Nanchi mwaketekela mu mulaye wa mu Baibolo wa lusanguko nyi? * Luketekelo lwa kumonañana na batemwe betu bafwa lwawama bingi. Nanchi luno luketekelo lwa kine nyi? Pa kuba’mba tukumbule buno bwipuzho, twayai twisambe pa batumwa ba kwa Yesu Kilishitu.

Batumwa baketekejile mu lusanguko lwa bafu. Mambo ka? Na mambo a bintu bibiji. Kitanshi, luketekelo lwabo lwaimenejile pa kino kishinka:Yesu wasangwilwe kufuma ku bafu. Batumwa ne “balongo kukila pa 500 pa kimye kimo” bamwene Yesu wasangukile. (1 Kolinda 15:6) Kunungapo, lusanguko lwa kwa Yesu lwayukanyikilwe ku bantu bavula byonka byaamba mabuku a Mambo Awama ana.—Mateo 27:62–28:20; Mako 16:1-8; Luka 24:1-53; Yoano 20:1–21:25.

Kya bubiji, batumwa bemwenejile kimye Yesu kyo asangwile bantu basatu, ku Naina, ku Kapenama ne ku Betani. (Luka 7:11-17; 8:49-56; Yoano 11:1-44) Lusanguko lwapeleleko lwaambiwapo kala mu uno magazini lwajinga lwa kisemi Yesu kyo atemenwa bingi. Twayai twisambe pa byamwekele.

“Kolojobe usakusanguka.” Yesu waambijile Mata wafwishishe mulongo wanji Lazalasa bino byambo saka papita ne moba ana. Mata patanshi kechi wayukile mwatazhizhe Yesu bino byambo ne. Bino wakumbwile amba “nayuka namba ukasanguka.” Nangwa byonkabyo, walangulukilenga amba kino kikobiwa kulutwe. Fwanyikizhai byo akuminye kimye kyo aumvwine Yesu wamwambila’mba “Amiwa yami lusanguko ne bumi,” wamwene Yesu byo asangwile mulongo wanji kufuma ku bafu!—Yoano 11:23-25.

Nanchi Lazalasa wajinga kwepi kimye kyo afwile pa moba ana? Lazalasa kechi waambilepo biji byonse byamwesheshenga amba wajinga mutuntulu ku mpunzha ikwabo pa oa moba ana ne. Lazalasa kechi wajinga na mweo ubula kufwa wayile mwiulu ne. Byo abushishe Lazalasa, Yesu kechi wamubwezhezhe kufuma mwiulu kwiya pano pa ntanda, ne kumulengela kubula kwiyowa mutende uji mwiulu pamo ne Lesa ne. Pano Lazalasa wajinga kwepi pa oa moba ana? Walaajile mu kilende.—Musapwishi 9:5, 10.

Vulukai kuba’mba Yesu waesakenye lufu ku kulaala kya kuba muntu wafwainwa kubukatu inge bamubuusha. Jishimikila jaamba’mba: “‘Lazalasa mulunda nami, walaala tulo, bino mbena kuya na kumubusha.’ Onkao mambo, baana banji ba bwanga  bamwambijile amba: ‘Nkambo, umvwe walaala tulo, ko kuba amba usakubukwa.’ Nangwa byonkabyo, Yesu waambilenga pa lufu lwa kwa Lazalasa. Bino abo balangulukilenga amba ubena kwamba pa kulaalatu tulo. Pa kyonkakya kimye, Yesu wibambijile patoka amba: ‘Lazalasa wafwa.’” (Yoano 11:11-14) Byo abushishe Lazalasa, Yesu wabwezhezhemo bumi jibiji ne kukwatankena pamo na kisemi kyanji jikwabo. Yesu waubijile kino kisemi kintu kyawama bingi!

Lusanguko lwaubile Yesu byo ajinga pano pa ntanda, lwamwesheshenga byo akoba kulutwe kimye kyo akekala Mfumu wa Bufumu bwa Lesa. * Kimye kyo akalamanga ino ntanda kufuma mwiulu, ukasangula bantu balaala mu tulo baji mu bilende. Kyokyo aambijile amba, “Amiwa yami lusanguko.” Langulukai pa byo mukekala na lusekelo kimye kyo mukamona batemwe benu basanguka! Kabiji akilangulukai pa bikeumvwa boba bakasangulwa!—Luka 8:56.

Yesu waambijile Mata amba: “Awa wangitabila, nangwa wafwa, ukasanguka. Kabiji yense uji na bumi ne kungitabila kechi ukafwa ne.” (Yoano 11:25, 26) Bantu Yesu bo akasangula mu bukalama bwanji bwa myaka kiumbi, bakekala na luketekelo lwa kwikala myaka ne myaka umvwe kya kuba batwajijila kwikala na lwitabilo mwi aye.

Panyuma ya kwamba bino byambo byaamba pa lusanguko, Yesu washikishe Mata bwipuzho bwa kulangulukapo bwa kuba’mba: “‘Nanchi waitabila kino nyi?’ Mata wamwambijile amba: ‘Ee, Nkambo; Amiwa naitabila kuba amba yenu Kilishitu Mwana Lesa.’” (Yoano 11:26, 27) Nga anweba kiji byepi? Nanchi mwakonsha kutemwa kwikala na lwitabilo lwajingapo ne Mata pa lusanguko nyi? Kintu kitanshi kyo mwafwainwa kuba, ke kufunda pa nkebelo ya Lesa ku bantu. (Yoano 17:3; 1 Timoti 2:4) Kuyuka bino, kwakonsha kwimulengela kwikala na lwitabilo. Mwakonsha kwipuzha Bakamonyi ba kwa Yehoba pa kuba’mba bemukwashe kuyuka bifunjisha Baibolo pa uno mutwe. Bakatemwa bingi kwisamba ne anweba pa luno luketekelo lwawama lwaamba pa lusanguko.