Kyamba kya Usopa kya mu 1950 kya September 15, kyalumbulwile “kifwanyikizho” ne “kintu kine kyo kimenako” amba: “Kifwanyikizho ke kintu kimenako kintu kikamweka kulutwe. Kabiji kintu kine ke kyokya kyo babena kwambapo mu bukifwanyikizho. Kifwanyikizho kijitu nobe kimvule, ne kwafuma kimvule kyo kine kintu.

Pa myaka yavula yapitapo, mabuku etu aamba pa banabalume ne banabakazhi bakishinka bajingako kala, nabiji Debola, Elihu, Yefita, Yoba, Lehaba ne Libeka ne bakwabotu kuba’mba bajinga nobe bimvule nangwa’mba bifwanyikizho bimenako bena Kilishitu bashingwa nangwa ba mu jibumba jikatampe. (Lum. 7:9) Twalangulukanga’mba Yefita, Yoba ne Libeka bemenako bashingwa, pakuba Debola ne Lehaba amba bemenako jibumba jikatampe. Mu myaka ya kulutwe kuno kechi twesakanya bintu mu jino jishinda ne. Mambo ka?

Binembelo bimwesha’mba bantu bamo bobatongola mu Baibolo baimenangako bintu bikatampe. Byonkatu byo kyanembwa mu Ngalatiya 4:21-31, mutumwa Paulo waambile pa “kifwanyikizho” mwajinga banabakazhi babiji. Hegala muzha wa mukazhi wa kwa Abalahama waimejilengako bena Isalela bakisemwa, bepaine kwi Yehoba kwesakana na Mizhilo ya Mosesa. Pakuba Sala, wajinga “mwanamukazhi mwana bene,” waimenejilengako mukazhi wa Lesa, ko kuba’mba, lubaji lwa mwiulu lwa jibumba janji. Mu nkalata yanji yo anembejile Bahebelu, Paulo waesakenye Melekizedeke kwi Yesu. Melekizedeke wajinga mfumu kabiji ñanga. Paulo watongwele mingilo ipasha yaingijile bano bantu babiji. (Hebe. 6:20; 7:1-3) Kabiji Paulo waesakenye Isaya ne baana banji babalume kwi Yesu ne bashingwa banji. (Hebe. 2:13, 14) Paulo wanembele bino na lutangijilo lwa mupashi; onkao mambo tuswa byo aamba pa bintu byo bimenako.

Bino, nangwatu Baibolo po yaamba kuba’mba muntu ubena kwimenako muntu mukwabo kechi twafwainwa kupwisha kuba’mba bintu byonse byaubile  yewo muntu nangwa byamwekele mu bwikalo bwanji bimenako kintu kikwabo ne. Kya kumwenako, nangwa kya kuba Paulo waambile kuba’mba Melekizedeke wimenako Yesu, bino Paulo kechi waambapo pa shinkwa ne binyu Melekizedeke byo apeele Abalahama panyuma ya kushinda bamfumu bana ne. Onkao mambo, kechi kujipo bishinka bya mu Binembelo byakonsha kwitulengela kukeba kuyuka byo bilumbulula ne.—Nte. 14:1, 18.

Banembi bamo bajingako panyuma ya lufu lwa kwa Kilishitu baponejile mu kitewa kya kumona nobe bintu byonse paji byo bimenako. Buku wa kuba’mba The International Standard Bible Encyclopaedia walumbulula mafunjisho a kwa Origen, Ambrose, ne Jerome amba: “Bakebelenga bifwanyikizho, kabiji bebitananga mu mashimikila onse, ne mu tubintutu tucheche twanembwa mu Binembelo. Nangwatu mashimikila apeela ne a bintu bimweka mu bwikalo balangulukanga’mba emenako bukine bwakatazha kumvwa . . . , nangwatu masabi akwachile baana ba bwanga pa juba jamwekele Mupulushi kwi abo, bamo balanguluka’mba aa masabi 153 emenako bimo.”

Augustine wa ku Hippo waambilepo bingi pa jishimikila ja kwa Yesu ja byo ajishishe banabalume nobe 5,000 na bashinkwa bambaale batanu ne masabi abiji. Byo kiji kuba’mba wichi wanemene kukila mbaale, Augustine wapwishishe kuba’mba bashinkwa batanu bemenako mabuku atanu anembele Mosesa (“mbaale” wabula kunema kwimenako “Lulayañano lwa Kala”). Pano nga aa masabi abiji? Nao walangulukanga’mba emenako mfumu ne ñanga. Shayuka mukwabo watemenwe kukeba kuyuka kintu byo kimenako waambile kuba’mba Yakoba byo apotele bubeji bwa kwa Isao na muchiba wa masuku achila, kyaimenejilengako Yesu byo apotele kya buswanyi kya mwiulu kya bantu na mashi anji achila.

Inge ino ndumbulwilo yamweka kuba’mba kechi yailamo ne, ko kuba’mba mwamona byo kyakatazha kuyuka bintu byo bimenako. Bantu kechi bakonsha kuyuka mashimikila a mu Baibolo emenako bintu bimo ne abula kwimenako bintu bimo ne. Kintu kyawama kuba ke kino: Binembelo po byaamba’mba muntu, kintu kyamwekele nangwa kintutu kikwabo kibena kwimenako kintu kimo twafwainwa kuswa. Kechi twafwainwa kumonanga muntu nangwa kintutu kikwabo amba kimenako kintu kimo inge Binembelo kechi byaambapo ne.

Pano twakonsha kumwenamo byepi mu bintu byanembwa mu Binembelo? Mu Loma 15:4 tutangamo byambo bya kwa Paulo bya kuba’mba: “Bintu byonse byanembelwe kala bebinembele’mba tufunjileko, kuba’mba mu kuchinchika kwetu ne mu lutekenesho lwa mu Binembelo twikale na luketekelo.” Paulo waambilenga kuba’mba balongo banji bashingwa ba mu myaka kitota kitanshi bafwainwe kufunjilako ku bintu byamwekele kala byanembwa mu Binembelo. Onkao mambo, bantu ba Lesa, bashingwa nangwa ba mu “mikooko ikwabo,” babena kwikala mu “moba a kupelako” nangwa ne, bakonsha kufunjilako ku “bintu byonse byanembelwe kala.”—Yoa. 10:16; 2 Timo. 3:1.

Kechi twafwainwa kumonanga mashimikila amo kuba’mba abena kwambatu pa jibumba jimo, ja bashingwa nangwa jibumba jikatampe, nangwa amba bya kala. Bantu ba Lesa ba mu ano mabumba onse bafwainwa kwingijisha byo tufunjilako ku ano mashimikila. Kya kumwenako, kechi twafwainwa kumonanga byanembwa mu buku wa Yoba kuba’mba bibena kwambatu pa byachinchikile bashingwa mu kimye kya Nkondo Itanshi ya Ntanda Yonse ne. Bapopweshi ba Lesa bavula, banabalume ne banabakazhi, bashingwa ne ba mu jibumba jikatampe babena kupita mu bintu byakatazha byapichilemo Yoba kabiji “mwayuka ne kintu Yehoba kyo amubijile, mwayuka’mba Yehoba ye wa kifyele ne lusa.”—Yako. 5:11.

Akilangulukai pa kino: Nanchi mu bipwilo byetu mu ano moba kechi muji banabakazhi bakishinka baji byonka byajinga Debola, nangwa bakulumpe mu kipwilo bakyanyike baji na maana byonka byajinga Elihu nenyi? Kabiji nanchi kechi muji bapainiya bachinchika kabiji bamukoyo byonka byajinga Yefita, ne banabalume ne banabakazhi bakishinka kabiji bachinchika byonka byachinchikile Yoba nenyi? Tumusanchila bingi Yehoba mambo walama “bintu byonse byanembelwe kala,” kuba’mba kupichila “mu lutekenesho lwa mu Binembelo twikale na luketekelo.”

Na mambo a bino bishinka, mabuku etu mu ano moba abena kwamba kikatakata pa byo tufunjilako ku mashimikila a mu Baibolo, kechi pa byo emenako mu bungauzhi ne.