Lufu ke mulwanyi ye bachiina bingi bantu. Twibikako kumulwisha papelela bulume bwetu. Umvwe mutemwe wetu wafwa, tukankalwa kusumininwa. Inge tukiji banyike, tulanguluka amba lufu kechi luketumwekelapo ne. Ino ndangulukilo ikala ya bubela.

Bantu bamo baubilepo bimo pa kuba’mba babulenga kufwa kukila byaubile bena Felo. Mu bwikalo bwabo bonse pamo ne bamingilo bavula baesekele bingi kukeba kushinda lufu. Bishimikwa mo bazhiikanga mafumu a bwitote byamweshanga byo baesekele ne byo bakankelwe kuba kino.

Mafumu akatampe abena China nabo baubangapo bimo pa kuba’mba babulenga kufwa kupichila mu kwingijisha jishinda japusanako. Batomanga mema mwavwangwa bya mipashi. Mfumu mukatampe aye Qin Shi Huang waambijile bantu banji bafunda bya sayansi kuba’mba bakebe muchi mwavwangwa bya mipashi pa kuba’mba bantu babulenga kufwa. Pano bino, ino michi mwajinga bulembe bwa mema a siliva bwalengejile aye kufwa.

Mu 1513 C.E., mwendela ntanda mwina Spain aye Juan Ponce de León wayile ku kalunga ka Caribbea na kukeba muchi wa kubula kukota. Wataine muzhi wa Florida mu U.S.A. Byo ajinga kuno, kechi papichile ne myaka yavula ne, wafwile kimye kyo kwajinga nkondo ya bena America. Kafwako muchi wa uno mutundu ye batana ne.

Bena Felo, mafumu akatampe ne bendela ntanda bonse bakebele kushinda lufu. Ñanyi wakonsha kulengulula byo bakebelenga nangwa kya kuba mashinda o baingijishe kechi awamine ne? Atweba bonse kechi tukeba kufwa ne.

Mambo ka o twashikilwa lufu? Baibolo walumbulula kine kintu kilengela. Waamba pa Mulenga wetu Yehoba Lesa * amba: “Aye Lesa walenga byonsetu ke bya buya mu kimye kyabyo; kabiji walengela bantu kulanguluka bya kala ne bya kulutwe bya  muyayaya.” (Musapwishi 3:11) Twakonsha kutemwa kumonanga buya bwa ntanda myaka ne myaka kechi pa myakatu 80 ne. (Salamo 90:10) Byo bikeba muchima wetu.

Mambo ka Lesa o abikijile mu michima yetu kukeba kwikala “muyayaya?” Nanchi wakebelengatu kwitulefula nyi? Lesa kechi wakonsha kuba byobyo ne. Lesa walaya kuba’mba ukashinda lufu. Baibolo waambapo bingi pa mulaye wa Lesa wa kufumyapo lufu ne kuleta bumi bwa myaka ne myaka.—Monai kakitenguluzha ka kuba’mba,  “Kushinda Lufu.”

Yesu Kilishitu waambile’mba: “Pa kuba amba bakekale na bumi bwa myaka, bafwainwa kwimuyuka anweba Lesa yenka wakine ne Yesu Kilishitu ye mwatumine.” (Yoano 17:3) Ko kuba’mba lufu bakelushinda. Yesu waamba’mba Lesa ye yenkatu wakonsha kwitushinjila lufu.