Nanchi mwatanga magazini a katataka a Kyamba kya Usopa nyi? Monai inge mwakonsha kukumbula ano mepuzho:

Nanchi bena Kilishitu bafwainwa kulomba kwi Yesu Kilishitu nyi?

Ine. Yesu mwine witufunjishe’mba twafwainwa kulombatu kwi Yehoba, ne aye walombanga kwi Shanji. (Mat. 6:6-9; Yoa. 11:41; 16:23) Ne baana ba bwanga batanshi, balombanga kwi Lesa kechi kwi Yesu ne. (Byu. 4:24, 30; Kolo. 1:3)—1/1, jipa 14.

Ñanyi kintu kyo twafwainwa kubanga pa mwaka pa mwaka pa kuvuluka lufu lwa kwa Yesu?

Kintu kyo twafwainwa kuba ke kutanga Baibolo mu moba a kivuluko. Kabiji twafwainwa kwingilako pakatampe mu mwingilo kimye kya kivuluko. Kabiji twafwainwa kulangulukishapo bingi pa luketekelo lwitupa Lesa.—.1/15, mapa 14-16.

Ñanyi bintu byamwekejile bakaili babiji bena Ijipita balotolwejile Yosefwa kiloto?

Yosefwa wabuujile kaseya wa kwa Felo amba bakamubwezha pa kifulo kyanji kyo ajingapo kala. Pakuba kiloto kya uteeka kyalumbulwilenga’mba Felo ukamwipaya ne kumukujika pa kichi. Monse mo balumbulwijile bino biloto mo mo byamwekejile. (Nte. 40:1-22)—2/1, mapa 12-14.

Ñanyi bupe bwa kubula kuketekela bwatambwijile balongo mu Japan?

Batambwijile buku wa mu Baibolo wa Binembelo bya Ntanda Ipya wa kwa Mateo. Bamusha mu mwingilo wa kusapwila kabiji bantu bavula babula kuyuka Baibolo bamutemwa bingi.—2/15, jipa 3.

Ñanyi bintu byakwashishe kusampanya mambo awama mu myaka kitota kitanshi?

Na mambo a mutende wajingako, makatazho akepele. Kino kyalengelanga baana ba bwanga batanshi kwenda mu mikwakwa yawama. Bantu bavula baambanga mulaka wa Kingiliki, wibakwashanga kusapwila ne mu Bayudea bonse baikalangamo. Kabiji baana ba bwanga balondelanga mizhilo ya bena Loma pa kuba’mba basapwile mambo awama.—2/15, mapa 20-23.

Nanchi bena Kilishitu bafwainwa kusekelela Ishita nyi?

Yesu kechi wakambizhepo baana banji ba bwanga kuvulukanga lusanguko lwanji ne, aye wibakambizhe kuvulukanga lufu lwanji. (Luka 22:19, 20)—3/1, jipa 8.

Mu myaka ya kunyuma, mabuku etu aambanga pa bifwanyikizho ne byo bimenako, bino mu myaka ya kulutwe kuno kechi ambapo javula ne. Mambo ka?

Baibolo waamba’mba bantu bamo baimenangako bintu bikatampe. Byonkatu byo kyanembwa mu Ngalatiya 4:21-31. Pano bino, kechi twafwainwa kumonanga muntu nangwa kintutu kikwabo amba kimenako kintu kikwabo ne. Nangwa byonkabyo, atweba twakonsha kufunjilako ku bano bantu ne bintu byo baubile byo baambapo mu Baibolo. (Loma 15:4)—3/15, mapa 17-18.

Mambo ka mambanga o bazhiikwile ku byala bya mu Ijipita o anemena kwi atweba?

Pa myaka kitota yapitapo, bataaine mambanga pajinga Mambo Awama a kwa Yoano. Kyamweka ajingako ne kala Yoano saka anemba kala buku wanji, kabiji byambo bijimo bimwesha bukine buji mu Baibolo.—4/1, mapa 10-11.

Mambo ka o kyawamina kupanga muntu mu kipwilo ubula kulapila?

Baibolo waamba pa jishinda jawama ja kupangilamo muntu jakonsha kumulengela kumwenamo. (1 Ko. 5:11-13) Kupanga muntu kunemeka jizhina ja Lesa, kuzhikijila kipwilo ne kulengela ndengamambo kupimpula byubilo byanji.—4/15, mapa 29-30.