MUTUMWA Paulo wanembejile bino byambo bena Kilishitu bajinga mu Loma mu mwaka wa 56 C.E. Baibolo kechi waambapo umvwe kya kuba Paulo wayile ku Sipaina nangwa ne. Bino Mambo a Lesa afikile mu Sipaina mu kitota kya bubiji C.E kupichila mwi Paulo ne bamishonale bakwabo.

Kechi papichile ne kimye ne, bena Kilishitu batendekele kuvula mu Sipaina. Kino kyalengejile kutendeka kutuntulula Baibolo mu mulaka wa Kilatini. Mu kitota kya myaka kya bubiji, kyalo kya Sipaina kyalamwanga na bena Loma kabiji mulaka wa Kilatini ye baambanga mu bufumu bonse bwa bena Loma.

Bena Kilishitu bena Sipaina batanshi batuntulwile Mabaibolo a mu Kilatini atelwa amba Vetus Latina Hispana. Ano Mabaibolo asampene mu Sipaina pa myaka yavula Jerome saka akyangye kupwisha Baibolo wa mu Kilatini utelwa’mba Vulgate ku ntendekelo ya kitota kya myaka kya butanu C.E.

Baibolo watuntulwile Jerome, ye apwishishe mu Betelema, Pelisitina wafikiletu mu Sipaina mu kimyetu kicheche. Kimye Lucinius wajinga munonshi kabiji watanganga Baibolo byo ayukile kuba’mba Jerome watuntulwilenga Baibolo wa mu Kilatini, wakebelenga kwikalako na uno Baibolo. Watumine banembeshi batanu na umo ku Betelema na kukopololako uno Baibolo ne kutwala ku Sipaina. Pa kupitapo myaka yavula, Baibolo wa Vulgate wapingizhiwe pa wa Vetus Latina Hispana. Kutuntulula Baibolo wa mu Kilatini wakwashishe bantu ba mu Sipaina kutanga Baibolo ne kumumvwisha. Pano bino, kimye Bufumu bwa Loma kyo bwalekele kulama, kwaishile milaka ikwabo.

Mu kitota kya myaka kya butanu, mulaka wa Visigoth ne milaka ikwabo ya kina German yaishile mu Sipaina, kabiji mulaka wa wakatataka utelwa amba, Gothic batendekele ku mwamba mu Peninsula. Bano batendekele uno mulaka baitabijile mu bwina Kilishitu butelwa’mba Arianism, bwakananga lufunjisho lwa Balesa Basatu. Baishile na Binembelo byo batuntulula byo batelanga’mba Uifilas nangwa amba Baibolo wa bena Gothic. Uno Baibolo bamwingijishe mu Sipaina kufikatu ne mu kitota kya bu 6, kimye mfumu wa bena Visigothic aye Reccared kyo aikajile ke Katolika ne kukana bwina Kilishitu bwatelwanga amba Arianism. Waonawine mabuku onse aambanga pa luno lufunjisho, kubikapotu ne Baibolo wa Ulfilas. Kino kyalengejile binembelo byonse bya mu Gothic kuzhimañana mu Sipaina.

Bino Mambo a Lesa atwajijile kusampana mu Sipaina pa kikye kimye. Kechi baambangatu mulaka wa Gothic ne, bino kwajinga ne mulaka wa Kilatini waambanga bantu bavula mu Sipaina, amo mwafumine milaka ya kina Loma yambiwa mu Iberian Peninsula. * Mabuku a kala mu mulaka wa Kilatini atelwa amba Byanembwa pa mabwe mu mulaka wa  Visigoth, na mambo a kuba’mba byanembelwe pa mabwe. Byanembelwe mu kitota kya myaka kya bu 6 ne 7, kabiji muji mashimikila amo afuma mu buku wa Masalamo ne mabuku a Mambo Awama. Pa jibwe jimo, paji jishimikila jonse ja Salamo 16.

Kunembwa kwa bino Binembelo pa mabwe kumwesha kuba’mba bantu batanganga ne kukopolola Mambo a Lesa pa kyokya kimye. Bafunjishi baingijishanga bino Binembelo bya mu Baibolo kufunjishishamo banyike bafundanga kutanga ne kunemba. Kupusanako na biseba byapotwanga na mali avula byaingijishanga ba bupopweshi kunembapo Baibolo, mabwe kechi afwanga mali avula ne.

Baibolo umo wa uno mutundu bamulamina mu chechi wa San Isidoro uji mu muzhi wa León, mu Sipaina. Uno Baibolo wa mu mwaka wa 960 C.E., kabiji uji na mapa 516, aji masentimita 47 mu bula, masentimita 34 mu bwipi kabiji wanema makilogalamu 18. Mukwabo uji mu Butala bwa Mabuku bwa ku Vatican utelwa amba Baibolo wa ku Ripoll, wanembelwe mu mwaka wa 1020 C.E. Uno Baibolo ke umo pa ma Baibolo a kala uji na bipikichala byawama bulongo. Pa kulenga bino bipikichala, ulenga kampe wazhikishe juba na kulengatu kisopelo kimo nangwa mulungu yense na kulengatu byambo biji pa nkupiko ya peulu. Nangwa kya kuba ano ma Baibolo amwekanga bulongo, kechi akwashishe bantu kuyuka Mambo a Lesa ne.

Kitota kya myaka kya butanu na busatu byo kyafikile, mu Sipaina mwaishile mulaka mukwabo mambo Bamozilemu balukukile jikuji. Mu mapunzha alamwanga na ba Mozilemu, bantu bavula baambanga mulaka wa ku Alabya kukila Kilatini. Onkao mambo, bakebelenga Baibolo mu mulaka wa Alabya.

Mabaibolo a mu mulaka wa Alabya, kikatakata mabuku a Mambo Awama, akumbene mu Sipaina. Mu kitota kya myaka kya bu 8 bishopu aye John wa ku Seville, watuntulwile Baibolo yense mu mulaka wa Alabya. Kyatamakotu ke kya kuba’mba ano mabuku a mu Kialabya afwako. Buku umo watuntulwilwe mu Kialabya mu kitota kya myaka kya bu 10 wa Mambo Awama, bamulamina mu León, Sipaina.

Mu ma 500 A.D. – 1500 A.D, mulaka wa Castilian, nangwa Kisipanishi, watendekele kufika mu Iberian Peninsula. Uno mulaka ye basampenyejilengamo Mambo a Lesa. * Baibolo wa mu Kisipanishi mutanshi wajinga mu buku wa kuba’mba, La Fazienda de Ultra Mar (Byubilo Kufuma ku Bushiya bwa Tulunga), wa ku ntendekelo ya kitota kya myaka kya bu 13. Uno buku muji ne jishimikila jaamba pa lwendo lwa bena Isalela, kabiji muji ne mashimikila afuma mu Pentatuke ne mabuku akwabo a mu Binembelo bya Kihebelu pamo ne Mambo Awama ne makalata o banembejile bena Kilishitu.

Uno Baibolo bantangi ba mu machechi kechi bamutemenwe ne. Mu 1234, Kije kya Tarragona, kyapaine muzhilo wa kuba’mba ma Baibolo onse a mu milaka yamba bantu bakonkako bafwainwa kwiapana ku bantangi ba bupopweshi kuba’mba beasoke. Kyawamakotu, uno muzhilo kechi walengejile kwikileka kutuntulula ma Baibolo akwabo ne. Mfumu Alfonso X (1252-1284), ye batela kuba’mba ye wajinga muntu mutanshi kunemba mulaka wa Kisipanishi, wakebelenga kabiji watundaikilenga kuba’mba Binembelo bituntululwe mu mulaka wakatataka. Ma Baibolo o batuntulwilenga pa kikye kimye pajinga ne Baibolo ye batela kuba’mba Pre-Alfonsine ne Baibolo wa Alfonsine ye batuntulwile panyuma wabayijilepo mu mulaka wa Kisipanishi pa kyokya kimye.

Ano Mabaibolo onse abiji alengejile mulaka wakatataka wa Kisipanishi kukoma. Shayuka aye Thomas Montgomery waambile pa uno Baibolo wa Pre-Alfonsine amba: “Uno Baibolo baingijishe mulaka wapela kumvwa bantu babula kuyuka mulaka wa Kilatini.”

Ano Mabaibolo atanshi a mu mulaka wa Kisipanishi, atuntulwilwe kufuma mu mulaka wa Latin Vulgate kechi mu mulaka mutanshi ne. Kutendeka mu kitota kya myaka kya bu 14, bashayuka Bayudea batuntulwile Mabuku a mu Kihebelu mu Kisipanishi kufuma mu Kihebelu. Pa kikye kimye, mu Sipaini mo mwajinga Bayudea bavula ba mu Europe, kabiji batuntuluzhi Bayudea bajinga na mabuku a mu mulaka wa Kihebelu avula a kwibakwasha kutuntulula. *

Umo pa ano Baibolo ke ye batela amba Alba, bamupwishishe mu kitota kya bu 15. Kinemanga umo mwina Sipaini aye Luis de Guzmán waambijile Rabbi Moisés Arragel kutuntulula Baibolo mu castizo ko kuba’mba mulaka mwine wa Kisipanishi. Wambile pa bintu bibiji byalengejile kutuntulula uno Baibolo. Kitanshi waambile’mba: “Mabaibolo aji mu milaka yafuma mu Kilatini kechi beanemba bulongo ne,” ne kya bubiji, amba, “Atweba tukeba Baibolo uji na tubyambo tukwabo twalumbulula biji mu jishimikila byo twabula kumvwa ne.” Bino byambo byo aambile bimwesha kuba’mba bantu bajingako mu moba anji batemenwe kutanga ne kukeba kumvwisha biji mu Baibolo. Kabiji bimwesha ne kuba’mba binembelo byajinga mu milaka yamba bantu yasampene mu Sipaina.

Bantuntuluzhi baingijile mwingilo wanema wa  kukopolola ne kulengela bantu bafunda mu Sipaina kutanga Baibolo mu mulaka wabo kwa kubula lukatazho. Kyafuminemo, Shayuka wabya mpito aye Juan Orts González waambile’mba “Luther saka akyangye kusemwa ne, bantu ba mu Sipaina bayukile Baibolo kukila bena Germany nangwa bena England.”

Ku kupwa kwa myaka kitota kya bu 15, muzhilo wa bena Sipaina wakainye kutuntulula ne kwikala na Binembelo mu mulaka uji yense. Bakainye kwikala na Baibolo mu Sipaina pa myaka yavula. Papichile myaka bitota bisatu pa kuba’mba baswishe kwikala na Baibolo. Kimye kyo kwajinga uno muzhilo, bantuntuluzhi babujile moyo balupwile Mabaibolo mu Kisipanishi ne kwiatwala mu Sipaina. *

Kunembwa kwa Baibolo mu Sipaina byonka byaamba jishimikila, kumwesha bansatuki byo baesekele kukanya Mambo a Lesa kwingijisha mashinda avula. Nangwa byonkabyo, bakankelwe kuzhindamika Byambo bya Lesa.—Salamo 83:1; 94:20.

Kwingila na mukoyo kwa bashayuka kwalengejile Baibolo kunembwa ne kusampanyiwa mu Sipaina. Bantuntuluzhi ba mu ano moba babena kulondela byonka byatuntulwile bantuntuluzhi binembelo mu milaka ya Kilatini, Gothic, Alabya ne Kisipanishi. Kyafuminemo, bantu bavula lelo jino bamba Kisipanishi batanga Mambo a Lesa mu mulaka ye bomvwa bulongo.