Kwingijila Yehoba mu “Moba a bya Malwa”
BA ERNST * bafikizha myaka 70 bejizhañenye amba, “Kukolwakolwa kubena kunkatazha bingi.” Nanchi ne anweba byo byo mumvwa nyi? Inge mubena kuya na kukota kabiji mubena kumvwa nobe mubena kukolwakolwa ne bulume kukepa mu mubiji, ko kuba’mba mubena kwimwena kufika kwa byambo biji mu Musapwishi kitango 12. Mu kyepelo 1, moba a bukote beatela’mba “moba akatazha” nangwa’mba “moba a bya malwa” (tubyambo twa munshi). Pano bino, kino kechi kibena kulumbulula’mba bwikalo bwenu bukekalangatu bwa malwa ne. Mwakonsha kwikala bwikalo bwawama ne kwingijila Yehoba na lusekelo.
TWAJIJILAI KWIKALA NA LWITABILO LWAKOSA
Twimutemwa bingi anweba balongo ne banyenga bakikulumpe. Baibolo waambapo pa bakalume ba Yehoba bakikulumpe bapichile mu makatazho o mubena kupitamo. Kya kumwenako, Izaka, Yakoba, ne Ahiya balekele kumona na mambo a kukoma. (Nte. 27:1; 48:10; 1 Mfu. 14:4) Mfumu Davida wakotele kya kuba “kechi waumvwanga kyuya ne.” (1 Mfu. 1:1) Bazilai wajinga nonshi, naye kechi wakonshanga kutompa kajo ne kumvwa byo kawama nangwa kuteleka ku nyimbo ne. (2 Sam. 19:32-35) Abalahama ne Naomi bonse bapichile mu malwa a kufwisha benakwabo.—Nte. 23:1, 2; Luta 1:3, 12.
Ñanyi bintu bibakwashishe kutwajijila kwikala bakishinka kwi Yehoba ne kwikala na lusekelo? Na mambo a kuketekela mu mulaye wa Lesa, Abalahama “wakosele mu lwitabilo” nangwa kya kuba wakotele. (Loma 4:19, 20) Ne atweba twafwainwa kwikala na lwitabilo lwakosa. Luno lwitabilo kechi lwiya na mambo a kukoma, bulume nangwa bintu byo tupitamo ne. Kya kumwenako, mushakulu Yakoba wakotele, kechi wamonanga ne, kabiji walaalangatu. Nangwa byonkabyo, wajinga na lwitabilo lwakosa mu milaye ya Lesa. (Nte. 48:1-4, 10; Hebe. 11:21) Lelo jino, ba Ines, baji na myaka 93, baji na kikola kikookesha mishipeshipe, pano bino bamba’mba: “Moba onse ñumvwa amba Yehoba ubena kumpesha. Kabiji ndangulukatu pa paladisa. Kino kindengela kwikala na luketekelo.” Kine baji na muchima wawama wa lusekelo.
Tukosesha lwitabilo lwetu kupichila mu kulomba, kubalaula mu Mambo a Lesa ne kutanwa ku kupwila kwa bwina Kilishitu. Mu moba anji a bukote, ngauzhi Danyela walombanga bimye bisatu pa juba pa juba ne kutanga Mambo a Lesa. (Da. 6:10; 9:2) Ana, mwanamukazhi wakikulumpe wafwijilwe “watanwanga moba onse pa nzubo ya Lesa.” (Luka 2:36, 37) Inge kemutanwe ku kupwila kimye kyonse ne kukumbulapo, muketundaika anweba bene ne bonse baji mu luonde. Kabiji Yehoba umwenamo bingi lusekelo mu milombelo yenu, nangwa kya kuba mukankalwa kuba bintu byo mwaubangapo kala.—Maana 15:8.
Itundaikainga
Anweba bakalume ba Lesa bakishinka bavula mukeba bingi kumona, kutanga ne kwikala na bulume bwa kutanwa ku kupwila, pano bino, kibena kwimukatazha bingi, apo kampe mwaleka ne kuleka. Pano mwafwainwa kuba byepi? Ingijishai bintu byonka byo muji nabyo. Bavula bakankalwa kutanwa ku kupwila bengijisha mafoni kuteleka ku bibena kwambiwa pa kupwila. Banyenga Inge, baji na myaka 79, kechi bamona bulongo ne, pano bino banengezha kupwila kwingijisha mapepala o bapulinta mu bisopelo bikatampe ebapa mulongo mu kipwilo.
Apo kampe muji na kintu kimo kyabula bantu bavula, ko kuba’mba muji na kimye kyabaya. Mwakonsha kwingijisha kino kimye kuteleka ku Baibolo ye bakopela pa maselechi, mabuku alumbulula Baibolo, majashi ne bifwanyikizho. Mwakonsha ne kutumina foni bakwenu ba mu lwitabilo ne kwibapako bya bupe bya mupashi ne ‘kwikosesha anwe bene na bene mu lwitabilo.’—Loma 1:11, 12.
TWAJIJILAI KWIKALA BABAMBAKANA MU MWINGILO WA LESA
Sapwilainga
Ba Christa, baji na myaka kukila pa 80, baambile na bulanda amba: “Kileta bingi bulanda inge keukankalwe kuba bintu byo waubanga kala.” Pano bakikulumpe bakonsha kwikala byepi na lusekelo? Ba Peter, baji na myaka 75, baambile’mba: “Bakonsha
kwikala na lusekelo inge kebalanguluke pa bintu byawama, kechi pa bintu byo bakonsha kubula kuba ne, bino bafwainwa kusekela mu byo bakonsha kuba.”Abya mwakonsha kulangulukapo mashinda amo a busapwishi o mwakonsha kwingilako nyi? Ba Heidi, baji na myaka ya mu ma 80, bakankalwa kuya na kusapwila ku nzubo ku nzubo byonka byo baubanga kala. Bino bafunjile kwingijisha kompyuta pa kunemba makalata a kutumina bantu mu busapwishi. Basapwishi bakikulumpe bamo batendeka misambo ya mu Baibolo na bantu kimye kyo baji pa mpuzha pa kukokolokela nangwa pa kiteshenyi. Kabiji inge muji mu kipatela, abya mwakonsha kwalula kyokyo kipatela kwikala nyaunda yenu ya kusapwilamo ku ba badokotala ne bamanase ne bantu bakwabo bajimo nyi?
Saka mutambwila benyi
Mu bukote bwanji, Mfumu Davida watundaikanga mpopwelo ya kine. Wapaine bya bupe ne kunengezha bintu bya kukwasha mu mwingilo wa kushimika nzubo ya Lesa. (1 Moba 28:11–29:5) Ne anweba mwakonsha kutundaikako mwingilo wa Bufumu mwaya ntanda kwesakana na papelela bulume bwenu. Mwakonsha kutundaika bapainiya ne basapwishi babambakana mu kipwilo kupichila mu byambo bya lutundaiko, kwibapako bya bupe, nangwa kujilapo nabo tukajo. Mu milombelo yenu, mwakonsha kulombelako ne banyike, bisemi, baji mu mwingilo wa kimye kyonse, babena kukolwa ne babena kutangijila mu jibumba ja Lesa.
Anweba ne mingilo yenu pamo mwanema bingi. Shetu wa mwiulu kechi ukemutaya anweba bakikulumpe ne. (Sala. 71:9) Yehoba wimutemwa bingi. Katatakatu atweba bonse tukekalenga myaka yavula kwa kubula misongo nangwa kupita mu makatazho. Kabiji tukekala na bulume bwa kutwajijila kwingijila Yehoba Lesa wetu wa butemwe myaka ne myaka, mambo tukekala na bumi bwalumbuluka.
^ par. 2 Mazhina amo apimpulwa.