Byo najinga mwanyike, mvuluka lusekelo lo najinga nalo saka nkikala mu kyalo kya France ku kabeta ka ku bulenge mwaikalanga ba mama. Batata bampangijile kampelwa kabiji naumvwanga bulongo kukaila mu mashamba. Mu 1966, Bakamonyi ba kwa Yehoba betufwakashijile ne kwisamba na batata pa kimye kyabaya. Byo papichile bañondo batanu na babiji, bafukwilepo kwikala Kamonyi. Bamama nabo baikele ke Bakamonyi kabiji bankomeshe bingi bulongo.

Natendekele kubela panyumatu ya kubwela ku Spain kwafumine bansemi bami. Natendekele kumvwa misongo mu maboko ne mu tupokoso. Panyuma ya myaka ibiji ya kumonañana na badokotala bapusana pusana, twataine dokotala utala pa kikola kya mu bikupa ne mu mishipashipa waambile’mba “Inge mwaishile kala.” Bamama batendekele kujila. Byo najinga mu kibamba mwatalala naumvwine saka bamba pa “kikola kipaya maselo mu mubiji kibula kupwa” ne “kikola kya Juvenile polyarthritis.” * Nangwa kya kuba najinga na myaka jikumi, nayukile kuba’mba bintu byaya munsunya.

Badokotala baambile amba nafwainwa kuya ku kipatela ko balamina banyike baji na bikola bibula kupwa. Byo nafikile, naumvwine bingi moyo pa kumona kishimikwa. Pajinga mizhilo yakatazha bingi. Ba shishita ba mu Katolika bantendele nsuki ne kumvwika bivwalo byakala. Byo nalangulukilenga pa bwikalo byo bukekala, mipolo yayengelejile.

Na mambo a kuba bansemi bamfunjishe kwingijila Yehoba, nakaine kwivwanga mu bisho bya Kikatolika byajinga mu kipatela mo balamina banyike baji na bikola bibula kupwa. Bashishita ba mu Katolika kibakatezhe kuyuka kyo na kainyijile. Nalombele kwi Yehoba kuba’mba ankwashe, kabiji wanzhikijile byonka byubatu nsemi wamulume wa butemwe.

Bansemi bebaswishishe kwiya na kumonanga pa Bibelushi pa kimye kicheche. Bandetelanga mabuku alumbulula Baibolo a kutanga pa kuba’mba lwitabilo lwami lutwajijile kwikala lwakosa. Javula banyike kechi bebaswishanga kwikala na mabuku ne. Bino  amiwa banswishishe kwikala na mabuku alumbulula Baibolo ne Baibolo ye natanganga kimye kyonse. Naambanga na bansongwakazhi pa luketekelo lwa kwikala myaka ne myaka mu Paladisa pano pa ntanda mukekalanga bantu bakabulanga kukolwa. (Lumwekesho 21:3, 4) Nangwa kya kuba najinga na bulanda ne kumvwa mukose, najinga na lusekelo pa kuyuka kuba’mba luketekelo lwami mwi Yehoba lwayilenga na kukomenako.

Panyuma ya kupitapo bañondo batanu na umo, badokotala bambujile amba mbwele ku nzubo. Kikola kyami kechi kyapwile ne. Bino naumvwine bulongo pa kubwela na kwikala na bansemi. Kikola kyandengejile kulemana kabiji naumvwinenga bingi misongo mu manungi. Myaka yami ya bukamwale yajingatu ya kukolwa. Byo nafikizhe myaka 14, nabatizhiwe ne kukebesha kwingijila Yehoba papelela bulume bwami. Pano bino, kimye kimo nalefwilwe. Nalombele kwi Yehoba amba “Mambo ka o mwandekela na kino kikola? Nkwashai kuba’mba nkose. Nanchi kechi mubena kumona byo mbena kumanama nenyi?”

Myaka yami ya bukamwale yakatezhe bingi. Nayukile kuba’mba kechi nkakosa ne. Kyankolanga bingi ku muchima pa kumona bakwetu byo bajinga na butuntulu bwa mubiji bwawama. Namonanga kuba’mba bantu kechi banta muchima ne kabiji najinga na bumvu ne kwizhindaminatu. Bino kisemi kyami ne bakwetu bankwashanga bingi. Mvuluka bingi ba Alicia balunda nami bankilako na myaka 20. Bankwashishe kulubako ku kikola kyami ne kulenga bulunda na bantu kukila kulangulukangatu pa makatazho ami.

Byo najinga na myaka 18, kikola kyakijilemo kya kuba kutanwa ku kupwila kwankokeshanga bingi. Inge kafwako kyo mbena kuba ne, natangangatu Baibolo. Buku wa Yoba ne wa Masalamo, ankwashishe bingi kuyuka kuba’mba pa kino kimye Yehoba Lesa wituta muchima kikatakata ku mupashi kukila ku mubiji. Kulomba kikupu kwandengejile kwikala na “bulume bwakila bwa bantu” ne “mutende wa Lesa wakila milanguluko ya bantu.”—2 Kolinda 4:7; Filipai 4:6, 7.

Byo nafikizhe myaka 22, natendekele kwendelatu mu kakinga. Nachiine kuba’mba bantu bakaleka kummona ne kumonangakotu kakinga muji mwanamukazhi wakolwa. Kwendela pa ka nkinga ka bilema kwandengejile kukasuluka kabiji mwafumine bintu byawama bingi. Mulunda nami aye Isabel wañambijile amba, nebikile kikonkwanyi kya kwingila maola 60 mu mwingilo wa kusapwila pa ñondo umo.

Patanshi, namwenenga kuba’mba kyakatazha bingi. Bino nalombele Yehoba kuba’mba ankwashe kabiji ba mu kisemi ne balunda bantundaikile bingi kabiji nakonsheshe. Uno ñondo wapwile bukiji kabiji kechi nayukile ne moyo byo apwile ne. Naingijile bingi bulongo kabiji mu 1996 nafuukwilepo kutendeka mwingilo wa bupainiya, ko kuba’mba kwingila maola atongolwa pa ñondo pa ñondo mu mwingilo. Nafuukwilepo kintu kyawama mambo nafwenyenye kwipi ne Lesa ne kukosesha mubiji wami. Kwingilako mu mwingilo kwalengejile kubulako bantu bintu byo naitabilamo ne kulengela bamo kwikala balunda na Lesa.

Mu kimye kya kisalo mu 2001, nachimukile maulu na mambo a mapuso a pa mukwakwa. Byo najinga mu misongo ikatampe pa mwanya mu kipatela, nalombele pa bunke kuba’mba: “Yehoba, kunsha ne!” Mwanamukazhi wajinga pa mwanya walondejilepo washikishe kuba’mba, “Nanchi mwiba Kamonyi ba kwa Yehoba nyi?” Kechi najinga na bulume bwa kukumbula ne bino naitabiletu na mutwe. Wambile’mba, “Ne muyuka anweba bantu! Javula ntanga bingi magazini enu.” Bino byambo byantekeneshe bingi. Nangwa najinga mu misongo ikatampe nasapwijile pe Yehoba. Kino kyaletele munema kwi Aye.

Inge naumvwako bulongo, nasapwilangako. Bamama bañendeshanga pa kakinga mwaya kipatela, maulu ami saka kuji kitute. Jonse, twayanga na kupempula balwazhi bamo, ne kwibepuzha byo babuka, ne kwibashilako mabuku alumbulula Baibolo amo. Luno lupempu lwankokeshanga bingi, bino Yehoba wampeele bulume bwa kuba bino.

 Pa myaka icheche yapitapo, misongo ya bailako kabiji lufu lwa batata lwandengejile bulanda bingi. Pano bino, natwajijila kwikala wakosa. Mu ñanyi jishinda? Javula natemwa kutanwa na balunda nami ne balongo kabiji kinkwasha kubula kulanguluka pa lukatazho lo nji nalo. Kabiji inge nji bunke, ntanga, ne kufunda Baibolo nangwa kusapwila pa foni.

Kabiji kuji ne bintu bikwabo byo natemenwe bingi nabiji kumvwako kamwela kawama kabena kupepemuka ne bwema bwawama bwafumanga ku maluba. Bino byandengelanga kumusanchila Yehoba. Kwikala na milanguluko yawama nako kunkwasha kwikala bulongo. Juba jimo najinga na mulunda nami mu busapwishi saka a bena kushinjika kakinga ko naendelangapo, waimene na kunembapo bimo. Ponkapo kakinga ka kunkulukile ne kuya na kwipaka ku motoka waimene. Bonse babiji twakankamenetu, bino byo twamwene kuba’mba kechi nekozha ne, twasekele bingi.

Kuji bintu byavula byo nakankalwa kuba. Ne bitela amba bintu byo nkeba kuba. Javula nzhinzhibala ne kwimona saka nji mu ntanda ipya yalaya Lesa. (2 Petelo 3:13) Ne mmona saka nji na butuntulu bwa mubiji bwawama, mbena kwenda, ne kwiyowa bumi bwawama. Ndanguluka pa byambo bya Mfumu Davida bya kuba’mba: “Pembelai Yehoba: Kosai, ne muchima wenu achinchike.” (Salamo 27:14) Nangwa mubiji ubena kuya na kukoka, Yehoba umpa bulume. Natwajijila kwikala wa bulume bino saka nakoka.