KWISAMBA NA BANTU
Mambo ka Lesa o Aswishisha Buyanji?
Uno ke mwisambo Kamonyi wa kwa Yehoba ye akonsha kwisamba na bantu. Twayai tufwanyikizhe kuba’mba Kamonyi wa jizhina ja Malita wafika pa nzubo ya mwanamukazhi wa jizhina ja Sofiya.
LESA UMVWA BYEPI PA KUMONA ATWEBA NA KUYANDA?
Malita: Byepi ba Sofiya. Naumvwa bingi bulongo pa kwimutana pa nzubo.
Sofiya: Kyawama.
Malita: Byo naishile, twisambile pe Lesa byo omvwa pa buyanji bwetu. * Mwaambile kuba’mba kino kyo kintu kimukatazha pa kimye kyabaya, kikatakata kimye bainenu kyo bajinga mu mapuso a pa mukwakwa. Nga bainenu baumvwako byepi?
Sofiya: Bibena kwalaukatu, lelo baumvwako bulongo, kesha bya bwelamo. Bino lelo bajiko bulongo.
Malita: Kyawama akyo. Mwafwainwa muji bingi na milanguluko na mambo a luno lukatazho.
Sofiya: Ibyo. Kimye kimo ndanguluka pakapwila kikola.
Malita: Kijitu bulongo kulanguluka mu jojo jishinda. Kampe mubena kuvuluka kuba’mba kimye kyo twasambakene, nemushijile bwipuzho bwaambilenga pe Lesa kyo aswishisha buyanji kutwajijila inge kya kuba uji na bulume bwa kwibupwisha.
Sofiya: Ee, navuluka.
Malita: Saka tukyangye kutana mukumbu mu Baibolo, tukipitulukeko pacheche mu bintu byo twisambilepo.
Sofiya: Kijitu bulongo.
Malita: Twafunjile kuba’mba mwanamulume wa kishinka wajingako kala walangulukanga pa ene mambo Lesa o aswisha buyanji. Nangwa byonkabyo, Lesa kechi wamukajipijile nangwa kumwambila amba wafwainwa kwikala na lwitabilo lwakosa ne.
Sofiya: Kechi nayukile ne.
Malita: Twafunjile ne kuba’mba Yehoba Lesa umvwa kutama pa kumona atweba na kuyanda. Kyakumwenako, Baibolo waamba’mba kimye bantu banji byo bamanaminenga, ‘kyamukolelenga bingi ku muchima.’ * Nanchi kechi kitutekenesha kuyuka kuba’mba Lesa umvwa ku muchima kutama umvwe ke tuyande ne nyi?
Sofiya: Ee.
Malita: Kikwabo, twisambile amba kulanguluka pa bulume buji na Mulenga wetu, kwitulengejile kushiinwa kuba’mba wakonsha kupwisha buyanji pa kimye kiji kyonse.
Sofiya: Kino kyo kintu kyo nakankalwa kumvwisha. Mambo ka Lesa o alekela bintu byatama na kubiwa saka aji ne na bulume bwa kwibipwisha?
ÑANYI WAAMBILENGA BYA KINE?
Malita: Twayai tutane mukumbu mu buku mutanshi wa mu Baibolo wa Ntendekelo. Nanchi mwayuka jishimikila jaamba pe Adama ne Evwa ne kichi kya kuyuka byawama ne byatama nyi?
Sofiya: Ee, nafunjile bino ku Sande sukulu. Lesa wibambijile amba ku kichi kimo kechi bafwainwa kujako ne, bino abo baapileko kipangwa ne kuja.
Malita: Mwaamba kine. Pano twayai twisambe pa bintu byalengejile Adama ne Evwa kusatuka. Bino bintu byo byalengela amba tuyandenga. Mwane batange pa Ntendekelo kitango 3, kyepelo 1 kufika ku 5.
Sofiya: Pa amba’mba: “Aye mulolo wibikijile kujimuka bilengwa byumi byonse byo alengele Yehoba Lesa. Kabiji mulolo wamwipwizhe mwanamukazhi amba: Nanchi kine, Lesa kechi wimwambijile nenyi? amba: Kechi mukaje ku kichi nangwa kimotu kya mu bujimi ne. Kumvwa mwanamukazhi wamukumbwile mulolo amba: Ku bipangwa bya ku bichi bya mu bujimi twakonsha kujakotu; kana ku bipangwa bya ku kyokya kichi kiji mukachi ka bujimi, Lesa waambile’mba: Kechi mukajeko ne, nangwa kukwatakotu ne, kuchina’mba mwakafwa. Pakuba mulolo wamwambijile mwanamukazhi amba: Ine, kechi mukafwa ne. Mambo Lesa wayuka’mba mu juba jo mukajako, meso enu akalaba; kabiji mukekala pamo nobe Lesa mwine ne kuyuka byawama ne byatama.”
Malita: Nasanta. Twayai twisambeko pa bino byepelo. Kitanshi, mulolo waambile ku mwanamukazhi, Evwa. Byambo bikwabo byamwesha kuba’mba Satana Diabola ye waambilenga kwi Evwa kupichila mu mulolo. * Satana waipwizhe Evwa pa mukambizho wibapeele Lesa waambilenga pa kichi kimo. Mwamona byaambile Lesa kuba’mba byo bikafumamo umvwe kya kuba Adama ne Evwa baja ku kichi nyi?
Sofiya: Ee, amba bakafwa.
Malita: Mwaamba kine. Byambo bikwabo byaambile Satana byamwesheshenga amba Lesa wabepele. Monai byo aambile: “Kechi mukafwa ne.” Satana waambilenga amba Lesa wa bubela.
Sofiya: Kyo kimye kitanshi kumvwapo bino byambo.
Malita: Kimye Satana kyo aambile kuba’mba Lesa wa bubela, wakolomwene bintu byakebewenga kimye pa kuba’mba bipwe. Mwayuka o kyaikela bino nyi?
Sofiya: Uuu, kechi nayuka ne.
Malita: Kampe twambile mu jino jishinda. Twambe amba, juba jimo naiya kwi anweba ne kwimwambila amba nji na bulume kwimukila. Mwakonsha kuba byepi pa kuba’mba muswe?
Sofiya: Mwakonsha kubapo bimo.
Malita: Ee, mwafikilapotu. Kampe twakonsha kusala kintu kyanema ne kumona wakonsha kwikishikula. Kuba bino, kwakonsha kulengela kuyuka uji na bulume.
Sofiya: Naumvwa kishinka kyo mubena kwambapo.
Malita: Pano ibyepi mu jishinda jikwabo umvwe naamba’mba ne wakishinka kukila anweba? Kino kyakilamo ne kukatazha, ke ibyo nenyi?
Sofiya: Ee, ne amiwa byobyo nalanguluka.
Malita: Bukishinka kechi kintu kyo twafwainwa kwingijisha bulume pa kweseka muntu pa kuba’mba tuyuke amba uji nabo ne.
Sofiya: Ibyo, ee.
Malita: Kintu kyo twafwainwa kubatu pa kuba’mba tupwishe lukatazho ke kuleka papita kimye pa kuba’mba bantu bayuke wakishinka pe atweba bonse babiji.
Sofiya: Byo mwaamba byaumvwanyika.
Malita: Monai jikwabo pa jonka jishimikila jiji mu Ntendekelo. Nanchi Satana waambilenga amba uji na bulume kukila Lesa nyi?
Sofiya: Ine.
Malita: Kino inge kyamwesheshe amba Lesa wajinga wa bubela. Bino Satana aye waambile’mba wabukishinka kukila Lesa. Kiji nobe waambijilenga Evwa kuba’mba ‘Lesa ubena kubepa, bino amiwa mbena kwamba kine.’
Sofiya: Kyawama.
Malita: Lesa walangulukile kuba’mba pafwainwe kupita kimye pa kuba’mba luno lukatazho lupwe. Mu kuya kwa kimye, bantu inge bayukile waambile bukine ne wabepele.
MAMBO AKWABO AKOLOMWENE SATANA
Sofiya: Panyuma ya kuba Evwa wafwa, nanchi kino kyalumbulwilenga amba Lesa waambile kine nyi?
Malita: Twafwainwa kwamba’mba, waambile kine. Pano bino kwajinga bintu bikwabo mu bubela bwabepele Satana. Monai jikwabo mu kyepelo 5. Nanchi mwamona kintu kikwabo Satana kyo abuujile Evwa nyi?
Sofiya: Waambile amba umvwe waja ku kipangwa, meso enu akalaba.
Malita: Ee, ne kuba’mba “ukekala pamo nobe Lesa mwine ne kuyuka byawama ne byatama.” Ko kuba’mba Satana waambilenga amba Lesa utana bantu byawama.
Sofiya: Oo, nanchi.
Malita: Abuno nabo bwajinga bubela.
Sofiya: Pano mwatazha mwepi?
Malita: Kupichila mu bino byambo byanji, Satana waambilenga amba Evwa kumvwangakotu ne bantu bonse kuba’mba bafwainwa kwikala bulongo kwa kubula kwibalama kwi Lesa. Mu kino namo, Yehoba wayukile kuba’mba jishinda jawamatu ja kumwesheshamo amba byaambilenga Satana byajinga bya bubela, ke kumuswisha kuba byo akebelenga. Onkao mambo, Lesa waswisha Satana kulama ino ntanda pa kimye kicheche. Kino kitukwasha kuyuka ene mambo buyanji o bwavujila mambo Satana ye ubena kulama ino ntanda kechi Lesa ne. * Bino kuji bintu byawama.
Sofiya: Ñanyi bintu byonka byo?
Malita: Baibolo witubula bintu bibiji byawama byaamba pa bukine bwa Lesa. Kitanshi, Yehoba wituta muchima umvwe ke tuyande. Kyakumwenako, monai byambo bya Mfumu Davida byanembwa mu Masalamo 31:7. Davida wapichile bingi mu bya malwa mu bwikalo bwanji, pano monai byo aambile mu lulombelo kwi Lesa. Tangaipo mwane pa kino kyepelo.
Sofiya: Pa amba’mba: “Nkasekela ne kusangalala mu lusa lwenu; Mambo anweba mwamona kumanama kwami: Mwayuka byakatazha byamona muchima wami.”
Malita: Nangwa kya kuba Davida wapichile mu bya malwa, watekeneshiwe bingi pa kuyuka amba Yehoba wamwene byonse byo apichilemo. Nanchi kino kimutundaika, pa kuyuka kuba’mba Yehoba uyuka byonse ne byo twiumvwa umvwe ke tupite mu makatazho bintu byakonsha kubula kuba bantu nyi?
Sofiya: Ee, mwane. Kintundaika.
Malita: Kya bubiji, ke kya kuba’mba Lesa kechi ukaleka buyanji kutwajijila ne. Baibolo ufunjisha kuba’mba katatakatu akonaune bukalama bwatama bwa kwa Satana. Kabiji ukafumyapo bintu byonse byatama kumvwangakotu ne bintu byo mupitamo anweba ne bainenu. Abya mwafwainwa kutemwa kuba’mba nkeye mulungu ubena kwiya ne kwimumwesha ene mambo o twaketekela kuba’mba katatakatu Lesa akafumyepo buyanji nyi? *
Sofiya: Kijitu bulongo.
Nanchi kujipo mutwe umo wa mu Baibolo ye mwakankalwa kumvwisha nyi? Nanchi mukeba kuyuka mafunjisho nangwa byubiwa mu bupopweshi bwa ba Kamonyi ba kwa Yehoba nyi? Umvwe byobyo kiji, mwakasuluka kushikisha Kamonyi wa kwa Yehoba. Bakemukwasha kutana mikumbu.
^ par. 7 Monai mutwe wa kuba’mba “Kwisamba na Bantu—Nanchi Lesa uta Muchima pa Buyanji Bwetu Nyi?” mu magazini wa July 1, 2013. Mwakonsha ne kumutana pa www.pr418.com.
^ par. 17 Monai Isaya 63:9.
^ par. 26 Monai Lumwekesho 12:9.
^ par. 55 Monai Yoano 12:31; 1 Yoano 5:19.
^ par. 61 Umvwe mukeba kuyukilapo byavula, monai kitango 9, mu buku wa Nanchi Baibolo Kine Ufunjisha’mba Ka? wanembwa na Bakamonyi ba kwa Yehoba.
