1, 2. Bañanyi bakonsha kumwenamo inge batanga bulongo buku wa Lwimbo wa Solomone, kabiji mambo ka? (Monai kipikichala kitanshi.)

‘PA JUBA ja masongola babena kwisongola betala na butemwe ne kwikwata ku maboko. Ñanyi wakonsha kukana kuba’mba kechi betemwa ne?’ Abino byo bilanguluka mukulumpe mu kipwilo wafumatu na kwibasongwesha. Pano bino, ku kijiilo byo babena kusekela ne kusangalala, ulanguluka ne kuba’mba, kana bakekala mu masongola myaka yavula nyi? Kana butemwa bwabo bukakoma pa kupitapo myaka yavula nyi? Inyi kana bukapwa? Baji mu masongola bekala bingi bulongo inge butemwe bwabo bwatwajijila. Pano bino, na mambo a kwikana kwasampukila ne pa katele, kyailamo bingi kwipuzha amba, nanchi butemwe bwa kine bwakonsha kwikala myaka yavula nyi?

² Butemwe bwa kine bwakatezhe bingi kutaana nangwatu mu moba ajingako Solomone Mfumu wa bena Isalela. Solomone waambile pa bantu bajinga mu oa moba amba: “Pa bantu kiumbi, nataainepotu mwanamulume umo waoloka, bino kafwako mwanamukazhi nangwa umo waoloka ye nataainemo ne. Akino kyo kyo nataaine kuba’mba: Lesa wa kine walengele bantu baoloka, bino bantu bene bakeba kwiubila bintu byavula.” (Sapwi. 7:26-29) Byubilo bya bantu mu kyalo byatamine bingi na mambo banabakazhi  ba mu byalo bingi bapopwelanga Baela. Kyo kyalengejile kuba’mba Solomone kimukatazhe kutaana mwanamulume nangwa mwanamukazhi wajinga na byubilo byawama. * Nangwa byonkabyo, nsansawilo yo anembele mu Lwimbo wa Solomone, kunyuma saka papita ne myaka 20, imwesha kuba’mba mwanamulume ne mwanamukazhi bakonsha kwitemwa kya kine. Kabiji imweshatu patoka butemwe byo buji ne mo bumwekela. Bapopweshi ba kwa Yehoba bonsetu, baji mu masongola ne babula mu masongola bakonsha kufunjilako byavula pa buno butemwe inge batanga bulongo biji mu uno buku wa mu Baibolo.

3. Mambo ka mwanamulume ne mwanamukazhi o bakonsha kwitemenwa kya kine?

³ Tangai Lwimbo wa Solomone 8:6. Byambo bya kuba’mba “lubebe lwa kwa Yehoba” bilumbulula bulume buji na butemwe. Butemwe bwa kine “lubebe lwa kwa Yehoba,” mambo Yehoba ye Nsulo ya buno butemwe. Bantu baji na bulume bwa kutemwa bakwabo mambo wibalengele mu kipasha kyanji. (Nte. 1:26, 27) Lesa byo apaine mwanamukazhi mutanshi, aye Evwa, ku mwanamulume mutanshi, Adama waambile byambo bya nsansawilo. Kwa kubula nangwa kuzhinaukatu ne, Evwa wamutemenwe bingi Adama, mambo ko ‘ko bamufumishe.’ (Nte. 2:21-23) Mwanamulume ne mwanamukazhi bakonsha kwitemwa kya kine mambo Yehoba witupa bulume bwa kutemwañana.

4, 5. Lumbululai mu byambo bicheche jishimikila jiji mu buku wa Lwimbo wa Solomone.

⁴ Kwitemwa kwa wa mulume ne wa mukazhi kwakonsha kwikala kikupu. Kabiji mwavwangwa ne bintu bikwabo. Mbaji imo ya buno butemwe yanembwa mu buku wa Lwimbo wa Solomone. Mu uno buku muji jishimikila ja nsongwakazhi wa mu muzhi wa Shulema ne kafunga ye atemenwe bingi. Uno nsongwakazhi walajile muchima wa kwa Solomone mambo walambile bingi. Bamufumishe mu bujimi bwa miñanzañanza bwa bakolojanji mo aingijilenga bwajinga kwipi na kwalengejile Solomone kampu na bashilikale banji. Nangwa byonkabyo, kyamwekeshatu patoka, kufumatu kwatendekela jino jishimikila kuba’mba uno nsongwakazhi watemenwe bingi kafunga. Solomone byo akebele kuba’mba amongole, uno nsongwakazhi waambile byambo byamwesheshe patoka kuba’mba ukebesha kumona nsongwalume ye atemwa bingi. (Lwimbo 1:4-14) Uno nsongwalume byo aishile mu kampu, batendekele kwiambila byambo byamwesheshenga byo betemwa.—Lwimbo 1:15-17.

⁵ Solomone pa kubwela ku Yelusalema wasendele uno nsongwakazhi. Nsongwalume kafunga naye walondejile. (Lwimbo 4:1-5, 8, 9) Solomone wakankelwe kongola uno nsongwakazhi, wapulwijimotu mabula. (Lwimbo 6:4-7; 7:1-10) Kyapeleleko mfumu waambijile uno nsongwakazhi kubwela kwabo. Uno lwimbo wapwa na byambo bimwesha uno nsongwakazhi byo akebeshenga mutemwe wanji bya kuba’mba, “nyema lubilo nobe lupaala” kwiya kwi amiwa.—Lwimbo 8:14.

6. Mambo ka o kyakatezha kuyuka baambile byambo biji mu uno lwimbo?

⁶ Lwimbo wa kwa Solomone wawama bingi. O ene mambo o atelelwa’mba lwimbo “wakila nyimbo yonse.” (Lwimbo 1:1) Bino mu uno lwimbo, Solomone kechi watongolamo mazhina a baji mu jino jishimikila ne. Kechi wiatongwele ne, mambo wakebelenga lwimbo ne nsansawilo kumvwanyika bulongo. Nangwa byonkabyo, byambo bine byo biji ne ye babena kwambila bitukwasha kuyuka waambile byobyo byambo. *

7, 8. Twakonsha kwambapo’mba ka pa “byambo bya butemwe” biji mu buku wa Lwimbo wa Solomone? Tongolaipo bimo.

⁷ Buku wa Lwimbo wa Solomone muji “byambo bya butemwe” byavula bingi biambilanga uno nsongwakazhi na kafunga ye atemenwe. Mu ano moba twakonsha kukumya byambo byabo bya butemwe byo beambilanga mambo byanembelwe kala papita ne myaka 3000. Bino bitulengela kuyuka byajinga butemwe bwabo nangwa kya kuba byo baubanga byapusana na byo tuba mu ano moba. Kafunga watakaikile uno nsongwakazhi kupichila mu kwamba pa meso anji kuba’mba “ajitu nobe a bankunda,” ko kuba’mba wajinga na kifyele. (Lwimbo 1:15) Kabiji nsongwakazhi naye wafwanyikizhe meso a nsongwalume ku babembe. (Tangai Lwimbo wa Solomone 5:12.) Meso atoka a uno nsongwalume wiamonanga bingi bulongo nobe babembe babena kowa mu mukaka.

⁸ Mu Lwimbo wa Solomone byambo byanembwamo kechi byonse byaamba pa buya ne. Akilangulukai pa byambo byaambile kafunga pa ñambilo ya nsongwakazhi. (Tangai Lwimbo wa Solomone 4:7, 11.) Byatunwa byanji bebilumbulula kuba’mba “kuzuuma munzungwe wa buki.” Mambo ka? Mambo buki bwa ku jipuma bwatobala bingi. “Buki ne mukaka biji munshi ya lujimi wobe” kulumbulula kuba’mba byonka biji buki ne mukaka, byambo byanji byawamine bingi. Kyamwekeshatu patoka kuba’mba kafunga kechi waambilengatu pa buya ne, byo amwambijile uno nsongwakazhi amba, “kashika walamba, . . . kechi ujipo na bulema nangwa bumo ne.”

9. (a) Kwitemwa kwa baji mu masongola kwavwangamo ka? (b) Mambo ka kwimwesha butemwe o kwanemena mu masongola?

⁹ Mu ano moba baji mu masongola bakamwa Yehoba bayuka kuba’mba masongola kechi bulundatu ne. Bafwainwa kwitemwa kya kine ne kwimwesha buno butemwa. Nanchi buno butemwe bo bwepi? Nanchi buno butemwa ke butemwe bwa kwipana bwatongolwa mu Baibolo nyi? (1 Yoa. 4:8) Abya mwavwangwa kwimwesha butemwe bwa kine bo bemwesha ba mu kisemi nyi? Nanchi buno butemwe ke bobwa bwikalapo na balunda na muntu nyi? (Yoa. 11:3) Nanchi butemwa bwa kwifwalama nyi? (Maana 5:15-20) Butemwe bwa kine mu masongola bwavwangamo bino byonse. Butemwe bumwekela mu byubilo. Kyanema bingi ku baji mu masongola kubula kuleka bintu bya pa juba pa juba kwibalengela kubula kwimwesha butemwe. Kuba bino kwakonsha kuzhikijila masongola ne kwibalengela kwikala na lusekelo. Mu bisho mo babula kwisajila wa kusongola, wa mulume ne wa mukazhi kechi beyuka bulongo saka bakyangye kwisongola ne. Onkao mambo, kubula kulubako kwiambila byambo bya butemwe kwanema bingi pa kuba’mba butemwe bwabo bukome ne masongola abo akose.

10. Mambo ka kuvuluka butemwe bo bemumwesheshe o kwanemena?

¹⁰ Kwiambila byambo bya butemwe mu masongola mufuma kintu kikwabo kyanema bingi. Mfumu Solomone wamulengejile nsongwakazhi wa ku Shulema “bya kwikobaika bya ngolode yo bavwangakanya na siliva.” Wamutakaikile bingi kuba’mba “umweka bulongo nobe ñondo, wakematu nobe kyeya kya juba.” (Lwimbo 1:9-11; 6:10) Nangwa byonkabyo, uno nsongwakazhi watwajijile kwikala wakishinka ku kafunga ye atemenwe bingi. Ñanyi kintu kyamukoseshanga ne kumutekenesha kimye kyo aabene na kafunga? Mwine witubula kyamukwashishe. (Tangai Lwimbo wa Solomone 1:2, 3.) Kuvuluka ‘byambo bya butemwe byawama’ byaambile kafunga. Kwi aye bino byambo ‘byawamine kukila binyu’ bisangajika muchima wa muntu, kabiji jizhina ja kwa kafunga jajinga “nobe manyi o baitulwila” pa mutwe. (Sala. 23:5; 104:15) Kuvuluka butemwe bo bakumwesheshe kulengela butemwe kukoma. Onkao mambo, kyanema  bingi baji mu masongola kumweshanga byo batemwa bamwatawabo nangwa bakazhi babo.

11. Bena Kilishitu babula mu masongola bakonsha kufunjilako ka ku nsongwakazhi mwina Shulema wachipishe bakwabo kubula kukolomona butemwe mwi aye?

¹¹ Bena Kilishitu babula mu masongola, kikatakata aba babena kukeba wa kusongola nangwa wa kusongolwako bakonsha kufunjilako byavula ku byanembwa mu buku wa Lwimbo wa Solomone. Uno nsongwakazhi kechi wamutemenwe Solomone ne. Wachipishe banabakazhi bena Yelusalema amba: “Kange munkanjikizhe nangwa kukolomona butemwe mwi amiwa ne, mwibuleke bukeishile bwine.” (Lwimbo 2:7; 3:5) Mambo ka? Mambo kechi kyailamo kufwalama muntu ujitu yense ne. Bena Kilishitu babena kukeba kusongolwa nangwa kusongola bafwainwa kupembela saka batekanya kufikatu ne kimye kyo bakatana muntu ye bakatemwa kya kine.

12. Mambo ka nsongwakazhi mwina Shulema o atemwejile kafunga?

¹² Mambo ka nsongwakazhi mwina Shulema o atemwejile kafunga? Kya kine kuba’mba uno nsongwalume walambile bingi, wajinga nobe “lupaala,” maboko anji ajinga “abuluñana nobe ngolode” kabiji maulu anji amwekanga bingi bulongo “nobe mashiki o balenga na mabwe.” Kechi walambiletu ne kukosa ne, bino wajinga ne na byubilo byawama. “Byonkatu bikala kichi kya maepo mu bichi bya mungye,” byo byajinga ne uno ‘mutemwe wanji inge uji pa bansongwalume.’ Uno nsongwakazhi wakishinka kwi Yehoba pa kuba’mba omvwe bino pa uno mwanamulume, kyamweka uno mwanamulume watemenwe bingi kwingijila Lesa.—Lwimbo 2:3, 9; 5:14, 15.

13. Mambo ka kafunga o atemenwejile uno nsongwakazhi?

¹³ Pano nga uno nsongwakazhi mwina Shulema wajinga byepi? Nangwa kya kuba walambile bingi kya kuba walala ne muchima wa mfumu wajinga na “ba muka mfumu 60 ne bantombo 80 ne bansongwakazhi ba kukankalwa kubala,” bino aye mwine wimonanga “nobe jiluba ja mu kisanzangala,” ko kuba’mba jiluba jabula kunema. Uno nsongwakazhi wipelwile bingi. Bino kafunga wamumonangatu nobe “jiluba jiji mu miba.” Mambo uno nsongwakazhi wajinga wakishinka kwi Yehoba.—Lwimbo 2:1, 2; 6:8.

14. Bena Kilishitu bazhike ne bakatanda bakeba kutwela mu masongola bakonsha kufunjilako ka ku butemwe bo baambapo mu buku wa Lwimbo wa Solomone?

¹⁴ Binembelo byakambizha bena Kilishitu  kusongolatu nangwa kusongolwatu “kana monka mwi Nkambo.” (1 Ko. 7:39) Bena Kilishitu babula mu masongola bachinuzhuka kwifwalama na bantu babula kwitabila. Abo bakeba bakusongola nangwa bakusongolwako mu bapopweshi bakishinka ba Yehoba. Pa kuba’mba mwikale mutende ne kwingijila Lesa saka mwakwatankana mwafwainwa kwikala na lwitabilo ne moyo wa kwakamwa Lesa. Bino byo bintu byanema bingi byo mwafwainwa kukeba kumona mu muntu ye mukeba kusongola nangwa kusongolwako. Abino byo byubilo kafunga byo amwene mu nsongwakazhi ne nsongwakazhi naye byobyo amwene mu kafunga.

15. Bena Kilishitu babula mu masongola bakamwa Lesa bakonsha kufunjilako ka ku nsongwakazhi mwina Shulema?

¹⁵ Tangai Lwimbo wa Solomone 4:12. Mambo ka kafunga o afwanyikizhizhe mutemwe wanji ku “mashamba” aji mu luvimba? Muntu ungi kechi wakonsha kutwela mu mashamba aji mu luvimba ne. Muntu wakonshatu kutwelamo kana bamushikwilako ku kibelo. Uno nsongwakazhi mwina Shulema wajinga nobe ano mashamba mambo watemenwetu ukekala mwatawanji aye kafunga kwapwa. Byo abujile kongolwa ku mfumu, uno nsongwakazhi wamwesheshe kuba’mba uji nobe “nsakwa,” kechi nobe “kinzhilo” kishinkukashinkukatu ne. (Lwimbo 8:8-10) Kyo kimotu, bansongwalume ne bansongwakazhi bakamwa Lesa bafwainwa kwilama ne kukamweshatu butemwe ku muntu ye bakasongola nangwa ye bakasongolwako kulutwe.

16. Bebajikila bakonsha kufunjilako ka ku byanembwa mu buku wa Lwimbo wa Solomone?

¹⁶ Kafunga byo aambijile uno nsongwakazhi mwina Shulema kuba’mba baye na kwendauka mu kimye kya milemba, bakolojanji bamukainye. Pakuba bakolojanji bamutumine kuya na kusopa bujimi bwa miñanzañanza. Mambo ka? Nanchi kechi bamuketekejile nyenga yabo nenyi? Abya balangulukilenga kuba’mba uji na milanguluko ya kuba bubi nyi? Kechi bakebelanga nyenga yabo kuponena mu lweseko ne. (Lwimbo 1:6; 2:10-15) Kishinka kyo bafwainwa kufunjilako bena Kilishitu babula mu masongola ke kino: Kimye kyo mwibajikila, mwafwainwa kujimuka pa kuba’mba bulunda bwenu bwikale bwatoka. Kuya kwa bubiji bwenu ne. Nangwa kya kuba kechi kyatama kwimwesha butemwe ne, bino mwafwainwa kuchinuzhukanga bintu byakonsha kwimubika mu lweseko.

17, 18. Mwamwenamo byepi mu byo twafunda mu buku wa Lwimbo wa Solomone?

¹⁷ Bena Kilishitu batwela mu masongola saka betemwa bingi. Yehoba watendekeshe masongola kuba’mba akekalenga myaka ne myaka. Onkao mambo, kyanema bingi baji mu masongola kubula kuzhimya lubebe lwa butemwe bwabo. Bafwainwa kwikalanga bwikalo bulengela butemwe kukoma.—Mako 10:6-9.

¹⁸ Pa kukeba wa kutwela nanji mu masongola, mwafwainwa kusala muntu ye mwatemwa kya kine. Kabiji mwafwainwa kukomesha butemwe bwenu pa kuba’mba bukabule kuzhima, byonkatu byo bebulumbulula mu buku wa Lwimbo wa Solomone. Anweba mubena kukeba kutwela mu masongola, ne anweba muji mu masongola, tanai butemwe bwa kine, ko kuba’mba “lubebe lwa kwa Yehoba.”—Lwimbo 8:6.