Yehoba Upesha Bantu Baji na Muchima wa Bumpanyi

JIZHAI

MULENGA wetu wanemeka bantu kupichila mu kwibapa luusa lwa kwifuukwila bintu. Kyakilapo kuwama ke kya kuba’mba, upesha bantu baji na muchima wa bumpanyi batundaika bupopweshi bwa kine, bebikako kunemeka jizhina janji jazhila ne kuba kyaswa muchima wanji. Yehoba kechi ukeba kumwingijila na mambo a kumuchina nangwa kumwingijila kya kwikanjikizha ne. Pakuba wanemeka bingi bamwakamwa na mambo a kumutemwa kya kine ne kumusanchila.

Bena Isalela byo bajinga mu kiselebwa kya Sinai, Yehoba wibakambizhe kulenga ntente wa lusambakeno. Waambile’mba: “Mushikulepo bintu byo muji nabyo ne kwibipana kwi Yehoba. Muntu yense waswa apane bya bupe kwi Yehoba.” (Lupu. 35:5) Mwina Isalela yense wafwainwe kupana kyonse kyo akonsheshe kupana, kikatampe nangwa kicheche kya kwingijisha ku mwingilo wa Lesa. Pano bantu baubile byepi?

“Bonse bajinga na muchima wa kupana” ne bonse “bajinga na mupashi wa bumpanyi” baletele bya bupe. Banabalume ne banabakazhi baletele bya kwingijisha mu mwingilo wa Yehoba. Baletele tumapengele, mashikiyo, tumbalaminwe, ngolode, siliva, mukuba, tonge wafituluka, ne wachijisha, kisapi kyawamisha kya linenyi, boya bwa bambuzhi, myayi ya mikooko yo basombesha na musombelo uchila, myayi ya banyama bakatampe ba mu kalunga ka mema, bichi bya mwiba wa kaseele, mabwe a buneme, balasama ne manyi. Kepo “bintu byo baletele byafikijilemo kwingijisha ku uno mwingilo kabiji byavujishe.”—Lupu. 35:21-24, 27-29; 36:7.

Kyalengejile Yehoba kumvwa bulongo kechi bintu byo baletele ne, bino ke muchima wa bumpanyi wa bantu batundaikile mpopwelo ya kine. Kabiji bepaine kwingijisha kimye kyabo ne bulume bwabo. Jishimikila jaamba kuba’mba: “Banabakazhi bonse basendwe bazhingile mizhinge na maboko abo.” Kabiji bano “banabakazhi bonse basendwe bajinga na muchima wa kupana, bazhingile boya bwa bambuzhi.” Kunungapo, Yehoba wapele Bezalela “maana, milangwe ne maana a kuyuka bintu byonse bya busendwe.” Lesa wayuzhizhe Bezalela ne Oholyaba mupashi ne kwibafunjisha busendwe bwa kwingila mingilo yonse yo bebapele.—Lupu. 35:25, 26, 30-35.

Yehoba byo aambijile bena Isalela kupana mibingu, waketekejile kuba’mba “bonse bajinga na muchima wa kupana” basakutundaika mpopwelo ya kine. Kyafuminemo, wapesheshe bantu bajinga na muchima wa bumpanyi kupichila mu kwibatangijila ne kwibalengela kwikala na lusekelo bingi. Onkao mambo, Yehoba wamwesheshe kuba’mba inge wapesha bakalume banji baji na muchima wa bumpanyi, umona kuba’mba kuji bya kwingijisha nangwa bantu bakwingila pa kuba’mba afikizhe kyaswa muchima wanji. (Sala. 34:9) Yukai kuba’mba Yehoba ukemupesha bingi inge mwatwajijila kumwingijila na muchima yense.

BAMO BYO BAFUUKULAPO KUPANA MIBINGU IBINGULWA KU MWINGILO WA NTANDA YONSE

Byonka byo kyajinga mu moba a mutumwa Paulo, ne lelo jino bavula ‘batulapo bya milambo,’ ko kuba’mba mali amo ne kuya na kwiabika mu tubokoshi twa mibingu panembwa’mba, “Mwingilo wa Ntanda Yonse.” (1 Ko. 16:2) Pa ñondo pa ñondo, bipwilo bituma ino mibingu ku ofweshi wa Bakamonyi ba kwa Yehoba uji mu kyalo kyabo. Kabiji mwakonsha kutuma mibingu ku kije kyaswishiwa na mizhilo kingijisha Bakamonyi ba kwa Yehoba mu kyalo kyenu. Pa kuba’mba muyuke jizhina ja kije kyaswishiwa na muzhilo kingijisha Bakamonyi ba kwa Yehoba mu kyalo kyenu, nembelai ku ofweshi wa musampi wa mu kyalo kyenu. Mwakonsha kutana keyala wa ofweshi wa musampi pa intaneti kwingijisha keyala wa www.pr418.com. Bupe bo mwakonsha kutuma ke buno:

KUPANA BUPE KWA KUBULA KWAMBA BYO BUKENGILA

Kutuma mali kwingijisha biñambañamba, ne tubikachi twa ku banki. Ku misampi imo mwakonsha kuba bino kwingijisha keyala wa jw.org nangwa keyalatu mukwabo.
Buno bwakonsha kwikala bupe bwa mali, bipe nangwa bintu bikwabo byanema. Mwafwainwa kutumina pamo na nkalata ibena kulumbulula kuba’mba ao mali nangwa bipe byo mwatuma bakebingijishe mo bakebela.

KUPANA BUPE NE KUBULAÑANA BYO BUKENGILA

Ke mali apanwa kuba’mba beengijishe, pano bino, bakonsha kumubwezhezha mwine mwinao inge wiakeba.
Mwafwainwa kutuma nkalata ya kulumbulula bikengila bobo bupe.

KUNENGEZHEZHA JIMO BYA KUPANA BUPE

Kununga pa bupe bwa mali ne bipe, kuji mashinda akwabo a kupainamo mibingu ya kukwasha mwingilo wa Bufumu wa ntanda yonse. Ano mashinda atanchikwa panshipo. Saka mukyangye kutuma mibingu kwingijisha jishinda jo mukeba, patanshi bulai ofweshi wa musampi wa mu kyalo kyenu kuba’mba muyuke mashinda o bengijisha mu kyokyo kyalo. Byo kiji kuba’mba mizhilo ya kafulumende ne mpaino ya misonko yapusana pusana, kyanema bingi kwipuzha dipatimenti utala pa bya mizhilo ne misonko uji musampi saka mukyangye kusalapo jishinda jawama ja kupainamo bupe.

Kwivimbila: Ke mibingu ipanwa kupichila mu kutongola kije kingijisha Bakamonyi ba kwa Yehoba kuba’mba kikatambula mali amo a kwivimbila nangwa a penshonyi.

Mali aji ku Kipao: Mali aji ku kipao, bipepala bya kufishishapo mali ku kipao, nangwa mali a muntu watambula penshonyi akonsha kunengezhiwa nangwa kupanwa kimye kya lufu lwanji ku kije kingijisha Bakamonyi ba kwa Yehoba, kwesakana na mizhilo ya ku kyokyo kipao.

Bipe Nangwa Mali a Muntu pa Kampanyi ne Mali a Muntu o Akongwesha Kampanyi: Bino bintu byakonsha kupanwa ku kije kingijisha Bakamonyi ba kwa Yehoba kuba’mba ke bupe bwapanwa bwa kubula kubwezha nangwa kutambula buno bupe inge mwine wafwa.

Bishimikwa ne Mpunzha: Bishimikwa nangwa mpunzha byakonsha kupanwa ku kije kingijisha Bakamonyi ba kwa Yehoba kupichila mu kupana bupe bwa kuba’mba bakebwingijishe mo bakebela, nangwa inge kya kuba muntu wapana nzubo, awa wapana nzubo wakonsha kukitwajijila kwikalamo saka akiji mumi.

Bupe bwa pa Mwaka: Bupe bwa pa mwaka ke lunengezho lulengela muntu kupana mali a penshonyi pa mwaka pa mwaka ku kije kingijisha Bakamonyi ba kwa Yehoba, ko kuba’mba mali o afwainwe aye mwine kutambulanga nangwa ye atongwele kuba’mba akatambulenga oo mali. Awa wapana buno bupe bakamukepesheshako misonko mu yewo mwaka ye atendekelamo kupana bobo bupe.

Buswe ne Mali Afiwa ku Kipamo: Bipe nangwa mali akonsha kupanwa ku kije kingijisha Bakamonyi ba kwa Yehoba kupichila mu kunemba buswe kwesakana na mwayila mizhilo, nangwa kutongola kije kikatambulanga bobo bupe. Luno lunengezho lwakonsha kulengela wapana buno bupe kumukepesheshako misonko.

Monkatu mwatala byambo bya kuba’mba “kunengezhezha jimo bya kupana bupe,” ano mashinda a kupainamo bupe akebewa muntu ukeba kupana buno bupe kwinengezhezha jimo. Onkao mambo, mwafwainwa kwipuzha dipatimenti utala pa bya mizhilo ne misonko uji pa musampi. Kupichila mu kwingijisha ano mashinda a kupainamo bupe, bavula bakwasha bupopweshi bwetu ne bantu mwaya ntanda kabiji bebakepesheshako mali a misonko a kupana pa kupana bobo bupe.

Pa kuba’mba muyukilepo byavula, mwakonsha kunemba nangwa kutuma foni ku Treasury (Dipatimenti Itala pa Mali) kwingijisha keyala uji panshipo nangwa mwakonsha kutumina ku ofweshi wa musampi uji mu kyalo kyenu.

Mwakonsha Kutemwa

Bya Kupana Mali pa Intaneti

Yukai mashinda apusana pusana o mwakonsha kwingijisha pa kuba’mba mupaneko mali.

KYAMBA KYA USOPA—KYA KUFUNDAMO