1. Lumbululai kilengwa kya mupashi byo kyaikele ke Satana.

KIMYE KIMO, kino kilengwa kyaikele bingi bulongo ne Yehoba. Mu kuya kwa kimye, kino kilengwa kya mupashi kyatendekele kukeba kuba’mba bantu bekipopwelenga. Mu kifulo kya kuleka ino ndangulukilo yatama, akyo kyatwajijiletu na kulangulukapo, ko kyakayanga mwafuma ne bundengamambo. (Yako. 1:14, 15) Kino kilengwa twikiyuka’mba Satana kabiji ‘kechi kyatwajijile kwikala mu bukine ne.’ Kyasatukijile Yehoba ne kwialula kine ke “shanja bubela.”—Yoa. 8:44.

2, 3. Byambo bya kuba’mba “Satana,” “Diabola,” “muloolo,” ne “nsuñunyi,” bimwesha byepi mulwanyi mukatampe wa Yehoba?

² Kufumatu kimye Satana kyo asatukile, waikala mulwanyi mukatampe wa Yehoba, kabiji kechi watemwa bantu nangwa pachechetu ne. Mazhina akwabo o bapa Satana amwesha po afika mu kongola bantu. Satana kilumbulula’mba “Ukanya,” kumwesha’mba kino kilengwa kya mupashi kyatama, kechi kitundaika bumfumu bwa Lesa ne; kibushikwa ne kwibwimena kuntundwa. Pa bintu byonse Satana byo abena kukeba’mba bizhimañane, ke bumfumu bwa Yehoba.

³ Byonka byo baamba pa Lumwekesho 12:9, Satana bamutongola’mba Diabola, kulumbulula’mba “Waluntepentepe.”  Kino kibena kwitufunjisha kuba’mba Satana watamisha jizhina ja Yehoba pa kumutongola’mba wa bubela. Byambo bya kuba’mba “muloolo wa kala” bituvululamo kintu kyatama kyamwekele mu Edena kimye Satana kyo aingijishe muloolo pa kujimbaika Evwa. Kyambo kya kuba’mba “nsuñunyi mukatampe” kitulengela kuvuluka kinyama kilengesha moyo kabiji kyafwainwa Satana ukebesha kuba’mba alubankanye kyaswa muchima wa Yehoba ne konauna bantu banji.

4. Ñanyi bintu byo tusakwisambapo mu uno mutwe?

⁴ Kwambatu kine, Satana ukebesha bingi konauna bukishinka bwetu. O ene mambo Baibolo o itujimwinako’mba: “Jimukai, saka mulaba ne kukenkenta! Mulwanyi wenu aye Diabola upitañana nobe bokwe ubuluma ubena kukeba wa kuja.” (1 Pe. 5:8) Kwesakana na luno lujimuno, mu uno mutwe tusakwisamba pa byubilo bisatu bya kwa Satana bibena kumwesha’mba twafwainwa kujimuka na uno mulwanyi wakanama wa kwa Yehoba ne bantu banji.

5, 6. (a) Ambaipo bintu bimo bimwesha’mba bilengwa bya mupashi biji na “bulume bukatampe.” (b) Mu ñanyi jishinda Satana mo ‘aletela lufu’?

⁵ Bilengwa bya mupashi byo batongola’mba bamalaika biji na “bulume bukatampe.” (Sala. 103:20) Byajimuka kukila bantu kabiji biji na maana ne bulume. Nangwa byonkabyo, bamalaika ba kishinka bengijisha bulume bwabo bulongo. Kimye kimo, malaika wa Yehoba waipayile bashilikale balwanyi bena Asilya 185,000, kafwako muntu nangwa umo wakonsha kulwa ino nkondo ne, nangwatu nzhita ya bashilikale. (2 Mfu. 19:35) Kabiji kimye kikwabo, malaika waingijishe bulume bwakila bwa bantu ne kulupula batumwa ba kwa Yesu mu kaleya. Akino kilengwa kya mupashi kyabujile kumweka ku meso a bakasopa, kyashinkwile bibelo ne kulupula batumwa kyabwela kyashinkako, bakasopa bonse saka baimana pa bwipi!—Byu. 5:18-23.

⁶ Bilengwa bya mupashi bingijisha bulume bwabyo bulongo, pakuba Satana wingijisha bulume bwanji kutama. Uji bingi na bulume ne kukeba kutwala bantu mungi! Binembelo bimutongola’mba “mfumu wa pano pa ntanda” ne “lesa wa buno bwikalo.” (Yoa. 12:31; 2 Ko. 4:4) Satana Diabola “uleta lufu.” (Hebe. 2:14) Kino kechi kibena kulumbulula’mba wipaya bantu ne. Pano bino, byubilo byanji byatama byakumbana ino ntanda. Kabiji Evwa waswile bubela bwamubuujile Satana ne Adama wasatukijile Lesa, kabiji bundengamambo ne lufu byakumbene ku bantu bonse. (Loma 5:12) Kuno kwibajimbaika kumwesha’mba Diabola “uleta lufu.” O ene mambo Yesu o amutelejile’mba “mbanzhi.” (Yoa. 8:44) Mulwanyi wetu Satana uji bingi na bulume!

7. Bandemona bamwesha byepi amba baji na bulume?

⁷ Umvwe twamukana Satana, ko kuba’mba kechi twakanatu aye bunke ne, bino twakana ne boba balengulula bumfumu bwa Lesa. Pa bano bantu paji ne jibumba ja bilengwa bya mupashi byasatuka, nangwa’mba bandemona. (Lum. 12:3, 4) Kabiji bandemona bamwesha bulume bwakila bwa bantu pa kuleta bya malwa pa boba bo bamanyika. (Mat. 8:28-32; Mako 5:1-5) Kange tulengululenga bulume buji na bamalaika batama nangwa buji na “mukulumpe wa bandemona” ne. (Mat. 9:34) Satana kechi twakonsha kumushinda bunke bwetu kwa kubula bukwasho bwa Yehoba ne.

8. (a) Ñanyi kintu Satana kyo akebesha kuba? (Monai kipikichala kitanshi.) (b) Kwesakana na byo mubena kumona, ino ntanda imwesha byepi kushinta kwa kwa Satana?

⁸ Mutumwa Petelo waesakenye Satana ku “bokwe ubuluma.” Buku umo  walondolola’mba kyambo kya Kingiliki kyo batuntulula’mba “ubuluma,” kilumbulula “kujila kwa nyama wafwa nzala.” Akino byo kilumbululapo bulongo kushinta kwa kwa Satana! Nangwa kya kuba ntanda iji mu bulume bwanji, aye kechi watondwa ne. Satana uji nobe bokwe ukikebatu banyama bakwabo ba kuja. (1 Yoa. 5:19) Kwi aye ntanda ijitu nobe kajo “kakubikatu peulu.” Satana wata maana ku “kajo kene,” ko kuba’mba bashingwa bashalapo ne balunda nabo ba mu “mikooko ikwabo.” (Yoa. 10:16; Lum. 12:17) Satana watatu muchima pa konauna bantu ba Yehoba. Byo abena kumanyika baana ba bwanga ba kwa Yesu kufumatu mu kitota kya myaka kitanshi kufika ne lelo jino, kimwesha’mba washinta bingi.

9, 10. (a)Satana waesekele byepi kukanya kyaswa muchima wa Lesa ku mukoka wa bena Isalela? (Ambaipo bimo bimwesha kino.) (b) Ñanyi kintu Satana kyo akebelenga pa kuta muchima bena Isalela ba kala? (c) Diabola umvwa byepi ku muchima lelo jino inge walengela kalume wa Yehoba kulenga mambo akatampe?

⁹ Satana byo esekesha kukanya kyaswa muchima wa Lesa, umwesha byo ashinta mu jishinda jikwabo. Bokwe wafwa nzala kechi ubila lusa nyama ye akeba kuja ne. Kechi ubila lusa nyama ye akyangye kwipaya nangwatu inge wa mwipaya napotu kechi wilangulusha ne. Ne Satana naye kechi ubila lusa bantu bo akeba kuja ne. Kyamweka Satana watemenwe bingi byo amwene bena Isalela na kulenga mambo nabiji bulalelale ne lunkumbwa. Inge ke mutange pa bintu byatama byamwekejile Zimuli ne Gehazi wa lunkumbwa, abya “mumona” bokwe ubena kubuluma saka asangalala byo ashinda nyi?—Bala. 25:6-8, 14, 15; 2 Mfu. 5:20-27.

¹⁰ Pajinga kintu Satana kyo akebelenga pa kuta muchima bena Isalela ba kala. Auno mukoka mo mwafwainwe kufuma Mesiasa, yenka ukachakakanya Satana ne kutumbijika bumfumu bwa Yehoba. (Nte. 3:15) Satana kechi wakebelenga bena Isalela kuba byawama ne, aye wakebeshe bingi kwibatundaika kulenga mambo. Satana kechi waumvwine ku muchima kutama kimye Davida kyo aubile bukende nangwa kumvwina lusa ngauzhi Mosesa byo bamukainye kutwela mu Ntanda ya Mulaye ne. Satana  usangalala bingi inge kalume wa Lesa walenga mambo akatampe. Umvwe Diabola walengela bamo kuba byatama, kyo kimye kyo endelekelamo Yehoba.—Maana. 27:11.

11. Ñanyi kintu Satana kyo akebelenga pa kulukuka Sala?

¹¹ Satana washikilwe bingi kisemi mwafwainwe kufuma Mesiasa. Akilangulukai kyamwekele aku Abalahama bamubuulatu’mba ukekala “kisaka kikatampe.” (Nte. 12:1-3) Abalahama ne Sala saka bakiji mu Ijipita, Felo watumine bantu kuleta Sala mu nzubo yanji kuba’mba ekale mukazhanji. Pano bino, Yehoba wapokolwele Sala kubula kumulenga mambo. (Tangai Ntendekelo 12:14-20.) Izaka saka akyangye kusemwa, kintu kya uno mutundu kyamwekele ne ku Gelala. (Nte. 20:1-7) Nanchi Satana ye walengejile bino byonse nyi? Nanchi Satana walangulukilenga’mba Sala byo akafuma mu muzhi wa Ula mwajinga bunonshi ne kwikala mu matente, bakamongola pa kumona bipango byawama bya kwa Felo ne Abimeleki nyi? Abya Satana walangulukilenga’mba Sala ukalukilamo mwatawanji ne Yehoba ne kutwela mu masongola a bukende nyi? Baibolo kechi waambapo ne, pano bino, twayuka kuba’mba Diabola watemenwe bingi kuba’mba Sala abule kufikilamo kusema mwana walayiwe. Satana inge kechi kyamukolele ku muchima konauna masongola a mwanamukazhi wawama, byubilo byanji ne bulunda bwanji ne Yehoba ne. Satana byo ashintapo!

12, 13. (a) Satana wamwesheshe byepi kushinta kwanji kimye kyasemekelwe Yesu? (b) Satana umvwa byepi ku muchima pa kumona banyike batemwa Yehoba byo babena kumwingijila lelo jino?

¹² Yesu wasemekelwe Abalahama saka asemwa kala. Satana wayukile kuba’mba uno mwana walamba kabiji wa buneme. Satana wayukile’mba uno mwana ukakoma ne kwikala Mesiasa walayiwe. Yesu ye wajinga lukunwa mutanshi wa kwa Abalahama, yenka ‘ukonauna mingilo ya kwa Diabola’ kulutwe na lwendo. (1 Yoa. 3:8) Nanchi Satana walangulukilenga’mba kyatama kwipaya mwana mucheche nyi? Kwi Satana kafwako kyawama ne. Satana wakebelenga kwipaya Yesu byo akijinga mwana. Waubile byepi kino?

¹³ Mfumu Heloda wazhingijile bingi bashayuka ba tubangabanga byo baishile na kumwipuzha pa “Mfumu wa Bayudea wasemwa,” kabiji wakebele kumwipaya. (Mat. 2:1-3, 13) Pa kuba’mba obe bino wakambizhe kuba’mba bepaye baana ba balume bonse ba myaka ibiji ne kubwela panshi baikalanga mu Betelema ne mande anji. (Tangai Mateo 2:13-18.) Yesu kechi bamwipayile ne, pano kino kimwesha ka pa mulwanyi wetu Satana? Kyamweshatu patoka kuba’mba Diabola kechi wanemeka bumi bwa bantu ne. Kabiji kechi ubila lusa baana ba bacheche ne. Kine Satana “bokwe ubuluma.” Kange mulengulule kushinta kwanji ne!

14, 15. Satana “wapofula michima ya babula kwitabila” mu ñanyi jishinda?

¹⁴ Na mambo a kujimuka kwanji, Satana wongola bantu kuba’mba baleke kutemwa Yehoba Lesa. (1 Yoa. 4:8) Na mambo a bujimuku bwanji, Satana ulengela bantu kubula kwikala na “muchima wa kukeba kuyuka Lesa.” (Mat. 5:3) Aye “wapofula michima ya babula kwitabila kuba’mba kyeya kya lukumo lwa mambo awama aamba pe Kilishitu aye kipasha kya Lesa, kibule kwibasamina.”—2 Ko. 4:4.

¹⁵ Jishinda jimo jikatampe Satana jo ongwelamo bantu ke bupopweshi bwa bubela. Utemwa bingi kumona bantu na  kupopwela bashakulu, bilengwa na Lesa, banyama, bantu nangwa bintutu bikwabo kukila Yehoba ‘ukeba bantu kumwingijilatu bunke bwanji!’ (Lupu. 20:5) Nangwatu bantu bavula balanguluka’mba babena kupopwela Lesa, bebatwala mungi ku mafunjisho a bubela ne bisho byatutu byo boba. Bantu lelo jino bajitu nobe boba Yehoba bo asashijile’mba: “Mambo ka o mutayila mali enu ku kajo kabula kunema, kabiji mambo ka o monawina mali enu ku bintu byakonsha kubula kwimukwasha? Umvwai kwi amiwa ne kuja kajo kawama, kabiji anweba mukasangalala pa kuja kajo kawama.”—Isa. 55:2.

16, 17. (a) Mambo ka Yesu o aambijile Petelo amba: “Pichila kunyuma yami, Satana”? (b) Satana wakonsha kwitulengela byepi kuleka kulaba ne kukenkenta?

¹⁶ Satana wakonsha ne kongola bakalume ba Yehoba. Akimonai kyamwekejile Yesu byo abuujile baana banji ba bwanga amba basakumwipaya. Mutumwa Petelo wajingatu na mulanguluko wawama byo amutwajile ku mbaji ne kumwambila’mba: “Kwakamwa ne, Nkambo; kino kechi kikemumwekela ne.” Yesu wamwambijile Petelo amba: “Pichila kunyuma yami, Satana!” (Mat. 16:22, 23) Mambo ka Yesu o atongwejile Petelo amba “Satana”? Mambo Yesu wayukile kintu kisakumumwekela. Kimye kyafikile kyo afwainwe kufwa lufu lwa bukitapisho ne kumwesha Diabola amba wa bubela. Pa kyokya kimye mu bwikalo bwa bantu, kechi kyajinga kimye kya kwa Yesu kya kubula “kwakamwa” ne. Yesu inge waji walekele kulaba ne kukenkenta, Satana inge wamutolele kyangwa.

¹⁷ Mpelo ya buno bwikalo byo yafwenya pepi, ne atweba tubena kwikala mu moba akatazha. Satana ubena kukeba’mba twikileke kulaba ne kukenkenta ne kubula “kwakamwa,” pa kuba’mba tukebeshe bintu bya mu ino ntanda ne kwitulabika. Kange muswishe kino kwimumwekela ne! Pakuba anweba “labainga ne kukenkenta.” (Mat. 24:42) Kange mujimbaikwe na bubela bwa kwa Satana bwa kuba’mba mpelo ikiji kwalepa nangwa’mba kechi ikeya ne.

18, 19. (a) Satana wakonsha kwitujimbaika byepi ne kwitulengela kulanguluka’mba Yehoba kechi witutemwa ne? (b) Yehoba witukwasha byepi kutwajijila kulaba ne kukenkenta?

¹⁸ Satana weseka kwitujimbaika ne mu jishinda jikwabo. Ukeba atweba kuswa amba Lesa kechi witutemwa ne, kabiji kechi witulekelako mambo etu ne. Buno bo bubela bwa kwa Satana. Pe aye ne atweba ñanyi kine ye babula kutemwa kwi Yehoba? Satana. Ñanyi kine ye babula kulekelako mambo? Satana. Bino Baibolo witubuula’mba: “Lesa waoloka kabiji kechi wakonsha kuvulama mingilo yenu ne butemwe bo mwamwesha jizhina janji ne.” (Hebe. 6:10) Yehoba utemwa bingi byo tumutokesha ku muchima, kabiji mwingilo wetu kechi watutu ne. (Tangai 1 Kolinda 15:58.) Onkao mambo, kange tuswishe Satana kwitujimbaika na bubela bwanji ne.

¹⁹ Byonkatu byo twafunda, Satana uji na bulume, washinta kabiji mujimbijimbi. Twakonsha kushinda byepi uno mulwanyi wetu wakatazha? Yehoba kechi witushatu bunke kwa kubula bukwasho ne. Mambo anji etubuula mashinda engijisha Satana, kabiji “kechi twaluba bya bujimuku byanji ne.” (2 Ko. 2:11) Umvwe twayuka mashinda a bujimuku a kwa Satana, kiketukwasha kulaba ne kukenkenta. Pano bino, kechi twafwainwa kupelelatu pa kuyuka mashinda a bujimuku a kwa Satana ne. Baibolo waamba’mba: “Diabola mukanai ne aye ukemunyema.” (Yako. 4:7) Mutwe walondelapo ukamba pa mashinda asatu o twafwainwa kwingijisha kushinjilamo Satana.