1. Twakonsha kwingijisha byepi lulombelo luji mu Mateo 6:9-13 mu mwingilo wetu?

BANTU bavula balabijila Lulombelo lwa Nkambo. Mu mwingilo wetu wa ku nzubo ku nzubo, javula twambapo bingi pa luno lulombelo pa kukwasha bena mazubo kuba’mba Bufumu bwa Lesa ke kafulumende wa kine ukaleta lupimpu lwawama pano pa ntanda yetu. Kabiji twakonsha ne kwamba pa byambo bitanshi biji mu lulombelo kuba’mba Lesa uji na jizhina jo twafwainwa kuzhijika.

2. Twayuka byepi amba Yesu kechi wakebelenga’mba tukabwezhengapotu byambo bintutu bimo biji mu lulombelo lwa kufunjilako kimye kyonse kyo tubena kulomba ne?

² Nanchi Yesu ukeba’mba atweba tupitulukengatu mu byambo byonka byo aingijishe pa kulomba, byonka byuba machechi avula nyi? Ine. Yesu saka akyangye kwitubuula bya kulomba, waambile’mba: “Pa kulomba, kange mwambengatu bintu bimo ne.” (Mat. 6:7) Kabiji pa kimye kikwabo, byo afunjishenga baana banji ba bwanga bya kulomba, walombele  lulombelo luntutu lumo, bino kechi waingijishe byambo bintutu bimo ne. (Luka 11:1-4) Kabiji Yesu witukwashishe kuyuka bintu byo twafwainwa kulombapo ne kyo byanemena. Onkao mambo, kyayilamo kutela luno lulombelo amba lwa kufunjilako.

3. Ñanyi mepuzho o twafwainwa kulangulukapo pa kufunda luno lulombelo?

³ Mu uno mutwe ne ukalondelapo, tukesamba pa byambo biji mu luno lulombelo. Byo tukafundanga uno mutwe, twafwainwa kwishikisha atweba bene amba, ‘Luno lulombelo lwakonsha kunkwasha byepi kuyuka bya kulomba? Abya mbena kwikela mwayila luno lulombelo nyi?’

4. Byambo bya kuba’mba “Tata wetu” bituvululamo ka, kabiji Yehoba waikala byepi “Tata” ku bena Kilishitu baji na luketekelo lwa kwikala pano pa ntanda?

⁴ Byambo bya kuba’mba “Tata wetu” kechi “Tata wami” ne, bituvululamo kuba’mba Yehoba ye Shetu wa balongo ne banyenga bonse mwaya ntanda. (1 Pe. 2:17) Kino kintu byo kyawamapo! Bena Kilishitu bashingwa, bo basala kwikala baana ba Lesa bakekala mwiulu, kibafwainwa kutongola Yehoba amba “Tata.” (Loma 8:15-17) Bena Kilishitu bakekala na bumi bwa myaka ne myaka pano pa ntanda nabo bakonsha kutela Yehoba amba “Tata.” Ye wibapa bumi, kabiji ye upa bapopweshi banji bonse ba kine bintu byo bakeba. Aba bakekala pano pa ntanda bakekala baana ba Lesa inge baikala balumbuluka ne kwikala ba kishinka mu lweseko lukapelako.—Loma 8:21; Lum. 20:7, 8.

5, 6. Ñanyi bupe bansemi bo bafwainwa kupa baana babo, kabiji baana babo bafwainwa kuba byepi na buno bupe? (Monai kipikichala kitanshi.)

⁵ Bansemi bapa baana babo bupe bwawama inge bebafunjisha bya kulomba ne kwibakwasha kumonanga Yehoba amba Shetu wa mwiulu wituta muchima. Mulongo kalama wa mwanzo ubena kwingijila mu South Africa waamba’mba: “Kufumatu kimye kyasemekelwe baana betu ba bakazhi, nalombanga nabo kimye kyonse bufuku kanatu inge mfwapo. Baana betu javula bamba’mba kechi bavuluka byambo bine byo naambanga pa kulomba ne. Pano bino, bavuluka byo kyaikalanga ne byo kyanema pa kwisamba na Shetu, Yehoba ne kumvwa kuzhikijilwa. Byo bakomeneko, nebatundaikanga kulomba na jiwi ja peulu pa kuba’mba ñumvwe byo babena kubuula Yehoba biji mu michima yabo. Kino kyankwashanga kuyuka biji mu michima yabo. Apa bino nebafunjishanga bya kulomba bintu byanema biji mu lulombelo lwafunjishe Yesu pa kuba’mba milombelo yabo ikale yawama.”

⁶ Kabiji baana ba uno mulongo batwajijile kukosesha bulunda bwabo ne Yehoba. Aluno basongolwa kabiji babena kwingijila pamo na balume babo mu mwingilo wa kimye kyonse. Kintu kyawama bansemi kyo bakonsha kupa baana babo ke kwibakwasha kukosesha bulunda bwabo ne Yehoba. Kiji kwi abo bene kukosesha bulunda bwabo ne Lesa nangwa ne. Kuba bino kwavwangamo kutemwa jizhina ja Lesa ne kwijinemeka.—Sala. 5:11, 12; 91:14.

7. Bantu ba Lesa batokwa byepi, kabiji ki ka kyo twafwainwa kuba?

⁷ Twatokwa bingi pa kuyuka jizhina ja Lesa, ne kutelwa’mba “bantu ba jizhina janji.” (Byu. 15:14; Isa. 43:10) Tulomba kwi Tata wetu wa mwiulu amba: “Jizhina jenu jizhile.” Inge saka mulomba bino kikalengela Yehoba kwimukwasha kubula  kubanga bintu nangwa kwamba byambo byakonsha kutamisha jizhina janji jazhila. Kechi twafwainwa kwikala byonka byajinga bantu ba mu myaka kitota kitanshi babulanga kuba byo basapwilanga ne. Mutumwa Paulo wanembele pe abo amba: “Jizhina ja Lesa jibena kunenwa mwenga mu bisaka bya bantu na mambo a anweba.”—Loma 2:21-24.

8, 9. Ambaipo bantu bamo bo bakwasha kwi Yehoba na mambo a kukebesha kuzhijika jizhina janji.

⁸ Tukeba kuzhijika jizhina ja Lesa. Byo afwishishe mwatawanji, nyenga wikala mu kyalo kya Norway washajiletu bunke na mwananji wa myaka ibiji. Walondolwele’mba, “kino kyankatezhe bingi mu bwikalo bwami. Nalombanga kimye kyonse, inge papitatu jiola jimo, kuba’mba ankwashe kuchinchika ne kubula kuswisha Satana kwendeleka Yehoba na mambo a bintu byabula kufwainwa byo nakonsha kufuukulapo nangwa kubula bukishinka. Nakebelenga kuzhijika jizhina ja Yehoba ne kukwasha mwanami kukamonañana jikwabo na bashanji mu Paladisa.”—Maana. 27:11.

⁹ Nanchi Yehoba wakumbwile milombelo yanji nyi? Ee. Uno nyenga bamutundaikanga ku balongo ne banyenga. Byo papichile myaka itanu, uno nyenga wasongwelwe ku mukulumpe mu kipwilo. Mwananji wa myaka 20, luno ke mulongo wabatizhiwa. Waambile’mba, “Natemenwe bingi kuba’mba balume bami bankwashishe kumukomesha.”

10. Ñanyi kintu kikebewa pa kuba’mba tuzhijike jizhina ja Lesa?

¹⁰ Ki ka kikebewa pa kuba’mba jizhina ja Lesa jizhijikwe ne kufumyapo mwenga? Pa kuba’mba kino kyubiwe, Yehoba wafwainwa kufumyapo bonse bakana bumfumu bwanji. (Tangai Ezikyo 38:22, 23.) Bantu bakalumbuluka mu kuya kwa kimye. Byo tubena kutengelapo kimye bilengwa byonse kyo bikazhijika jizhina ja Yehoba! Kikapelako, Tata wetu wa mwiulu ukekala “bintu byonse ku bantu bonse.”—1 Ko. 15:28.

11, 12. Mu 1876, Yehoba wakwashishe bantu banji kumvwisha ka?

¹¹ Yesu saka akyangye kuya mwiulu, batumwa banji bamushikishe’mba: “Nkambo, nanchi mubena kubwezha bufumu ku bena Isalela pa kyonka kino kimye nyi?” Byakumbwile Yesu bimwesha’mba kechi bafwainwe kuyuka kimye kikatendekelamo kulama Bufumu bwa Lesa ne. Wabuujile baana banji ba bwanga kutatu muchima pa mwingilo wanema wa kusapwila ye bafwainwe kwingilanga. (Tangai Byubilo 1:6-8.) Nangwa byonkabyo, Yesu wafunjishe baana banji ba bwanga kutengelanga Bufumu bwa Lesa. Onkao mambo, kufumatu mu moba a batumwa, bena Kilishitu batwajijila kulomba’mba bwiye.

¹² Kimye byo kyafikile kuba’mba Yesu atendeke kulama mwiulu, Yehoba wakwashishe bantu banji kumvwisha bintu bikamweka. Mu 1876, Charles Taze Russell wanembele kibaba kyajinga mu magazini wa Bible Examiner. Kino kibaba kyajinga na mutwe wa kuba’mba “Bimye bya Bangetila: Bikapwa Kimye Ka?,” kyatongwele 1914 kwikala yewo mwaka. Kino kibaba kyakwatankenye “bimye bitanu na bibiji” byaambiwapo mu bungauzhi bwa kwa Danyela ku “bimye byatongolwa bya bisaka” byaambilepo Yesu. *—Da. 4:16; Luka 21:24.

13. Ñanyi bintu byamwekele mu mwaka wa 1914, kabiji bintu bibena kumweka mu ntanda kufumatu kyokya kimye bimwesha ka?

 ¹³ Mu 1914, kwabuukile nkondo ku byalo bya ku Europe, kabiji ino nkondo yakumbenetu ntanda yonse. Byo yapwilenga mu 1918, kwajinga nzala ne bikola byaipayile bantu bavula kukila bantu bafwile mu nkondo. Abino byonse ke lubaji lwa “kiyukilo” kyaambilepo Yesu. Kino kiyukilo kyamwesheshenga’mba Yesu waikele ke Mfumu mwiulu mu 1914. (Mat. 24:3-8; Luka 21:10, 11) Biyukilo byavula bimwesha’mba mwaka wa 1914 kyo kimye Nkambo Yesu Kilishitu kyo “bamupele munchinya.” Kabiji “aye wayilenga na kushinda kuba’mba apwishe kushinda.” (Lum. 6:2) Yesu wapangile Satana ne bandemona banji kufuma mwiulu ne kwibataya pano pa ntanda. Kufumatu kyokya kimye, bantu bashiinwa’mba byambo byanembelwe na lutangijilo lwa mupashi wazhila bya kine, byaamba’mba: “Malwa kwi anweba ntanda ne kalunga ka mema, mambo Diabola waikila ko muji, saka azhingila bingi, mambo wayuka’mba washalatu na kakimye kacheche.”—Lum. 12:7-12.

14. (a) Mambo ka o kyanemena ne luno kulombanga’mba Bufumu bwa Lesa bwiye? (b) Ñanyi mwingilo ye twafwainwa kwingilanga?

¹⁴ Bungauzhi buji mu Lumwekesho 12:7-12 bwalumbulula ene mambo o kwaikela makatazho avula abena kukatazha bantu kufumatu kimye Bufumu bwa Lesa kyo bwatendekele kulama. Nangwa kya kuba Yesu ubena kulama mwiulu, Satana naye  ubena kulama ino ntanda. Tukatwajijila kulomba’mba Bufumu bwa Lesa bwiye kufikatu ne kimye Yesu kyo akapwisha kushinda ne kufumyapo bubi pano pa ntanda. Kabiji twafwainwa kulombanga’mba bwiye ne kusapwila pa Bufumu. Yesu waambijile jimo amba: “Ano mambo awama a Bufumu bakeasapwila pano pa ntanda ponse kwikala bukamonyi ku bisaka byonse bya bantu, apa bino mpelo ikafike.”—Mat. 24:14.

15, 16. Twakonsha kwikala byepi mwayila lulombelo lwa kuba’mba kyaswa muchima wa Lesa kyubiwe pano pa ntanda?

¹⁵ Myaka 6,000 yapitapo, kyaswa muchima wa Lesa kyaubiwenga bingi bulongo pano pa ntanda. O ene mambo Yehoba byo atajile pano pa ntanda ne kumona bintu byo apele bantu, waambile’mba: “Byawamishatu.” (Nte. 1:31) Kufumatu kimye kyasatukile Satana, bantu bachechetu bo babena kuba kyaswa muchima wa Lesa pano pa ntanda. Lelo jino, twatemwa bingi kwikala pa Bakamonyi 8 milyonyi, balomba amba kyaswa muchima wa Lesa kyubiwe pano pa ntanda ne kwikela mwayila luno lulombelo. Bamwesha kino mu bwikalo bwabo ne kwingilako mwingilo wa kukwasha bantu kwikala baana ba bwanga.

¹⁶ Nyenga mishonale mu Africa wabatizhiwe mu 1948 waambile’mba: “Kwesakana na mwayila luno lulombelo, javula ndomba’mba ntaane bantu baji nobe mikooko ne kwibakwasha kuyuka Yehoba, mpelo saka ikyangye kwiya. Kabiji saka nkyangye kusapwila muntu ndomba maana kuba’mba namufike pa muchima. Kabiji bantu baji nobe mikooko bo nataana kala, ndomba kuba’mba Yehoba etupe maana a kwibakwasha.” Kino kyalengela uno nyenga uji na myaka 80 kwingila bulongo mwingilo, pamo na bukwasho bufuma ku bakwabo, wakwasha bantu bavula kwikala Bakamonyi ba kwa Yehoba. Kabiji mwakonsha kulangulukapo pa bantu bakwabo boba kyaswa muchima wa Lesa nangwa kya kuba bakota.—Tangai Filipai 2:17.

17. Mumvwa byepi ku muchima pa bintu Yehoba byo akoobila bantu ne ino ntanda?

¹⁷ Tusakutwajijila kulomba kyaswa muchima wa Lesa kubiwa kufikatu ne kimye Bufumu bwa Lesa kyo bukafumyapo balwanyi pano pa ntanda. Po po tukamona kyaswa muchima wa Lesa na kubiwa bantu bavula byo bakasangulwa mu paladisa pano pa ntanda. Yesu waambile’mba: “Kange mukumye kino ne, mambo kimye kibena kwiya aba bonse baji mu bilende kyo bakomvwa jiwi [jami] ne kufumamo.” (Yoa. 5:28, 29) Kikawama bingi kutambwila balongo ne balunda netu bafwa! Lesa “ukashimuna mipolo yonse ku meso [etu].” (Lum. 21:4) Bantu bavula bo bakasangula bakekala “babula koloka” bafwile kwa kubula kuyuka Yehoba ne Yesu. Kikawama bingi kufunjisha bantu bo bakasangula kuyuka kyaswa muchima wa Lesa ne kwibakwasha kwikala na “bumi bwa myaka ne myaka.”—Byu. 24:15; Yoa. 17:3.

18. Ñanyi bintu bantu byo bakebesha?

¹⁸ Bufumu bwa Lesa inge bwaiya pano pa ntanda bukazhijika jizhina janji, kabiji bonse pano pa ntanda bakakwatankana mu kupopwela Yehoba. Onkao mambo, mukumbu wa bintu bisatu biji mu lulombelo lwa kufunjilako bikafikizha bintu bikeba bantu. Pano bino, kuji bintu bikwabo bina byo tukeba byashalako byaambiwapo mu lulombelo lwa kwa Yesu. Tukesambapo mu mutwe walondelapo.