1. Mambo ka o twafwainwa kukosesha bulunda bwetu na Yehoba?

NANCHI mwi Bakamonyi ba kwa Yehoba bepana kabiji babatizhiwa nyi? Inge ibyo, muji na kintu kyanema bingi, ko kuba’mba bulunda bwawama na Lesa. Pano bino, buno bulunda buji mu kizumba na mambo a bintu bya mu ntanda ya kwa Satana ne bumbulwa kulumbuluka bwetu. Bena Kilishitu bonse baji mu kino kizumba. Onkao mambo, twafwainwa kukosesha bulunda bwetu na Yehoba.

2. (a) Nga bulunda bulumbulula ka? (Monai tubyambo twa munshi.) (b) Twakonsha kukosesha byepi bulunda bwetu na Yehoba?

² Nanchi muji na bulunda bwa kine na Yehoba nyi? Abya mwakonsha kutemwa kwibukosesha nyi? Kinembelo kya Yakoba 4:8 kyaamba’mba: “Fwenyai kwipi ne Lesa, ne aye ukafwenya kwipi ne anweba.” Monai kuba’mba kino kyavwangamo mbaji ibiji. * Inge ketwibikeko kufwenya kwipi ne Lesa, aye naye ukafwenya kwipi ne atweba. Kuba bino kimye kyonse kukalengela bulunda bwetu na Yehoba kukosa. Kino kiketulengela  kwikala na bulunda bwa kine ne aye. Kabiji tukekala na luketekelo lwajingapo ne Yesu kimye kyo aambile’mba: “Awa wantumine wa kine, kabiji . . . amiwa namuyuka.” (Yoa. 7:28, 29) Pano ñanyi bintu byo mwafwainwa kuba pa kuba’mba mufwenye kwipi ne Yehoba?

3. Twakonsha kwisamba byepi ne Yehoba?

³ Pa kuba’mba tufwenye kwipi ne Yehoba, twafwainwa kwisambanga nanji kimye kyonse. Mwakonsha kwisamba byepi ne Lesa? Muba byepi pa kwisamba na mulunda nenu wikala kwalepa? Mwafwainwa mwinembela makalata ne kwisamba pa foni bimye byavula. Po pamotu, mwisamba ne Yehoba kupichila mu kulomba kwi aye kimye kyonse. (Tangai Salamo 142:2.) Kabiji muswisha Yehoba kwisamba nenu inge kemutange Mambo anji kimye kyonse ne kulangulukapo. (Tangai Isaya 30:20, 21.) Pano twayai twisambe pa ino mbaji ibiji ya kwisambilamo ne aye byo ikosesha bulunda bwetu ne Yehoba ne kwitulengela kwikala balunda nanji bakine.

4, 5. Yehoba wisamba byepi ne anweba kupichila mu Mambo anji? Ambai kya kumwenako.

⁴ Kwa kubula nangwa kuzhinaukatu ne, mwayuka kuba’mba mu Baibolo muji byambo bya Lesa byo anembela bantu bonse. Pano bino, nanchi Baibolo walumbulula anweba bunke bwenu byo mwakonsha kufwenya kwipi ne Yehoba nyi? Ee. Mu ñanyi jishinda? Kimye kyonse kyo mubena kutanga ne kufunda Baibolo, mwafwainwa kuta muchima pa byo mubapo pa byo mutanga ne kulanguluka pa byo mwakonsha kwibingijisha mu bwikalo bwenu; inge mwauba bino, ko kuba’mba mubena kuswisha Yehoba kwisamba nenu kupichila mu Mambo anji. Kuba bino kukemulengela kwikala na bulunda bwa kine ne aye.—Hebe. 4:12; Yako. 1:23-25.

⁵ Kya kumwenako, tangai ne kulanguluka pa byambo byaambile Yesu bya kuba’mba, “Lekai kwibikila nsabo pano pa ntanda.” Inge mubena kutangizhako Bufumu mu bwikalo bwenu, pa kutanga bino byambo mukomvwatu nobe Yehoba ubena kwimusanchila. Pano bino, inge mwamona kuba’mba mwafwainwa kupimpulako bwikalo bwenu ne kuta muchima pa bintu bya Bufumu, ko kuba’mba Yehoba wimubulako mbaji yo mwafwainwa kwingijilapo pa kuba’mba mufwenye kwipi ne aye.—Mat. 6:19, 20.

6, 7. (a) Kufunda Baibolo kwitulengela byepi kutemwa Yehoba ne kuyuka amba witutemwa? (b) Ñanyi kintu kine kyo twafwainwa kufunjilanga Baibolo?

⁶ Kufunda Baibolo kwitulengela kuyuka mbaji yo twafwainwa kwingijilapo pakuba’mba tuwamishe bulunda bwetu na  Lesa. Kunungapo, kwitulengela kuyuka byubilo bya Yehoba byawama kabiji tumutemwa bingi. Inge butemwe bo twatemwa Lesa bwabaya, aye naye witutemwa bingi, kabiji kino kikosesha bulunda bwetu ne aye.—Tangai 1 Kolinda 8:3.

⁷ Pano bino, pa kuba’mba tufwenye kwipi ne Yehoba, kyanema bingi kuyuka kintu kine kyo tubena kutangila Baibolo. Kinembelo kya Yoano 17:3 kyaamba’mba: “Pa kuba’mba bakekale na bumi bwa myaka ne myaka, bafwainwa kwimuyuka anweba Lesa yenka wa kine, ne Yesu Kilishitu ye mwatumine.” Onkao mambo, kechi twafwainwa kutanganga na mulanguluko wa kukebatu kuyuka bintu ne. Bino kintu kine kyo twafwainwa kutangilanga Baibolo ke kukeba ‘kumuyuka’ bulongo Yehoba.—Tangai Kulupuka 33:13; Sala. 25:4.

8. (a) Ki ka kyakonsha kuleta luzhinauko pa byaubile Yehoba ku Mfumu Azaliya byanembwa mu 2 Bamfumu 15:1-5? (b) Nga kuyuka Yehoba kwakonsha kwitulengela byepi kubula kuzhinauka pa byo aubile?

⁸ Inge twamuyuka bulongo Yehoba, kechi tukomvwanga bibi inge mashimikila amo a mu Baibolo etulengela kuzhinauka ene mambo o aubijile bintu bimo ne. Kya kumwenako, mumvwa byepi inge mwalanguluka pa kintu Yehoba kyo aubile ku Mfumu Azaliya wa mu Yuda? (2 Mfu. 15:1-5) Monai kuba’mba, nangwa kya kuba “bantu batapishenga ne kusoka bya kufutumuna pa mapunzha atuntama,” Azaliya aye mwine “waubilenga byaoloka kwi Yehoba.” Nangwa byonkabyo, “Yehoba wapumine mfumu, ne aye wakolelwe mbumba kufikatu ne juba jo afwile.” Mambo ka Lesa o aubijile kino? Jishimikila kechi jaambapo ne. Nanchi kino kyafwainwa kwitulengela kumvwa bibi ku muchima nangwa kulanguluka’mba Yehoba wakambwile Azaliya pa kubula mambo nyi? Inge twamuyuka bulongo Yehoba, kechi tukalanguluka bino ne. Tukayuka kuba’mba Yehoba ujimuna bantu “monka mo kyafwainwa.” (Yele. 30:11) Kuyuka bino kwitulengela kuketekela kuba’mba nangwa kya kuba kechi twayuka Yehoba kyo akambwijile Azaliya ne, twafwainwa kuketekela kuba’mba buchibamambo bwanji bwajinga bwaoloka.

9. Ñanyi bishinka bitulengela kuyuka ene mambo Yehoba o akambwijile Azaliya na mbumba?

⁹ Pano bino, bishinka bikwabo byaamba pa jino jishimikila twakonsha kwibitaana mu binembelo bikwabo mu Baibolo. Mfumu Azaliya bamutelanga ne kuba’mba Mfumu Uzaya. (2 Mfu. 15:7, 32) Jishimikila jipasha na jino janembwa pa 2 Byambo bya Moba 26:3-5, 16-21, tufunjilako kuba’mba nangwa kya kuba pa bimye bimo Uzaya waubilenga byaoloka kwi Yehoba, bino kulutwe na lwendo “wilundumikile bingi ne kwiletela mwine lonaiko.” Na mambo a bwitote, watendekele kwingila mingilo ya bañanga yo babujile kumuswisha. Bañanga 81 bamusolomokele ne kweseka kumukwasha. Pano nga Uzaya waubile byepi? Kechi wakookejile ne. ‘Wibazhingijile bingi’ bano bañanga. Kyo kyalengejile kuba’mba Yehoba amukambule na mbumba.

10. Mambo ka o twafwainwa kubujila kuzhinauka bintu byuba Yehoba? Kabiji ki ka kyakonsha kwitulengela kuketekela mashinda a Yehoba aoloka?

¹⁰ Twakonsha kufunjilako kintu kyanema bingi ku jino jishimikila. Pano ibyepi inge kya kuba mu Baibolo kechi mwajingapo bishinka bikwabo byaamba pa jino jishimikila ne, byonka byo kiji ku mashimikila amo a mu Baibolo? Nanchi mwakonsha kuzhinauka bololoke bwa Lesa nyi? Inyi mukalanguluka’mba mu Baibolo muji byambo byavula byakonsha kwitulengela kushiinwa’mba Yehoba kimye kyonse uba bintu byaoloka, mambo ye wayuka byawama ne byatama? (Mpitu. 32:4) Inge twamuyuka Yehoba bulongo ne mashinda awama o obilamo bintu, tukamutemwa bingi, kabiji kechi tukamuzhinaukanga ne. Yukai kuba’mba mukamuyuka bulongo inge mwatwajijila kufunda ne kulanguluka pa Mambo anji, mambo jo jishinda Lesa joesambilamo ne atweba. (Sala. 77:12, 13) Kino kikakosesha bulunda bwenu na Yehoba, kabiji mukekala na bulunda bwa kine ne aye.

11-13. Mwayuka byepi amba Yehoba uteleka ku milombelo yenu? (Monai kipikichala kitanshi.)

¹¹ Lulombelo lwitulengela kufwenya kwipi ne Yehoba. Tumutakaika, kumusanchila ne kulomba lutangijilo lwanji. (Sala. 32:8) Bino pa kuba’mba bulunda bwenu na Yehoba bwikale bwa kine, mwafwainwa kushiinwa kuba’mba ubena kumvwa milombelo yenu.

¹² Bantu bamo balanguluka’mba lulombelo ke jishindatu ja kwitekenesheshamo. Bamba’mba inge mwalanguluka’mba lulombelo lwenu lwakumbulwa, kiji bino mambo a kuba mwaamba byo mubena kulanguluka, mwayuka lukatazho lwenu kabiji mwata muchima pa bya kwilupwisha. Bino, mwakonsha kuyuka byepi amba Yehoba umvwa milombelo yenu ifuma panshi ya muchima?

¹³ Akilangulukai pa kino: Yesu saka akyangye kwiya pano pa ntanda, wimwenejile Yehoba byo akumbula milombelo ya bakalume banji. Kabiji byo ajinga pano pa ntanda, Yesu walombanga pa kumubuula Shanji wa mwiulu biji ku muchima wanji. Inge kya kuba Yesu walangulukilenga’mba Yehoba kechi ubena kuteleka milombelo ne, nanchi inge wakishishe bufuku na kulomba nyi? (Luka 6:12; 22:40-46) Kabiji ingewalangulukilenga’mba lulombelo ke jishindatu ja kwitekenesheshamo, nanchi inge wafunjishe baana banji ba bwanga bya kulomba nyi? Kwa kubula nangwa kuzhinaukatu ne, Yesu wayukile’mba lulombelo ke jishinda ja kwisambilamo ne Yehoba. Pa kimye kimo, Yesu waambile’mba: “Tata, nemusanchila bingi pa kuñumvwa. Nayuka namba, kimye kyonse muñumvwa.” Ne atweba twafwainwa kuketekelakuba’mba Yehoba ‘umvwa milombelo.’—Yoa. 11:41, 42; Sala. 65:2.

14, 15. (a) Tumwenamo byepi umvwe ketulombe pa kintu kyo tubena kukeba? (b) Lulombelo lwakwashishe byepi nyenga umo kukosesha bulunda bwanji ne Yehoba?

¹⁴ Inge kemulombe pa kintu kyonka kyo mubena kukeba, mukaketekela kuba’mba Yehoba ukakumbula, nangwa kya kuba kimo kimye wakonsha kukumbula mu jishinda jo mwakonsha kubula kumona patoka. Inge Yehoba wakumbula milombelo yenu mukashiinwa kuba’mba ko  aji. Kabiji inge kemumubuule Yehoba biji ku muchima wenu, po po akafwenya kwipi ne anweba.

¹⁵ Akimonai byapichilemo ba Kathy. * Nangwa kya kuba ba Kathy bayanga mu mwingilo kimye kyonse, kechi batemenwe mwingilo wa kusapwila ne. Bashimikizhe’mba: “Mwingilo wa kusapwila kechi namutemenwe ne. Byo natambwile penshonyi, mukulumpe mu kipwilo wañambijile kuba’mba nakonsha kwingilako bupainiya bwa kimye kyonse; kabiji wampele ne pepala wa kunembesheshapo bupainiya. Nafuukwilepo kwingilako bupainiya, bino nalombanga kimye kyonse kuba’mba Yehoba ankwashe kuba’mba ntemwe mwingilo wa kusapwila.” Nanchi Yehoba wakumbwile lulombelo lwabo nyi? Baambile’mba: “Pano luno naingila bupainiya pa myaka isatu. Na mambo a kwingila kimye kyabaya mu mwingilo ne kufunda ku banyenga bakwetu, mbena kusapwila bingi bulongo. Luno natemwa bingi mwingilo wa kusapwila. Kabiji kyakilamo kunema, bulunda bwami ne Yehoba bwakoselako bingi kukila byo bwajinga kala.” Kya kine, milombelo ya ba Kathy ibakwashishe bingi kwikala na bulunda bwa kine ne Yehoba.

¹⁶ Kwikala balunda na Yehoba ke kintu kyo twafwainwa kulamawizhanga mu bwikalo bwetu bonse. Twafwainwa kwibikako kufwenya kwipi ne Lesa pa kuba’mba naye afwenye kwipi ne atweba. Onkao mambo, twayai twisambenga ne Lesa kimye kyonse kupichila mu kufunda Baibolo ne kulomba kwi aye. Kikafumamo, bulunda bwetu na Yehoba bukakosa bingi kabiji buketukwashanga kushinda meseko.

16, 17. (a) Twafwainwa kubanga byepi pa kuba’mba bulunda bwetu ne Yehoba butwajijile? (b) Ñanyi lukatazho lo tukesambapo mu mutwe walondelapo?

¹⁷ Nangwa byonkabyo, kyakonsha kwitukatazha inge kya kuba lukatazho lwatwajijila panyuma ya kulombapo na mukoyo. Mu bimye bya uno mutundu kyakonsha kwitukatazha bingi kuketekela mwi Yehoba. Twakonsha kutendeka kulanguluka’mba kampe Yehoba kechi umvwa milombelo yetu ne, nangwa kampe kechi witumona’mba twi balunda nanji ne. Pano twakonsha kuba byepi pa luno lukatazho pa kuba’mba tushiinwe amba bulunda bwetu na Lesa bwa kine? Tukesamba pa kino mu mutwe walondelapo.