MU 1870 jibumba jicheche mu Pittsburgh (Allegheny), mu Pennsylvania, ku U.S.A., jatendekele kukebakeba mu Binembelo. Byo bebatangijilenga kwi ba Charles Taze Russell, bafunjilenga pa mutwe wa bukuzhi bwa kwa Kilishitu kabiji bayukile mwingilo mukatampe wa buno bukuzhi mu kuba kyaswa muchima wa Yehoba. Baumvwine bingi bulongo byo bafunjile’mba bukuzhi bwashinkula jishinda ja ku lupulukilo, nangwatu ku boba bakyangye kumvwa pe Yesu! Beumvwine’mba bafwainwa kutendeka kuvuluka lufu lwa kwa Yesu pa mwaka pa mwaka.—1 Ko. 11:23-26.

Mulongo Russell watendele kunemba Zion’s Watch Tower, waambilenga bingi pa lufunjisho lwa bukuzhi kuba’mba jishinda jikatampe Lesa jo amwesheshamo butemwe. Kyamba kya Usopa kyatelele kino kimye kya Kivuluko kya lufu lwa Kilishitu amba “kimye kyanema bingi” ne kutundaika batanga kwikivulukanga mu Pittsburgh nangwatu ku mapunzhatu akwabo mu mabumba. “Nangwatu paji babiji nangwa basatu baji na lwitabilo lumo lwanema,” nangwatu muntu umo, “Nkambo naye ukekala nabo.”

Pa mwaka pa mwaka, bantu bavula baiyanga ku Kivuluko mu Pittsburgh. Banembele byambo bya lwito amba, “Bantu baji na lusekelo bakemutambwila.” Kine Bafunda Baibolo ba ku ino mpunzha batambwijilenga na muchima umo ne kujiisha balongo ne banyenga yabo ba ku mupashi. Mu 1886 kwajinga “Kupwila kwa Bantu Bonse” kwajingako pa moba avula kimye kya Kivuluko. Kyamba kya Usopa kyatundaikile bantu amba, “Iyai anweba mwatemwa kya kine Nkambo ne balongo banji ne bukine bwanji.”

Pa myaka yavula, Bafunda Baibolo mu Pittsburgh baikalanga na kushonkena kwa bantu baitabila mu bukuzhi bayanga kokwa na kutanwa ku Kivuluko. Bafunda Baibolo byo bayilenga na kuvula, mabumba ne batanwa ku Kivuluko batendekele kuvujilako ntanda yonse. Ba Ray Bopp ba mu Chicago ecclesia (kipwilo) bavulukile’mba mu ma 1910 papitanga maola avula pa kuba’mba bapishemo bipashañano mu bitota bya bantu batanwangako mambo bavula bajangako.

Ñanyi bipashañano byo baingijishanga? Nangwa kya kuba bayukile’mba Yesu waingijishe binyu pa Kijiilo kya Nkambo kya Mabanga, pa kyokya kimye Kyamba kya Usopa kyaambile’mba bafwainwa kwingijishanga mema atobala a mañanzañanza nangwa a bipangwa byauma byo bateka, pa kuba’mba babule kweseka boba “babula kukosa.” Nangwa byonkabyo, binyu bebipananga ku boba balangulukilenga’mba “binyu byabila byobyo bafwainwa kwingijisha.” Mu kuya kwa moba Bafunda Baibolo bayukile’mba binyu bichila byabula kuweluka byo byafwainwa kwimenako mashi a kwa Yesu.

Kuvuluka lufu lwa kwa Yesu kwalengejile kwikala na kimye kya kulanguluka langulukapo. Nangwa  byonkabyo, mu bipwilo bimo kyamwekanga nobe baji pa kijilo, kabiji inge mutanchi wapwa bavula bayanga kwa kubula kwamba ne kyambo. Buku wa kuba’mba Yehoba wa mu 1934 waambile’mba Kivuluko kechi kyafwainwa kubiwa na “bulanda” na mambo a lufu lwatama lwafwile Yesu ne, bino kyafwainwa kubiwa na “lusekelo” byo aji kalama kabiji Mfumu kufuma mu 1914.

Mu mwaka wa 1935 mwaubiwe lupimpu lukatampe lwapimpwile Bivuluko bya kulutwe, mambo balumbulwile bulongo mwatala byambo bya kuba’mba “jibumba jikatampe” byanembwa mu Lumwekesho 7:9. Kufikatu kyokya kimye, bakalume ba Yehoba bamonanga jino jibumba amba bena Kilishitu bepana baji na mukoyo mucheche. Kabiji jino jibumba jikatampe bejiyukile’mba ke jibumba ja bapopweshi ba kishinka baji na luketekelo lwa kwikala pano pa ntanda. Panyuma ya ino ndumbulwilo ne kwipimapima abo bene, ba Russell Poggensee baambile’mba: “Yehoba kupichila mu mupashi wanji wazhila kechi wasolola mwi amiwa amba nafwainwa kuya mwiulu ne.” Mulongo Poggensee ne bakwabo bajinga nobe aye balekele kujako ku bipashañano bino batwajijile kutanwa ku Kivuluko.

Mu kyonka kino “kimye kyanema bingi,” mikwekele iikajila ya kusapwila yajinga jishinda jawama ku bonse ja kumwesheshamo lusanchilo lwa bukuzhi. Bulletin wa mu 1932 watundaikile bena Kilishitu amba kechi bafwainwa kwikala “batumwa ba Kivuluko,” bajangakotu babujile kwikala “ba mwingilo” ne, bino bafwainwa kusapwilanga mambo a bukine. Mu 1934 Bulletin watundaikile bantu kwingilako “bupainiya bwa kukwasha” byo aambile’mba: “Nanchi mu kimye kya Kivuluko mukekala bantu 1,000 bakanembesha nyi?” Pa mambo a bashingwa Informant waambile’mba: “Bakonsha kwikalatu na lusekelo lukatampe inge ke basapwile pa Bufumu.” Mu kuya kwa kimye, ne baji na luketekelo lwa kwikala pano pa ntanda nabo bafwainwe kubanga bino. *

Ku bantu bonse ba Yehoba, kimye kya Kivuluko ke kimye kya bufuku kyazhila mu mwaka. Bekivuluka nangwatu mu bimye byakatazha. Mu 1930 ba Pearl English ne banyenga yabo ba Ora, baendele musinso walepa makilomita 80 (mamailoshi 50) kuya na kutanwa ku Kivuluko. Byo bajinga mu kaleya mwa bunke mu China bamishonale abo ba Harold King banembele nsansawilo ne nyimbo yaamba pa Kivuluko ne kulenga bipashañano na mañanzañanza afiita auma ne mupunga. Kufuma ku Eastern Europe kufika ku Central America ne ku Africa, bena Kilishitu babula moyo bachinchikile makondo nangwa kwibakanya ne kuya na kuvuluka lufu lwa kwa Yesu. Kechi na mambo a ko tuji ne bintu byo tubena kupitamo ne, tukonkana pamo na kunemeka Yehoba Lesa ne Yesu Kilishitu mu kimye kyanema kya Kivuluko.