BEZALELA ne Oholyaba bayukile bingi mingilo ya buntungi. Byo bajinga bazha mu Ijipita, kyamweka balengele matafwali avula bingi a kukankalwa kubala. Pano bino, papichile myaka yavula kufuma po baingijile uno mwingilo. Pa kikye kimye, bebapele mwingilo mukatampe wa kulenga bintu ne kutangijila mwingilo wa kushimika tente wa lusambakeno. (Lupu. 31:1-11) Nangwa byonkabyo, bantutu bacheche bo bamwenepo bintu byo balengele. Nanchi balefwilwe na mambo a kuba bantu bavula kechi bamweneko byo balengelenga nenyi? Nanchi bafwainwe kwakamwa amba bantu kechi babena kumona mingilo yabo nenyi? Nanchi kyanema bantu kumona mingilo yenu nyi?

Bipe bimo byajinga mu tente wa lusambakeno byamwekanga bingi bulongo. Akilangulukai pa bakelubi ba ngolode bajinga peulu ya jikwachi ja lulayañano. Mutumwa Paulo wibatongwele’mba “ba lukumo.” (Hebe. 9:5) Akifwanyikizhai bano bakelubi ba ngolode ba kubunda byo bamwekanga bulongo.—Lupu. 37:7-9.

Bino bintu byalengele Bezalela ne Oholyaba inge byatanwa lelo jino, bakonsha kwibibika mu mazubo awama bingi mo balamina bya kishakulu pa kuba’mba bantu bavula bayenga na kwibimona. Bino pa kimye kyo bebilengele, banga bamwene kuwama kwabyo? Bakelubi bebabikile Mwazhijisha; onkao mambo, ñanga mukatampe ye yenkatu wibamonanga kimye kyo atwelangamo jimo pa mwaka pa Juba ja Kufuchilamo Mambo. (Hebe. 9:6, 7) Kino kibena kulumbulula’mba bantu bachechetu bo bamwene bakelubi.

Inge yenu mwajinga Bezalela nangwa Oholyaba kabiji mwaingijile na ngovu kulenga bino bintu byawama, inge mwaumvwine byepi pa kuyuka’mba bantu bachechetu bo bebimwene? Bantu bavula ano moba bomvwa bingi bulongo umvwe bebatakaika nangwa kwibakumbwa ku bakwabo pa mingilo yo baingila. Balanguluka amba jo jishinda jo bayukilamo amba baingila bulongo. Bino bakalume ba Yehoba kechi byo balanguluka ne. Byonka byajinga Bezalela ne Oholyaba, tumwena lusekelo mu kuba kyaswa muchima wa Yehoba ne kwitabilwa kwi aye.

 Kimye Yesu kyo ajinga pano pa ntanda, bantangi ba bupopweshi batemenwe kulomba milombelo ya kukeba amba bantu bebatote. Pakuba Yesu waambilepo jishinda jawama kulombelamo, ko kuba’mba kulomba mu bukishinka kwa kubula kukeba amba bantu bemutote. Ki ka kikafumamo? “Shenu umona byafyamika ukemufweta.” (Mat. 6:5, 6) Kintu kine kyanema kechi bilanguluka bantu pa milombelo yetu ne, bino ke biimona Yehoba. Byo alangulukapo pa milombelo yetu byo biilengela kunema. Kyo kimotu ne mingilo yonse yo twafwainwa kwingila mu mwingilo wanji. Mwingilo wetu kechi wikala wanema inge bantu kebetutakaike ne, bino ulengela Yehoba “umona byafyamika” kusekela.

Kimye kyo bapwishishe kushimika tente wa lusambakeno, jikumbi “javwetele tente wa lusambakeno ne lukumo lwa Yehoba lwakumbene mu tente wa lusambakeno.” (Lupu. 40:34) Kino kyamwesheshetu patoka amba uno tente waitabilwa kwi Yehoba. Nga Bezalela ne Oholyaba baumvwine byepi? Nangwa kya kuba mazhina abo kechi anembelwe pa byo balengele ne, kyamweka basangalele bingi pa kuyuka amba Lesa wapesheshe mingilo yabo. (Maana 10:22) Pa myaka yalondejilepo, kibasangajikanga bingi pa kumona bintu byo balengele saka bebingijisha mu mwingilo wa Yehoba. Bezalela ne Oholyaba byo bakasangulwa mu ntanda ipya, bakomvwa bingi bulongo pa kwibabula amba tente wa lusambakeno bamwingijishe mu mpopwelo ya kine pa myaka 500.

Mu jibumba ja Yehoba lelo jino, balongo ne banyenga balenga mavidyo, bipikichala, banyimbi, bakopa bya kukopakopa, bantuntuluzhi, ne banembi kechi bayukanyikwa mazhina ne. Kafwako muntu nangwa umo umonako inge babena kwingila ino mingilo ne. Kyo kimotu ne mingilo ibena kwingila balongo ne banyenga baji mu bipwilo kukila pa 110,000 mwaya ntanda. Ñanyi umona kalume ulama mali a kipwilo byo anemba mapepala a mali ku mpelo ya ñondo? Ñanyi umonako munembeshi mu kipwilo byo anemba sawakya wa mwingilo? Kabiji ñanyi umona bingila mulongo nangwa nyenga ubena kuwamisha byaonaika pa Nzubo ya Bufumu?

Bezalela ne Oholyaba kechi batambwilepo bilambu byo bakonsheshe kumwesha ku bantu pa mingilo yawama yo baingijile ne. Bino batambwijile kintu kyakilapo kunema, ko kuba’mba baitabijilwe kwi Yehoba. Twayuka amba Yehoba wamwene mingilo yabo. Atweba bonse, twayai twipelulenga ne kwingila na muchima wa kwipana, byonka byaubanga Bezalela ne Oholyaba.