BA GUY HOLLIS PIERCE ba mu Jibumba Jitangijila ja Bakamonyi ba kwa Yehoba bapwishishe bwikalo bwabo bwa pano pa ntanda pa Kibiji pa 18 March, 2014. Bajinga na myaka ya kusemwa 79 kimye kyafikile luketekelo lwabo lwa kwikala mulongo wa kwa Yesu wasangulwa.—Hebe. 2:10-12; 1 Pe. 3:18.

Ba Guy Pierce basemenwe mu muzhi wa Auburn, mu California, mu U.S.A., pa 6 November, 1934, kabiji babatizhiwe mu 1955. Basongwele bakazhi babo ba Penny mu 1977, kabiji bajinga ne na baana. Kwikala na baana kwibalengejile kwikala na muchima wa bunsemi. Mu 1982 abo ne ba Penny bapayankene bingi mu mwingilo wa bupainiya. Mu 1986 batendekele mwingilo wa bukalama wa mwanzo mu kyalo kya United States. Baingijile myaka 11 mu uno mwingilo.

Mu 1997, ba Guy ne Penny Pierce batendekele kwingijila mu kisemi kya pa Betele wa mu kyalo kya United States. Mulongo Pierce waingijilepo mu Dipatimenti Itala pa Bibena Kwenda Mwingilo. Mu 1998 bamutongwele kukwasha mu Kavoto Katala pa ba Mwingilo ba Kimye Kyonse ka Jibumba Jitangijila. Mulongo Pierce bamubijikile kuba’mba ke wa mu Jibumba Jitangijila pa kupwila kwikalako pa mwaka pa mwaka kwa Watch Tower Bible and Tract Society of Pennsylvania kwajingako pa 2 October mu 1999. Pa iye myaka yonse baingijile mu Kavoto Katala pa ba Mwingilo ba Kimye Kyonse, mu Kavoto ka Kunemba, mu Kavoto Katala pa Kusampanya Mabuku ne mu Kavoto ka Lutangijilo.

Ba Pierce bebatemenwe bingi ku bantu ba mu bisho ne nkomeno yapusana pusana na mambo a kukasuluka kwabo. Nangwa byonkabyo, butemwe, kwipelula ne kunemeka mafunde ne mizhilo ya bololoke ne kuketekela mwi Yehoba na muchima yense byo bintu byalengejile kwibatemwa bingi ku bantu. Ba Guy Pierce bashiinwe kuba’mba milaye ya Yehoba nangwa pakafwetu nzovu ikafika, kabiji bakebeshanga bingi kubulako bantu buno bukine mwaya ntanda yonse.

Mulongo Pierce waingijilanga bingi Yehoba na ngovu, wabukanga lukelokelo, kabiji javula wakotokanga bufuku bwine. Baendele mwaya ntanda yonse na kutundaika balongo ne banyenga, kabiji bamonangapo ne kimye kya kwisamba na ba mu kisemi kya Betele ne bakwabotu bakebanga kwisamba nabo kuba’mba bebabuleko bya kuba nangwa kwibakwasha. Nangwatu bakwabo ba mu lwitabilo bo bajinga nabo kala bavuluka muchima wabo wa kutambwila bantu, kukasuluka kwabo ne lutundaiko lwabo lwa mu Binembelo.

Uno mulongo kabiji mulunda netu washa bakazhi ne baana batanu na umo, ne bankana ne bankanununa. Kabiji wafunjishe bantu bavula bukine. Mulongo Mark Sanderson mukwabo mo baingijilanga mu Jibumba Jitangijila ye waambile jashi ja kuvuluka Mulongo Pierce pa Kibelushi pa 22 March, 2014, pa Betele wa mu Brooklyn. Mu jino jashi mulongo waambile pa luketekelo lwajinga na Mulongo Pierce lwa kuya mwiulu, kabiji watangile byambo byaambile Yesu bya kuba’mba: “Mu nzubo ya Batata muji mapunzha a kwikalamo avula. . . . Mbena kuya na kwimunengezhezha mpunzha. Kabiji umvwe naya ne kwimunengezhezha mpunzha, nkabwela jibiji ne kwimutambula, kuba’mba akwa ko nkekala, ne anweba mukekale konka. Kabiji mbena kuya, anweba mwijiyuka jishinda.”—Yoa. 14:2-4.

Ibyo kuba’mba tukebatonganga bingi ba Pierce. Bino tuji na lusekelo mambo ‘bayukile jishinda jaya’ ko ‘bakekala myaka ne myaka.’