” bo bakekala mu kisaka kipya, ko kuba’mba bena Isalela ba Lesa. Yehoba waambijile bano bena Isalela bakekala mu lulayañano lupya amba: “Amiwa nkekala ke Lesa wabo, ne abo bakekala ke bantu bami.”—Yele. 31:31-33.

¹⁹ Bena Isalela bakisemwa byo bamufutukilemo, Yehoba wasajile bena Isalela ba ku mupashi kwikala bantu banji mu myaka kitota kitanshi. Pano mu ano moba bantu banji pano pa ntanda bo bañanyi? Nga bantu ba michima ya bukishinka bakonsha kuyuka byepi bapopweshi ba Lesa bakine? Tukesamba pa ano mepuzho mu mutwe walondelapo.