Nasemekejilwe mu nyaunda ya bantu babujile kunoka ya Bilbao ku kabeta ka ku buyeke ka Spain. Mu kisemi kyetu twajinga bana kabiji najinga wa bubiji. Kisemi kyami bajinga Bakatolika bene bene kabiji natanangwa kimye kyonse ku Kijiilo kya kwa Kilishitu. Byo nafikizhe myaka ya kusemwa 23, naikele mufunjishi, mwingilo ye natemenwe bingi kabiji na mwingijile pa myaka 40. Natemenwe kufunjisha mu kipwilo kya Bakatolika kabiji mabanga naingilanga nobe mufunjishi ko kuba’mba kufunjisha banyike babakazhi kuvuluka lufu lwa kwa Yesu.

Panyuma ya kwikala mu masongola pa myaka 12, mwinakwami wafwile kabiji nashajile na kulama baana babakazhi bana. Pa kyo kya kimye, najingatu na myaka 33. Nakebelenga kutana lutekenesho mu kipwilo kya Katolika, pano bino najinga na mepuzho avula bingi. Neipwizhenga namba: ‘Mambo ka bantu o bafwila umvwe kya kuba’mba Kilishitu witukujile? Mambo ka o tulombela kuba’mba Bufumu bwa Lesa bwiye inge kya kuba bantu bawama baya mwiulu?’ Ne kintu kikwabo kyo nalangulukangapo bingi ke kya kuba’mba: ‘Umvwe kya kuba’mba Lesa wituchibila mambo umvwe twafwa, pano mambo ka o twafwainwa kufumina mwiulu, ku mpunzha ya lumanamo nangwa mu mujilo wa helo na kwituchibila mambo japelako?’

Naipwizhenga ano mepuzho Bapulishiti bo nasambakenenga. Umo wakumbwile amba: “Kechi nayuka ne. Kepuzhe mukulumpe mu chechi. Mambo ka o waipwizha? Mambo ka o ubena kwipwizha ano mepuzho nobe kechi waitabila mwi Lesa ne? Lubakotu!” Bino natwajijile na kukeba mikumbu. Palutwe kacheche, natainwenga ku machechi a Pentekosita kwaambiwanga majashi na Bapulishiti ne Bantemwa maana ba bupopweshi. Bino kafwako wakumbwile mikumbu yo nakebelenga ne.

Byo nafikizhe myaka ya mu ma 60, mwana wa sukulu wa myaka ya kusemwa 7 wangichile amba nkatanwe ku kupwila kwa Bakamonyi ba kwa Yehoba. Naumvwine bingi bulongo pa bintu byo namwene ne byo naumvwine. Pano bino, na mambo a kutabankana na bya kuba mu bwikalo, kechi namonañenepo jikwabo na Bakamonyi pa kyo kya kimye ne. Byo papichile myaka ibiji, bamulume ne mukazhi Bakamonyi abo ba Juan ne Maite baishile pa nzubo.  Pa bañondo basatu, twisambanga bingi lufunjisho lwa mepuzho ne mikumbu alo lwalengejile kutendeka kufunda Baibolo.

Nakebelenga bingi kufunda. Napeselepesele bingi kwingijisha mitundu isatu ya ma Baibolo pa kuba’mba nshiinwe umvwe bintu bifunjisha Bakamonyi ba kwa Yehoba bya kine. Namwene kuba’mba bintu byo naitabijilemo pa myaka yavula kechi byajinga bya kine ne. Nakuminye bingi pa bintu byo naitabijilemo byo byapusene na byo nafunjilenga mu Baibolo. Kwesakana na bintu byo naitabijilemo, kyajingatu nobe kichi kyamena kyo babena kuzhula.

Bamwatawami ba bubiji bansongwele bakolelwe bingi ne kufwa. Pa kimye kimotu, nalekele nkito ne kufuma ku Bilbao pa kimye kicheche. Kabiji ba Juan ne ba Maite nabo bafumineko. Kyataminekotu, kechi natwajijile na kufunda Baibolo ne. Bino nashiinwe kuba’mba natana bukine. Kechi nalubilemo kino ne.

Pakupitapo myaka 20, byo nafikizhe myaka ya kusemwa 82, ba Juan ne ba Maite babwelele ku Bilbao kabiji baishile na kumfwakashisha. Nasangalele bingi pa kwibamona. Navulukile kuba’mba Yehoba kechi wandubileko ne, kabiji twatendekele kufunda Baibolo jibiji. Ba Juan ne ba Maite bafunjishanga bingi bulongo mambo nabwezhangapo kwibepuzha mepuzho antutu amo. Nakebelenga kutwajijila na kufunda pa kuba’mba ngumvwishe ne kuleka kulondela bintu byo naitabijilemo. Kabiji nakebelenga kufunda byavula pa kuba’mba ngyuke bya kulumbulula bukine bwa mu Baibolo ku bakwetu ne ba mu kisemi.

Byo nafikizhe myaka 87, nabatizhiwe kabiji jajinga juba ja lusekelo. Nabatizhiwe kimye kyo najinga ku kubuñana kwa Bakamonyi ba kwa Yehoba. Mukulumpe mu kipwilo waambile jashi ja Baibolo jatundaikile atweba bajinga pepi na kubatizhiwa. Jino jashi jandengejile kujila. Kyajinga nobe Yehoba waambilenga kwi amiwa kimye kyo nejitelekelenga. Panyuma ya kubatizhiwa, Bakamonyi bavula baishile ne kunsanchila nangwa kya kuba bamo kechi bangyukile ne.

Nayukile kuba’mba Yesu jo “jishinda.” (Yoano 14:6) Bino kufunda Baibolo kwankwashishe kuyuka Yehoba yenka waambilengapo Yesu. Pa kino kimye, ndomba kwi Lesa nobe Tata kabiji Mulunda ye natemwa. Kutanga  buku wa Fwenyai Kwipi ne Yehoba, * wankwashishe kupimpula bwikalo bwami. Patanshi, namutangile yense mu jubatu jimo. Byamfikile bingi pa muchima byo nafunjile kuba’mba Yehoba uji bingi na lusa.

Umvwe navuluka kimye kyo nakebelenga bukine, ndanguluka pa byambo bya kwa Yesu bya kuba’mba: “Lombainga, mukekitambula; kebainga, mukekitana; konkonshainga, bakemushinkwilako.” (Mateo 7:7) Byo natana mikumbu yo nakebelenga, kindetela bingi lusekelo pa kubulako bakwetu.

Nangwa kya kuba nji na myaka 90, bino ñumvwa kuba’mba kuji byavula byo nafwainwa kufunda pe Yehoba. Umvwe natanwa kukupwila pa Nzubo ya Bufumu, kikala kimye kyawama bingi na mambo a bintu byo mfunda ne kupwanañana na balongo ne banyenga. Mbena kutonga kukekala mufunjishi mu Paladisa pano pa ntanda. (Lumwekesho 21:3, 4) Kikatakata ntonga kumona batemwe bami bafwa byo bakasanguka ne kwikala na jishuko ja kwibafunjisha bukine bwa mu Baibolo. (Byubilo 24:15) Byo nkebeshapo kukebabula kya bupe kyanema kyampa Yehoba saka nakota ne kala!