Nanchi Mwayuka Nyi?

JIZHAI

Nanchi Mwayuka Nyi?

Maalo o baingijishanga mu moba anembejilwemo Baibolo o a ka?

Maalo afumanga ku kichi kya Agarwood

Baibolo waamba kuba’mba maalo beengijishanga kusansa binunka bulongo ku bivwalo ne pa mwanya. (Salamo 45:8; Byambo bya Mana 7:17; Lwimbo wa Solomone 4:14) Maalo ajingako kala kampe afumanga ku kichi kya Agarwood. Kino kichi inge kyaikala ke kivungula, ko kwafumanga manyi. Umvwe batwa kino kivungula, kwafumanga byauba nobe bunga, byo bapoteshanga amba “maalo.”

Baibolo waesakanya matente a Isalela ku “bichi bya maalo byo ajimba Yehoba.” (Kubala 24:5, 6) Ano ajinga nobe kichi kya Agarwood, kyalepa kufika ku mamita 30 kabiji kitabila munsa munsa. Nangwa kino kichi kifwamo mu Isalela lelo jino, buku wa kuba’mba A Dictionary of the Bible waamba’mba, “kechi twakonsha kukana kishinka kya kuba’mba bino bichi ne bikwabotu byo babula kuyuka pa kino kimye [mu ino mpunzha] byajingako kala mu kimpachiko kya Yodano kyaile bingi nkuwa kabiji mwaikalanga ba binemanga.”

Ñanyi mutundu wa milambo yafwainwe kupanwa mu nzubo ya Lesa mu Yelusalema?

Kano kayukilo ka buchimba kajinga mu nzubo ya lesa mu Yelusalema kaikala myaka nobe 2000

Mizhilo ya Lesa yaambile amba milambo yonse yafwainwa kupanwa ku nzubo ya Lesa kechi yafwainwe kwikala na bulema ne. Lesa kechi wakebanga milambo yalemana ne. (Kulupuka 23:19; Bena Levi 22:21-24) Kwesakana na nembi Muyudea wa mu kitota kya myaka kitanshi, aye Philo, wanembele amba bañanga bapesapesanga banyama ba kupana milambo “kufuma ku mutwe kufika ne ku maulu” pa kuba’mba bamone amba bajinga bulongo kabiji kechi “baji na bulema bwa mutundu yense ne.”

Shayuka aye E. P. Sanders waambile amba kampe bañanga ba mu nzubo ya Lesa “baswishangatu aba bapoteshanga banyama ne bañonyi kupoteshatu bo bapesapesa kala. Mu jino jishinda, ubena kupotesha wafwainwa kupa ubena kupota kayukilo ka kumwesha kuba’mba uno nyama nangwa ñonyi ye apota kechi uji na bulema buji bonse ne.”

Mu mwaka wa 2011, bapoyapoya bya kupoyapoya bataine kano kayukilo pa mpunzha ponka pajinga nzubo ya Lesa, kaji nobe mali a muwayawaya kalengwa na buchimba ko baingijishanga mu kitota kya myaka kitanshi B.C.E. kufika mu 70 C.E. Byambo bijipo mu Kialamaiki byatuntululwa amba “Kyatoka Kipanwe kwi Lesa.” Kyamweka nobe bañanga bakasanga tuno tuyukilo ku bintu byo baingijishanga mu bya bupopweshi nangwa ku banyama ba milambo.