Lufu ke kintu kyo bashikwa bingi bantu. Bavula kechi bakeba ne kwambapotu ne. Bino nangwa twiluchiinepotu byepi, bonse tukafwa. Kabiji lumuna wa lufu uleta bingi bulanda.

Kafwako kyo twakonsha kuba inge twafwisha bansemi, benakwetu, nangwa mwana ne. Lufu lwiyatu kwa kubula ne kuketekela ne. Kechi twafwainwa kuchinuzhuka bulanda bwikalako panyuma ya lufu ne, kabiji bwatama bingi.

Antonio wafwishishe bashanji mu mapuso a pa mukwakwa, waambile’mba: “Kijitu nobe muntu wakiya ku nzubo yenu ne kusenda maki. Kino kyakonsha kulengela anweba kubula kubwela ku nzubo. Pano bino, mwayuka kyamweka kabiji kyokyo mubena kulangulukapo. Nangwa kya kuba mubena kukeba kulubako ku kino kintu kyatama, kishinka ke kya kuba amba kyamwekana kala.”

Ba Dorothy, nabo bafwishishe ba mwatawabo kimye kyo bajinga na myaka 47. Bakebelenga kuyuka kyalengejile. Nangwa kya kuba bafunjishanga baana bacheche kuba’mba bantu kechi bafwa ne, kechi bayukile byo kikala umvwe muntu wafwa ne. Baipwizhe basapwishi ba ku Chechi wa Anglican amba: “Kikala byepi umvwe muntu wafwa?” Bakumbwile amba: “Kafwako wayuka ne. Tupembelelengatu tukayuka kulutwe.”

Abya twafwainwa kupembelelangatu amba “tukayuka kulutwe” nyi? Nanchi kujipo bintu byakonsha kwitukwasha kuyuka umvwe lufu yo mpelo ya bantu bonse nangwa ne?