MU MYAKA ya kunyuma kwe, ba Cesar ne bakazhi babo ba Rocio, baikalanga bingi bulongo mu California, mo baingilanga nkito ya kubika biñambañamba bikabisha nangwa kutalazha mu bishimikwa. Bakazhi babo ba Rocio kimye kimo baingilanga ku ofweshi wa dokotala. Bajinga na nzubo yabo bene, kabiji kechi bajinga na baana ne. Bino kuji kyamwekele kyapimpwile bwikalo bwabo. Ñanyi kintu kyonkakyo?

Mu October 2009, ofweshi wa musampi wa ku United States watumine makalata mu bipwilo byonse bya mu kyo kya kyalo a kwita bakonsha kwipana kwingijila pa Betele pa kakimye kacheche mu mwingilo wa kubaisha musampi wa ku Wallkill, mu New York. Nangwatu bakulumpe bo bafwainwa kubula kwita ku Betele nabo bebaswishishe kunemba makalata a kuya na kwingijilapo. Ba Cesar ne ba Rocio baambile’mba: “Na mambo a jifumbi jo twajingapo, twamwene kuba’mba luno lwito lwa kwingijila pa Betele ke jishuko jibula kumwekamweka. Kechi twakebelenga kushalapo ne.” Ponkapotu bano balume ne bakazhi batumine nkalata ya kuba’mba babena kukeba kuya na kwingijila ku musampi.

Mwaka umo wapwile ne bañondo peulu, bino ba Cesar ne ba Rocio kechi bebechile ku Betele ne. Nangwa byonkabyo, bafukwilepo kupezhako bwikalo bwabo pa kuba’mba bakafikizhe kino kikonkwanyi kyabo. Bavilukijile mu kibamba kimo pa kuba’mba mu nzubo yabo babikemo bantu bakusonkela. Bafumine mu nzubo yabo ikatampe yo batemenwe bingi. Kechi papichile myaka yavula kufuma po beishimikijile ne. Bafuminemo ne kuvilukila mu kibamba kicheche. Ba Cesar baambile’mba: “Kuba bino kwitulengejile kwinengezha kuya ku Betele inge betwita.” Pano bintu byaikele byepi? Ba Rocio baambile’mba: “Panyumatu ya kupitapo ñondo umo betwichile kuya na kwingijila ku Wallkill pa kakimye kacheche. Twayukile kuba’mba kupezhako bwikalo bwetu kwalengejile Yehoba kwitupesha.”

Balongo ne banyenga bavula bepana kuya na kwingilako mwingilo wa buntungi mu kyalo kya New York  byonka byaubile ba Cesar ne ba Rocio. Bamo babena kwingila mwingilo wa kubaisha ofweshi wa musampi ku Wallkill, bakwabo babena kwingijila ko babena kushimikila ofweshi wa ntanda yonse ku Warwick. * Bavula baji mu masongola basha mazubo abo awama, makito ne bilelwa byabo pa kuba’mba bamwingijile Yehoba kimye kyabaya. Nanchi Yehoba wibapesha pa muchima wabo wa kwipana nyi? Wibapesha bingi.

Ba Way, bengila nkito ya bya malaichi ne bakazhi babo ba Debra, bonse baji na myaka mu ma 50, bapoteshe nzubo yabo ne bipe byabo mu Kansas ne kuvilukila ku Wallkill na kwingijila ku Betele kya kukelela. * Nangwa kya kuba bino kwavwangilemo kupimpula bwikalo, bino kechi belangulusha pa byo baubile ne. Ba Debra baambile’mba: “Kimye kimo mmonatu nobe mbena kwingila mu Paladisa byonkatu byo tumona mu bipikichala biji mu mabuku etu.”

Ba Melvin ne ba Sharon bapoteshe nzubo yabo ne bipe byabo mu South Carolina pa kuba’mba baye na kukwashako mu mwingilo wa buntungi ku Warwick. Nangwa kya kuba kwipana bino kechi kwapela ne, bano balume ne bakazhi batemwa bingi pa jishuko ja kwingilako mu uno mwingilo wanema. Baambile’mba: “Kuyuka kuba’mba byo tubena kuba bikakwasha jino jibumba mwaya ntanda yonse kwituletela bingi lusekelo.”

Ba Kenneth baingilanga nkito ya bya buntungi bafikizhe myaka ya kulekelapo mingilo ne ba Maureen, bonse baji na myaka mu ma 50, bafumine ku California ne kuya na kwingilako mwingilo wa kushimika ku Warwick. Saka bakyangye kuviluka baambijile nyenga mu kipwilo kuba’mba ebalaminengako nzubo yabo ne ba mu kisemi kuba’mba bebakwasheko kulama bashabo ba Kenneth bakoma. Nanchi belangulusha pa byo bafukwilepo kuya na kwingijila ku Betele nyi? Ine. Ba Kenneth baambile’mba: “Twamwenamo kya kine kine. Nangwa byonkabyo, twikala ne na mikiika. Pano bino, twikala bwikalo bwa lusekelo bingi kabiji tutundaika bakwetu na muchima yense kwipana kwingilako uno mwingilo.”

Bavula bepana kuya na kwingilako uno mwingilo bashinda mikiika yavula. Ba William ne ba Sandra, bonse baji na myaka mu ma 60, baikele bingi bulongo ku Pennsylvania. Bajinga na kampanyi ulenga byela bya minkinyi kwaingilanga bantu 17 bo batwezhezhe nkito. Bajinga mu kipwilo mo bakomena, kabiji balongo babo bavula baikalanga mu yonkaya mpunzha. Byo bebechila kuya na kwingijila ku Wallkill kya kukelela, bafumineko ne kusha bantu bonse bo bayukile ne kuya na kwikala bwikalo bupya. Ba William baambile’mba: “Kwa kubula nangwa kuzhinaukatu ne, kechi kyapelele kusha buno bwikalo bwawama  ne.” Nangwa byonkabyo, bano balume ne bakazhi panyuma ya kulombapo, bafukwilepo kuviluka, kabiji kechi belangulusha pa kino ne. Ba William baambile’mba: “Kwingijila pamo na ba mu kisemi kya Betele kundetela lusekelo lukatampe. Kabiji kafwako kintu kikwabo kyakonsha kundetela lusekelo lwa uno mutundu ne. Ba Sandra ne amiwa tuji bingi na lusekelo lo tukyangye kwikalapo nalo.”

Ba Ricky, bakulumpe ba kampanyi kashimika bya kushimikashimika mu kyalo kya Hawaii, bebechile kuya na kwingila ku Betele ku Warwick kya kukelela. Bakazhi babo ba Kendra, bakebeshe bingi kuba’mba bamwatawabo baswe luno lwito. Nangwa byonkabyo, bajinga bingi na milanguluko pa bikekalanga mwanabo aye Jacob uji na myaka ya kusemwa 11. Balangulukilenga kuba’mba kana kyayilamo kisemi kuvilukila ku kyalo kya New York nyi? Kabiji balangulukilenga ne kuba’mba mwanabo wamulume kana ukekalanga bulongo bwikalo bwa katataka nyi?

Ba Ricky baambile’mba: “Twakebeshe bingi kutanapo kipwilo muji bakyanyike bakamwa Lesa. Twakebelenga Jacob kwikala na balunda bavula bakabula kumulengela kwikala na byubilo byatama.” Mu kipwilo kyo bayilemo mwajingatu bakyanyike bacheche, bino mwajinga bengijila pa Betele bavula bingi. Ba Ricky baambile’mba: “Panyuma ya kupwila kutanshi naipwizhe Jacob pa byo eumvwinenga mu kipwilo, mambo a kuba’mba kechi mwajinga bakyanyike ba jifumbi janji ne. Wakumbwile’mba, ‘Kwakamwa ne Tata, balongo bakyanyike ba ku Betele bo basakwikala bakwetu.’”

Ne kya kine balongo bakyanyike bengijila pa Betele baikele balunda ba kwa Jacob. Ki ka kyafumamo? Ba Ricky baambile’mba: “Juba jimo bufuku namwene kyeya mu kibamba mo alala, nalangulukilenga kuba’mba kampe ubena kukaya makayo a pa kompyuta. Bino kechi byobyo aubilenga ne, watangilenga Baibolo. Byo namwipwizhe pa byo aubilenga, Jacob wakumbwile’mba: ‘Mbena kuba byonka byuba bakyanyike pa Betele, mbena kukeba kutanga Baibolo yense mu mwaka umo.’” Ba Ricky ne ba Kendra baji bingi na lusekelo na mambo a kwingilako mu mwingilo wa buntungi ku Warwick kabiji kuviluka kwabo kwakwasha mwanabo kukomenako ku mupashi. —Maana 22:6.

Aba bo baita kuya na kwingila mwingilo wa buntungi ku Wallkill ne ku Warwick bayuka kuba’mba mwingilo wabo wa pa Betele ukapwa kimye kyo bakapwisha kushimika. Nanchi bano balongo ne banyenga baakamwa kuba’mba bakekalanga pi nangwa bakobanga ka inge mwingilo ye babena kwingila wapwa nyi? Kechi baakamwa ne. Bavula balanguluka byonka byaambile bino bisemi bibiji bya ku Florida. Bano balume ne bakazhi bonse baji na myaka mu ma 50. Ba John, bakulumpe ba kampanyi kashimika bya  kushimikashimika ne bakazhi babo ba Carmen, bepana kwingila ku Warwick, baambile’mba: “Twimwena Yehoba byo abena kwitukwasha kumona bintu bya mu bwikalo pa kino kimye. Onkao mambo, twashiinwa kuba’mba kechi uketulekelela inge twapwisha uno mwingilo ne.” (Sala. 119:116) Ba Luis, basendwe bafiika bya kuzhimyako mujilo mu bishimikwa ne bakazhi babo ba Quenia, bengijila ku Wallkill. Baambile’mba: “Twimwena Yehoba byo abena kwitumwena bintu bya mu bwikalo. Nangwa kya kuba kechi twayuka jishinda jo aketukwashishamo ne, twaketekela kuba’mba ukatwajijila kwitumwena bya mu bwikalo.”—Sala. 34:10; 37:25.

Bavula babena kukwasha mu mwingilo wa buntungi ku New York baji na bintu byavula byakonsha kwibalengela kubula kwipana. Nangwa byonkabyo, bamweseka Yehoba, byonkatu byo aamba aye mwine amba: “Ngesekai mu kino, mumone inge kechi nakonsha kwimushinkwila bipenze bya mwiulu ne kwimwitulwila mapesho avula kya kuba kechi mukakajilwa kintu nangwa kimo ne.”—Mala. 3:10

Nanchi ne anweba musakumweseka Yehoba pa kuba’mba mwimwene byo akemupesha nyi? Lombaipo ne kulangulukapo pa byo mwakonsha kuba pa kuba’mba mwingileko mu uno mwingilo, ku New York nangwa kukwabotu kuji mingilo ya buntungi mu jibumba ja Lesa, pa kuba’mba mukemwene Yehoba byo akemupesha.—Mako 10:29, 30.

Ba Dale, basendwe mu bya kushimikashimika ne ba Cathy, ba ku Alabama, batundaika bingi bakwabo kwingilako uno mwingilo. Baambile pa kwipana kuya na kwingijila ku Wallkill amba: “Umvwe mwalubako bwikalo bwa ntentente ne kuya na kwingijilako, popo mukamona bibena kwingila mupashi wa Yehoba.” Mwakonsha kuba byepi pa kuba’mba muye na kwingijilako? Ba Dale baambile’mba: “Mwafwainwa kupezhako bwikalo bwenu. Kabiji kechi mukelangulushapo umvwe mwauba bino ne.” Ba Gary, ba ku North Carolina, baingila myaka 30 mu mwingilo wa bya kushimikashimika. Abo ne bakazhi babo ba Maureen, baambile’mba, pa mapesho o babena kwiyowa ku Warwick paji ne “kupwanañana ne kwingijila pamo na balongo ne banyenga bepana kwingijila Yehoba pa Betele.” Kabiji ba Gary banungilepo’mba: “Kwingijila pa Betele kukebewa kupezhako bwikalo, kino kyo kintu kyanema kuba mu ano moba.” Ba Jason, baingilanga ku kampanyi ka bya malaichi ne ba Jennifer, ba ku Illinois, baambile kuba’mba kwingila mingilo ya pa Betele ku Wallkill ke “jishinda jimo jitulengela kufwanyikizha byo kikela mu ntanda ipya.” Kabiji ba Jennifer banungilepo kuba’mba: “Kileta bingi lusekelo kuyuka kuba’mba Yehoba usanta bingi pa byonse byo tuba ne kuba’mba ubena kwitukwasha kuyuka byo tukobanga kulutwe. Yehoba witukwasha bingi.”