Mu mwaka wa 33 C.E, Yesu wafwile, kabiji wasangwilwe ne kuya mwiulu. Byo papichile kimye, Yesu bamupele Bufumu. (Danyela 7:13, 14) Kulutwe, Yesu byo aji Mfumu, ukaleta mutende pano pa ntanda ne kufumyapo buyanji.—Tangai Salamo 72:7, 8, 13.

Yesu ukoba bintu byawama bingi kimye kyo akalamanga bantu. Ukengijisha ngovu yamupa Shanji pa kubwezha bantu ku bulumbuluke. Bantu bonse bakeyowa bwikalo bwawama pano pa ntanda kabiji kechi bakakotanga ne kufwa ne.—Tangai Yoano 5:26-29; 1 Kolinda 15:25, 26.

Pa kino kimye Yesu ubena kutangijila mwingilo wa kusapwila ntanda yonse ubena kwingila baana banji ba bwanga bakishinka lelo jino. Bafwakesha bantu na kwibabula byaamba Baibolo pa Bufumu bwa Lesa. Yesu waambile’mba ukakwashanga baana banji ba bwanga mu uno mwingilo wabo kufikatu ne kimye Bufumu bwa Lesa kyo bukafumyapo makafulumende a bantu.—Tangai Mateo 24:14; 28:19, 20.

Kupichila mu kipwilo kya bena Kilishitu bakine, Yesu ubena kutangijila bantu mu jishinda jawama ja ku bumi. Ukatwajijila na kwibazhikijila mu kimye kya lonaiko lwa buno bwikalo bujipo ne kwibatwezha mu ntanda ipya yalaya Lesa.—Tangai 2 Petelo 3:7, 13; Lumwekesho 7:17.