Nasemekejilwe mu Riga, muzhi mukatampe mu kyalo kya Latvia. Amiwa ne nyenga yami betukomeshe ku bamama. Nangwa kya kuba Bamama ba Katolika, twayangatu ku chechi pa moba a kusekelela a bupopweshi. Kufumatu ne kala, naketekejile mwi Lesa, pano bino byo nakijinga mwanyike, natabakene na bintu bikwabo.

Byo nakomenenga, natemenwe kuzokaula bintu ne kwibisokankanya jibiji. Bamama byo bamwene bino, kechi bakebanga kunsha bunke pa nzubo ne. Bampeele kibokoshi mwajinga bintu byo nafwainwe kuzokaula ne kwibisokankanya jibiji kabiji naumvwanga bingi bulongo kuba bino. Kwajinga ne kisela kikwabo kyo natemenwe kya kwendesha tupulututu. Bamama bannembeshe mu kisela kya kwikyombesha na tupulututu twa tucheche kyatelwanga amba Zelta Mopēds (The Golden Moped). Natendekele kwikyombesha kwingijisha kapulututu ka kukyofwa nobe nkinga kabiji mu kuya kwa moba natendekele kwingijisha tupulututu.

Nafunjile bingi bukiji kwendesha ne kwikala sendwe mu kino kisela kibika bumi mu kizumba. Pa bimye bisatu, natambwile bilambu na mambo a kwikala mutanshi pa bonse bajinga mu kwikyombesha kwa tupulututu mu kyalo kya Latvia, kabiji pa bimye bikwabo bibiji najinga mutanshi mu kwikyombesha na tupulututu kwa byalo kutelwa’mba Baltic States Superbike.

Kimye kyo najinga sendwe mu kwikyombesha na tupulututu, mukambwe wami aye Evija (luno mukazhami) watendekele kwisamba na Bakamonyi ba kwa Yehoba. Wataine mabuku a Bakamonyi ba kwa Yehoba ajinga na ka kupashi ka kulombelapo lufunjisho lwa Baibolo. Wanembele jizhina janji pa ka kupashi ne kwikatuma ku keyala wabo. Mu kimye kichechetu, Bakamonyi ba kwa Yehoba babiji bamufwakashijile, kabiji batendekele kumufunjisha Baibolo. Namuswishishe kufunda nabo, nangwa kya kuba’mba pa kyo kya kimye kechi nateleko muchima ku bya bupopweshi ne.

Mu kupita kwa kimye, bano Bakamonyi bañambijile kutanwako kimye kyo babena kufunda Baibolo ne Evija. Natanwangako,  kabiji natemenwe bingi kumvwa byo bamfunjishenga. Kintu kyamfikile pa muchima ke mulaye wa paladisa wanembwa mu Baibolo. Kyakumwenako, bambujile kutanga byambo biji pa Salamo 37:10, 11, byaamba’mba: “Bino pakishala pacheche ne babi bakekala ke kafwako: Ee kine, obewa ukatajishanga pantu panji kabiji aye ukekala ke kafwapo. Pakuba bakimote bakaswana ntanda. Kabiji bakasangalela mu kuvula kwa mutende.” Uno mulaye wamfikile pa muchima bingi.

Natwajijile kufunda byambo bya Lesa. Nayukile bubela buji mu bupopweshi byo bwavula ne mafunde a Baibolo ke a kine kabiji kechi akatazha kumvwa ne.

Byo natwajijile kufunda Baibolo, nayukile kuba’mba Yehoba wanemeka bingi bumi. (Salamo 36:9) Kino kyandengejile kulangulukapo bingi pa kwi kyombesha na tupulututu, mambo kechi nakebelenga kubika bumi bwami mu kizumba ne. Nakebelenga kwingijila Yehoba ne kupana lukumo kwi aye. Na mambo a bino, kuya nkuwa ne kisangajimbwe kya kwikyombesha na tupulututu kechi byanemene kwi amiwa ne.

Mu 1996, nashinkilwe ku kukonkana kwa byalo kwa Bakamonyi ba kwa Yehoba mu muzhi wa Tallinn, mu Estonia, kabiji kechi palepeshetu na kibanza mo twakayilanga na tupulututu ne. Pa kuno kukonkana, namwene bantu bafumine ku byalo byapusana pusana bapwila pamo saka babena kumvwañana. Kya kumwenako, kimye Kamonyi umo kyo aelele ka kyola ka mali, nalangulukilenga amba kyapwa kaeleka. Kechi papichile ne kimye ne, Kamonyi umo watolele kano ka kyola ne kubwezha kwa kubula kufumyamo nangwa kimo ne. Nakuminye bingi pa kumona bino! Luno nayuka namba Bakamonyi balondela bingi mikambizho yanembwa mu Baibolo. Amiwa ne Evija twatwajijile na kufunda Baibolo, kufikatu ne mu mwaka wa 1997, po twabatizhiwe ne kwikala ke Bakamonyi ba kwa Yehoba.

Balunda nami bavula bafwa na mambo a kino kisela kya kwikyombesha na tupulututu kibika bumi mu kizumba. Mu kufunda Baibolo, nayukile kuba’mba nji na mutembo wa kwingijila Upana bumi, aye Yehoba. Kuyuka bino, kwalengela kutwajijila kwikala na bumi.

Amiwa ne Evija twaingila myaka ina mu mwingilo wa kimye kyonse pa ofweshi wa musampi wa Bakamonyi ba kwa Yehoba uji mu muzhi wa Riga. Pa kino kimye, tubena kufunjisha mwanetu wamukazhi Alise kukosesha bulunda bwanji ne Yehoba. Juba jimo mu mulungu, ngya na kulungisha myotoka ne bintu bikwabo byafwa pa ofweshi wa ba ntuntuluzhi. Nji bingi na lusekelo pa kwingijisha bulongo mingilo yo nafunjile ku bwanyike. Ibyo, ne luno natwajijila kuzokaula bintu ne kwibisokankanya jibiji.

Na mambo a bintu byo nafunda mu Baibolo, amiwa ne kisemi kyami twanemeka bingi mwingilo wa kusapwila pe Lesa yenka wa kine. Kwambatu kine, mulaye wa kuba’mba paladisa ukekala pano pa ntanda, wapimpwile bwikalo bwami!