KINGSLEY byo bamukwachile pa kipuzhi, watendekele kutanga Baibolo kimye kitanshi mu Sukulu wa Mwingilo wa Lesa mu kipwilo. Watangile bingi bulongo byambo byonse, kabiji kechi washilepo kisopelo nangwa kimo ne. Mambo ka o atangijile bulongo kwa kubula kutala mu Baibolo?

Kingsley wikala mu kyalo kya Sri Lanka, kechi umona ne. Washinka matwi kabiji wendela pa kakinga ka bilema. Auno mwanamulume wayukile byepi Yehoba ne kufikilamo kunembesha mu Sukulu wa Mwingilo wa Lesa? Lekai nemulumbulwile.

Kimye kitanshi kyo namonañene ne Kingsley kyantundaikile bingi byo ajinga na kilaka kya kufunda bukine bwa mu Baibolo. Wafunjilepo Baibolo na Bakamonyi bavula, mu buku wanji wa bampofu watabaukile wa kuba’mba Kuyuka Kutangijila ku Bumi Bwa Myaka. * Waswile kutendeka kufunda jibiji, bino twajinga na makatazho abiji.

Lutanshi, Kingsley waikalanga na bakwabo mu nzubo mo balamina bakote ne bantu balemana. Na mambo a kyungwe kyaubiwanga ne Kingsley byo ashinkile matwi, nasuntulangako jiwi pa kwamba. Kabiji bonse baikalanga mu nzubo baumvwanga byo namufunjishanga!

 Lwa bubiji, Kingsley watanganga ne kumvwakotu bintu bicheche byo namufunjishanga. Pa kuba’mba tufunde bulongo, Kingsley wanengezhanga bingi bulongo. Watangilangamo jimo ne kupitulukamo mu buku, kutangila jimo binembelo mu Baibolo wa bampofu, ne kulabijila mikumbu ya mepuzho. Jino jishinda jamukwashanga bingi. Kimye kyo twafundanga, waikalanga saka alema makunda ambwa, ne kumvwa bulongo kulumbulula bintu byo afunda na jiwi ja peulu aku na kukayisha panshi. Kechi papichile ne kimye kyabaya ne, twatendekele kufunda jibiji mu mulungu pa maola abiji!

Kingsley wakebanga bingi kutanwa ku kupwila pa Nzubo ya Bufumu, bino kino kechi kyapelele ne. Kwakebewanga wakumukwasha kumubika mu kakinga ka bilema, mu motoka ne kumutwala ku Nzubo ya Bufumu. Bino bavula mu kipwilo bepimpulanga kimye kya kumukwasha, kabiji batemenwe bingi kuba kino. Kimye kya kupwila, Kingsley watentekanga kakiñambañamba ku kutwi kamukwashanga kumvwisha ne kukumbulapo!

Byo afunjile pa kimye kyabaya, Kingsley wafuukwilepo kunembesha mu Sukulu wa Mwingilo wa Lesa. Byo kwashajiletu milungu ibiji kuba’mba ambe jashi jitanshi ja kutanga Baibolo, namwipwizhe inge wapitulukilengamo. Aye wakumbwile’mba, “Ee, mulongo napitulukamo bimye 30.” Namusanchijile pa kwibikako kwanji kabiji nakebele ne kutelekako ku byo akatanga. Wazhikwile Baibolo wanji, wabika ne minwe pa byambo ne kutendeka kutanga. Pano bino, namwene’mba kechi ubena kupisha minwe yanji pa byambo ne. Walabijile byambo byonse byo atangile mu Baibolo!

Byo nakankelwe kushiinwa, mipolo yalukumukilengatu. Nashikishe Kingsley namba walabijile byepi byo wapitulukilemotu bimye 30. Wankumbwile’mba: “Napitulukangamo bimye 30 pa juba pa juba.” Kukila pa ñondo umo, Kingsley waikalanga pa kakisapi na kutanga ne kutangulula kufikatu ne byo alabijile byonse.

Juba jafikile ja kutanga jashi janji mu Nzubo ya Bufumu. Kingsley byo apwishishe kutanga, balongo ne banyenga mu kipwilo bapopwejile bingi, bavula bajijile pa kumona byo atangile bulongo. Musapwishi umo walekele kwamba majashi mu sukulu na mambo a moyo, wanembeshe jikwabo. Mambo ka? Uno musapwishi wakumbwile’mba, “Umvwe kingsley wakonsha kwikyuba, ne amiwa nakonsha!”

Kingsley wabatizhiwe kumwesha kwipana kwanji kwi Yehoba pa September 6, 2008 byo afunjile Baibolo pa myaka isatu. Kingsley wajinga Kamonyi wa kishinka kufikatu ne byo afwile pa 13 May, 2014. Kabiji wajinga na luketekelo lwa kuba’mba mu Paladisa pano pa ntanda, ukatwajijila kwingila mwingilo mu bukishinka na butuntulu bwa mubiji bwawama. (Isa. 35:5, 6)—Byo byashimikizha ba Paul McManus.