Nanchi mwatanga magazini a katataka a Kyamba kya Usopa nyi? Monai inge mwakonsha kukumbula ano mepuzho:

Nanchi kijitu bulongo kusoka mubiji wa mwina Kilishitu inge wafwa nyi?

Muntu mwine wakonsha kufuukulapo kuba’mba bakasoke mubiji wanji inge wafwa nangwa ne. Nangwa kya kuba Baibolo kechi yashinkamika pa kwamba kino ne, bino yaamba kuba’mba mubiji wa Mfumu Saulo ne wa mwananji Yonafwanyi beisokele ne kwiizhika. (1 Sam. 31:2, 8-13)—6/15, jipa 7.

Ñanyi bintu bitulengela kushiinwa kuba’mba Lesa kechi ye ulengela bintu byatama kubiwa ne?

Mambo Lesa waoloka mu mashinda anji onse. Kechi uba nshiji ne, ye wakishinka kabiji waoloka. Yehoba uji na kifyele ne lusa. (Mpitu. 32:4; Sala. 145:17; Yako. 5:11)—7/1, jipa 4.

Ñanyi makatazho akonsha kupitamo waya na kwingijila ku mpunzha kuji kukajilwa kukatampe mu kyalo kingi?

Makatazho asatu ke ano: (1) kufunda bya kwikala bwikalo bwa katataka (2) kwikala na mukose ne (3) kufunda bya kwikala na balongo ne banyenga ba ku yoyo mpunzha. Bavula batwajijila kwingila nangwa batalañana na ano makatazho bamona bingi byawama.—7/15, jipa 4-5.

Ki ka kyalengejile Yosefwa kumwalukilamo ku bakolojanji?

Mambo Yosefwa bamutemenwe bingi kwi Yakoba kabiji wamupele ne mukunkumba wawama bingi. Bakolojanji Yosefwa bamubijile kichima ne kumupotesha mu buzha.—8/1, mapa 11-13.

Mambo ka matalakiti akatataka o awamina ne kupela kwingijisha?

Onse beanembatu mu mutundu umo. Ano matalakiti onse etulengela kutangapo Kinembelo ne kwipuzha muntu ye twatana bwipuzho. Mukumbu yense mwina nzubo ye akonsha kukumbula mwakonsha kuzhikula mukachi ka talakiti ne kumumwesha byaamba Baibolo. Twakonsha ne kumubula bwipuzho bo tukesambapo pa kubwelako.—8/15, mapa 13-14.

Kisilya wa Peshitta ye mu ka?

Kisilya ke mulaka wafuma ku mulaka wa Kialamaiki ye batendekele kwingijisha mu kitota kya myaka kya bubiji nangwa kya busatu C.E. Kyamweka Kisilya ye wajinga mulaka mutanshi mo batuntulwile Baibolo wa Binembelo bya Kingiliki bya Bwina Kilishitu. Baibolo wa mu mulaka wa Kisilya wayukanyikilwe kuba’mba Peshitta.—9/1, mapa 13-14.

Bansemi bena Kilishitu bafwainwa kuba byepi pa kuba’mba bafungenga baana babo?

Kyanema bingi kuteleka inge baana benu babena kwamba pa kuba’mba mwibayuke bulongo. Bajishainga kajo ka ku mupashi. Batangijilainga na kifyele, kikatakata inge batendeka kuzhinauka bukine.—9/15, mapa 18-21.

Bufumu bwa Lesa bukafumyapo ñanyi bintu?

Bantu bonse bakekala na nkito, kabiji kechi kukekala kukolwa, lufu, nkondo, bipowe bya nzala ne buyanji ne.—10/1, mapa 6-7.

Ñanyi lulayañano lwa mu Baibolo lukalengela bamo kulama pamo ne Kilishitu?

Byo apwishishe kuja Kijiilo kya Lupitailo kyapeleleko na batumwa, Yesu walayañene lulayañano na baana banji ba bwanga ba kishinka lutelwa’mba lulayañano lwa Bufumu. (Luka 22:28-30) Luno lulayañano lwibalengela kushiinwa’mba bakalama pamo ne Yesu mwiulu.—10/15, mapa 16-17.

Tongolai bishinka bibiji byanembwa mu Baibolo bimwesha kuba’mba Satana ko aji.

Binembelo byaamba kuba’mba Satana waambile ne Yesu kimye kyo akebelenga kumweseka. Kabiji mu moba ajingako Yoba, Satana waambile ne Lesa. Ano mashimikila amwesha kuba’mba Satana kya kine ko aji.—11/1, mapa 4-5.

Bañanyi “bantu ba jizhina janji” baambilepo Yakoba banembwa mu Byubilo 15:14?

Bano bajinga Bayudea ne babujile Bayudea baitabijile bo basajile kwi Lesa kwikala mukoka wasalululwa kuba’mba ‘basapwile byawamisha’ bya Mwine wibechile. (1 Pe. 2:9, 10)—11/15, mapa 24-25.

Muzhi wa Timgad waikejile pi, kabiji bantu ba mu uno muzhi baikalanga byepi?

Timgad wajinga muzhi mukatampe wa bena Loma wajinga ku Kabeta ka Buyeke bwa Africa (luno kino kyalo kitelwa’mba Algeria). Byaubanga bantu baikalangamo bimwekela mu byambo byanembwa pa kyo bazhikwile bya kuba’mba: “Bubinda, Kowa, Kukaya, Kuseka—Buno bo Bwikalo!” Buno bwikalo bwipasha na bo baambapo mu 1 Kolinda 15:32.—12/1, mapa 8-10.