KUSHONKENA pamo kuba’mba tufunde kwi Yehoba, kwituletela bingi lusekelo. Umvwe bantu ba Lesa babuñana pamo kuba’mba bebafunjishe kwi Lesa, kujiila pamo kajo nako kunungako lusekelo.

Mu September 1919, Bafunda Baibolo bajinga na kushonkena kwa moba atanu na asatu ku Cedar Point, Ohio, mu U.S.A. Banengezhejile balongo ne banyenga maotela mwa kulaala ne kujiila kajo, pano kwaishile bantu bavula kukila bo baketekejile. Bakaseya ba balume ne ba bakazhi baakaminwe bingi pa kumona bantu bavula baishile. Mukulumpe wa kino kishimikwa washikishe banyike benyi inge bakonsha kwipana kwibakwashako, kabiji bavula baswile. Sadie Green naye waingijileko. Uno kaseya wa mukazhi waambile’mba, “Kyo kyajinga kimye kitanshi kwingilako uno mwingilo, nangwa byonkabyo, twaingijile bulongo.”

Myaka yalondejilepo, kunengezha kajo pa kushonkena kwalengelanga bavula kwipana kwingijila balongo ne banyenga. Kwingijila pamo na balongo ne banyenga kwakwashishe banyike bavula kutangizhako kukeba kwingijila Lesa. Gladys Bolton naye waingijileko mu kibamba mwa kuteekela kajo pa kushonkena mu 1937. Waambile’mba, “Namonañene na bantu bavula bingi bafumine ku mapunzha angi, kabiji bambuujileko ne makatazho o babena kupitamo. Kufumatu kyokya kimye, natendekele kulanguluka kwingilako bupainiya.”

Beulah Covey watainwe ku kushonkena waambile’mba: “Kwipana kwa ba mingilo kwalengejile bintu kwenda bulongo.” Nangwa byonkabyo, uno mwingilo wakatezhe bingi. Byo afikile ku Kibanza Kikatampe kya Dodger mu Los Angeles, ku California, mu 1969, Angelo Manera po po ayukile’mba bamutongola kwikala wa mwingilo mu kibamba mwa kuteekela kajo. Waambile’mba, “Bampele mwingilo wakosa bingi!” Kunengezha kuno kushonkena kwavwangilemo ne kupoya mufolo walepele makilomita 0.4 mwakupishisha mupaipi wa gasi wayile ku kibamba kwa kuteekela.

Mu 1982 mu Sierra Leone, ba mingilo bepaine  patanshi kuseba pa kushimikila mwa kuteekela kwingijisha bintu bya konkakwa. Mu 1951, mu muzhi wa Frankfurt mu Germany, balongo bajinga na mali basonkejilenga shitima walenganga luya pa kuteka maketulu 40. Bakaseya bapananga michiba ya kajo 30,000 mu jiola jimo. Pa kukepeshako mingilo ya bantu 576 baingijilanga mu kibamba mwa kovwela bipe, baishile na kushonkena besendejile bene mipenyi ne mafoloko. Mu Yangon, mu Myanmar, bateka kechi bavuzhangamo mpilipili mu kajo ko bapanga baiya na kushonkena ne.

Kwimana mu munongo mu mute wazonga pa kuya mu kibamba mwa kujiila ku kushonkena kwajingako mu 1950 mu United States, kwalengejile Annie Poggensee kumwenamo bintu byawama. Waambile’mba: “Nesambile pa bintu byawama bingi na banyenga babiji bafumine ku Europe na bwato.” Bonse balumbulwile Yehoba byo ebakwashishe pa kuba’mba batanweko. Annie waambile’mba, “Bano banyenga babiji basangalele bingi. Kechi kibakatezhe kwimana mu munongo mu mute wazonga ne.”

Pa kushonkena kukatampe kwavula, matente mwa kuteekela kajo mwajinga matebulu o batanchika bulongo alengelanga bantu kuja bukiji ne kufumamo pa kuba’mba bakwabo nabo bajiilemo. Pano bantu bavula baubanga byepi pa kuba’mba baje pa kimye kya pa chaile? Muntu umo wabula Kamonyi waambile’mba: “Nkyangye kumonapo buno bupopweshi. Babena kuja saka baimana.”

Bashilikale ne babilolo ba mu kafulumende bakuminye bingi pa kumona bintu byo byaendele bulongo. Byo bapwishishe kupikita kibamba mwa kuteekela kyo balengejile mu Kibanza Kikatampe kya Yankee mu muzhi wa New York, mu United States, mukulumpe mwine wa bashilikale wakambizhe mukulumpe wa bashilikale aye Faulkner wa ku Britain watalanga pa bya nkondo kuba’mba nabo byo byo bafwainwa kwingilanga. Aye ne mukazhanji baishile ku kushonkena kwajingako mu 1955 mu muzhi wa Twickenham, mu England kwajinga na mutwe wa kuba’mba, “Triumphant Kingdom.” Waambile’mba, wamwene bantu byo betemwa saka baimana mo bateekela kajo.

Pa myaka yavula, ba mingilo bepana bateekelenga kajo kawama ko bapotanga pa mutengo mucheche ku boba baiyanga na kushonkena. Pano bino, uno mwingilo wabayile bingi kya kuba walengelanga balongo ne banyenga bavula kwingila kimye kyabaya ne kubula kumvwa majashi amo nangwa onsetu. Mu ma 1970, bapimpwileko jishinda ja kunengezhezhamo kajo mu mapunzha avula a pa kushonkena. Kutendeka mu 1995, beya ku kushonkena bebabuujile kwisendela kajo. Kino kyalengejile balongo ne banyenga bateekelenga ne kupana kajo kumwenamo mu majashi ne kupwanañana na bena Kilishitu bakwabo. *

Yehoba watemenwe bingi bepaine kwingijila bakwabo ba mu lwitabilo! Bamo bakivuluka oa moba awama o baingijilanga mu kibamba mwa kuteekela kajo. Kintu kimo kyanema ke kya kuba’mba: Butemwe bukimweka pa kushonkena kwetu.—Yoa. 13:34, 35.