1, 2. Bapopweshi ba Yehoba kufumatu ne kala boba byepi?

KUFUMATU ne kala, bapopweshi ba Yehoba batengela kufika kwa bungauzhi. Kya kumwenako, Yelemiya waawile kuba’mba bufumu bwa Yuda bakebonauna, ne kya kine bebonawine ku bena Babilona mu 607 B.C.E. (Yele. 25:8-11) Isaya naye waawile’mba Yehoba ukabwezha Bayudea mu Yuda. Waambile’mba: “Bo bene ba lusekelo aba bonse babena kumupembelela.” (Isa. 30:18) Mika naye waketekejile kuba’mba milaye ya Yehoba ikafika. Waambile’mba: “Amiwa nkatalanga kwi Yehoba.” (Mika 7:7) Pa myaka yavula, bakalume ba Lesa nabo bapembelejilenga kufika kwa bungauzhi bwaambile pe Mesiasa, nangwa’mba Kilishitu.—Luka 3:15; 1 Pe. 1:10-12. *

² Ne lelo jino, tubena kupembelela kufika kwa bungauzhi bwaamba pa Bufumu bwa Yehoba. Yesu ye Mfumu wa buno Bufumu, kabiji katatakatu apokolole bakalume ba Lesa ku ino ntanda ibi. Ukonauna bangubabibi bonse ne kupwisha buyanji. (1 Yoa. 5:19) Onkao mambo, twafwainwa kutwajijila  kutengela juba ja Yehoba mambo jakonsha kufika kimye kiji kyonse. Kabiji twafwainwa kwibikako kwinengezhezha jimo.

3. Twakonsha kwikala na ñanyi luzhinauko inge kya kuba twapembelela mpelo pa myaka yavula?

³ Atweba bakalume ba Yehoba tukebesha bingi kumona kyaswa muchima wa Lesa ‘kubiwa pano pa ntanda, byonka byo kibena kubiwa mwiulu.’ (Mat. 6:10) Pano bino, panyuma ya kupembelela mpelo ya buno bwikalo pa myaka yavula, bamo bakonsha kuzhinauka’mba, ‘Mambo ka o twafwainwa kutwajijila kutengela mpelo?’ Twayai twisambe pa kino.

4. Mambo ka o twafwainwa kutwajijila kulaba ne kukenkenta?

⁴ Baibolo witubuulatu patoka ndangulukilo yo twafwainwa kwikala nayo pa mambo a mpelo ya buno bwikalo. Yesu wabuujile baana banji ba bwanga amba, “Labainga ne kukenkenta.” (Mat. 24:42; Luka 21:34-36) Onkao mambo, twafwainwa kutwajijila na kutengela mambo byo bitubuujile Yesu. Jibumba ja Yehoba jitubuula byo twafwainwa kuba kino. Kupichila mu mabuku alumbulula Baibolo, jitutundaika kutwajijila na “kutengela ne kukebesha kwiya kwa juba ja Yehoba” ne kuketekela mu milaye ya Lesa ya ntanda ipya.—Tangai 2 Petelo 3:11-13.

5. Ñanyi kintu kikwabo kyafwainwa kwitulengela kulabanga ne kukenkenta?

⁵ Bena Kilishitu ba mu myaka kitota kitanshi bafwainwe kutengelanga. Bino atweba twafwainwa ne kukizhamo kutengela juba ja Yehoba. Mambo ka? Mambo kiyukilo kyaambile Yesu kibena kumwesha’mba waikele ke Mfumu wa Bufumu bwa Lesa mu 1914. Kabiji kibena kumweshe’mba tuji mu moba apelako nangwa’mba mu kimye “kya mpelo ya buno bwikalo.” Byonkatu byaawile Yesu, bintu mu ntanda bibena kuyatu na kutaminako kabiji mambo awama a Bufumu babena kwiasapwila mwaya ntanda yonse. (Mat. 24:3, 7-14) Yesu kechi waambile kimye kikapitapo pa kuba’mba mpelo ikafike ne. Onkao mambo, twafwainwa kulabanga ne kukenkenta.

6. Twayuka byepi amba bintu mu ntanda bisakutaminangakotu mpelo byo ibena kufwenya pepi?

⁶ Baibolo waamba’mba bantu bakayangatu na kutaminako “mu moba a kupelako.” (2 Timo. 3:1, 13; Mat. 24:21; Lum. 12:12) Onkao mambo, nangwa kya kuba bintu luno byatama, twayuka’mba bikayangatu na kutaminako. Nanchi “mpelo ya buno bwikalo” ibena kulumbulula kimye kya kulutwe ntanda po ikakizhamo kutama nyi?

7. Kinembelo kya Mateo 24:37-39 kyaambapo amba ka pa moba a kupelako?

⁷ Nanchi mwaketekela amba bintu bikatama kufika pa ñanyi kipimo “malwa akatampe” saka akyangye kutendeka? (Lum. 7:14) Nanchi mwaketekela kuba’mba mu byalo byonse mukekala makondo, kubula kajo ne misongo mu mazubo onse nyi? Inge kyaikala bino, ko kuba’mba ne bonse balengulula byaamba Baibolo bakaswa kuba’mba bungauzhi bwa mu Baibolo bubena kufika. Pakuba Yesu waambile’mba bantu bavula kechi ‘bakatako muchima’ ku kiyukilo kya kwikalapo kwanji ne. Bakatwajijila na kuba bintu bya mu bwikalo kufikatu ne mpelo byo ikebabazhimuna. (Tangai Mateo 24:37-39.) Onkao mambo, kechi twafwainwa kuketekela amba bintu mu ntanda bikakizhamo kutama kya kuba kikalengele bantu kuswa’mba mpelo iji pepi ne.—Luka 17:20; 2 Pe. 3:3, 4.

8. Na mambo a kuba twayuka kiyukilo kyapaine Yesu, twashiinwa amba ka?

⁸ Pano bino, kiyukilo kyapaine Yesu kikwasha baana banji ba bwanga kuyuka  kimye kyo babena kwikalamo. Baana ba bwanga ba kwa Yesu batwajijila kulaba ne kukenkenta. (Mat. 24:27, 42) Kufumatu mu 1914, mbaji yapusana pusana ya kiyukilo kya kwa Yesu yamweka. Twashiinwa’mba tubena kwikala mu kimye “kya mpelo ya buno bwikalo.” Yehoba wafuukwila jimo kimye kyo akonauna ntanda ibi ya kwa Satana.

9. Ñanyi bishinka bitulengela kutwajijila kutengela mpelo ya buno bwikalo?

⁹ Pano mambo ka bena Kilishitu o bafwainwa kutengelanga mpelo? Mambo tukeba kukookela byaambile Yesu Kilishitu. Kabiji twayuka kiyukilo kya kwikalapo kwanji. Kechi tutengelatu na mambo a kuba’mba betubula kuba bino ne, bino tuji na bishinka bya mu Binembelo bitulengela kushiinwa’mba twafwainwa kutwajijila kulaba ne kukenkenta. Mambo twayuka’mba mpelo ya buno bwikalo bwatama iji pepi.

10, 11. (a) Mambo ka Yesu o aambijile baana banji ba bwanga ‘kulabanga ne kukenkenta’? (b) Yesu wabuujile baana banji ba bwanga kuba ka inge mpelo yamweka nobe yabanda kufika? (Monai kipikichala kitanshi.)

¹⁰ Atweba bavula twatwajijila kulaba ne kukenkenta pa myaka yavula. Pano bino, kechi twafwainwa kuleka kutengela na mambo a kuba’mba twapembelela pa kimye kyabaya ne. Twafwainwa kutengelanga Yesu kwiya na kufumyapo ntanda ya kwa Satana. Vulukai kuba’mba Yesu watundaikile baana banji ba bwanga amba: “Jimukai, mukenkentenga, mambo kechi mwayuka kimye kyatongolwa ne. Kiji nobe muntu wayile ku kyalo kingi washile nzubo yanji ne kupa luusa bakalume banji, awu mwingilo wanji awu mwingilo wanji, ne kukambizha kalama wa kibelo kulabanga ne kukenkenta. Onkao mambo, labainga ne kukenkenta, mambo kechi mwayuka juba nkambo mwina nzubo jo akeshilamo ne, kana mabanga nangwa pakachi ka bufuku nangwa ku makya nangwa lukelokelo, pa kuba’mba umvwe waiya kya kubazhimukilatu, akabule kwimutaana saka mwalaala. Pano bino, byo nemwambila anweba, naambila ne bonse namba: Labainga ne kukenkenta.”—Mako 13:33-37.

¹¹ Bena Kilishitu byo bayukiletu amba Kilishitu watendekele kulama mu 1914, bayukile kuba’mba katatakatu mpelo ifike. Batendekele kwingila na mukoyo mwingilo wa kusapwila pa Bufumu. Yesu waambile’mba wakonsha kwiya “ku makya nangwa lukelokelo.” Pano inge waiya, baana banji ba bwanga bakoba byepi? Waambile’mba: “Labainga ne kukenkenta.” Onkao mambo, nangwa kya kuba twapembelela pa kimye kyabaya, kechi kibena kulumbulula’mba mpelo ikiji kwalepa nangwa ikeya saka twafwa kala ne.

12. Habakuka wamwipwizhe amba ka Yehoba, kabiji Lesa wamukumbwile’mba ka?

¹² Akilangulukai pe ngauzhi Habakuka ye bapele mwingilo wa kwaula lonaiko lwa Yelusalema. Kimye kyo atendekele mwingilo wanji, bangauzhi bakwabo saka batendekele kala kwamba pa luno lonaiko. Bintu byatamine kya kuba ‘babi bazhokolokele baoloka kabiji bunchibamambo bwaoloka bwavulañene.’ O ene mambo Habakuka o aipwizhe amba: “Anweba Yehoba, bimye binga byo nkajila na kukeba bukwasho?” Mu kifulo kya kukumbulatu buno bwipuzho, Yehoba watundaikile ngauzhi wanji wa kishinka amba kimye kya lonaiko “kechi kikakelwa” kufika ne. Lesa waambijile Habakuka amba, “wikitengelenga.”—Tangai Habakuka 1:1-4; 2:3.

13. Ñanyi milanguluko Habakuka yo akonsheshe kwikala nayo, kabiji inge yatamijile ka?

¹³ Pano ibyepi inge kya kuba Habakuka walefwilwe ne kulanguluka’mba: ‘Po batendekejile  kwamba pa lonaiko lwa Yelusalema. Nanchi lusakwiya lelo nyi? Pano ngaulengatu nobe muzhi bakamonauna kesha? Bakwetu nabo bakingileko.’ Inge kya kuba Habakuka walangulukilenga bino, inge waonawine bulunda bwanji ne Yehoba, kabiji inge wafwile kimye bena Babilona kyo baonawine Yelusalema.

14. Mambo ka o twafwainwa kuketekela kuba’mba inge twatwajijila kutengela mpelo kechi kiketulenga bumvu ne?

¹⁴ Byo tukatwela mu ntanda ipya, tukavulukanga amba bungauzhi bonse bwaambilenga pa mpelo ya buno bwikalo bwafikile. Kulanguluka pa bintu byonse byo byamwekele kuketulengela kuketekela mwi Yehoba ne milaye yanji iji kulutwe. (Tangai Yoshua 23:14.) Tukamusanchilanga bingi Lesa, ‘watongola kimye kikamwekelamo bino bintu,’ kabiji witubuula amba “mpelo ya bintu byonse yafwenya kala pepi.”—Byu. 1:7; 1 Pe. 4:7.

15, 16. Mambo ka o twafwainwa kwingijila mwingilo wa kusapwila papelela bulume bwetu mu ano moba apelako?

¹⁵ Jibumba ja Yehoba jatwajijila kwituvululamo kuba’mba tutenga muchima pa kwingijila Yehoba mu bwikalo bwetu. Bino bya kwituvululamo bitulengela kupayankana mu mwingilo wa Lesa ne kumona’mba mwingilo wetu ubena kukebewa kumwingila bukiji. Twashiinwa kuba’mba kiyukilo kyaambilepo Yesu kibena kufika mu ano moba kabiji katatakatu mpelo ifike. Onkao mambo, twayai tutangizhengako Yehoba mu bwikalo bwetu ne kusapwila mambo awama aamba pa Bufumu.—Mat. 6:33; Mako 13:10.

¹⁶ Nyenga umo waambile’mba: “Inge ketusapwile mambo awama a Bufumu bwa Lesa, . . . twakonsha kupulusha bantu ku lufu lukeya na malwa akeshila ino ntanda.” Uno nyenga wayuka buneme bwa kupulusha bantu, mambo aye ne bamwatawanji bebapulwishe kimye kyalobele bwato bukatampe bwa Wilhelm Gustloff mu 1945. Nangwatu kimye kiji muntu mu kizumba, wakonsha kulubamo bintu byanema mu bwikalo. Uno nyenga uvuluka’mba mwanamukazhi umo wajijilenga’mba: “Mama byola byami! Mama byola byami! Mashikiyo ami, makosa ami ne tumbalaminwe twami! Bintu byami bya mutengo byonse byaloba. Nashalatu!” Pakuba bantu bakwabo bajinga mu buno bwato babikile bumi bwabo mu kizumba ne kwingila na ngovu pa kuba’mba bapulushe bantu baponejile mu kalunga ka mema ajinga na mabebe. Byonka byaubile bano bantu, ne atweba twafwainwa kwingila papelela bulume bwetu kukwasha bantu. Twafwainwa kutwajijila kwingila mwingilo wa kusapwila pa kuba’mba  tukwashe bantu bakapuluke mpelo ya ino ntanda.

17. Ñanyi bishinka bitulengela kwitabila’mba mpelo yakonsha kwiyatu nobe mu kukopa kwa jiso?

¹⁷ Bintu bibena kumweka mu ntanda bibena kumweshatu patoka kuba’mba bungauzhi bwa mu Baibolo bubena kufika kabiji mpelo ya buno bwikalo bwatama ijitu pepi. Tubena kupembelela kimye “nsengo jikumi” ne “lukinyama” kyo bikalukuka Babilona Mukatampe, ko kuba’mba bupopweshi bwa bubela bwa ntanda yonse. (Lum. 17:16) Kechi twafwainwa kulangulukanga’mba kukiji kimye kyabaya pa kuba’mba bino bintu bikafike ne. Vulukai kuba’mba Lesa ye ‘ukabika mu michima yabyo’ mulanguluko wa kulukuka bupopweshi bwa bubela, kabiji wakonsha kubikamo uno mulanguluko nobe mu kukopa kwa jiso. (Lum. 17:17) Katatakatu mpelo ya ino ntanda ya kwa Satana ifike. Onkao mambo, twafwainwa kulondela lujimuno lwa kwa Yesu lwa kuba’mba: “Jimukai kuchina’mba michima yenu yakanemenwa na mambo a kukizhamo kuja, kupendwapendwa, bijikila bya mu buno bwikalo, ne aja juba jakemufikila kwa kubula kuyuka nobe kitewa.” (Luka 21:34, 35; Lum. 16:15) Twayai tumwingijilenga Yehoba na mukoyo, saka twaketekela kuba’mba “ukwasha boba bamupembelela.”—Isa. 64:4.

18. Ñanyi bwipuzho bo tukesambapo mu mutwe walondelapo?

¹⁸ Byo tubena kupembelela mpelo ya buno bwikalo bwatama, twayai tulondelenga byambo byaambile mwana wa bwanga Yuda amba: “Anweba batemwe, ikomeshainga anwe bene mu lwitabilo lwenu lwazhila ne kulomba na mupashi wazhila, pa kuba’mba mwikale mu butemwe bwa Lesa, byo mubena kutengela lusa lwa Nkambo yetu Yesu Kilishitu luleta bumi bwa myaka ne myaka.” (Yuda 20, 21) Pano twakonsha kumwesha byepi amba tubena kukebesha ne kutengela kufika kwa milaye ya Lesa ya ntanda ipya? Tukesamba pa kino mu mutwe walondelapo.