1, 2. Mambo ka Baibolo o aesakenya bulume bwetu bwa kwamba ku mujilo?

MU 1871, jisaka ja mu Wisconsin mu United States, jatendekele kupya. Uno mujilo wakumbene bukiji kya kuba wasokele bichi nobe mabilyonyi abiji. Bantu kukila pa 1,200 bafwile. Uno mujilo waipayile bantu bavula bingi kukila bantu bafwile na mijilo mukwabo mu United States. Kyamweka nsase icheche yafumine ku shitima wapichilenga mu jino jisaka yo yalengejile uno mujilo mukatampe. Kino kituvululako byaamba kyepelo kya mu Baibolo amba: “Monai kamujilo kacheche byo kasoka kiundu kyabaya!” (Yakoba 3:5) Mambo ka nembi wa Baibolo aye Yakoba o aambijile bino?

² Walumbulula’mba: “Lujimi naye ye mujilo.” (Yakoba 3:6) “Lujimi” wimenako bulume bwetu bwa kwamba. Byonkatu mujilo byo oba, byambo byo twamba byakonsha kuleta lukatazho. Byambo byo twamba biji na bulume bwa kukwasha bantu nangwa ne. Baibolo witubuula’mba byambo byo twambila bakwetu byakonsha kwibaletela bumi nangwa lufu. (Byambo bya Maana 18:21) Nanchi kino kibena kulumbulula’mba twafwainwa kuzhindamatu na mambo a kuchina’mba twakonsha kwamba byatama nyi? Ine. Kechi twakonsha kuleka kwingijisha mujilo  na mambotu a kuchina’mba wakonsha kwitusoka ne. Pano bino, tutako muchima pa kumwingijisha. Kya kumwenako, twakonsha kwingijisha mujilo pa kuteka kajo, koota ne kumunyikilako. Kyo kimotu, inge saka tutako muchima pa kwamba, twakonsha kwingijisha bulume bwa kwamba kunemekelamo Yehoba ne kulengela bakwetu kumwenamo.—Salamo 19:14.

3. Ñanyi bintu bisatu byakonsha kwitukwasha kutundaika bakwetu inge tubena kwamba?

³ Yehoba witupa bulume bwa kubuula bakwetu byo tubena kulanguluka ne kumvwa, kupichila mukwamba nangwa kwamba na maboko. Pano twakonsha kwingijisha byepi buno bupe bwanema kutundaikilamo bakwetu? (Tangai Yakoba 3:9, 10.) Twafwainwa kuyuka kimye kya kwamba, bintu bya kwambapo ne jishinda ja kwibyambilamo.

4. Ñanyi kimye kyo twafwainwa kuzhindama?

⁴ Kimye kimo kyawama kubula kwamba. Baibolo waamba’mba kuji “kimye kya kuzhindama.” (Musapwishi 3:7) Kya kumwenako, tuzhindamapo inge bakwetu babena kwamba, kumwesha’mba twibanemeka. (Yoba 6:24) Kabiji kechi twafwainwa kwamba pa bintu bya bene nangwa byafwainwa kubula kuyuka bantu ne. (Byambo bya Maana 20:19) Inge kya kuba muntu wituzhingijisha, kyawama kutekanya ne kuzhindamatu.—Salamo 4:4.

5. Twakonsha kumumwesha byepi Yehoba amba tusanta pa bulume bwa kwamba bo etupa?

⁵ Pano bino, kuji ne bimye byo twafwainwa kwamba. (Musapwishi 3:7) Kuji kimye kya kutota Yehoba, kya kutundaika bakwetu, kya kwamba byo tubena kumvwa ne kya kubuulako bakwetu bintu byo tubena kukeba. (Salamo 51:15) Inge ketwingijishe bulume bwa kwamba mu jino jishinda, tumwesha Yehoba amba tumusanchila pa kwitupa buno bupe. Javula inge mulunda netu witupa bupe bwawama, twibwingijisha bulongo.

6. Mambo ka o kyanemena kusala kimye kyafwainwa kya kwamba?

⁶ Mambo ka o kyanemena kusala kimye kyafwainwa kya kwamba? Byambo bya Maana 25:11 byaamba’mba: “Byonkatu biji maepo a ngolode aji mu bipe bya siliva byo biji ne byambo byo baamba pa kimye kyafwainwa.” Maepo a ngolode amweka bulongo, bino akonsha ne kukizhamo kumweka bulongo inge beabika pa kipe kya siliva. Mu jishinda jimotu, twakonsha kwikala na byawama byo tukeba kubuulako mukwetu. Bino inge twasala bulongo kimye kyawama kya kwamba, byambo byetu bikamukwasha bingi. Twakonsha kuba byepi bino?

7, 8. Balongo betu mu Japan balondejile byepi Yesu?

⁷ Inge twaamba pa kimye kyabula kufwainwa, bantu kechi bakonsha kumvwa nangwa kuswa byo twaamba ne. (Tangai Byambo bya Maana 15:23.) Kya kumwenako, mu March mu 2011 kitentanshi ne kinkunkwila byaonawine mizhi yavula ku musela wa Japan. Bantu kukila pa 15,000 bafwile. Nangwa kya kuba Bakamonyi ba kwa Yehoba bavula bafwishishe bisemi byabo ne balunda, baingijishenga Baibolo kukwashako bakwabo bajinga na luno lukatazho. Bino bayukile’mba bano bantu bavula bajinga ba Buddha kabiji kechi bayukile byavula pa Baibolo ne. Onkao mambo, mu kifulo kya kwibabuula pa lusanguko pa kyokya kimye, balongo bebatekeneshe ne kwibalumbulwila ene mambo bintu byatama o bimwekela bantu bawama.

⁸ Bano balongo balondejilenga Yesu. Aye wayukile kimye kya kuzhindama, bino wayukile ne kimye kya kwamba. (Yoano 18:33-37;  19:8-11) Kabiji wapembelelanga kimye kyafwainwa kya kufunjisha baana banji ba bwanga bintu bimo. (Yoano 16:12) Balongo ba mu Japan bapembelejile kimye kyafwainwa kya kubuula bantu pa lusanguko. Byo papichile myaka ibiji ne kichika kufuma pamwekejile kinkunkwila, bapelenga bantu talakiti wa kuba’mba Umvwe Muntu Wafwa Wakonsha Kwikala Mumi Jibiji Nyi? Bavula batambwile uno talakiti kabiji wibatekeneshe byo bamutangile. Ne atweba twafwainwa kulanguluka pa bisho bya bantu baji mu nyaunda yetu ne byo baitabilamo pa kuba’mba tuyuke kimye kyafwainwa kya kwisamba nabo.

9. Mu ñanyi bintu bikwabo mo twafwainwa kupembelela kimye kyafwainwa kya kwamba?

⁹ Mu ñanyi bintu bikwabo mo twafwainwa kupembelela kimye kyafwainwa kya kwamba? Kampe inge muntu witwambila byatama. Mu kifulo kya kumukumbula ponkapotu ne kwamba byabula kufwainwa, kyawama kutulumana ne kulanguluka’mba: ‘Nanchi waji kukebangatu kunzhingijisha nyi? Nanchi nafwainwa kwisamba nanji pa byo aji kwamba nyi?’ Kyakonsha kuwama kuzhindamatu. Bino inge twamona’mba twafwainwa kwisamba nanji, twafwainwa kupembelela bukaji bwatontoloka. (Tangai Byambo bya Maana 15:28.) Nangwa kampe tubena kukeba kutundaika ba mu kisemi kyetu babula Bakamonyi kuyuka Yehoba. Twafwainwa kutekanya, kulangulukapo bulongo pa byo tukeba kwamba ne kutaana kimye kyafwainwa kyo bakonsha kuteleka.

10. (a) Mambo ka o twafwainwa kusajila bulongo bya kwamba? (b) Ñambilo ya mutundu ka yo twafwainwa kuchinuzhuka?

¹⁰ Bintu byo twamba byakonsha kulengela bantu kumvwa bulongo nangwa kumvwa kutama. (Tangai Byambo bya Maana 12:18.) Bantu bavula mu ino ntanda ya kwa Satana bamba ‘byambo byatama’ biji nobe “miketo” nangwa “mpoko” mambo bakeba kuzhingijisha bakwabo. (Salamo 64:3) Bavula bafunda ino ñambilo mu mafilimu ne mu bisela bya pa televizhonyi byo batamba. Bino bena Kilishitu kechi bamba bintu byatama kabiji byabula kufwainwa nangwatu kwibyambila mu bisela ne. Ibyo kuba’mba ñambilo ya bisela yawama kabiji yakonsha kulengela byo tubena kwamba kumvwanyika bulongo. Bino kechi twafwainwa kwamba bya mwenga ne, ko kuba’mba kwamba bintu byakonsha kulengesha bakwetu bumvu nangwatu kutukana pa kuba’mba bantu baseke. Baibolo wakambizha bena Kilishitu kubula kwamba “mwenga.” Kabiji wamba ne kuba’mba: “Kange muleke byambo byatama bilupuke mu kanwa kenu ne, poso byawama byonka bikomesha bantu bibafwainwa pa kyonkakyo kimye kuba’mba bikwashe aba babena kwibyumvwa.”—Efisesa 4:29, 31.

11. Ñanyi kintu kyakonsha kwitukwasha kusala byambo byawama?

¹¹ Yesu waambile’mba “kanwa kamba monka mwavujila biji mu muchima.” (Mateo 12:34) Kino kibena kulumbulula’mba bintu byo twamba byo bimwesha byo tumvwa mu muchima. Onkao mambo, inge twatemwa bantu ne kwibata muchima, tukasalanga byambo byawama bya kwibambila. Bintu byo  twamba bikekala byawama kabiji bya lutundaiko.

12. Ñanyi bintu bikwabo byakonsha kwitukwasha kusala byambo byawama?

¹² Kikebewa kwibikako pa kusala byambo byawama bya kwamba. Nangwa kya kuba Mfumu Solomone wajinga na maana, “walangulukilepo bingi ne kukebakeba bulongo” pa kuba’mba byambo byo anembele bikale bya kine kabiji byawama kwibitanga. (Musapwishi 12:9, 10) Ki ka kyakonsha kwitukwasha kuyuka bya kwamba? Twakonsha kutanga mu Baibolo ne mu mabuku etu alumbulula Baibolo pa kutaana mashinda a katataka a kwambilamo. Twakonsha kuyuka mwatala byambo byo twabula kuyuka bulongo. Kabiji twakonsha kufunda byaambanga Yesu pa kuyuka bya kwamba mu jishinda jakonsha kukwasha bakwetu. Aye wayukile bulongo bya kwamba, mambo Yehoba wamufunjishe “byambo byawama bya kwamba ku bantu bakooka.” (Isaya 50:4) Kabiji kyanema kulanguluka pa byambo byetu byo byakonsha kulengela bantu kumvwa. (Yakoba 1:19) Twakonsha kwishikisha’mba: ‘Inge ñambe bibye, nanchi muntu usakuyuka mwatala byo mbena kwamba nyi? Usakumvwa byepi?’

13. Mambo ka o twafwainwa kwambila mu jishinda japela kumvwa?

¹³ Bena Isalela bavumyanga matolompita pa kubuula bantu bya kuba. Mvumino imo ya ntolompita beingijishanga pa kukonkanya bantu. Kabiji mvumino ikwabo yajinga ya kubuula bashilikale amba balukuke balwanyi babo. Akifwanyikizhai kyafwainwa kumweka ku bashilikale inge kya kuba mvumino ya ntolompita kechi yayukanyikwa ne! Baibolo waesakanya kuvuma kwawama kwa ntolompita ku byambo byapela kumvwa. Inge twabula kulumbulula bulongo bintu, bantu bakonsha kuvulañana nangwa kuketekela bya bubela. Nangwa kya kuba tukeba’mba byo tubena kwamba byumvwanyike, bino twafwainwa kujimuka pa kuba’mba jishinda jo tubena kwambilamo jibule kwikala ja mwenga nangwa ja kubula mushingi.—Tangai 1 Kolinda 14:8, 9.

14. Ñanyi kya kumwenako kimwesha’mba Yesu waambanga mu jishinda japela kumvwa?

¹⁴ Mateo kitango 5 kufika ku 7, ke bitango byawama byamwesha Yesu byo asalanga byambo bya kwamba byapela kumvwa. Mu jashi janji, kechi wakebele kukumisha bantu kupichila mu kwingijisha byambo byakatazha nangwa byabula kufwainwa ne. Kabiji kechi waambile byambo byakonsha kuzhingijisha bantu ne. Yesu wafunjishe bantu bintu byanema bingi, bino byo aambile byajinga byapela kumvwa. Kya kumwenako, Yesu wabuujile baana banji ba bwanga amba kechi bafwainwa kwakamwa na kajo ka pa juba pa juba ne. Onkao mambo, wibalumbulwijile’mba Yehoba ujiisha bañonyi kimye kyonse. Kepo ebepwizhe’mba: “Nanchi anweba kechi mwanema kwibakila nenyi?” (Mateo 6:26) Byo aingijishe bino byambo byapela, Yesu wibakwashishe kumvwisha kino kishinka kyanema ne kwibatundaika.

15. Mambo ka o twafwainwa kwambila na lusa?

¹⁵ Jishinda jo twambilamo ku bakwetu najo janema, byonka byanema byambo byo twamba. Bantu baumvwanga bingi bulongo kuteleka kwi Yesu mambo waambanga “byambo byawama,” nangwa bya lusa. (Luka 4:22) Inge ke twambe mu jishinda jimwesha lusa, bantu bakomvwa bulongo kuteleka kwi atweba ne kuswa byo tubena kwamba. (Byambo bya Maana 25:15) Inge twanemeka bantu ne kwibata muchima, tukesambanga nabo mu jishinda jimwesha lusa. Abino  byo byaubile Yesu. Kya kumwenako, byo amwene bantu babena kukebesha kumuteleka, waumvwine bulongo ne kwikala nabo kimye kyabaya ne kwibafunjisha. (Mako 6:34) Nangwatu bantu byo bamubilenga mwenga, Yesu kechi wibobilenga mwenga ne.—1 Petelo 2:23.

16, 17. (a) Twafwainwa kulondela byepi Yesu kimye kyo tubena kwisamba na ba mu kisemi kyetu ne balunda netu? (Monai kipikichala kitanshi.) (b) Ñanyi bintu byawama byafuminemo nsemi wa mukazhi umo byo aambile na lusa?

¹⁶ Nangwa kya kuba twatemwa ba mu kisemi kyetu ne balunda netu, jimo twakonsha kwibambila byatama na mambotu a kuba twibayuka bingi. Kampe twakonsha kulanguluka’mba kechi twafwainwa kutako muchima ku byambo byo twibambila ne. Bino Yesu kechi waambijilepo balunda nanji byatama ne. Kimye baana banji ba bwanga kyo bepachikilenga pa wajinga mukulumpe pe abo, wibolweleko na lusa ne kwingijisha kya kumwenako kya mwana mucheche pa kwibakwasha kupimpula ndangulukilo yabo. (Mako 9:33-37) Bakulumpe mu kipwilo bafwainwa kulondela Yesu kupichila mu kufundako bakwabo saka batekanya.—Ngalatiya 6:1.

¹⁷ Nangwa kya kuba muntu witwambila bya kwituzhingijisha, mwakonsha kufuma byawama inge twakumbula mu jishinda jawama. (Byambo bya Maana 15:1) Kya kumwenako, nyenga umo muzhike wajinga na mwana wa mulume waubanga byatama aku na kubepekezha kupopwela Yehoba. Nyenga umo mu kipwilo waumvwijileko bainanji lusa ne kwibambila’mba: “Kyatama bingi kuba’mba mwakankalwa kufunjisha mwanenu.” Bainanji uno mwana batulumeneko ne kwamba’mba: “Ibyo kuba’mba pa kino kimye bintu kechi biji bulongo ne, bino natwajijila na kumufunjisha. Mukañambile byobyo byambo panyuma ya Amagedonyi; po po nkayuka’mba kine nakankelwe kumufunjisha.” Na mambo a kuba inanji uno mwana watekenye ne kukumbula uno nyenga na lusa, bulunda bwabo bwatwajijile. Kabiji mwana naye waumvwine byakumbwile bainanji ne kuyuka’mba bainanji baketekala’mba wakonsha kupimpula byubilo byanji. Onkao mambo, walekele kukaya na balunda batama, wabatizhiwe kabiji palutwe kacheche watendekele kwingijila pa Betele. Inge tubena kwamba na balongo, ba mu kisemi kyetu nangwa bantu bo twabula kuyuka, kimye kyonse byambo byetu byafwainwa kwikala “na bibusa kabiji byalungwamo mukele.”—Kolose 4:6.

18. Twakonsha kulondela byepi byaubanga Yesu inge tubena kwamba?

¹⁸ Kubuulako bakwetu byo tubena kulanguluka ne byo tubena kumvwa ke bupe bwanema bingi kufuma kwi Yehoba. Inge ketulondele byaubanga Yesu, tukasalanga kimye kyafwainwa kya kwamba, tukatangako muchima ku byambo byo twamba kabiji kimye kyonse tukakebanga kubila bakwetu lusa. Onkao mambo, twayai twingijishenga byambo byetu kutundaikilamo bakwetu ne kutokesha Yehoba ku muchima.