1. Lwitabilo lwanema byepi? (Monai kipikichala kitanshi.)

NANCHI mwakiipuzhapo amba, ‘Nanchi Yehoba ukampulusha mu kimye kya malwa akatampe nyi?’ Mutumwa Paulo waambile’mba kyubilo kyanema kyo twafwainwa kwikala nakyo pa kuba’mba tukapuluke ke lwitabilo. Waambile’mba: “Kwa kubula lwitabilo kechi kyakonsheka kutokesha Lesa ku muchima ne.” (Bahebelu 11:6) Kino kyaumvwanyika kupeela bingi, bino kishinka ke kya kuba’mba “kechi bantu bonse baji na lwitabilo ne.” (2 Tesalonika 3:2) Bino binembelo bibiji bitukwasha kuyuka buneme bwa kukosesha lwitabilo lwetu.

2, 3. (a) Lwitabilo lwetu lwanema byepi? (b) Ñanyi bintu byo tusakwisambapo?

² Mutumwa Petelo waambile pa lwitabilo “lwaesekwa.” (Tangai 1 Petelo 1:7.) Malwa akatampe ajitu pepi, kabiji tukeba kwikala bantu “baji na lwitabilo lwa kupulusha bumi bwetu.” (Bahebelu 10:39) Twafwainwa kwingila na ngovu pa kukosesha lwitabilo lwetu. Tukeba tukatanwe pa boba bakatambula mfweto kimye kikasololwa Yesu Kilishitu, Mfumu wetu. Byonka byaubile mwanamulume walombele Yesu amba avuzhe lwitabilo lwanji, ne atweba twakonsha kulomba’mba: “Nkwashai nkoseshe lwitabilo lwami!” (Mako 9:24) Nangwa byonka byalombele batumwa, twakonsha kulomba’mba: “Vuzhai lwitabilo lwetu.”—Luka 17:5.

 ³ Mu uno mutwe, tusakwisamba pa bino bishinka: byo twakonsha kukosesha lwitabilo lwetu, byo twakonsha kumwesha’mba lwitabilo lwetu lwakosa, ne ene mambo o twafwainwa kushiinwa’mba Lesa ukakumbula inge twamulomba’mba avuzhe lwitabilo lwetu.

4. Bañanyi bakonsha kwitukwasha kukosesha lwitabilo lwetu?

⁴ Na mambo a kuba lwitabilo lwanema, Yehoba witupa bya kumwenako byavula bya bantu ba mu Baibolo bajinga na lwitabilo. Abino “bebinembele’mba tufunjileko.” (Loma 15:4) Byaubile Abalahama, Sala, Izaka, Yakoba, Mosesa, Lehaba, Gidiona, Balaka ne bakwabotu bavula byakonsha kwitulengela kukosesha lwitabilo. (Bahebelu 11:32-35) Kununga pa bano bantu ba kala, kuji ne balongo ne banyenga ba mu ano moba baji na lwitabilo. * (Monai tubyambo twa munshi.)

5. Elaija wamwesheshe byepi amba wajinga na lwitabilo lwakosa mwi Yehoba, kabiji twafwainwa kwiipuzha’mba ka?

⁵ Ngauzhi Elaija ye wa kumwenako umo wa mu Baibolo. Byo musakulangulukanga pa byo aubile, monai bintu bitanu mo amwesheshe amba waketekela mwi Yehoba. (1) Elaija byo abuujile Mfumu Ahaba amba Yehoba ukaleta kyashi, waambile kwa kubula kuzhinauka amba: “Byonkatu Yehoba Lesa wa Isalela byo aji na bumi, yenka ye ñingijila, mu iye myaka kechi kukekalapo kime nangwa mvula ne, posotu na byambo byami!” (1 Bamfumu 17:1) (2) Elaija waketekejile’mba Yehoba ukamupa bintu byo akebelenga pamo ne bakwabo mu kimye kya kyashi. (1 Bamfumu 17:4, 5, 13, 14) (3) Kabiji Elaija waketekejile’mba Yehoba usakusangula mwana wa mwanamukazhi wafwilwa. (1 Bamfumu 17:21) (4) Washiinwe amba mujilo wa Yehoba usakusoka mulambo wanji pa Mutumba wa Kamela. (1 Bamfumu 18:24, 37) (5) Mvula saka akyangye ne kunoka, Elaija waambijile Ahaba saka ashiinwa amba: “Tuntukai, muye na kuja ne kutoma, mambo mvula mukatampe ubena kupoota.” (1 Bamfumu 18:41) Panyuma ya kulanguluka pa bino byamwekele, twakonsha kwiipuzha’mba, ‘Nanchi lwitabilo lwami lwakosa byonka byajinga lwa kwa Elaija nyi?’

6. Ki ka kyo tukeba kwi Yehoba pa kuba’mba tukoseshe lwitabilo lwetu?

⁶ Na mambo a kuba’mba kechi twakonsha kukosesha lwitabilo atweba bene ne, twafwainwa kulomba kwi Lesa amba etupe mupashi wazhila. Mambo ka? Mambo lwitabilo ke kipangwa kya mupashi wazhila. (Ngalatiya 5:22) Tumwesha’mba tuji na maana inge ketulondele lujimuno lwa kwa Yesu lwa kulomba mupashi wazhila. Yesu walayile’mba Yehoba “ukakilapo kupana mupashi wazhila ku boba bamulomba.”—Luka 11:13.

7. Lumbululai byo twakonsha kukosesha lwitabilo lwetu.

 ⁷ Inge twaikala na lwitabilo lwakosa mwi Lesa, twafwainwa kutwajijila kwilukosesha. Twakonsha kwesakanya lwitabilo ku mujilo. Inge twabanza mujilo, lubebe lubaya bingi. Nangwa byonkabyo, inge twaleka kusonselako, mujilo uzhima pashalatu buto. Bino inge twatwajijila kusonselako, mujilo utwajijila kuteema. Byo biji ne lwitabilo lwetu. Inge twatwajijila kutanga ne kufunda Mambo a Lesa kimye kyonse, butemwe bo twatemwa Baibolo ne Yehoba bukabayilako. Onkao mambo, tukatwajijila kukosesha lwitabilo lwetu.

8. Ñanyi bintu bikemukwasha kukosesha lwitabilo lwenu?

⁸ Kechi mwafwainwa kupelelatu pa kuyuka bintu byo mwafunjile saka mukyangye kubatizhiwa ne. (Bahebelu 6:1, 2) Kya kumwenako, kufunda pa bungauzhi bwa mu Baibolo bwafika kala kukemukwasha kukosesha lwitabilo lwenu. Kabiji mwakonsha kwingijisha Mambo a Lesa kumona inge lwitabilo lwenu lwakosa.—Tangai Yakoba 1:25; 2:24, 26.

9, 10. Lwitabilo lwetu lukosa byepi kupichila mu (a) balunda bawama? (b) kupwila? (c) kusapwila?

⁹ Mutumwa Paulo waambile’mba bena Kilishitu bakonsha ‘kwikosesha bene na bene mu lwitabilo lwabo.’ (Loma 1:12) Kino kilumbulula ka? Inge twaikala pamo na balongo betu ne banyenga, twakonsha kwikosesha atwe bene ba bene mu lwitabilo. Kyakonsha kwikala bino kikatakata inge twaikala pamo na boba baji na lwitabilo ‘lwaesekwa.’ (Yakoba 1:3) Balunda batama bonauna lwitabilo lwetu, pakuba balunda bawama belukosesha. (1 Kolinda 15:33) O ene mambo o betutundaikila kupwilanga kimye kyonse. Akwa, ko ko twakonsha ‘kwitundaika atwe bene na bene.’ (Tangai Bahebelu 10:24, 25.) Kunungapo, mikambizho yo tutambwila pa kupwila ikosesha lwitabilo lwetu. Baibolo wamba’mba “lwitabilo lwiya pa kumvwa kintu.” (Loma 10:17) Onkao mambo, ishikishai’mba, ‘Nanchi ntanwa ku kupwila kimye kyonse nyi?’

¹⁰ Kabiji tukosesha lwitabilo lwetu inge ketusapwile ne kufunjisha mambo awama a mu Baibolo ku bakwetu. Byonka byajinga bena Kilishitu batanshi, ne atweba twafunda kuketekela mwi Yehoba ne kwamba na kuchinchika kimye kyonse.—Byubilo 4:17-20; 13:46.

11. Mambo ka Kaleba ne Yoshua o baikejile na lwitabilo lwakosa, kabiji twakonsha kwibalondela byepi?

¹¹ Lwitabilo lwetu mwi Yehoba lukoselako inge twamona byo etukwasha ne byo akumbula milombelo yetu. Kyo kyamwekele kwi Kaleba ne Yoshua. Bamwesheshe amba bajinga na lwitabilo mwi Yehoba kimye kyo baendejile Ntanda ya Mulaye. Byo papichile kimye, lwitabilo lwabo lwakosejilengako kimye kyonse inge bamona Yehoba byo ebakwashishenga. Yoshua wabuujile bena Isalela saka ashiinwa amba: “Kafwako kintu nangwa kimo kya mu milaye yawama kimulayile Yehoba Lesa wenu kyabula kufika ne.” Byo papichile myaka waambile’mba: “Onkao mambo, akamwainga Yehoba ne  kumwingijila mu bukine ne mu bukishinka.” Kabiji wanungilepo amba: “Pakuba amiwa ne ba mu nzubo yami, tukengijilanga Yehoba.” (Yoshua 23:14; 24:14, 15) Inge twaketekela mwi Yehoba ne kumona byo etukwasha, lwitabilo lwetu lukakoselako.—Salamo 34:8.

12. Tumwesha byepi amba tuji na lwitabilo lwakosa?

¹² Tumwesha byepi amba tuji na lwitabilo lwakosa? Mwana wa bwanga Yakoba waambile’mba: “Nsakukumwesha lwitabilo lwami na mingilo yami.” (Yakoba 2:18) Bintu byo tuba byo bimwesha’mba tuji na lwitabilo lwakosa. Twayai tumone.

13. Tumwesha byepi amba tuji na lwitabilo inge ketusapwile?

¹³ Kusapwila jo jishinda jawama ja kumwesheshamo amba tuji na lwitabilo. Mambo ka? Mambo inge tubena kusapwila, tumwesha’mba twaketekela’mba mpelo iji pepi ne kuba’mba ‘kechi ikakelwa ne!’ (Habakuka 2:3) Pa kuba’mba tuyuke inge lwitabilo lwetu lwakosa, twafwainwa kwiipuzha’mba: ‘Nanchi nanemeka mwingilo wa kusapwila nyi? Nanchi ñingila papelela bulume bwami kubuulako bantu pe Lesa nyi? Nanchi nkebapo mashinda akwabo a kwingijilamo mwingilo wa Yehoba nyi?’ (2 Kolinda 13:5) Twayai tumweshenga’mba lwitabilo lwetu lwakosa kupichila mu ‘kusolola patoka lupulukilo,’ ko kuba’mba kusapwila mambo awama.—Tangai Loma 10:10.

14, 15. (a) Twakonsha kumwesha byepi lwitabilo mu bwikalo bwetu bwa pa juba pa juba? (b) Ambai kyamwekele kimwesha lwitabilo lwakosa.

¹⁴ Jishinda jikwabo mo tumweshesha’mba tuji na lwitabilo mwi Yehoba ke kuchinchika makatazho o tupitamo mu bwikalo. Inge tubena kukolwa, kulefulwa, kuyanda nangwa makatazho akwabotu, twafwainwa kwitabila  kuba’mba Yehoba ne Yesu ‘baketukwasha pa kimye kyafwainwa.’ (Bahebelu 4:16) Tumwesha’mba tuji na lwitabilo mwi Yehoba inge tubena kumulomba amba etukwashe. Yesu waambile’mba twakonsha kulomba Yehoba kuba’mba etupe “kajo ka pa juba pa juba monka mwayila kukajilwa kwetu kwa pa juba pa juba.” (Luka 11:3) Mashimikila a mu Baibolo amwesha’mba Yehoba wakonsha kwitupa bintu byonse byo tukajilwa. Kya kumwenako, kimye kyo kwajinga kyashi kikatampe mu Isalela, Yehoba wapele Elaija kajo ne mema. Baibolo waamba’mba “bikwangala byamuletelanga shinkwa ne nyama lukelo, ne shinkwa ne nyama mabanga, kabiji watomenenga mema mu kakola.” (1 Bamfumu 17:3-6) Tuji na lwitabilo kuba’mba ne atweba Yehoba wakonsha kwitupa byo tukajilwa.

¹⁵ Twaketekela’mba inge twalondela mafunde a mu Baibolo, twakonsha kulama bulongo kisemi kyetu. Rebecca, nyenga wasongolwa wikala mu Asia, walumbulula aye ne kisemi kyanji byo balondejile mafunde aji mu Mateo 6:33 ne mu Byambo bya Maana 10:4. Waamba’mba bamwatawanji bamwene kuba’mba nkito yo baingilanga yabikilenga bulunda bwabo na Yehoba mu kizumba. Onkao mambo, balekele ino nkito. Pano bino, bajinga na baana bana, onkao mambo  batendekele kuteeka kajo ne kwikapotesha. Na mambo a kwingila na ngovu, balenganga mali avula a kukonsha kulaminamo kisemi kyabo. Ba Rebecca baamba’mba: “Twamwene kuba’mba Yehoba kechi witulekelele ne. Kafwako juba jo twaikalangatu kwa kubula kajo ne.” Nga anweba mwakipitapo kala mu bintu bya uno mutundu byakoseshe lwitabilo lwenu nyi?

16. Ki ka kikamweka inge twaketekela mwi Lesa?

¹⁶ Kechi twafwainwa kuzhinauka amba Yehoba uketukwasha inge twalondela lutangijilo lwanji ne. Paulo wanembele byambo byaambile Habakuka amba: “Mololoke ukekala na bumi na mambo a lwitabilo.” (Ngalatiya 3:11; Habakuka 2:4) O ene mambo o twafwainwa kwikela na lwitabilo lwakosa mwi Lesa wakonsha kwitukwasha. Paulo wituvululako amba, “monka mwayila bulume bwingila mwi atweba, aye Lesa wakonsha kuba bintu byavula kukila pa bintu byonse byo tulomba nangwa byo tulanguluka.” (Efisesa 3:20) Bakalume ba Yehoba bengila na bulume bonse kuba kyaswa muchima wa Lesa, pano bino bayuka’mba kechi byonse byo bakonsha kuba ne. Tusanta bingi pa kuyuka’mba Lesa uji ne atweba ne kuba’mba ubena kupesha mingilo yetu.

17. (a) Yesu wakumbwile byepi batumwa? (b) Mambo ka o twakonsha kuketekela’mba Yehoba ukakumbula milombelo yetu ya kwituvuzhizha lwitabilo?

¹⁷ Pa byonse byo twisambapo, twakonsha kumvwa byaumvwine batumwa kimye kyo balombele Yesu amba: “Vuzhai lwitabilo lwetu.” (Luka 17:5) Yesu wakumbwile batumwa banji mu jishinda jawama pa Pentekosita mu mwaka wa 33, kimye kyo batambwijile mupashi wazhila, kabiji wibakwashishe kumvwisha bintu byazhika pa kyaswa muchima wa Lesa. Kino kyakoseshe lwitabilo lwabo. Ñanyi bintu byafuminemo? Batendekele mwingilo mukatampe wa kusapwila wabujile kubiwapo kala kufika pa kyokya kimye. (Kolose 1:23) Nanchi twakonsha kuketekela amba Lesa uketukumbula inge twamulomba’mba avuzhe lwitabilo lwetu nyi? Yehoba witulaya amba wakonsha kukumbula inge tubena “kumulomba mwayila kyaswa muchima wanji.”—1 Yoano 5:14.

18. Yehoba upesha byepi boba bakosesha lwitabilo lwabo?

¹⁸ Inge twaketekela mwi Yehoba na muchima yense, uketutemwa. Uketukumbula inge twamulomba’mba avuzhe lwitabilo lwetu, lwitabilo lwetu lukakoselako, kabiji tukekala bantu ‘bafwainwa Bufumu bwa Lesa.’—2 Tesalonika 1:3, 5.