ANITA * byo abatizhiwetu kwikala Kamonyi wa kwa Yehoba, mulume wanji wamukanyanga bingi. Anita waamba’mba: “Bamwatawami bankanyanga kuya na kupwila ne kunkanyatu kutongola jizhina ja Lesa. Inge natongolatu jizhina ja Yehoba kyalengelanga bamwatawami kuzhingila bingi.”

Kufunjisha baana banji kuyuka Yehoba nako kwaletelanga bingi Anita makatazho. Waamba’mba, “Bankanyanga bingi kwamba pe Yehoba pa nzubo. Nafundanga na baana bami ne kuya nabo na kupwila kwa kubula bamwatawami kuyuka.”

Byonkatu biji bintu byapichilemo Anita, inge mwina Kilishitu ke bamukanye ku ba mu kisemi kwakonsha kweseka bukishinka bwanji. Mwakonsha kwikala na makatazho akwabo, nabiji kukolwa, kufwisha mwana nangwa kufwisha mulume nangwa mukazhi, nangwatu inge wa mu kisemi waleka kwingijila Yehoba. Pano ki ka kyakonsha kukwasha mwina Kilishitu kwikala wa kishinka kwi Yehoba?

Mwakonsha kuba byepi umvwe ke mupite mu ano makatazho? Mutumwa Paulo waambile’mba: “Kimufwainwa anweba kuchinchika.” (Hebe. 10:36) Ñanyi kintu kyakonsha kwimukwasha kuchinchika?

Kintu kikatampe kyakonsha kwitukwasha kuchinchika makatazho ke kulomba kwi Lesa. Akilangulukai pa kino kyamwekele. Bya malwa byafikijile kisemi kya kwa Ana pa Kimo mabanga. Bamwatawanji bafwile lufu lwa kubazhimukilatu, kabiji baikele mu masongola myaka 30. Ana waamba’mba: “Bamwatawanji kechi babwelele ku nzubo kufuma ku nkito ne, kabiji bajingatu na myaka 52.”

Ana wachinchikile byepi? Watwelele nkito yamukwashishe kupayankana, nangwa byonkabyo, kechi yapwishishe binyenge byanji ne. Waamba’mba: “Nalombele kwi Yehoba ne kumusashijila namba ankwashe kuchinchika lufu lwa bamwatawami.” Nanchi Yehoba wakumbwile milombelo yanji nyi? Ee wakumbwile. Waamba’mba: “Mutende upana Lesa wantekeneshe ne kunkwasha. Nayuka kuba’mba Yehoba ukasangula bamwatawami.”—Fili. 4:6, 7.

Awa ‘umvwa milombelo’ walaya kupa bakalume banji bintu byo bakeba pa kuba’mba bekale ba kishinka kwi aye. (Sala. 65:2) Nanchi mwayuka kuba’mba uno mulaye ukosesha lwitabilo lwenu nyi? Nanchi kino kechi kimukwasha ne anweba kuchinchika nenyi?

Yehoba ukwasha bantu banji kupichila mu kipwilo kya bwina Kilishitu. Kipwilo kya mu Tesalonika byo kyapichilenga mu makatazho, Paulo waambijile bena Kilishitu amba, “itundaikainga ne kwikomesha anwe bene na bene, byonkatu byo [baubilenga].” (1 Tesa. 2:14; 5:11) Bena Kilishitu bajinga mu Tesalonika bachinchikile meseko na mambo a kwitemwa ne kwikwasha bene na bene. Kuchinchika kwabo kwitufunjisha bintu byanema bingi ne atweba lelo jino, kabiji kwitukwasha kuyuka byo twafwainwa kuchinchika makatazho.

Kutemwa bakwetu ba mu kipwilo kwakonsha kwitukwasha kubanga “bintu bya kwikomesha atwe bene na bene.” (Loma 14:19) Kino kyanema bingi kikatakata mu kimye kya makatazho. Paulo wapichile mu makatazho avula bingi, nangwa byonkabyo, Yehoba wamupele bulume bwa kuchinchika. Bimye bimo Lesa watundaikanga Paulo kwingijisha balongo ne banyenga. Paulo byo atumine mitende ku kipwilo kya mu Kolose, wibanembejile’mba: “Bantekenesha bingi.” (Kolo. 4:10, 11) Na mambo a kutemwa Paulo, bamutekeneshe ne kumukosesha kimye kyo ajinga mu makatazho. Kyamweka ne anweba bakimutundaikapo ne kwimukwasha ku bakwenu ba mu kipwilo.

Lesa wabikako lunengezho lukwabo lwa kwimukwasha monka mu kipwilo, ko kuba’mba bakulumpe  mu kipwilo. Bano banabalume baji “nobe kya kufyamamo pa kwiya kipupu, bakekala nobe mpunzha ya kufyamamo pa kwiya mvula wa kinkunkwila, kabiji nobe tukola twa mema tuji mu kyalo mwabula mema, kabiji bakekala nobe kimfutele kya mu jibwe jikatampe jiji mu kyalo mwauma.” (Isa. 32:2) Kino kitutekenesha bingi. Nanchi mwibabuula kuba’mba bemukwashe inge muji na makatazho nyi? Lutundaiko ne bukwasho bupana bakulumpe mu kipwilo bukemukwasha kuchinchika.

Bakulumpe mu kipwilo kechi bakonsha kupwisha makatazho enu onse ne. Mambo nabo bambulwa kulumbuluka, kabiji “bantutu byonka byo [tuji].” (Byu. 14:15) Nangwa byonkabyo, milombelo yabo ya kwitulombelako yakonsha kwitukwasha bingi. (Yako. 5:14, 15) Mulongo umo mu kyalo kya Italy wachinchika kikola kyatama bingi pa myaka yavula, waambile’mba: “Kuntemwa ku balongo ne kumpempula kimye kyonse kwankwasha kuchinchika.” Nanchi mwakonsha kumwenamo bintu byawama mu lunengezho lwa Yehoba lo abikako, ko kuba’mba bakulumpe mu kipwilo nyi?

Kuji bintu bikwabo byakonsha kwitukwasha kuchinchika. Jishinda jimo, ke kukosesha bulunda bwetu ne Lesa. Monai kyamwekejile John wa myaka 39 wakolelwe kikola kya kansa. Waamba’mba: “Kyankolele bingi ku muchima byo nayukile’mba nji na kino kikola, mambo nakijingatu mwanyike.” Pa kikye kimye mwana wa kwa John wajingatu na myaka isatu. John waamba’mba: “Mukazhami kechi walamangatu mwanetu mucheche ne, bino wantele muchima ne kuntwala ku kipatela.” Muchi ye bengijisha kubukilako bantu baji na kikola kya kansa, wakookeshanga bingi John ne kumukozha munda. Paishijile ne lukatazho lukwabo. Bashanji John nabo bakolelwe bingi kabiji kwakebewenga wa kwibakwasha.

Pano John ne kisemi kyanji bachinchikile byepi ano makatazho? Waamba’mba, “Nangwa kya kuba nakookanga bingi, natundaikanga kisemi kyami kukosesha bulunda ne Lesa. Twatanwanga ku kupwila konse, twasapwilanga kimye kyonse kabiji twaikalanga ne na kupopwela kwa kisemi nangwa kya kuba kyakatazhanga kuba bino.” John wayukile’mba, pa kuba’mba achinchike makatazho onse, wafwainwe kwikala na bulunda bwakosa ne Lesa. Nanchi pajipo bintu bimo byaamba John byakonsha kufunjilako boba babena kupita mu makatazho nyi? Waamba’mba: “Nangwa kya kuba kimye kitanshi waakaminwe ne kupopomenwa, pa kupitapo kimye wakosele. Wayukile’mba Yehoba wamutemwa kabiji wamupele bulume bwa kumukwasha kuchinchika. Yehoba wakonsha kwimukosesha ne anweba byonkatu byo ankwasha.”

Kwambatu kine, Lesa wakonsha kwitukwasha kuchinchika meseko akatampe ne bintu byakatazha byo tubena kupitamo luno nangwa kulutwe. Twayai tulombenga kwi Yehoba kimye kyonse ne kwikala na balunda bawama ba mu kipwilo, kukeba bukwasho ku bakulumpe mu kipwilo ne kukosesha bulunda bwetu ne Lesa. Umvwe saka tuba bino, tukoobilanga bintu monka mwayila byambo byaambile Paulo amba: “Kimufwainwa anweba kuchinchika.”