KYAJINGA kimye kya kisalo mu 1970. Najinga mu mwanya mu Kipatela kya Valley Forge, ku Phoenixville, mu Pennsylvania, mu United States. Manase wa mulume wampiminenga BP kichika kyonse kya jiola jimo. Najinga mushilikale wa myaka 20 kabiji nasambwile kikola kyatama bingi. Manase wankijileko myaka byo ammwene, wakankamenetu. BP yami byo yabwelelengatu panshi, namushikishe namba, “Wakimonapo pafwila muntu nyi?” Wapopomenwe bingi ne kunkumbula’mba, “Ine nkyangye.”

Kechi naketekejile namba nsakukosa ne. Ki ka kyandengejile kuya mu Kipatela? Ubai nemushimikizheko bintu byo napichilemo.

Nakolelwe byo naingijilenga mu kibamba mwakutumbwila bantu mu kimye kya nkondo mu kyalo kya Vietnam. Naumvwanga bingi bulongo kukwasha bakolwa ne bekozha kabiji nakebeshe bingi kwikala dokotala utumbula bantu. Nayile mu Vietnam mu July 1969. Byonkatu byo kikala ku bantu baiya katataka, ne amiwa bampishishemo pa mulungu umo pa kuba’mba ngyuke bulongo mpunzha ne kupijilwa na kyuya kijiko.

Byo natendekeletu kwingila nkito mu kipatela mwakutumbwila bantu ku Mekong Delta mu Dong Tam, ko kwafikilanga madeke a tubotolo aletanga bantu bo bakozha. Natemenwe bingi uno mwingilo kabiji ponkapotu natendekele kwingila. Bantu bo bakozhezhe bebatwajile mu tuzubo twamalata mo batumbwilanga bantu. Dokotala utumbula ne bamanase babiji baingijilanga monka na kukeba kupulusha bantu. Namwene bivunda bifiita byajinga mu madeke a tubotolo byo babujile kulongolola. Bambuujile’mba mu byobya bivunda mwajinga bipimvwa bya bashilikale bo baipayile ku nkondo. Abino byobyo natendekele nkondo.

Byo nakijinga mwanyike, nayukileko pacheche bukine bufunjisha Bakamonyi ba kwa Yehoba. Bamama bafundanga Baibolo na Bakamonyi, pano bino kechi babatizhiwe ne. Naumvwanga bingi bulongo kutanwapo kimye bamama kyo bafundanga. Pa kyonkakya kimye, nayile ne batata bakushinda  kwipi na Nzubo ya Bufumu. Nebashikishe’mba, “Nga kya ki ka?” Bankumbwile’mba, “Kange uye kwipi na boba bantu ne!” Na mambo a kutemwa batata ne kwibaketekela, nebomvwijile. Kufumatu jonkaja juba, po po nalekele kumonañana na Bakamonyi ba kwa Yehoba.

Byo nafumine ku Vietnam, natendekele kukeba Lesa. Bintu byatama byo nemwenejile byankatezhenga bingi ku muchima. Kyamwekeletu nobe kafwako nangwa umo wayukile byamwekelenga ku Vietnam ne. Mvuluka kimye bantu baleta kiwowo kyo batongwelenga bashilikale bena America amba bepaya banyike na mambo a masawakya aambilenga’mba baipayilenga baana ba bacheche babula mambo mu nkondo.

Byo nakebeshe kuyuka Lesa, natendekele kuya ku machechi apusana pusana. Namutemenwe bingi Lesa, bino kechi nasekejilemo mu bintu byo nemwenejile mu machechi ne. Kyapeleleko, nayile ku Nzubo ya Bufumu ya Bakamonyi ba kwa Yehoba mu Delray Beach, ku Florida. Pajinga pa Mulungu mu February 1971.

Byo natwelele nataaine jashi ja mvula bantu ke jiye na kupwa, nangwa byonkabyo, napembejile kutanwa ku lufunjisho lwa Kyamba kya Usopa lwalondejilepo. Kechi mvuluka mutwe ye besambilengapo ne, pano bino mvuluka baana ba bacheche byo bazhikawilenga ma Baibolo ne kutaana binembelo. Kino kyansangajikile bingi! Naumvwinenga ne kumona byo baubilenga. Byo nafuminenga pa Nzubo ya Bufumu, mulongo wajinga na myaka 80 wansolomokele. Jizhina janji wajinga Jim Gardner. Wasolwele buku uji na mutwe wa kuba’mba The Truth That Leads to Eternal Life, wanshikishe’mba, “Wakonsha kumusenda nyi?” Twaumvwañene kutendeka kufunda Baibolo kimye kitanshi pa Kina lukelo.

Pa joja juba pa Mulungu bufuku, nafwainwe kuya ku nkito. Bantwezhezhe nkito pa kipatela kyajinga mu Boca Raton, ku Florida ko naingijilenga mu kibamba mo baleta bantu bakeba bukwasho bwa bukiji bukiji. Nafwainwe kutendeka kwingila na 23 koloko wa bufuku kufika ku 7 koloko wa lukelo. Byo kwazhindamine bufuku natangile buku wa Truth. Mukulumpe wa ba manase byo ansolomokele, wansompwele buku ye nalamine mu kuboko, wamutajile pa nkupiko ne kwamba’mba, “Kechi ukekala Kamonyi ne.” Namusompwele buku wami wa Truth ne kumwambila’mba, “Nafika pakachi kutanga uno buku kabiji kyamweka nkekala Kamonyi wa kwa Yehoba!” Byo ayile, napwishishe kutanga uno buku bonkabwa bufuku.

Byo natendekele kufunda Baibolo na mulongo Gardner, namushikishe’mba, “Ñanyi bintu byo tusakufunda?” Aye wankumbwile’mba, “Buku ye nakupele.” Namubuujile’mba, “Namutanga yense.” Mulongo Gardner wañambijile’mba, “Kijitu bulongo, pano tufundekotu kitango kitanshi.” Namwene kuba’mba byavula byo nabujile kumvwisha. Wañambijile kutanga binembelo byavula mu buku wa Lesa uchila ye naingijishanga. Natendekele  kufunda pe Lesa wa kine, Yehoba. Mulongo Gardner, ye naitanga’mba, Jim, wamfunjishe bitango bisatu bya mu buku wa Truth jonkaja juba lukelo. Kufumatu jonkaja juba, twafundanga bitango bisatu pa Kina. Natemenwe bingi bintu byo nafundanga. Kyawamine bingi byo bamfunjishe ku yewa mulongo washingwa wiyukile bingi na mulongo Charles T. Russell!

Byo papichile milungu icheche, nafikijilemo kwikala musapwishi wa mambo awama. Mulongo Jim wankwashishe mu bintu byavula bingi, kuvwangakotu ne bya kusapwila ku nzubo ku nzubo. (Byu. 20:20) Byo natendekele kwingijila pamo na mulongo Jim, natemenwe bingi kusapwila. Nanemeka bingi mwingilo wa kusapwila. Byo kyawamapo kwikala wa mwingilo umo ne Lesa!—1 Ko. 3:9.

Pano umvwai nemubuule bintu bya kyami kyami, ko kuba’mba butemwe bwami butanshi bwa kutemwa Yehoba. (Lum. 2:4) Kutemwa Yehoba kwankwasha bya kuba na bintu byatama byo namwene ku nkondo ne mesekotu akwabo.—Isa. 65:17.

Nkivuluka kintu kimo kyawama kyamwekele mu kimye kya milemba mu 1971. Bansemi bami bampangile mu nzubo yabo. Batata bakushinda kechi bakebelenga Kamonyi wa kwa Yehoba kwikala mu nzubo yabo ne. Pa kyokya kimye, kechi najinga na mali avula ne. Ku kipatela ko naingilanga bamfoleshanga mali inge papita milungu ibiji, kabiji mali avula neengijishe kupotamo bivwalo bya kwingijisha mu mwingilo pa kuba’mba ñimenengako Yehoba bulongo. Nafilepo mali amo ku banki ku Michigan, ku kyalo ko nakomejile. Moba amo nalaalanga mu motoka wami. Nayanga na kwitendela myevu ne kowela mu bibamba bya kowelamo bitanwa po bapotesha manyi a mu myotoka.

 Juba jimo, byo nalaalanga mu motoka, nafikile pa Nzubo ya Bufumu saka kwakishala kimye kyabaya pa kuba’mba jibumba ja kuya mu mwingilo jifike. Po po nakombokeletu ku nkito ku kipatela. Byo naikele kunyuma ya Nzubo ya Bufumu kwafyamikile, natendekele kuvuluka byamwekele mu Vietnam, bwema bwa bantu bo basokele ne mashi achimba o namonanga, byandengejile kupopomenwa. Mu milanguluko yami, natendekele kumvwa ne kumona bansongwalume na kuñambila’mba, “Nsakupuluka nyi? Nsakupuluka nyi?” Nayukile amba basakufwa, pano bino naesekele kwibatekenesha ne kubula kwibabuula’mba basakufwa. Byo naikele momwa, nashupikilwe bingi mu milanguluko.

Nalombele kya kuba mipolo yapokomokelengatu nobe mema. (Sala. 56:8) Natendekele kulanguluka bingi pa lusanguko. Lwamfikile bingi pa muchima: Na mambo a lusanguko, Yehoba Lesa ukafumyapo bintu byonse byatama byo nemwena kabiji bibena kunkatazha mu milanguluko amiwa ne bakwetu. Lesa ukasangula boba bansongwalume kabiji bakafunda bukine pe aye. (Byu. 24:15) Pa kyokya kimye, butemwe bwa kutemwa Yehoba bwabayile bingi kabiji bwamfikile pa muchima. Aja juba ne luno janema bingi kwi amiwa. Kufumatu kyokya kimye kufika ne lelo jino, nachinchika bingi meseko ne makatazho o napitamo kwa kubula kusankilapo butemwe bwami butanshi bwa kutemwa Yehoba.

Kimye kya nkondo, bantu boba bintu byatama bingi. Ne amiwa naubanga bintu byatama bingi. Kulanguluka pa binembelo bibiji byo natemwa kwankwasha bingi. Kinembelo kitanshi ke Lumwekesho 12:10, 11, kyaamba’mba, Diabola bamushinda kechi na byambotu byonka byo tusapwila ne, bino ne na mashi a mwana mukooko. Kya bubiji ke Ngalatiya 2:20. Pa kino kyepelo, nayuka’mba Kilishitu Yesu wafwile “na mambo a amiwa.” Yehoba untala kupichila mu mashi a kwa Yesu, kabiji wandekelako mambo pa bintu byo naubile. Kuyuka kino kishinka kwankwasha kwikala na jiwi ja mu muchima jawama kabiji kuntundaika kukwasha bakwetu kuyuka bukine pe Lesa wa lusa aye Yehoba!—Hebe. 9:14.

Inge navuluka bintu byo napitamo, namusanchila bingi Yehoba pa byo anta muchima. Pa jonkaja juba, Jim byo ayukile’mba mbena kwikala mu motoka, wantwajile ku nyenga wajinga na nzubo ikatampe. Nashiinwa kuba’mba Yehoba waingijishe Jim ne yewa nyenga kunnengezhezha mpunzha yawama mwa kwikala. Yehoba wa lusa! Ukwasha bapopweshi banji ba kishinka.

Mu May 1971, nafwainwe kuya ku Michigan na kuba busulu. Saka nkyangye kufuma ku kipwilo kya Delray Beach mu Florida, nayuzhizhe manyi mu motoka ne mabuku, kabiji nayile ja ku kabeta ka ku buyeke mu mukwakwa mukatampe. Mabuku onse o nasendele apwile saka nkyangye ne kufika mu jishinda jaya ku Georgia. Nasapwijile mambo awama a Bufumu ku mapunzha onse. Nasapwijile mu tuleya ne kushila bantu matalakiti mu mapunzha mwavula bantu ne mapunzhatu akwabo. Kufikatu ne lelo jino, kechi nayuka kana aya nkunwa yo nabyajile yamenene nangwa ne.—1 Ko. 3:6, 7.

Kwambatu kine, kimyetu kitanshi kyo nafunjile bukine, kechi nayukile bya kusapwila kikatakata inge mbena kwisamba na ba mu kisemi kyami ne. Na mambo a butemwe butanshi bwa kutemwa Yehoba byo bwabayile mwi amiwa, kechi nebafikanga pa muchima pa kwibasapwila ne. Natemenwe bingi bakolojami ba John ne ba Ron, kabiji nebasapwilangatu bukine kya na mukose mukose. Nalombele lulekelo lwa mambo byo nabujile kwibata muchima. Nangwa byonkabyo, nakitwajijila na kulomba’mba bakaswe kufunda bukine. Kufumatu  kyokya kimye, Yehoba wamfunjisha kabiji nayuka bya kusapwila ne kufunjisha bulongo. —Kolo. 4:6.

Byo mvuluka byo natemwa Yehoba, kechi ndubako bintu bikwabo byo natemwa mu bwikalo bwami ne. Kintu kikwabo kyo natemwa ke mukazhami Susan. Nakebeshe bingi kwikala na mukwetu wa kuntundaika kwingila bulongo mwingilo wa Bufumu. Susan wakosa bingi kabiji mwanamukazhi watemwa Lesa. Mvuluka kimye kyo namupempwile saka twiipanguzha. Susan waikele kunyuma ya nzubo ya bansemi banji mu Cranston, ku Rhode Island. Watangilenga Kyamba kya Usopa ne kumona binembelo mu Baibolo. Kintu kyo natemenweko ke kya kuba’mba watangilenga bibaba bikwabo ne kutanga binembelo. Namwene’mba, ‘Awe ke mwanamukazhi watemwa Lesa!’ Twisongwele mu December 1971, kabiji nasanta bingi kuba’mba kufumatu kimye kyo twisongwele kufika ne lelo jino watwajijila na kuntundaika. Kyo nsanchilakotu mukazhami ke kya kuba’mba nangwa kya kuba wantemwa, bino wakilamo kutemwa Yehoba.

Amiwa ne Susan tuji na baana ba balume babiji, Jesse ne Paul. Byo bakomenenga, Yehoba wajinga nabo. (1 Sam. 3:19) Na mambo a kuba batemenwe bukine, betuletela lusekelo amiwa ne Susan.  Batwajijila kwingijila Yehoba mambo bakivuluka butemwe bwabo butanshi pe aye. Bonse baingila mu mwingilo wa kimye kyonse kukila pa myaka 20. Kabiji natemwa bako bami babiji Stephanie ne Racquel, nebamonatu nobe baana bami ba bakazhi bakwisemena. Bonse baana bami babiji basongola banabakazhi batemwa Yehoba Lesa na muchima wabo yense ne na mweo wabo yense.—Efi. 6:6.

Byo nabatizhiwe, naingijile myaka 16 pa jikuji ja Rhode Island kabiji naikele na balunda bawama bingi. Nkivuluka byubilo byawama bya bakulumpe mu kipwilo bo naingijilenga nabo. Nsanchila bingi bakalama ba myanzo bavula pa byo bankwashishe. Ke kintu kyawama bingi kwingijila pamo na banabalume batwajijila na butemwe bwabo butanshi pe Yehoba! Mu 1987, twayile na kwingijila ku North Carolina kwajinga kukajilwa kukatampe kabiji twakekele na balunda bawama bavula bingi. *

Mu August 2002, amiwa ne Susan betwichile kwingijila pa Betele ku Patterson mu United States. Amiwa naingijilanga ku Dipatimenti Itala pa Bibena Kwenda Mwingilo kabiji Susan waingijilanga ko bachapila bivwalo. Watemenwe kwingila uno mwingilo. Mu August 2005, bantongwele kwikala mu Jibumba Jitangijila. Natemenwe bingi pa kuntongola. Mukazhami waakaminwe bingi pa uno mwingilo mambo mwavwangilwe kwendauka. Susan kechi watemwa kwenda mu ndeke ne, nangwa byonkabyo monka twaendela! Susan waamba’mba byambo byamba bakazhi ba balongo baji mu Jibumba Jitangijila, byamukwasha bingi kuntundaika ne amiwa. Untundaika bingi pa kino, kabiji natemwa byo oba.

Mu ofweshi wami muji bipikichala byavula bingi byo natemwa! Bimvululamo bintu byawama byo namwenamo mu bwikalo bwami. Namwenamo bintu byavula bingi pa kuvuluka butemwe bwami butanshi bwa kutemwa Yehoba!