1-3. Ki ka kyalengejile luketekelo lwa kwa Paulo mwi Yehoba kukoselako? (Monai kipikichala kitanshi.)

INGE mwajinga bena Kilishitu mu Loma pa kyokya kimye, bumi bwenu inge bwajinga mu kizumba. Baana ba bwanga ba kwa Kilishitu bebamanyikilenga bingi ne kwibapamo mambo a kuba’mba bo basokele muzhi wa Loma mu 64 C.E., kabiji bebabepejile ne kuba’mba bashikwa bantu. Bena Kilishitu bavula bebatayilenga mu tuleya. Bakwabo nabo bebatayilenga mu mayengo a banyama pa kuba’mba bebaje nangwa kwibapopa pa bichi ne kwibasoka pa kuba’mba bapanenga kyeya bufuku.

² Kyamweka pa kyonkakya kimye kyakatazha po po bamukashile Paulo ja bubiji mu Loma. Nanchi bena Kilishitu bakwabo bakonsheshe kumukwasha nyi? Kyamweka Paulo wajinga na bijikila pa mambo a kino, mambo wanembejile Timoti amba: “Mu kwifumya kwami mu mambo kutanshi, kafwako nangwa umo wañimenejileko ne, bonse bankaine, nalomba namba kange bakebatotolweshe ne.” Pano bino, Paulo wayukile kuba’mba kechi wajinga bunke ne. Wanembele’mba: “Bino Nkambo waimene kwipi kwi amiwa ne kumpa bulume.” Nkambo Yesu wamupele Paulo bulume.  Nga kino kyamukwashishe byepi? Waambile’mba: “Napokolwelwe ku kanwa ka bokwe.”—2 Timo. 4:16, 17. *

³ Kuvuluka kino kyamwekele kwamukoseshe bingi Paulo ne kumulengela kuketekela kuba’mba Yehoba usakumukwasha kuchinchika meseko o apichilengamo, ne makatazhotu akwabo akonsheshe kwiya kulutwe. Kyo kyo aambijile ne kuba’mba: “Nkambo ukampokolola ku mingilo yonse yatama.” (2 Timo. 4:18) Kwa kubula nangwa kuzhinaukatu ne, Paulo wafunjile kuba’mba nangwa kya kuba bantu bakankalwa kumukwasha, Yehoba ne Mwananji bakamukwasha.

4, 5. (a) Kwi ñanyi ko mwakonsha kutambula bukwasho kimye kyonse? (b) Mwakonsha kukosesha byepi bulunda bwenu ne Yehoba?

⁴ Nanchi mwakikalapo na lukatazho lukatampe ne kutendeka kulanguluka’mba kafwako wa kwimukwasha nyi? Kampe mwakankelwe kutana nkito, nangwa mwajinga na lukatazho ku sukulu, kukolwa nangwa makatazhotu akwabo. Kimo kimye mwakebelenga bukwasho, pano bakwenu bakankelwe kwimukwasha. Ibyo, makatazho amo bantu kechi bakonsha kwiapwisha ne. Mu bimye bya uno mutundu, nanchi lutundaiko luji mu Baibolo lwa kuba’mba, “Ketekela mwi Yehoba” lwatutu nyi? (Maana 3:5, 6) Nanchi kechi lwingila nenyi? Lwingila bingi. Byonka byo kyanembwa mu mashimikila a mu Baibolo, Lesa ukwasha bingi.

⁵ Onkao mambo, inge bantu bakankalwa kwimukwasha, kechi mwafwainwa kuzhingila ne. Byonka byaubile mutumwa Paulo, mwafwainwa kumona kuba’mba bino byo bimye byo mwafwainwa kuketekela mwi Yehoba ne kwimwena byo emuta muchima. Kuba bino kukemulengela kuketekela mwi Lesa ne kwikala balunda nanji bakine.

6. Mambo ka o kyakonshesha kukatazha kuketekela mwi Yehoba kimye kyo tuji mu makatazho?

⁶ Abya mwakonsha kumubuula Yehoba mu lulombelo lukatazho lo muji nalo ne kukasuluka pa kuyuka kuba’mba mwauba byo mwakonsha kuba pa lolo lukatazho kabiji mwasha byonse mu maboko anji nyi? Ee, mwakonsha. (Tangai Salamo 62:8; 1 Petelo 5:7.) Kuba bino kwakonsha kwimulengela kwikala balunda na Yehoba. Pano bino, kyakonsha kukatazha kuketekela kuba’mba Yehoba usakwimukwasha pa lukatazho lo muji nalo. Mambo ka? Mambo kimye kimo Yehoba kechi ukumbula milombelo ponkapotu ne.—Sala. 13:1, 2; 74:10; 89:46; 90:13; Ha. 1:2.

7. Mambo ka Yehoba o abujila kufikenatu kwitupa bintu byonse byo tumulomba?

⁷ Mambo ka Yehoba o abujila kufikenatu kwitupa byonse byo tumulomba? Vulukai kuba’mba Lesa waesakanya bulunda bwetu ne aye ku bulunda buji na mwana ne bashanji. (Sala. 103:13) Mwana kechi wakonsha kuketekela bansemi yanji kumupa byonse byo akeba nangwa kumupabyo pa kyonkakyo kimye ne. Kimo kimye baana bakebatu ne bintu byabula kufwainwa. Bintu bikwabo byo bakeba mwakonsha kwibobilatu kana pa kimye kyafwainwa. Kabiji bintu bikwabo bikeba mwanenu kechi byakonsha kumufwainwa ne, nangwa byakonsha kulefula bakwabo inge mwamubilabyo. Kufikenatu kubila mwana kintu kyonse kyo alomba kwakonsha kulengela nsemi kwikala nobe muzha ku mwananji ne mwana waikala nobe ye nkambo yanji. Kyo kimotu, inge Yehoba wamona’mba kisakwituwamina, wakonsha kuleka papita kimye pa kuba’mba etubile byo twalomba. Uno ye mwingilo wanji, byo aji Mulenga wetu wa maana, Nkambo wetu witutemwa, kabiji Shetu wa mwiulu. Kufikenatu kwitubila byonse byo tulomba kwakonsha kuvulañanya bulunda bwetu ne aye.—Esakanyaiko Isaya 29:16; 45:9.

8. Yehoba walaya’mba ka inge bulume bwetu bwa kuchinchika bwapwa?

 ⁸ Kikwabo ke kya kuba’mba Yehoba wayuka papelela bulume bwetu. (Sala. 103:14) Onkao mambo, kechi uketekela atweba kuchinchika na bulume bwetu ne, bino witukwasha mambo ye Shetu. Ibyo kuba’mba bimye bimo twakonsha kumvwa nobe bulume bwa kuchinchika bonse bwapwa. Pano bino, Yehoba witulaya kuba’mba kechi ukaleka bakalume banji kuyanda kya kuba bakankalwa kuchinchika ne. Aye ‘uketumwena jishinda ja kuchinchikilamo.’ (Tangai 1 Kolinda 10:13.) Onkao mambo, kwa kubula nangwa kuzhinaukatu ne, twaketekela’mba Yehoba wayuka papelela bulume bwetu bwa kuchinchika.

9. Twakonsha kuba byepi inge milombelo yetu ya kukeba bukwasho yabula kukumbulwa bukiji?

⁹ Inge milombelo yetu ya kukeba bukwasho yabula kukumbulwa bukiji, twayai tupembelele Mwine wayuka kimye kya kwitukwasha. Vulukai kuba’mba aye naye witutekenya, mambo ukeba bingi kwitukwasha. Baibolo waamba’mba: “Yehoba wimutekenya kuba’mba emubile bibusa, Kabiji ukemana kuba’mba emubile lusa. Mambo Yehoba ye Lesa uchiba mambo monka mo aolokela. Bo bene ba lusekelo aba bonse babena kumupembelela.”—Isa. 30:18.

10-12. (a) Nga lukatazho lwakonsha kubayila byepi mwina Kilishitu ubena kulama wa mu kisemi wabela kikola kikatampe? (b) Kuketekela mwi Yehoba kwakonsha kulengela byepi muntu kukosesha bulunda na Lesa? Lumbululai.

¹⁰ Kimye kyo muji mu makatazho akatampe, mwakonsha kumvwa nobe muji kwipi na “kanwa ka bokwe,” byonka byaumvwine Paulo. Kyanema bingi kuketekela mwi Yehoba, mambo kikatazha bingi kumuketekela mu bimye bya uno mutundu. Fwanyikizhai kuba’mba mubena kulama mulongo wenu wakolwa kikola kikatampe. Kampe mwalombapo pa luno lukatazho kuba’mba Lesa emupe maana ne bulume. * Na mambo a kuba mwalombapo, nanchi kechi mwakasuluka pa kuyuka kuba’mba meso a Yehoba aji pe anweba kabiji amba ukemukwasha kuchinchika nyi?—Sala. 32:8.

¹¹ Bimye bimo bintu byakonsha kukatazha. Badokotala bakonsha kwimubuula bintu byapusana pusana. Nangwa kampe balongo benu bo mwaketekejile’mba bakemukwasha bakonsha kumweka nobe babena kulengelatu lukatazho kubayilako. Twajijilai kuketekela mwi Yehoba kuba’mba emukoseshe. Kabiji twajijilai kufwenya kwipi ne aye. (Tangai 1 Samwela 30:3, 6.) Makatazho enu byo akapwa, bulunda bwenu ne aye bukakosa bingi.

¹² Ba Linda * bemwenejile kino kishinka panyuma ya kulama bansemi babo bakolelwe pa myaka yavula kimye kyo bajinga pepi kufwa. Ba Linda baambile’mba: “Kimye kyo twajinga na luno lukatazho, bamwata wami, bakolojami ne amiwa bimye bimo twakankalwanga ne kuyuka bya kuba. Twamonangatu amba kafwako mwa kwikikwashisha ne. Pano bino, inge twavuluka byo kyajinga tushiinwa kuba’mba Yehoba witukwashishe. Mu kimye kyamwekele bintu kukatazha, aye witukwashishe ne kwitubuula bya kuba.”

13. Kuketekela mwi Yehoba kwakwashishe byepi nyenga umo kuchinchika makatazho akatampe o ajinga nao?

¹³ Kuketekela mwi Yehoba kwakonsha kwitukwasha bingi inge kwamweka bya malwa. Bamwatawabo ba Rhonda babula Bakamonyi banembele nkalata ya kukainapo ba Rhonda. Pa kyonkakya kimye bakolojabo ba Rhonda babalume bebataine na kikola kyonauna binungwa bya mubiji, kabiji kipayañana. Byo papichile bañondo bacheche, bakolojabo babalume bafwishishe bakazhi. Ba Rhonda byo bamwene kuba’mba  binyenge byabo byakepako na mambo a bintu byo bapichilengamo, bafuukwilepo kutendeka mwingilo wa bupainiya bwa kimye kyonse. Papichiletu moba acheche bainabo nabo bafwa. Ki ka kyakwashishe ba Rhonda kuchinchika? Baambile’mba: “Nesambanga ne Yehoba mu lulombelo pa juba pa juba, nangwatu inge kuji bintu bicheche byo mbena kukeba kufuukula. Kino kyandengejile kuketekela bingi mwi Yehoba. Kyamfunjishe kuketekela mwi aye kukila kwiketekela amiwa mwine nangwa kuketekela mu bantu. Kabiji wankwashishe bingi, mambo wampanga byonse byo nakebanga. Kyafumamo, namwenamo bingi mu kuketekela Yehoba.”

14. Ñanyi luketekelo lwafwainwa kwikala na mwina Kilishitu wakishinka umvwe mulongo wanji wapangiwa mu kipwilo?

¹⁴ Akilangulukai pa luno lukatazho lukwabo. Fwanyikizhai kuba’mba mulongo wenu bamupanga mu kipwilo. Kwesakana na byo mwafunda mu Baibolo, mwayuka byo mwafwainwa kuba na bantu bapangiwa mu kipwilo. (1 Ko. 5:11; 2 Yoa. 10) Pano bino, kulondela muzhilo waamba pa bya kuba na bantu bapangiwa mu kipwilo kwakonsha kukatazha. * Nanchi mwakonsha kuketekela kuba’mba Shenu wa mwiulu ukemukosesha pa kuba’mba mulondele mukambizho wa mu Baibolo wakanya kupwanañana na bantu bapangiwa mu kipwilo nyi? Nanchi mwakonsha kukosesha bulunda bwenu ne Yehoba mu kimye kya uno mutundu nyi?

15. Mambo ka Adama o abujile kukookela mukambizho wa Yehoba mu Edena?

¹⁵ Akilangulukai pa muntu mutanshi Adama. Nanchi waitabijile kuba’mba wakonsha  kusatukila Yehoba ne kutwajijila kwikala na bumi nyi? Ine, mambo Binembelo bitubula’mba Adama “kechi wajimbaikilweko ne.” (1 Timo. 2:14) Pano ki ka kyamulengejile kubula kukookela mukambizho? Kyamweka Adama wajiile kipangwa kyamupele Evwa mambo a kutemwa mukazhanji. Waumvwijile jiwi ja mukazhanji mu kifulo kya kumvwina Lesa, aye Yehoba.—Nte. 3:6, 17.

16. Ñanyi ye twafwainwa kutemwa bingi, kabiji mambo ka?

¹⁶ Nanchi kino kibena kulumbulula’mba kechi twafwainwa kutemwa balongo betu nenyi? Ine. Pano bino, Yehoba ye ye twafwainwa kutemwa bingi kukila pa bonse. (Tangai Mateo 22:37, 38.) Kino kikakwasha balongo betu, bengijila Yehoba nangwa babula kumwingijila. Onkao mambo, twajijilai kubaisha butemwe bwenu bo mwatemwa Yehoba ne kumuketekela. Kabiji inge kibena kwimukola bingi ku muchima na mambo a mulongo wenu ye bapanga mu kipwilo, mubuulai Yehoba mu lulombelo biji ku muchima wenu. * (Loma 12:12; Fili. 4:6, 7) Lombainga kwi Yehoba, mambo kyo kyakonsha kwimulengela kukosesha bulunda bwenu ne aye. Kuba bino kukemulengela kuketekela kuba’mba Yehoba ukemukwasha.

¹⁷ Ki ka kyalengejile’mba Paulo ‘bamupokolole ku kanwa ka bokwe’? Waambile’mba bamupokolwele ‘kuba’mba kupichila mwi aye mwingilo wa kusapwila engijiwe bulongo ne bisaka byonse bya bantu biomvwe.’ (2 Timo. 4:17) Byo twapayankana mu mwingilo wa kusapwila byonka byaubanga Paulo, twaketekela kuba’mba Yehoba ‘uketubikilapo’ byonse byo tukajilwa. (Mat. 6:33) Byo tuji basapwishi ba Bufumu, ‘betupa mambo awama,’ kabiji Yehoba witumona’mba “twi ba mwingilo umo” ne aye. (1 Tesa. 2:4; 1 Ko. 3:9) Inge twabambakana mu mwingilo wa Lesa, kiketupelela kupembelela bukwasho.

18. Ñanyi bintu byakonsha kwitukwasha kuketekela mwi Yehoba ne kukosesha bulunda bwetu ne aye?

¹⁸ Onkao mambo, twayai twingijishe kino kimye kukosesha bulunda bwetu na Lesa. Inge kwaikala bintu byakonsha kwitulengela kwakamwa, kyo kimye kyo twafwainwa kufwenya kwipi ne Yehoba. Inge ketutange Mambo a Lesa, kutoñaminamo mu milombelo ne kwingila mingilo ya Lesa, tukaketekela kuba’mba Yehoba uketukwasha kuchinchika mu bintu byo tubena kupitamo pa kino kimye ne kimye kya kulutwe.