JIBUMBA ja bena Kilishitu bakyanyike bafukwilepo kuya na kutamba filimu. Baumvwine ku bakwabo pa sukulu baambilenga’mba uno filimu wawama bingi. Byo bafikile ku kishimikwa mwa kutambila uno filimu, bamwene bipikichala byo balamika pajinga bilwilo bya nkondo byashinta ne bya banabakazhi bavwala bivwalo byabula kufwainwa. Pano baubile byepi? Nanchi bafwainwe kutwela mu kishimikwa ne kutamba uno filimu nyi?

Pa juba pa juba tufukula bintu byakonsha kulengela bulunda bwetu ne Yehoba kukosa nangwa konaika. Mwakonsha kufukulapo kuba kintu, bino inge mwalangulukapo bulongo mwakonsha kwalula milanguluko ne kuba kintu kyapusanako. Nanchi kino kimwesha kuba’mba mubena kukankazhama nyi, inyi kijitu bulongo?

Kutemwa Yehoba ko kwitulengela kwipana kwi aye ne kubatizhiwa. Tukebesha bingi kutwajijila kwikala bakishinka kwi Lesa. Nangwa byonkabyo, mulwanyi wetu Satana Diabola ukeba bingi konauna bukishinka bwetu. (Lum. 12:17) Twafukulapo kwingijila Yehoba ne kulama mikambizho yanji. Na mambo a kuba twipana kwi Yehoba, kyakonsha kutama bingi inge twapimpula milanguluko yetu. Mambo kyakonsha kwitwipaisha.

Papita ne myaka kukila 2,600, Nebukaneza Mfumu wa bena Babilona po aimikile kipashañano kikatampe kya ngolode ne kukambizha kuba’mba bonse bapone kinkuvumene ne kwikilambila. Yense wabujile kuba bino bafwainwe kumutaya mu kisha kya mujilo. Bapopweshi basatu baakamwanga Yehoba, abo ba Shadalaka, Meshaka ne Abedenego bakaine. Na mambo a kuba bakaine kupopwela kino kipashañano, bebataile mu kisha kya mujilo. Yehoba wibapulwishe mu jishinda ja kukumya. Nangwa byonkabyo, baswile kufwa kukila kwalula milanguluko yabo ne kuleka kwingijila Lesa.—Da. 3:1-27.

Mu kuya kwa moba, ngauzhi Danyela naye  watwajijile kulomba nangwa kya kuba kwajinga muzhilo wa kuba’mba ukoba bino bakamutaya mu jiyengo ja mabokwe. Watwajijile na mutanchi wanji wa kulomba kwi Yehoba bimye bisatu pa juba pa juba. Danyela kechi wapimpwile mulanguluko wa kutwajijila kwingijila Lesa wa kine ne. Ne kyafuminemo, uno ngauzhi bamupokolwele “mu tunwa twa mabokwe.”—Da. 6:1-27.

Ne bakalume ba Lesa ba mu ano moba nabo batwajijila kwikela mwayila kwipana kwabo. Pa sukulu umo mu Africa, jibumba ja baana ba sukulu Bakamonyi ba kwa Yehoba bakaine kupopwela mbandela ya kyalo. Bebazakamishe kuba’mba inge babule kwivwangamo pamo na bakwabo basakwibapanga sukulu. Palutwe kacheche, mukulumpe utala pa masukulu waishile mu yewo taunyi ne kwisamba na baana ba sukulu Bakamonyi. Bano baana ba sukulu Bakamonyi balumbulwile byo baitabilamo mu mushingi bino kwakubula moyo. Kufumatu popo, kechi bakibakatazhapo jikwabo ne. Balongo ne banyenga bakyanyike baya ku sukulu kwakubula kwibakatazha kuba’mba bonaune bulunda bwabo ne Yehoba.

Ba Joseph bakazhi babo bafwile panyuma ya kukolwa kikola kya kansa pa moba achechetu. Balongo ba ba Joseph baswile kabiji banemekele byo bakebelenga pa kijilo. Nangwa byonkabyo, balongo ba bakazhi babo kechi baji mu bukine ne. Onkao mambo bakebelenga kuba bisho bya pa kijilo, kubikapo ne bisho bifichisha Lesa ku muchima. Ba Joseph baambile’mba: “Na mambo a kuba nakaine, baesekele bingi kuba’mba bavulañanye baana bami; bino bonse batwajijile kuchinchika. Balongo babo bakebelenga kuba’mba babanze mujilo ne kukisha pa nzubo yami monka mwayila kisho kyabo. Bino nebabujile kuba’mba inge bakeba kukisha pa byoto, ko kuba’mba byoto kechi bisakwikela pa nzubo yami ne. Bayukile kuba’mba byo babena kukeba kuba kechi byayilamo na byo naitabilamo nangwa na byaitabijilemo bakazhi bami ne. Onkao mambo, panyuma ya kwisamba nabo, bakabanzhile byoto kungi.

“Pa kino kimye kya malwa, namusashijile Yehoba kuba’mba ankwashe pa kuba’mba kisemi kyetu kibule kulala mizhilo yanji. Lesa waumvwine milombelo yami ne kunkwasha kuchinchika nangwa kya kuba najinga mu lukatazho lukatampe.” Ba Joseph ne baana babo kechi bakebelenga kupimpula kyo bafukwilepo kya kutwajijila kukokela Yehoba ne.

Mwana mukazhi mwina Sailofenisha waishile kwi Yesu Kilishitu ku mpunzha ya ku Shidona byo papichiletu moba acheche kufuma pa juba ja Kijiilo kya Lupitailo. Waambijile Yesu bimye byavula kuba’mba apange ndemona mu mwananji wamukazhi. Patanshitu Yesu kechi wamukumbwile ne. Waambijile baana banji ba bwanga amba: “Amiwa kechi bantumine ku bonse ne, kana ku mikooko yaeleka ya kisaka kya Isalela.” Uno mwanamukazhi byo akoseleko, Yesu wamwambijile’mba: “Kechi kyawama kushikula kajo ka baana ne kupa twana twa kabwa ne.” Na mambo a lwitabilo lwanji lukatampe wakumbwile’mba: “Ibyo Nkambo, pano bino twana twa kabwa tuja bukuku bupona ku tebulu wa bankambo yato.” Yesu wamubijile byo akebelenga ne kubuka mwananji wamukazhi.—Mat. 15:21-28.

Yesu byo apimpwile byo alangulukilenga, walondejile byuba Yehoba. Kimye kimo Lesa wafukwilepo konauna bena Isalela balengele mwana ñombe wa ngolode, bino wapimpwile milanguluko yanji Mosesa byo amusashijile.—Lupu. 32:7-14.

Mutumwa Paulo waubanga byonka byuba Yehoba ne Yesu. Kimye kimo Paulo wamwene kuba’mba kechi kyailamo kuyila pamo ne Yoano Mako pa lwendo lwabo lwa bumishonale ne, mambo wabwelelemo ne kumusha Paulo ne Banabasa pa lwendo lwabo lutanshi lwa bumishonale. Mu kuya kwa moba, kyamweka Paulo waishile kuyuka kuba’mba Mako wipana bingi kabiji wakonsha kumukwasha bingi. O ene mambo Paulo o aambijile Timoti amba:  “Ukeye ne Mako mambo aye unkwasha bingi mu mwingilo.”—2 Timo. 4:11.

Nga atweba kiji byepi? Kwikala na lusa ne kutekanya byonka biji Shetu wa mwiulu witutemwa bingi kwakonsha kwitulengela kupimpula milanguluko. Twakonsha kupimpula byo tulanguluka pa bakwetu. Atweba kechi tuji byonka biji Yehoba ne Yesu ne, mambo twibambulwa kulumbuluka. Umvwe Yehoba ne Yesu bapimpwile byo bafukwile, nanchi ne atweba kechi twafwainwa kupimpula milanguluko yetu inge twalangulukapo bulongo pa bwikalo bwa bakwetu nenyi?

Kyakonsha kuwama bingi kwalula milanguluko pa kulanguluka pa bikonkwanyi bya kwingijila Lesa. Aba babena kufunda Baibolo ne batanwa ku kupwila kimo kimye bakankazhama kubatizhiwa. Balongo bamo nabo bakankazhama kwingilako bupainiya nangwa kya kuba bakonsha kwingilako pakatampe mu mwingilo. Kabiji balongo bakwabo nabo kechi bakanamina mingilo mu kipwilo ne. (1 Timo. 3:1) Nanchi ne anweba byobyo kiji nyi? Yehoba ubena kwimwita kuba’mba mwiyowe ino mingilo. Pano mambo ka akubujila kupimpula milanguluko yenu ne kwimwena lusekelo lufuma mu kwipana kwi Lesa ne kukwasha bantu?

Ba Ella bengijila pa ofweshi wa musampi wa Bakamonyi ba kwa Yehoba mu Africa baambile’mba: “Byo nafikiletu pa Betele kechi nayukile kuba’mba nkekalapo myaka yavula ne. Nakebeshanga bingi kwingijila Yehoba na muchima yense pano bino nalangulukanga bingi pa ba mu kisemi, patanshitu nebatonganga bingi. Bino ye naikalanga nanji mu kibamba kimo wantundaikanga bingi kabiji nafukwilepo kwikala. Byo naikele myaka jikumi pa Betele, nafukwilepo kutwajijila kukwasha balongo ne banyenga mu mwingilo wami pa Betele.”

Nanchi muvuluka kyamwekejile Kaina na mambo a kichima kyo aumvwijile nkasanji ne  kuzhingila bingi nyi? Lesa waambijile uno mwanamulume wakanamine amba usakwitabilwa kwi aye inge apimpule milanguluko yanji ne kuba byawama. Lesa wajimwineko Kaina kuba’mba ashinde bubi ‘bwamubelamijile ku kibelo.’ Kaina wafwainwe kupimpula byubilo byanji ne milanguluko, bino aye wafukwilepo kukana byamujimwineko Lesa. Kyatamine bingi mambo Kaina waipaile nkasanji ne kwikala mbanzhi mutanshi.—Nte. 4:2-8.

Kabiji akilangulukai pa byaubile Mfumu Uzaya. Patanshi waubilenga byawama ku meso a Yehoba kabiji watwajijile kumukeba Lesa. Kyataminekotu ke kya kuba’mba Uzaya waonawine bukishinka bwanji na mambo a bwitote. Watwelele mu nzubo ya Lesa na kupana bya kufutumuna nangwa kya kuba kechi wajinga ñanga ne. Bañanga byo bamukainye kuba kino kintu, nanchi wapimpwile milanguluko yanji nyi? Ine. Uzaya “wazhingijile bingi” ne kukana byo bamubujilenga. Kyafuminemo, Yehoba wamukambwile na kikola kya mbumba.—2 Moba 26:3-5, 16-20.

Kuji bimye bimo byo twafwainwa kupimpula byo tubena kulanguluka nangwa kyakatazhatu byepi. Akiumvwai kyamwekele mu ano moba. Ba Joachim babatizhiwe mu 1955, bino mu 1978 bebapangile mu kipwilo. Byo papichile myaka kukila pa 20, balapijile, kepo bebabwezhezhe mu kipwilo ne kwikala jikwabo Kamonyi wa kwa Yehoba. Kunyuma kwe mukulumpe mu kipwilo wibepwizhe pa kibalengejile kwikala kimye kyabaya kwa kubula kunemba nkalata ya kulomba kwibabwezha mu kipwilo. Ba Joachim bakumbwile’mba: “Bwitote ne bukaji bo bwandengejile kutaya kimye kyabaya bibye. Nangwatu byo najinga kungye ya kipwilo nayukile kuba’mba Bakamonyi ba kwa Yehoba bafunjisha bukine.” Uno mulongo wafwainwe kupimpula ndangulukilo yanji ne kulapila.

Kimye kimo kupimpula milanguluko yetu nangwa bwikalo bwetu kwanema bingi. Twayai twikale na muchima wa kuswa kuba bino pa kuba’mba tutalwenga bulongo kwi Yehoba.—Sala. 34:8.