1. Ñanyi bintu byo tutaana mu Mambo a Lesa?

TWAKONSHA kuyuka bya kupwisha makatazho mambo Yehoba ye Mufunjishi Mukatampe. (Isa. 30:20, 21) Mu Mambo anji mo mutanwa byonse bikebewa pa kuba’mba ‘twikale bafikilamo’ ne ‘kwinengezha bulongo kwingila mingilo yonse yawama.’ (2 Timo. 3:17) Umvwe ketulondele mafunjisho a mu Baibolo, twikala na maana akila “a ba pano pa ntanda.”—1 Ko. 3:19; Sala. 119:97-100.

2. Ñanyi bintu byo tusakwisambapo mu uno mutwe?

² Byonka byo tusakufunda, maana a ba pano pa ntanda alengela bantu kuba bisakasaka michima yabo. Onkao mambo, kyakonsha kwitukatazha kuchinuzhuka kulanguluka ne kubula kuba bintu byubapo ba pano pa ntanda. O ene mambo Baibolo o aambila’mba: “Mwafwainwa kumona’mba kafwako muntu nangwa umo wimukwata buzha na buntemwa maana ne bujimbijimbi monka mwayila bisho bya bantu” ne. (Kolo. 2:8) Mu uno mutwe, tusakwisamba pa bantu byo batatwile kuswa bubela bubiji bufunjisha Satana. Byo tusakwisambanga pa buno bubela, tusakumona maana a ba pano pa ntanda kyo aikela bumbulwamaana ne maana aji mu Mambo a Lesa kyo awamina kukila maana a ba pano pa ntanda.

3-4. Bantu batendekele kumona byepi bulalelale mu United States mu myaka pakachi ka 1900 ne 1930?

³ Mu myaka pakachi ka 1900 ne 1930, bantu mu United States bapimpwile milanguluko yabo pa byo bamonanga kwilaala. Kala, bantu bavula bayukile’mba baji mu masongola bo bonkatu bafwainwa kwilaala kabiji bantu kechi baambanga pa uno mutwe pa bantu ne. Bino byonse byapimpwilwe, kabiji  milanguluko yabula kufwainwa yasampukijile ne pa katele.

⁴ Mu ntanda mwalukuchile bingi mu myaka pakachi ka 1900 ne 1930, kabiji byubilo bya bantu byapimpwilwe bingi. Shayuka umo waambile’mba: “Mafilimu, bya makayo, nyimbo, mabuku, ne batentemesha bya busulu byonse byatundaikilenga bulalelale.” Mu yoya myaka, bantu batendekele mazha aleta milanguluko ya bulalelale kabiji bantu batendekele kuvwala mvwajilo yatama. Byonkatu byaambijile jimo Baibolo, bantu bavula mu ano moba a kupelako “batemwa bya kisangajimbwe.”—2 Timo. 3:4.

5. Kutendeka mu myaka ya mu ma 1960, bantu bamona byepi mafunde aamba pa masongola?

⁵ Mu myaka ya mu ma 1960, bantu bavula baikalanga pamo saka babula kwisongola mwayila mafunde, kabiji kwilaala kwa banamulume bonka bonka ne banabakazhi bonka bonka ne kwikana byaubile ne woo. Bya kisangajimbwe byavula byatundaikanga bulalelale. Ñanyi bintu byafumamo? Nnembi wa mabuku umo wanembele’mba bisemi byavula bibena kwabenamo, kuji bansemi bavula babena kukomesha baana bunke, bulanda, kunonkwa buzha na kutamba bya mulekese ne bintu bikwabo byatama byo bibena kuba bantu bavula. Kuvula kwa bikola bisambukilañana kupichila mu bulalelale, nabiji AIDS, ke kiyukilo kimo kimwesha’mba maana a ba pano pa ntanda bo bumbulwa maana.—2 Pe. 2:19.

6. Bantu ba mu ino ntanda byo balanguluka pa kwilaala bamwesha byepi amba boba kyaswa muchima wa kwa Satana?

⁶ Bantu ba mu ino ntanda byo balanguluka pa kwilaala bamwesha bikeba Satana. Kwa kubula nangwa kuzhinaukatu ne, Satana umvwa bingi bulongo kumona bantu byo bengijisha kutama bupe bwa Lesa bwa kwilaala ne kubula kunemeka masongola. (Efi. 2:2) Bantu boba bulalelale bamwesha’mba kechi banemeka bupe bwa Lesa bwa kusema baana ne, kabiji kechi bakekala na bumi bwa myaka ne myaka ne.—1 Ko. 6:9, 10.

7-8. Mambo ka byaamba Baibolo pa kwilaala o byawamina kukila maana a ba pano pa ntanda?

⁷ Bantu balondela maana a ba pano pa ntanda balengulula mafunde a mu Baibolo ne kwamba’mba kechi engila ne. Bano bantu bakonsha kwipuzha’mba, ‘Mambo ka Lesa o etulengejile na nzala ya ku maulu kabiji witukanya kwiipwisha?’ Bepuzha buno bwipuzho mambo balanguluka’mba muntu wafwainwa kuba kyonse kyo akeba. Bino Baibolo ufunjisha  byapusanako. Witufunjisha’mba kechi twafwainwa kubanga byonse bisakasaka muchima wetu ne, twafwainwa kwikanyanga kuba byatama. (Kolo. 3:5) Kunungapo, Yehoba witupa bupe bwa masongola bantu mo bafwainwa kupwishisha nzala ya ku maulu mu jishinda jafwainwa. (1 Ko. 7:8, 9) Mu masongola bamulume ne mukazhi mo mo bapwishisha nzala ya ku maulu kwa kubula kwakamwa byonka byakamwa bantu boba bulalelale ne.

⁸ Kupusanako na maana a ba pano pa ntanda, Baibolo witufunjisha kwikala na milanguluko yawama pa kwilaala. Waamba’mba kwilaala kusangajika bantu. (Maana 5:18, 19) Nangwa byonkabyo, Baibolo waamba’mba: “Muntu yense mwi anweba wafwainwa kuyuka bya kukanya mubiji wanji pa kuba’mba ekale wazhila ne kunemekwa, kechi kwikala na lunkumbwa, ne milanguluko yatama ibindakanya muchima byonka byuba ba mu bisaka bya bantu babula kuyuka Lesa ne.”—1 Tesa. 4:4, 5.

9. (a) Mu myaka pakachi ka 1900 ne 1930, ki ka kya kwashishe bantu ba Yehoba kulondela maana aji mu Mambo a Lesa? (b) Ñanyi lujimuno lwawama luji pa 1 Yoano 2:15, 16? (c) Ñanyi byubilo byatama byanembwa pa Loma 1:24-27 byo twafwainwa kukana?

⁹ Myaka 100 yapitapo, bantu ba Yehoba kechi balondejile byubilo bya bantu “baleka kumvwa bumvu” ne. (Efi. 4:19) Bebikileko kulondela mafunde a Yehoba. Kyamba kya Usopa kya May 15, 1926 kyaambile’mba: “Mwanamulume nangwa mwanamukazhi wafwainwa kwikala na milanguluko ne byubilo byawama, kikatakata byo amona banabakazhi nangwa banabalume.” Nangwa kya kuba bantu bavula mu ntanda baubilenga byubilo byatama, bantu ba Yehoba batwajijile kulondela maana aji mu Mambo a Lesa. (Tangai 1 Yoano 2:15, 16.) Tusanta bingi pa kwikala na Mambo a Lesa. Kabiji tusanchila Yehoba pa kwitupa kajo ka ku mupashi pa kimye kyafwainwa ketukwasha kukana maana a ba pano pa ntanda aamba pa bulalelale. *—Tangai Loma 1:24-27.

10-11. Baibolo waambijile jimo amba ki ka kikamweka mu moba a kupelako?

¹⁰ Baibolo waambijile jimo amba mu moba a kupelako, bantu “bakekala betemwatu abo bene.” (2 Timo. 3:1, 2) Onkao mambo, kechi tukumya pa kumona ntanda byo ibena kutundaika bantu kwitemwatu abo bene ne. Buku umo wambile’mba mu myaka ya mu ma 1970, “mabuku atundaika bantu kwitemwatu bene avujile bingi.” Mabuku amo “atundaikilenga bantu kwiyuka bulongo byo baji ne kwitumbijika.” Akimonai byo banembele mu buku umo. Mwajinga byambo bya kuba’mba: “Wafwainwa kwiwamisha, kwitemwa ne kwinemeka obewa mwine.” Uno buku utundaika “muntu kwitemwa mwine, kwifuukwila byubilo byo afwainwa kwikala nabyo kwesakana na jiwi janji ja mu muchima ne mizhilo yo afwainwa kulondela.”

¹¹ Nanchi mwakyumvwapo kala bino nyi? Satana watundaikile Evwa kwikala na ino milanguluko. Wamubuujile’mba ukekala “nobe Lesa mu kuyuka byawama ne byatama.” (Nte. 3:5) Lelo jino, bantu bavula benemeka bingi abo bene kya kuba kafwako wafwainwa kwibabuula kyawama nangwa kyatama ne, nangwatu Lesa kechi bamumvwina ne. Kino kimwekela ne mu jishinda bantu bavula jo bamwenamo masongola.

12. Bantu mu ntanda batundaika bantu kumonanga byepi masongola?

¹² Baibolo wakambizha bamulume ne mukazhi kwinemeka bene na bena ne kunemeka luchipo lwa masongola. Utundaika  baji mu masongola kutwajijila kwikala pamo. Waamba’mba: “Mwanamulume ukasha bashanji ne bainanji ne kulamachila ku mukazhanji, ne abo bakekala ke mubiji umo.” (Nte. 2:24) Pakuba aba balondela maana a mu ino ntanda kechi banemeka masongola ne, bamba’mba mwanamulume nangwa mwanamukazhi wafwainwa kutatu muchima pa bintu byo akeba aye mwine. Buku umo waamba pa kwikana waambile’mba: “Mu byalo bimo inge bantu babena kutwela mu masongola balaya’mba bakatwajijila kwikala pamo mu bumi bwabo bonse. Pa luno bino byambo bebyalula amba ‘tukatwajijila kwikala pamo inge butemwe bwatwajijila.’” Na mambo a kuba’mba bantu kechi bamona masongola amba afwainwa kwikala a myaka ne myaka ne, bisemi byavula bibena kwabenamo ne kukozha bavula ku muchima. Kwa kubula nangwa kuzhinaukatu ne, jishinda bantu ba mu ntanda jo bamwenamo masongola ke bumbulwamaana.

13. Mambo ka Yehoba o ashikilwa bantu betota?

¹³ Baibolo waamba’mba: “Muntu yense witota mu muchima ye wa bunya kwi Yehoba.” (Maana 16:5) Mambo ka Yehoba o ashikilwa bantu betota? Kishinka kimo ke kya kuba’mba bantu baji na kino kyubilo kabiji batundaika kwitemwa abo bene bamwesha byubilo bya kwa Satana. Yesu bamwingijishe kwi Lesa pa kulenga bintu byonse. Pano Satana walangulukilenga’mba Yesu wakonsha kumufukamina ne kumupopwela. (Mat. 4:8, 9; Kolo. 1:15, 16) Bantu bemona abo bene amba banema bamweshatu patoka maana a ba pano pa ntanda kabiji kuba bino ke bumbulwa maana kwi Lesa.

14. Kinembelo kya Loma 12:3 kitukwasha byepi bya kwikala na milanguluko yawama pa byo twimona atweba bene?

¹⁴ Baibolo witukwasha kwikala na milanguluko yawama pa byo twimona atweba bene. Witubuula’mba kechi kyatama kwitemwa atweba bene mu jishinda jafwainwa ne. Yesu waambile’mba: ‘Temwa mukwenu byonka byo witemwa obe mwine,’ kino kibena kumwesha’mba twakonsha kwita muchima  atweba bene, bino kechi twafwainwa kukizhamo ne. (Mat. 19:19) Kabiji Baibolo witufunjisha’mba kechi twafwainwa kwimonanga’mba twanema kukila bakwetu ne. Bino witubuula’mba: “Kange mubenga bintu na mapata nangwa na kwitota kwatu ne, bino na muchima wa kwipelula saka mulanguluka’mba bakwenu bemukila.”—Fili. 2:3; tangai Loma 12:3.

15. Mambo ka lujimuno luji mu Baibolo lwaamba pa kubula kukizhamo kwinemeka o lwawamina?

¹⁵ Lelo jino, bantu bavula bemona’mba baji na maana balengulula lujimuno lwa mu Baibolo lwakanya kukizhamo kwita muchima. Bamba’mba inge ke tumone’mba bakwetu banema kwitukila, baketulengulula. Pano ñanyi bintu byafumamo mu kino kyubilo kitundaika Satana mwaya ntanda yonse? Ñanyi bintu byo mubena kumona mu ntanda? Nanchi bantu betemwatu abo bene baji na lusekelo nyi? Nga bisemi byabo biji na lusekelo nyi? Abya baji na balunda ba kine nyi? Nanchi baji na bulunda bwakosa ne Lesa nyi? Kwesakana na byo mwimwena, kyepi kyawama, kulondela maana a ba pano pa ntanda nyi, inyi maana aji mu Mambo a Lesa?

16-17. Ñanyi bintu byo twafwainwa kusanchilapo Lesa, kabiji mambo ka?

¹⁶ Bantu balondela maana a boba bo batela mu ntanda amba ba maana, bajitu nobe kañenda ubena kwipuzha kañenda mukwabo jishinda bino bonse saka balubilamo. Yesu waambile pa bantu bo bamonanga’mba ba “maana” kimye kyo ajinga pano pa ntanda amba: “Bo bantangi bampofu. Umvwe mpofu watangijila mpofu mukwabo bonse baponena mu kimbo.” (Mat. 15:14) Kwambatu kine, maana a ba pano pa ntanda bo bumbulwa maana kwi Lesa.

¹⁷ Maana aji mu Baibolo akwasha “bantu pa kwibafunjisha, pa kwibakajipila, pa kwibololako ne pa kwibajimuna mu bololoke.” (2 Timo. 3:16) Tusanchila bingi Yehoba, mambo kupichila mu jibumba janji wituzhikijila ku maana a ba pano pa ntanda. (Efi. 4:14) Kajo ka ku mupashi ko etupa ketukwasha kukakachila ku mafunde aji mu Mambo anji. Kyawama bingi kuyuka’mba Yehoba witupa maana ne lutangijilo kupichila mu Baibolo.